Atʋloa 118 - Chahta Holisso Holitopa 1886

¹ Chihowa hʋt achukma hoka̱, yakoke hʋsh im a̱ha̱chashke; im isht i̱ hullo ʋt abillia hoka̱.

² “Isht i̱ hullo yʋt abillia hoke,” Islael ʋt ik achí.

³ “Isht i̱ hullo yʋt abillia hoke,” Elon i̱ chukkachʋffa yʋt ik achí.

⁴ “Isht i̱ hullo yʋt abillia hoke,” Chihowa i̱ nukshopa ʋhleha hʋt ik achí.

⁵ Si ʋtikkunofah mʋt, Chihowa ha̱ i̱ pa̱ya lih ma̱, Chihowa hʋt sʋ haklo cha, ai o̱ hikia ʋwata ho̱ a sʋ helichi tuk oke.

⁶ Chihowa hʋt sʋbafoiyukka hoka̱, sʋ nukshopa he keyushke; hʋttak okʋto nanta ho̱ sʋ katiomihcha hetoh?

⁷ Chihowa hʋt si ʋpela ʋhleha ha̱ ʋm ibafoiyukka hatuk o̱, ʋno ʋt a̱ nukkilli ʋhleha ha̱ na̱ yokpa hosh o̱ hupo̱koyo la chi̱ hoke.

⁸ Chihowa hak o̱ ai ʋtukko kʋt achukma kʋt hʋttak a̱ anukchieto ka̱ i̱ shahli hoke.

⁹ Chihowa hak o̱ ai ʋtukko kʋt achukma kʋt hʋttak huchitoka ʋhleha ha̱ anukchieto ka̱ i̱ shahli hoke.

¹⁰ Oklushi moma kʋt si ʋpakfoiyupa hoh kia, Chihowa hohchifoh pulla ho̱ ishit kanchi la chi̱ hoke.

¹¹ Si ʋpakfoiyupʋt, oklah si ʋpakfoiyupa hak inlih kia, Chihowa hohchifoh pulla ho̱ ishit kanchi la chi̱ hoke.

¹² Foishki chohmit si ʋpakfoiyupa hoh kia, bissukchʋkina luak o̱ chohmit mushohohlih pulla chi̱ hoke; Chihowa hohchifoh pulla ho̱ ishit kanchi la chi̱ kak oka̱

¹³ Si akkʋma he ish ahni hosh is sʋ fahʋmah fehna tuk ak inlih kia, Chihowa hak osh si ʋpela tuk oke.

¹⁴ Chihowa hʋt ʋm ai okcha̱ya tuba hokʋt, ʋmi lhampko micha ʋm ʋlhtʋloak oke.

¹⁵ Ai ʋlhpiesa ʋhlehah im ʋlhtipo ya̱ im aiyachi tʋloa yʋt olʋt tʋkkali kʋt, “Chihowa im ishtimpakimma yak osh nan i̱ shʋlihchi yoke.

¹⁶ “Chihowa im ishtimpakimma yak osh chaha yoke; Chihowa im ishtimpakimma yak osh nan i̱ shʋlihchi yoke,” achi hoke.

¹⁷ Sʋlla chih keyuh, amba okcha̱yʋt a̱ha̱tta lish, Chihowa hʋt nan isht a̱ha̱tta ka̱ ʋno̱ho̱li la chi̱ hoke.

¹⁸ Chihowa hʋt na̱ pʋlʋmmih fehna si ono̱ho̱cchi tuk oke; yohmih kia nan illi ha̱ ik si o̱ bohloshke.

¹⁹ Ai ʋlhpiesa huliht okhisa putta ka̱ hʋs sa̱ tiwwi na, yʋmmak o̱ pit a chukkoa lish, Chihowa ha̱ ayokpa̱ha̱chi lashke.

²⁰ Ilʋppak osh Chihowa i̱ huliht okhisa yoke; yʋmmak o̱ ai ʋlhpiesa ʋhleha hʋt a chukkoa hinla hoke.

²¹ Is sʋ haiyaklo cha, ai okcha̱ya is sa̱ tuba tuk oka̱, chi ayokpʋche la chi̱ hoke.

²² Tʋli chukkikbi ʋhleha hʋt ik ayokpacho kash, yʋmmak osh chukbika nuta i̱ tola tubʋshke.

²³ Nanah ilʋppʋt Chihowa hak o̱ a minti hatuk osh, pi nishkin itikba ya̱ nana kʋt ai inlah fehna hoke.

²⁴ Nittak ilʋppak o̱ Chihowa hʋt ʋtokuli tuk oka̱, na̱ yokpʋt isht iloh a yokpashke.

²⁵ Intah! Chihowa ma, omeh ish pim ahni cha, ish pi okchalinchashke; intah! Chihowa ma, omeh ish pim ahni cha, nan achukma ka̱ ish pim ʋtahlashke.

²⁶ Chihowa hohchifo ho̱ ilai eshi hosh a̱yʋt ʋla kʋt na̱ yokpashke. Chihowa im ʋboha aiyashʋt e hʋchi ayokpʋchishke.

²⁷ Chihowa, yʋmmak osh Chitokaka yosh, pi̱ tohwikelichi yoka̱, ʋbit nan isht ayokpʋchi ya̱ ishit tʋllakchi puttah ishit takchi hosh, alta lʋpish a̱ isht hʋsh onashke.

²⁸ A̱ Chitokaka chia hoka̱, chi ayokpʋche lishke; a̱ Chitokaka chia hoka̱, hulittoblit isht chi ʋnumpule lishke.

²⁹ Chihowa hʋt achukma hoka̱, yakoke hʋsh im a̱ha̱chashke; im isht i̱ hullo yʋt abillia hoka̱.