Atʋloa 143 - Chahta Holisso Holitopa 1886

Atʋloa Lewi ʋt ikbi tok.

¹ Chihowa ma, ʋm ʋnnumpah ilbʋssha ya̱ ish haklashke; nan asi̱hi̱lhha li ka̱ is sa̱ hʋponaklashke: chim aia̱hlika, nan isht chim ai ʋlhpiesa aiena hatuk pullah mak o̱ is sʋ haiyaklashke.

² Yohmi kʋt kʋna hosh okcha̱yʋt a̱ha̱tta kʋt chi tikba ya̱ ai ʋlhpiesa hosh hikkia he keyu hoka̱, chi̱ tishu ha̱ na̱ chik im apeso kashke.

³ Tʋnʋp ʋt ʋmish shilombish a̱ hliohlit, ʋm ilhfiopak a̱ akka ʋleshulit kanchit, illi tok hupaki chomihchit aiokhlileka sʋ benilechi hoka̱.

⁴ Yohmi hatuk o̱ ʋmish shilombish ʋt im okhlilit kʋnnia hoke; sʋ chu̱kʋsh si anukfoiyukka kʋt chukkillissa hoke.

⁵ Nittak tikba yʋttok a̱ ithaiyana lishke; nanah ish kʋnio̱ho̱mi tok moma ka̱ anukfilli lishke; chibbak toksa̱ha̱lí tok a̱ anukfi̱hi̱lli li hoke.

⁶ Sʋbbak a̱ pit isht chim ʋshʋttapa lishke; ʋmish shilombish ʋt yakni yosh oka bʋnna kak o̱ chiyuhmi hosh chi hoyo hoke. [Yukopa.

⁷ Chihowa ma, ʋmish shilombish ʋt tahʋt kʋnnia hoka̱, tu̱shpʋt is sʋ haklashke; chi nʋsshuka ya̱ is sa̱ luhmi na, yakni kula ona ʋhleha hak o̱ chohmi lin náh.

⁸ Onnahinlikma̱ chim isht i̱ hullo ya̱ is sʋ haklochashke; chishno ak o̱ chi anukchieto li hoka̱: hina atia la he ʋlhpesa ka̱ is sʋthʋnanchashke; ʋmish shilombish a̱ chishno ak o̱ pit chi̱ tʋkaliche li hoka̱.

⁹ A̱ tʋnʋp a̱ im eshit is sʋ kohchichashke, Chihowa ma; chishno ak o̱ ont chi a luma li hoka̱.

¹⁰ A̱ Chitokaka chia hokʋt, nanah ish ai ahni kak o̱ yʋmihchi la chi̱ ka̱, is sʋm abʋchashke: chimish shilombish ʋt achukma hokʋt, yakni ittilawwih achukma kak o̱ a sʋsht a̱yashke.

¹¹ Chi hohchifoh pulla hatuk mak o̱ is si okchalinchashke, Chihowa ma; chi ai ʋlhpiesa kak osh ʋmish shilombish a̱ ai ilbʋssha is si a kohchichashke.

¹² Micha isht ish i̱ hullo pulla kak osh a̱ tʋnʋp ʋhleha ha̱ ish musholichashke, micha ʋmish shilombish a̱ ilbʋsshali moma ka̱ isht ish kanchashke; chi̱ tishuh sia hoka̱.