Atʋloa 119 - Chahta Holisso Holitopa 1886

ALEF.

ALEF.

¹ Ata̱ya ya̱ ai a̱hlih achukmʋt a foiyukka hosh Chihowa i̱ nan ʋlhpisa a no̱ho̱wa ʋhleha hʋt na̱ yokpʋshke.

^2-3 Nan isht im ai ʋlhtukkoa putta ka̱ hulittobli, chu̱kʋsh ai oklu̱hʋt Chihowa ha̱ ho̱ho̱yo, nan ik ai ʋlhpeso ma̱ yohmi keyu, im ata̱ya puttah ʋpesa tok a̱ ai ittʋno̱ho̱wa yʋt na̱ yokpa yoke.

⁴ Chishno ʋt chi̱ nan ʋlhpisa putta ka̱ hʋttak ʋt ʋcchukmalit hulittobla he ish ʋpesa tok oke.

⁵ Ʋm ata̱ya putta kʋt ʋlhtaha na, chi̱ nan ʋlhpisa putta ka̱ hulittobli li hokbano!

⁶ Chim ʋnnumpah ʋlhpisa moma ka̱ ahninchi li hokmak osh, sʋ hofahya he keyu hoke.

⁷ Nan ai ʋlhpiesa ish ʋpehi̱sa ka̱ ithʋna li kʋt chu̱kʋsh ai ʋpissali hosh chi ayokpʋche li hoke.

⁸ Chi̱ nan ʋlhpisa putta ka̱ hulittobli li hoka̱, ʋmmomihchit chik sʋ kancho kashke.

BELH.

BELH.

⁹ Nanta ho̱ kʋtiohmih mak osh hʋttak himitta yʋt im ata̱ya ya̱ kʋshuffa hinlah choh? Chim ʋnnumpa ha̱ iakkaya hosh ahah ahni hokmak a hinla hoke.

¹⁰ Sʋ chu̱kʋsh isht ai oklu̱hʋt chi ho̱ho̱yo li hoka̱, chim ʋnnumpah ʋlhpisa putta ka̱, i̱ filʋmmit ik yushobá, chik si ahno kashke.

¹¹ Ak chim ʋsshacho ka chi̱ kak osh, nan ish achi ya̱ sʋ chu̱kʋsh a fohkit ieshi lishke.

¹² Chihowa ma, chi holittopʋshke; chi̱ nan ʋlhpisa putta ka̱ is sʋm abʋchashke.

¹³ Chitih hʋt nan ʋpehi̱sa tuk moma ka̱ sʋttiʋlbi isht ʋnoli lih chatuk oke.

¹⁴ Nan isht chim ai ʋlhtukkoa putta ka̱ ata̱ya li kak osh, na̱ sʋ yokpa kʋt nan i̱la̱yak chito moma ka̱ ʋm ai ittillawwishke.

¹⁵ Chi̱ nan ʋlhpisa putta ka̱ anukfi̱hi̱lli lashke, mikmʋt ata̱ya ish ʋpesa tok putta ka̱ ʋcchukmali hosh pisa lashke.

¹⁶ Chi̱ nan ʋlhpisa putta ka̱ ishit sʋ yokpa hoke; chim ʋnnumpa ha̱ ʋm ihaksa he keyu hoke.

KIMEL.

KIMEL.

¹⁷ Chi̱ tishu ha̱ nanah achukma ho̱ ish i̱ yʋmi̱hi̱chi na si okcha̱yashke; yohmikma̱ chim ʋnnumpa ha̱ hulittobli lashke.

¹⁸ Sʋ nishkin a̱ is sa̱ fʋtummi na, nan inlah fehna putta ka̱ chi̱ nan ʋlhpisa ya̱ a pisa lashke.

¹⁹ Yakni ya̱ oklah inla yosh a̱ha̱tta li hoka̱, chim ʋnnumpah ʋlhpisa putta ka̱ chik sa̱ luhmo kashke.

²⁰ Nittak moma ka̱ nan ish ʋpehi̱sa ka̱ ho̱ho̱yo li kak osh, ʋmish shilombish ʋt lishoʋshke.

²¹ Ilefehnʋchi ʋhleha ha̱ ish im olʋbechih chatuk oke; chim ʋnnumpah ʋlhpisa putta ka̱ i̱ filʋmmit ittʋnowa ʋhleha hʋt kʋlakshishke.

²² Nan isht chim ai ʋlhtukkoa putta ka̱ ieshi li hoka̱, nan isht a hufahya, shittilema aiena kʋt si onuttoiyula tuk a̱ is sa̱ kʋnʋllichashke.

²³ Pehlichika ʋhleha hʋt chiyʋt ishit si ʋnumpuli hoh mák o̱, chi̱ tishu hʋt chi̱ nan ʋlhpisa putta ka̱ anukfi̱hi̱lla he bano hoke.

²⁴ Nan isht chim ai ʋlhtukkoa putta kak kia ʋm ai achukma, nanah a̱ miha hʋttak oke.

TALELH.

TALELH.

²⁵ Ʋmish shilombish ʋt lukfi pushi ya̱ ʋkʋllo hoka̱, chim ʋnnumpah pulla hatuk mak o̱ is si okchalinchashke.

²⁶ Ʋm ata̱ya putta ka̱ chim ʋnoli likma̱, is sʋ hakloh chatuk okʋt, chi̱ nan ʋlhpisa putta ka̱ is sʋm abʋchashke.

²⁷ Chi̱ nan ʋlhpisa puttah ata̱ya ya̱ is sʋthʋnanchi na, nanah inlah fehna ish yʋmi̱hi̱chi ka̱ anukfillit isht ʋnumpo̱ho̱li lashke.

²⁸ Nukha̱klo kak osh ʋmish shilombish ʋt bilʋt kʋnia hoka̱, chim ʋnnumpah pulla hatuk mak o̱ kʋllochit is sʋ hillechashke.

²⁹ Hulabi ata̱ya ya̱ is sa̱ filʋmmichashke; micha chi̱ nan ʋlhpisa ya̱ isht is sa̱ kanashke.

³⁰ Aia̱hlika hina yak o̱ ʋtokule li tuk oke; nan ish ʋpehi̱sa ya̱ sʋ tikba tʋkaliche li tuk oke.

³¹ Nan isht chim ai ʋlhtukkoa putta ka̱ asittia lih chatuk oka̱, Chihowa ma, is sʋ hofahyalin náh.

³² Sʋ chu̱kʋsh a̱ ish ʋwatʋlikma̱, chim ʋnnumpah ʋlhpisa puttah i̱ hina ya̱ a cha̱ha̱fa la chi̱ hoke.

HE.

HE.

³³ Chihowa ma, chi̱ nan ʋlhpisa puttah ata̱ya ya̱ is sa̱ bihliblikma̱, ieshit ai ʋlhi ka̱ ona lashke.

³⁴ Nan is sʋthʋnanchi na, chi̱ nan ʋlhpisa ya̱ ieshi lashke; yohmikmʋt chu̱kʋsh isht ai oklu̱ha hosh hulittobli la chi̱ hoke.

³⁵ Chim ʋnnumpah ʋlhpisa puttah i̱ hina yak o̱ ʋm ai achukma hoka̱, yʋmmak o̱ is si a nowʋchashke.

³⁶ Nan isht chim ai ʋlhtukkoa putta kak o̱ sʋ chu̱kʋsh a̱ pit ish fulullichashke, amba nan ʋhayuchi ʋno keyu kashke.

³⁷ Na̱ kʋlakshi ik peso ka chi̱ ka̱, sʋ nishkin a̱ ish shʋnelashke; chi̱ hina ya̱ a nowʋchit is si okchalinchashke.

³⁸ Yʋmmak o̱ isht chi̱ nukshopa hinla hoka̱, nan ish achi tuk ʋt chi̱ tishu ha̱ ish im ai a̱hlichashke.

³⁹ Nan ish ʋpehi̱sa yʋt hochukma hokʋt, nan isht ik si ʋhobalo i̱ sʋ kummuta ka̱ is sa̱ filʋmmichashke.

⁴⁰ Yakeh, chi̱ nan ʋlhpisa putta kak o̱ sʋ ba̱ha̱nna hoke; chi ai ʋlhpiesah pulla kak osh is si okchalinchashke.

WAF.

WAF.

⁴¹ Mikma̱ Chihowa ma, isht ish i̱ hullo yʋt ʋm ʋlʋt, nan ish achi tok pulla hatuk mak o̱, chim ai okcha̱ya yʋt ʋm ʋlashke.

⁴² Yohmi na chim ʋnnumpa ha̱ anukchieto li hokʋt, ik si ʋhobalo ya̱ ʋnnumpah ʋfalʋma ima lashke.

⁴³ Mikma̱ nan ish ʋpesa putta ka̱ anukchieto li hoka̱, ʋnnumpah ai a̱hli ya̱ ʋmmomihchit sʋtih ha̱ a kohchit chik esho kashke.

⁴⁴ Mikma̱ nittak moma ka̱ chi̱ nan ʋlhpisa ya̱ hulittobli li̱ billia cha billiashke.

⁴⁵ Mikmʋt chi̱ nan ʋlhpisa putta ka̱ ho̱ho̱yo li hatuk osh, ʋtaklama iksho ho̱ no̱ho̱wa la chi̱ hoke.

⁴⁶ Yohmikmʋt sʋ hofahyah keyu hosh nan isht chim ai ʋlhtukkoa putta ka̱ mi̱ko ʋhlehah itikba ya̱ isht ai ʋnumpo̱ho̱li la chi̱ hoke.

⁴⁷ Mikmʋt chim ʋnnumpah ʋlhpisa putta ka̱, yʋmmʋt a̱ hulittopa hatuk okʋt, isht a sʋ yokpa chi̱ hoke.

⁴⁸ Mikmʋt chim ʋnnumpah ʋlhpisa putta kak o̱, yʋmmʋt a̱ hulittopa hatuk osh, sʋbbak ittichablinchit ʋba pit wieli likmʋt, chi̱ nan ʋlhpisa putta ka̱ anukfihi̱llit isht ʋnumpo̱ho̱li la chi̱ hoke.

SAYIN.

SAYIN.

⁴⁹ Chi̱ tishu ha̱ ʋnnumpah isht is si anukchietochechi tok okʋt, isht ʋm ai achukma chi̱ ka̱, ish ithaiyanashke.

⁵⁰ Nan ish achi tok ʋt si okchalinchi ka̱, a̱ pʋlʋmmikmʋt, yʋmmak o̱ ishit si a hupohla yoke.

⁵¹ Ilefehnʋchi ʋhleha hʋt ik si ʋhobaloh fehna hak inlih kia, chi̱ nan ʋlhpisa ya̱ ak i̱ filʋmmoshke.

⁵² Chihowa ma, hupaki kash nan ish ʋpehi̱sa tok a̱ ithaiyana likmʋt, isht ile hupohlʋlechi lih chatuk oke.

⁵³ Hʋttak ik ʋlhpeso ʋhleha hʋt chi̱ nan ʋlhpisa ya̱ kanchi kak o̱, nukhubela chinto kʋt sʋ nukfoiyukkʋshke.

⁵⁴ Oklah inla yosh chukka yak ai a̱ha̱tta li kʋt, chi̱ nan ʋlhpisa putta kak osh ʋm ʋlhtʋloak oke.

⁵⁵ Chihowa ma, ninak oh kia chi hohchifo ha̱ ithaiyana likmʋt, chi̱ nan ʋlhpisa ya̱ hulittobli lih chatuk oke.

⁵⁶ Chi̱ nan ʋlhpisa putta ka̱ hulittobli li hokʋt, yʋmmak osh ʋmmi mak oke.

HELH.

HELH.

⁵⁷ Chihowa hʋt ʋmmi yoke: “Chim ʋnnumpah putta ka̱ hulittobli lashke,” achi le tuk oke.

⁵⁸ Chu̱kʋsh isht ai oklu̱hʋchit isht ish i̱ kana ya̱ hoyo li hoka̱, nan ish achi tuk ʋt ai iakayʋt is sa̱ kanashke.

⁵⁹ Ata̱ya li putta ka̱ anukfilli likmʋt, saiyi ya̱ fʋlʋmmichit nan isht chim ai ʋlhtukkoa putta ka̱ isht iakaya lih chatuk oke.

⁶⁰ Chim ʋnnumpah ʋlhpisa putta ka̱ hulittobli la chi̱ kʋt, ak ahchibalo hosh tu̱shpa lih chatuk oke.

⁶¹ Hʋttak ik ʋlhpeso ʋhlehah im ishit tʋllakchi putta kʋt si ʋpakfoiyupa hak inlih kia, chi̱ nan ʋlhpisa ya̱ ik sʋm ihaksoshke.

⁶² Nan ai ʋlhpiesa ish ʋpehi̱sa tuk pullah mak o̱, ninak iklʋnnah kia wʋkaya lish, yakoke chim a̱ha̱chi lishke.

⁶³ Chi̱ nukshopa momah, micha chi̱ nan ʋlhpisa puttah hulittobli ʋhlehah aiena ka̱ ibaiachʋffa sia hoke.

⁶⁴ Chihowa ma, yakni ʋt isht ish i̱ hullo yo̱ isht ai ʋluttoʋshke; chi̱ nan ʋlhpisa putta ka̱ is sʋm abʋchashke.

TELH.

TELH.

⁶⁵ Chihowa ma, chim ʋnnumpah pulla hatuk mak o̱, nan achukma ho̱ chi̱ tishu ha̱ ish i̱ yʋmihchih chatuk oke.

⁶⁶ Chim ʋnnumpah ʋlhpisa putta ka̱ sʋ yimmi hoka̱, nan ʋkostininchi achukma micha nan ithana aiena ka̱ is sʋm abʋchashke.

⁶⁷ Na̱ pʋlʋmmi ik si onuttolo ki̱shah mʋt, si yoshubah beka tok ak inlih kia, himak okʋno nan ish achi tok a̱ hulitto̱ho̱bli lishke.

⁶⁸ Chi achukma cha, achukma kak o̱ ish yʋmi̱hi̱chi hokʋt, chi̱ nan ʋlhpisa putta ka̱ is sʋm abʋchashke.

⁶⁹ Ile fehnʋchi ʋhleha hʋt a̱ sʋnalit hulabi ikbi tuk okak o̱ ʋno ʋto chu̱kʋsh isht ai oklu̱hʋt chi̱ nan ʋlhpisa putta ka̱ hulittobli la he bano hoke.

⁷⁰ Imi chu̱kʋsh ʋt nia kʋt bila chohmi hoke; ʋno ʋto chi̱ nan ʋlhpisa yak o̱ isht a sʋ yokpa hoke.

⁷¹ Chi̱ nan ʋlhpisa putta ka̱ isht ithʋna la chi̱ kak okʋt, na̱ pʋlʋmmi si onuttula tuk ʋt isht ʋm ai achukma hoke.

⁷² Nan ʋlhpisa chitih a ko̱ho̱ccha yʋt achukma kʋt, tʋli hulisso lakna micha tʋli hʋta tʋhlepah sipokni kʋniohmih kia ʋm i̱ shaiyahlishke.

YOT.

YOT.

⁷³ Chibbak ak osh sʋkbit sʋ helichi tok okʋt, chim ʋnnumpah ʋlhpisa putta ka̱ ithʋna la chi̱ ka̱ is sʋ nukfohkashke.

⁷⁴ Chim ʋnnumpa hak o̱ anukchieto li ka̱, chi̱ nukshopa ʋhleha hʋt sʋ pesa cha na̱ yokpashke.

⁷⁵ Chihowa ma, nan ish ʋpehi̱sa kʋt ai ʋlhpiesa ka̱, micha isht is sʋm ai a̱hli kak osh na̱ pʋlʋmmi is si onucchi tuk a̱ ithana lishke.

⁷⁶ Chi̱ tishu ha̱ nan ish im achi tok pullah mak o̱, isht ish i̱ hullo yʋt isht ʋm a hupohla yokbano!

⁷⁷ Chi̱ nan ʋlhpisa yak osh isht ʋm a yokpa yoka̱, isht ish i̱ nukha̱klo putta kʋt si onuttoiyola na, si okcha̱yashke.

⁷⁸ Ilefehnʋchi ʋhleha hʋt ai a̱hlih keyu ho̱ nan ik ʋlhpeso si yʋmihchi tuk okʋt, hufahyashke; ʋno ʋto chi̱ nan ʋlhpisa putta ka̱ anukfi̱hi̱lli la chi̱ hoke.

⁷⁹ Chi̱ nukshopa ʋhleha hʋt filemʋt ʋm ʋlashke; yohmikmʋt chim ai, ʋlhtukkoa putta ka̱ ithʋnashke.

⁸⁰ Ik sʋ hofahyo ka chi̱ kak osh, sʋ chu̱kʋsh ʋt chi̱ nan ʋlhpisa putta ka̱ im ai a̱hlashke.

KAF.

KAF.

⁸¹ Ʋmish shilombish ʋt chim ai okcha̱ya ya̱ aiyahni kak osh iellishke; chim ʋnnumpa hak o̱ ho̱ho̱yo lishke.

⁸² Nan ish achi tuk a̱ aiyahni li kak osh sʋ nishkin ʋt iellit taha ho̱, “Kʋtiohmikmak o̱ is sʋ hopohlʋlecha chi̱h choh?” a̱ha̱chi lishke.

⁸³ Na̱ hakshup kutoba o̱ shubulli ak o̱ ittillawwi lih kia, chi̱ nan ʋlhpisa putta ka̱ ik sʋm ihaksoshke.

⁸⁴ Chi̱ tishuh i̱ nittak ʋt kʋtohmih choh? Kʋtiohmikmak o̱ a̱ pʋllʋmmechi ʋhleha ha̱ nan ʋlhpisa ish im ai a̱hlicha chi̱h choh?

⁸⁵ Ilefehnʋchi ʋhleha hʋt chi̱ nan ʋlhpisa ai iakkayah keyu kak osh, yakni chiluk a̱ a̱ ku̱hu̱llishke.

⁸⁶ Chim ʋnnumpah ʋlhpisa putta kʋt momʋt ai a̱hli yoke; ai a̱hlih keyu ho̱ a̱ pʋllʋmmechi hoka̱, is si ʋpelashke.

⁸⁷ Yakni ya̱ oklah isht a sʋ kancha̱hosi tuk kia, ʋno ʋto chi̱ nan ʋlhpisa putta ka̱ ak issoshke.

⁸⁸ Nan isht ish i̱ hullo pulla hatuk mak osh is si okchalinchikma̱, nan isht ai ʋlhtukkoa chitih a ko̱ho̱ccha ka̱ hulittobli lashke.

LAMET.

LAMET.

⁸⁹ Chihowa ma, chim ʋnnumpa hʋt ʋba ya̱ tʋkkali na billia hoke.

⁹⁰ Chim ʋnnumpah ish ai a̱hlichi kʋt isht ai unchululi poiyutta ka̱ ma̱ha̱ya kʋt, yakni ya̱ ish tʋllali tok ak o̱ ohmit tʋkkali hoke.

⁹¹ Nan ish ʋpehi̱sa tok pullah mak o̱ himak nittak a̱ immomʋt tʋkkali hoke; nanah moma kʋt chi̱ tishu hokʋt.

⁹² Chi̱ nan ʋlhpisa yak osh ʋm a yokpa yatuk keyukmʋt, nan isht ʋm a pʋllʋmmi ya̱ ishit sʋlla he atuk oke.

⁹³ Yʋmmak o̱ isht is si okchalinchi tuk oka̱, chi̱ nan ʋlhpisa putta ka̱ ik sʋm ihakso ho̱ abillia chi̱ hoke.

⁹⁴ Chimmih sia hoke; is si okchalinchashke; chi̱ nan ʋlhpisa putta ka̱ hoyo li hoka̱.

⁹⁵ Ishit sʋ kancha chi̱ hosh, hʋttak ik ʋlhpeso ʋhleha hʋt ʋm ayicchi hoh kia, nan isht chim ai ʋlhtukkoa putta ka̱ anukfi̱hi̱lli li hoke.

⁹⁶ Chim ʋnnumpah ʋlhpisa yʋto ʋwatah fehna hoka̱, nan ʋlhtaiyaha moma kʋt ont ai ʋlhi ka̱ pisa lih chatuk oke.

MEM.

MEM.

⁹⁷ Chi̱ nan ʋlhpisa ya̱ ahninchi lih fehna hoke; nittak moma ka̱ isht ʋm anukfila yoke.

⁹⁸ A̱ tʋnʋp ʋhleha ha̱ i̱ shʋlihchi hosh chim ʋnnumpah ʋlhpisa putta kʋt sʋ hopoyuksʋli hoke; si anukfohkah abillia yokʋt.

⁹⁹ Nan isht chim ai ʋlhtukkoa putta kʋt isht ʋm anukfi̱hi̱la yatuk o̱, sʋ hopoyuksa kʋt nan ʋm abʋchi moma ka̱ i̱ shʋlihchi lishke.

¹⁰⁰ Chi̱ nan ʋlhpisa putta ka̱ hulittobli li kak osh, nan ʋkostininchi li kʋt hʋttak sipokni ʋhleha ha̱ i̱ shʋlihchi lishke.

¹⁰¹ Chim ʋnnumpa ha̱ hulittobli la chi̱ kak osh, hina ik achukmo aiyuka ka̱ saiyi ya̱ ak ʋhalayacho hoke.

¹⁰² Chishno ak osh is sʋthʋnanchi hatuk o̱, nan ish ʋpehi̱sa ka̱ ak i̱ filʋmmo hoke.

¹⁰³ Nan ish a̱ha̱chi tok ʋt sʋtʋkha ya̱ i̱ champulih fehna hoke; sʋtih ha̱ i̱ champuli kʋt foi bila yak kia im i̱ shahlishke.

¹⁰⁴ Chi̱ nan ʋlhpisa putta ka̱ nan ai ʋkostininchi li hoke; yʋmohmi hatuk osh hulabi ata̱ya aiyuka ka̱ isht ak aiyahno hoke.

NUN.

NUN.

¹⁰⁵ Chim ʋnnumpa hʋt saiyi i̱ pʋla hokmʋt, ata̱ya li ya̱ i̱ tohwikeli yoke.

¹⁰⁶ Ai ʋlhpiesa nan ish ʋpesa putta ka̱ hulittobli la chi̱ kʋt, ʋnnumpah kʋllo il onucchi li tok osh ai a̱hliche li tuk oke.

¹⁰⁷ A̱ pʋlʋmmih fiehnʋshke; Chihowa ma, chim ʋnnumpah pulla hatuk mak o̱ is si okchalinchashke.

¹⁰⁸ Ilap ahnit im issa sʋtih a ko̱ho̱ccha ka̱ ish ayokpʋchi hokbano, Chihowa ma, mikmʋt nan ish ʋpehi̱sa ya̱ is sʋm abʋchashke.

¹⁰⁹ Ʋm ilhfiopak ʋt sʋbbak foiyukkah billia hoh kia, chi̱ nan ʋlhpisa ya̱ ik sʋm ihaksoshke.

¹¹⁰ Hʋttak haksi ʋhleha hʋt ishit hukli ya̱ a̱ tʋla̱ha̱li hoke, yohmih kia chi̱ nan ʋlhpisa putta ka̱ ak i̱ filʋmmoshke.

¹¹¹ Sʋ chu̱kʋsh isht a yokpa yoka̱, nan isht chim ai ʋlhtukkoa putta kʋt ʋmmih a billia chi̱ hosh ishe li tuk oke.

¹¹² Chi̱ nan ʋlhpisa putta ka̱ yʋmihchi li̱ billiʋt ai ʋlhi ona la chi̱ hosh, sʋ chu̱kʋsh a̱ pit tʋkkalechi li hoke.

SAMEK.

SAMEK.

¹¹³ Im anukfilah shʋnayoa ʋhleha ha̱ shittilema li hoke, amba chi̱ nan ʋlhpisa yʋno ahninchi li hoke.

¹¹⁴ Ʋm ai ʋloma̱ka micha a̱ telihpa chia hoka̱, chim ʋnnumpa hak o̱ anukchieto li hoke.

¹¹⁵ Nan ik achukmo yʋmihchi ʋt hʋs sa̱ filʋmmikma̱, a̱ Chitokaka im ʋnnumpah ʋlhpisa putta ka̱ hulittobli lashke.

¹¹⁶ Nan ish achi tok mak osh is sʋ hʋllʋlli na si okcha̱yashke; mikmʋt nanah pisa la he ahni le tuk a̱ ishit chik sʋ hofahyalo kashke.

¹¹⁷ Is sʋ hʋllʋlli na si okcha̱yashke; mikma̱ chi̱ nan ʋlhpisa putta kak o̱ na̱ sʋ yokpa hosh pi̱hi̱sa li̱ billiashke.

¹¹⁸ Chi̱ nan ʋlhpisa putta ka̱ i̱ yushoba ʋhleha ha̱ ish shittilema hatuk o̱, inla haksichi kʋt ilap ak o̱ hulabi i̱ tuba hoke.

¹¹⁹ Hʋttak ik ʋlhpeso momah yakni aiyasha ka̱ lukfi chomihchit ish akshuchi yoke: yʋmohmi kak o̱ nan isht chim ai ʋlhtukkoa putta ka̱ ahninchi li hoke.

¹²⁰ Chi̱ sʋ komuta kak osh sʋn nipi ʋt wʋnni̱hi̱chishke, micha nan ish ʋpehi̱sa ka̱ i̱ sʋ nukshopa hoke.

AYIN.

AYIN.

¹²¹ Nan ish ai ʋpesa micha ai ʋlhpiesa yak o̱ yʋmihchi li hoka̱, sʋlbʋsshali ʋhlehah im issʋt chik sʋ kancho kashke.

¹²² Isht im ai achukma chi̱ ho̱ chi̱ tishu ha̱ nan ʋtoni ish i̱ tubashke; ilefehnʋchi ʋhleha hʋt ik sʋlbʋsshalo kashke.

¹²³ Chim ai okcha̱ya, micha nan ai ʋlhpiesa ish achi ka̱ aiyahni li kak osh, sʋ nishkin ʋt iellishke.

¹²⁴ Isht ish i̱ hullo pulla hatuk mak osh chi̱ tishu ha̱ ish kʋnimihchashke; micha chi̱ nan ʋlhpisa putta ka̱ is sʋm abʋchashke.

¹²⁵ Chi̱ tishuh sia hoke; nan isht chim ai ʋlhtukkoa putta ka̱ ithʋna la chi̱ ka̱, is sʋ nukfohkichashke.

¹²⁶ Chi nan ʋlhpisa ya̱ oklah kubʋffi hoka̱, Chihowa hʋt toksʋla he nittak ʋt ai onʋshke.

¹²⁷ Chim ʋnnumpah ʋlhpisa putta ka̱ ahninchi li kʋt, tʋli hulisso lakna, tʋli hulisso lakna hulittopa yak kia i̱ shʋlihchi lish,

¹²⁸ Nanah poiyutta ka̱ nan ish ai ʋpesa moma ka̱ ʋlhpesah ahni li hatuk osh, ata̱ya hulabi aiyuka kʋno shittilema li hoke.

PE.

PE.

¹²⁹ Nan isht chim ai ʋlhtukkoa putta kʋt na̱ fehna yoke; yʋmohmi hoka̱ ʋmish shilombish ʋt hulittoblit ieshih chatuk oke.

¹³⁰ Chim ʋnnumpah tiwa kʋt ik hupoyukso ʋhleha ha̱ na̱ nukfohkichit tohwikelichi hoke.

¹³¹ Chim ʋnnumpah ʋlhpisa putta ka̱ sʋ ba̱ha̱nna kak osh, sʋtih ha̱ itʋkpʋshalichit fio̱ho̱pa lishke.

¹³² Chi hohchifoh i̱ hulittopa ʋhleha ha̱ ish a kʋniomihchih chatuk mak osh, is sa̱ filema cha, is sa̱ nukha̱klashke.

¹³³ Nan ish a̱ha̱chi tok a no̱ho̱wa la chi̱ ka̱ is sʋm ʋtahli cha, nan ik ʋlhpeso nanah kia, ik im aiyá, chik sʋm ahno kashke.

¹³⁴ Hʋttak nan ilbʋsshali ya̱ is si a hlʋkuffechi na, chi̱ nan ʋlhpisa putta ka̱ hulittobli lashke.

¹³⁵ Chi̱ tishu ha̱ chi nʋsshuka ish o̱ tohwikelichashke, mikmʋt chi̱ nan ʋlhpisa putta ka̱ is sʋm abʋchashke.

¹³⁶ Chi̱ nan ʋlhpisa ya̱ oklah ik hulittoblo kak o̱, oka yʋt sʋ nishkin a̱ akka et yʋna̱ha̱llishke.

CHATE.

CHATE.

¹³⁷ Ai ʋlhpiesa chia hoke, Chihowa ma; micha ʋlhpiesa hosh nan ish ʋpehi̱sa hoke.

¹³⁸ Nan isht chim ai ʋlhtukkoa putta ka̱, ai ʋlhpiesah micha ai a̱hlih fehna ho̱ ish ʋpesa tuk oke.

¹³⁹ A̱ tʋnampi ʋhleha hʋt chim ʋnnumpah putta ka̱ im ʋhaksi kak o̱, nan a yiminta li yʋt ishit sʋ kanchishke.

¹⁴⁰ Nan ish achi kʋt kʋshofah fehnʋt taha hoka̱, chi̱ tishu hʋt ahninchi hoke.

¹⁴¹ Sʋskitinih, micha ik sʋ holittopo hoh kia, chi̱ nan ʋlhpisa putta ka̱ ik sʋm ihakso hoke.

¹⁴² Chim ai ʋlhpiesa yʋt ai ʋlhpiesa billia yoke, mikma̱ chi̱ nan ʋlhpisa yʋt aia̱hlika yoke.

¹⁴³ Nan i̱ pʋlʋmmi micha nukhʋmmi ʋt sʋshishke; yohmih kia chim ʋnnumpah ʋlhpisa putta kʋt ʋm ayokpa yoke.

¹⁴⁴ Nan isht chim ai ʋlhtukkoa putta kʋt ai ʋlhpesa billia yoka̱, is sʋ nukfohki na si okcha̱yashke.

KOF.

KOF.

¹⁴⁵ Chu̱kʋsh oklu̱hʋchi hosh isht chi̱ pa̱ya li hoka̱, is sʋ haiyaklashke, Chihowa ma; chi̱ nan ʋlhpisa putta ka̱ hulittobli lashke.

¹⁴⁶ Chi pa̱ya lishke; is si okchalinchi na, nan isht chim ai ʋlhtukkoa putta ka̱ hulittobli lashke.

¹⁴⁷ Ik onno ki̱sha ho̱ chi̱ tahpʋla lih chatuk oke; chim ʋnnumpa ha̱ anukchieto li hokʋt.

¹⁴⁸ Nan ish achi tuk a̱ ai anukfi̱hi̱lli la chi̱ hosh, ninak ai ʋtoni putta ka̱ tikbanlit sʋ nishkin ʋt okcha hoke.

¹⁴⁹ Isht ish i̱ hullo pullah mak osh ʋnumpule li ka̱ ish haklashke; Chihowa ma, nan ish ai ʋpehi̱sah pulla hatuk mak osh is si okchalinchashke.

¹⁵⁰ Nan okpʋni asittia ʋhleha hʋt bili̱ka hak inlih kia, chi̱ nan ʋlhpisa yokʋno i̱ hupakichi hoke.

¹⁵¹ Chishno ʋto ish bili̱ka hoke, Chihowa ma, mikma̱ chim ʋnnumpah ʋlhpisa putta kʋt ai a̱hlih bieka hoke.

¹⁵² Nan isht chim ai ʋlhtukkoa putta kʋt abillia chi̱ ho̱ ish tʋkohlichi tok a̱, hupaki kash isht ai ithaiyana li tok oke.

LESH.

LESH.

¹⁵³ Chi̱ nan ʋlhpisa ya̱ ʋm ihaksih keyu hoka̱, nan ʋm a pʋllʋmmi ka̱ ish pesa cha, is si a kohchichashke.

¹⁵⁴ Ai ittim afoa li ya̱ is si ʋpelachi cha, is sʋ hlakuffichashke; nan ish achi tok pullah mak osh is si okchalinchashke.

¹⁵⁵ Chi̱ nan ʋlhpisa putta ka̱ oklah ik hoyo hoka̱, ai okcha̱ya yʋt hʋttak ik ʋlhpeso ʋhleha ha̱ i̱ hupaki hoke.

¹⁵⁶ Isht ish i̱ nukha̱klo putta kʋt chinto hoke, Chihowa ma; nan ish ʋpehi̱sa pulla hatuk mak osh is si okchalinchashke.

¹⁵⁷ Sʋlbʋsshali micha a̱ tʋnampi ʋt la̱wa hoh kia, nan isht chim ai ʋlhtukkoa putta ka̱ ak i̱ filʋmmoshke.

¹⁵⁸ Chi̱ filʋmmi ʋhleha hʋt nan ish achi tok a̱ ik hulittoblo hatuk o̱, pisa likmʋt, shittilema lih chatuk oke.

¹⁵⁹ Chi̱ nan ʋlhpisa putta ka̱ ahninchi li ka̱ pisáh, Chihowa ma; isht ish i̱ hullo pulla hatuk mak osh is si okchalinchashke.

¹⁶⁰ Chim ʋnnumpah nushkuboka yʋt aia̱hlika yoke; micha nan ai ʋlhpiesa ish ai apesa aiyuka kʋt abillia hoke.

SHIN.

SHIN.

¹⁶¹ Nanihmih keyu ho̱ hulittopa ʋhleha hʋt sʋlbʋsshali hoh kia, chim ʋnnumpah pulla hatuk mak o̱ sʋ chu̱kʋsh ʋt nukshopa hoke.

¹⁶² Nan ish a̱ha̱chi tok a̱ ishit sʋ yokpa kʋt, nanah lawa ho̱ yukachit ishi kak o̱ chohmi li hoke.

¹⁶³ Hulabi ya̱ ik ahnechot shittilema li hoke; chi̱ nan ʋlhpisa yʋno ahninchi li hoke.

¹⁶⁴ Nan ai ʋlhpiesa ish ʋpesa putta hatuk mak o̱ nittak achʋffakma̱ untukloha chi hulittobliche lih chatuk oke.

¹⁶⁵ Chi̱ nan ʋlhpisa ahninchi ʋhleha hʋt chu̱kʋsh nuktaiyala i̱ lawa hoke; micha ai ibetʋbli ʋt ik im ikshoshke.

¹⁶⁶ Chim ai okcha̱ya ya̱ ho̱ho̱yo li hoke, Chihowa ma; micha chim ʋnnumpah ʋlhpisa putta ka̱ yʋmihchi lih chatuk oke.

¹⁶⁷ Ʋmish shilombish ʋt nan isht chim ai ʋlhtukkoa putta ka̱ hulittoblih chatuk oke; ahninchi lih fehna hokʋt.

¹⁶⁸ Ʋm ata̱ya moma kʋt chi tikba a haiyaka hoka̱, chi̱ nan ʋlhpisa puttah, micha nan isht chim ai ʋlhtukkoa puttah aiena ka̱ hulittobli lih chatuk oke.

TAW.

TAW.

¹⁶⁹ Pa̱ha̱ya li kʋt chi̱ bili̱ka onashke, Chihowa ma; chim ʋnnumpah pulla hatuk mak o̱ nan isht ʋkostininchi is sʋ nukfohkichashke.

¹⁷⁰ Nan asilhha li kʋt chi tikba onashke; nan ish achi tuk pullah mak osh is sʋ kohchashke.

¹⁷¹ Chi̱ nan ʋlhpisa putta ka̱ is sʋm abʋchikma̱, sʋttiʋlbi ʋt hulittoblichi ya̱ ko̱ho̱ccha chi̱ hoke.

¹⁷² Nan ish achi ka̱ sʋ sunlʋsh ʋt ayokpʋchit tʋlo̱ho̱washke; chim ʋnnumpah ʋlhpisa yʋt ai ʋlhpiesah bano hoka̱.

¹⁷³ Chi̱ nan ʋlhpisa putta kak o̱ ayokpʋchit ieshi le tuk oka̱, chibbak ʋt si ʋpela yashke.

¹⁷⁴ Nan ish okchalinchi ya̱ sʋ ba̱ha̱nna hoke, Chihowa ma; micha chi̱ nan ʋlhpisa yak osh ʋm ayokpa yoke.

¹⁷⁵ Ʋmish shilombish ʋt okcha̱ya cha, chi holittoblichashke; yohmi ka̱ nan ish ʋpehi̱sa yʋt si ʋpelashke.

¹⁷⁶ Chukfi kʋnia yo̱ chohmit fulohka̱ha̱chi li hoka̱, chi̱ tishu ha̱ ish hoyashke; chim ʋnnumpah ʋlhpisa putta ka̱ ik sʋm ihakso hoka̱.