Atʋloa 137 - Chahta Holisso Holitopa 1886

¹ Babilon okhina puttah lʋpalika, yʋmmak o̱ e chieya tok; Saion a̱ il ithaiyanah mʋt, e yayah aiena tok oke.

² Pi̱ hap a̱ tuko̱wissha yak o̱ il a tʋkohlichi tok oke.

³ Yʋmmak o̱ pi yokʋchi ʋhleha hʋt ʋlhtʋloak pim asilhhah mʋt, pissikkopali ʋhleha hʋt na̱ yukpa pim asilhhʋt, “Saion ʋlhtʋloak o̱ a kohchit pi̱ tʋloáh,” a̱ha̱chi tok oka̱.

⁴ Kʋtiohmi hosh yakni inla ya̱ Chihowa im ʋlhtʋloak a̱ il a tʋloa hinlah choh?

⁵ Chelusalem ma, chishno ya̱ ʋm ihaksi hokma̱, sʋbbak ishtimpakimma yʋt nan im punnah chatuk ʋt im ʋhaksashke.

⁶ Ak chithaiyano hokma̱, Chelusalem a̱ isht a sʋ yokpa kʋt, nanah moma ka̱ i̱ shʋlihchi lih keyu hokma̱, sʋ sunlʋsh ʋt sʋtih paknaka ya̱ ʋlbashke.

⁷ Etom ushi ʋhleha hʋt Chelusalem i̱ nittak ma̱, “Hu moshulechíh, i̱ tola ya̱ musholichit isht oh onáh,” a̱ha̱chi tok a̱ i̱ sʋnalit ish ithaiyanashke, Chihowa ma.

⁸ Babilon tʋmahah chukkillissa he ma, ish pi kaniomi̱hi̱chi tuk a̱, kʋna hosh ʋtobbit na̱ chi kaniomi̱hi̱chikmʋt, na̱ yokpa hi oke.

⁹ Kʋna hosh chim ʋllo̱si ʋhleha ha̱ eshi cha, tʋli isht issot kʋhla̱ha̱likmʋt, na̱ yokpa hi oke.