Atʋloa 115 - Chahta Holisso Holitopa 1886

¹ Nan isht ish i̱ hullo pulla kak o̱, chim ʋnnumpah a̱hli pulla kak o̱, pishno ak keyuh, Chihowa ma, pishno ak keyuh, amba chi hohchifo hak o̱ ish hulittoblashke.

² Nantihmi kak o̱ oklushi putta kʋt, “I̱ Chitokaka mʋto?” acha hinlah choh?

³ Yohmih kia pi̱ Chitokaka yʋt ʋba ya̱ binnilishke; nana ho̱ ahnikmʋt, moma ka̱ yʋmihchi yoke.

⁴ Oklushi i̱ na̱ holbʋt tuba putta kʋt tʋli hʋta, tʋli hulisso lakna aiena ho̱, hʋttak o̱ ibbak osh nan ikbi yoke.

⁵ Itih hʋt im a̱sha hokak osh, ʋnumpula he keyushke; nishkin ʋt im a̱sha hokak osh, pisa he keyushke.

⁶ Haksubish ʋt i̱ hinli hokak osh, hakla he keyushke; ibishakni ʋt im a̱sha hokak osh, hu̱wa he keyushke.

⁷ Ibbak okak osh pʋshohla he keyushke; iyi okak osh nowa he keyushke, i̱ nʋlʋpi ya̱ isht ʋnumpula he keyushke.

⁸ Ikbi ʋhlehah, micha yʋmma̱ anukchieto aiyukali kʋt yʋmmak o̱ chiyuhmi tuba hoke.

⁹ Islael ma, Chihowa hak o̱ ish anukchietashke; yʋmmak osh ʋpelʋchi micha i̱ telihpa yoke.

¹⁰ Elon i̱ chukkachʋffa ma, Chihowa hak o̱ hʋsh anukchietashke; yʋmmak osh ʋpelʋchi micha i̱ telihpa yoke.

¹¹ Chihowa i̱ nukshopa ʋhlehah ma, Chihowa hak o̱ hʋsh anukchietashke; yʋmmak osh ʋpelʋchi micha i̱ telihpa yoke.

¹² Chihowa hʋt pithaiyanah chatuk ʋt yokpalit, Islael i̱ chukkachʋffa ya̱ yokpala chi̱ hoke; Elon i̱ chukkachʋffa ma̱ yokpala chi̱ hoke.

¹³ Chihowa i̱ nukshopa, chipinta, huchito ma̱ aieninchit yokpala chi̱ hoke.

¹⁴ Hʋchishno micha hʋchim ʋlla ʋhlehah aiena ka̱ Chihowa hʋt hʋchi̱ bakahli hokbano!

¹⁵ Ʋba micha yakni aiena ka̱ ikbi tok Chihowa hʋt hʋchi yokpalashke.

¹⁶ Ʋba putta kʋt Chihowa hak o̱ immi hoke, amba yakni yokʋno hʋttak im ʋlla ʋhleha ha̱ ima tok oke.

¹⁷ Chihowa ha̱ hulittoblicha hinla kʋt illi ʋhleha hak o̱ keyukmʋt, kʋna hosh achullosa ya̱ ona kak o̱ keyushke.

¹⁸ Amba pishno yak okʋto himak a̱ ai ʋlhit ia hosh abillia ka̱ Chihowa ha̱ il ayokpa̱ha̱cha chi̱ hoke. Chihowa ha̱ hu holittoblichíh.