Atʋloa 135 - Chahta Holisso Holitopa 1886

^1-2 Chihowa ha̱ hu holittoblichíh. Chihowa hohchifo ha̱ hʋsh hulittoblichashke: Chihowa i̱ tishuh ʋhleha hʋt Chihowa im ʋboha, pi̱ Chitokaka im ʋboha i̱ wanuta puttah hʋsh hieli kʋt hʋsh hulittoblichashke.

³ Chihowa hʋt achukma hoka̱, Chihowa ha̱ hʋsh hulittoblichashke; hohchifo ha̱ nan ulachit hʋsh ayokpʋchashke; achukma hoka̱.

⁴ Chihowa hʋt ilap immi ha chi̱ hosh Chekob a̱ ʋtokulih mʋt, ilap inli hosh iesha chi̱ kʋt Islael a̱ ʋtokule tuk oka̱.

⁵ Ʋno yʋt Chihowa hʋt chintoh, micha pi̱ Shahli ʋt chitokaka momah i̱ shahli ka̱ ithana li hoka̱.

⁶ Ʋba micha yakni, okhʋtah puttah micha ahufobi moma ka̱, nana ho̱ Chihowa hʋt ahni tuk ʋt moma ka̱ a yʋmihchi yoke.

⁷ Yakni ont atahaka ya̱ oktohbi ʋba iachi hosh, umba ha̱ hʋsshukmʋlli im ikbi hoke; mahli ha̱ nan im aiasha puttah a kucchi hoke.

⁸ Yʋmmak osh Echip a̱ hʋttak micha nan ʋlhpoa aienah ʋttahpi putta ka̱ issot kanchi tok oke.

⁹ Echip ma, nan isht ʋtukkoa puttah, na̱ fehna puttah aiena ka̱ chim itti̱takla awet kanchit, Felo micha i̱ tishuh ʋhlehah moma ka̱ awet onucchi tok oke.

^10-11 Yʋmmak osh oklushi lawa ka̱ issot kanchi cha, mi̱ko kʋllo putta ka̱, Amolait i̱ mi̱ko Saihon, micha Beshan i̱ mi̱ko Ok, micha Kenan apehlichika puttah momah ʋbih mʋt,

¹² I̱ yakni ya̱ immih mak o̱, im oklah Islael ʋt ai ieshi ya chi̱ ho̱ ima tok oke.

¹³ Chihowa ma, chi hohchifo hʋt abillia yoke; Chihowa ma, isht a chithaiyana yʋt isht ai unchululi ittʋchahkʋchit ma̱ha̱ya ka̱ ibafoiyukka hoke.

¹⁴ Chihowa hʋt im okla ha̱ nan im apesakmʋt, i̱ tishuh ʋhleha hak atuk mak o̱ i̱ nukha̱kla hi oka̱.

¹⁵ Oklushi puttah i̱ na̱ holbʋt tuba putta kʋt tʋli hʋta, micha tʋli hulisso lakna aiena ho̱, hʋttak o̱ ibbak osh nan ikbi tuk ak oke.

¹⁶ Itih hʋt im a̱sha hokak osh, ʋnumpula he keyushke; nishkin ʋt im a̱sha hokak osh, pisa he keyushke.

¹⁷ Haksubish ʋt im a̱sha hokak osh, hakla he keyushke; itih ma̱ fiopa hʋt iksho kʋmmohmishke.

¹⁸ Yʋmma̱ ikbi ʋhlehah, micha yʋmma̱ anukchieto aiyukali kʋt yʋmmak o̱ chiyuhmi tuba hoke.

¹⁹ Islael i̱ chukkachʋffa ma, Chihowa ha̱ hʋsh ayokpʋchashke; Elon i̱ chukkachʋffa ma, Chihowa ha̱ hʋsh ayokpʋchashke.

²⁰ Lefai i̱ chukkachʋffa ma, Chihowa ha̱ hʋsh ayokpʋchashke; Chihowa i̱ nukshopa ʋhlehah ma, Chihowa ha̱ hʋsh ayokpʋchashke.

²¹ Chelusalem ai a̱ha̱tta Chihowa hʋt Saion a̱ a hulittopashke. Chihowa ha̱ hu holittoblichíh.