Atʋloa 112 - Chahta Holisso Holitopa 1886

¹ Chihowa ha̱ hu holittoblichíh. Hʋttak ʋt Chihowa i̱ nuksho̱ho̱pa, im ʋnnumpah ʋlhpisa putta ka̱ im ai achukmah fehna yʋt na̱ yokpa yoke.

² Im ishtatiaka yʋt yakni paknaka ya̱ huchitot aiyasha hi oke; ʋpissali ʋhlehah ai unchululi hʋt na̱ yokpa hi oke.

³ Nan i̱ lawa, im i̱la̱yak chito aiena kʋt im ʋboha aiyashakma̱, im ai ʋlhpiesa yʋt abillia yoke.

⁴ Ʋpissali ʋhleha hʋt aiokhlileka aiyasha tuk kia, i̱ kana, i̱ nukha̱klo, micha ai ʋlhpiesa aiena yatuk o̱, tohwikeli ʋt i̱ kohchah chatuk oke.

⁵ Inla i̱ kana cha i̱ pota yʋt nan isht im ai achukma hʋttak oke; nan isht ai asha ya̱ nan isht ai a̱ha̱tta kʋt ai a̱hlicha he bano hoke.

⁶ Kʋnʋlla he keyu ho̱ abillia chi̱ hokʋt: ai ʋlhpiesa ya̱ oklah ithaiyana na billia hi oke.

⁷ Nan ik achukmo ʋnnowa ka̱ nukshopa he keyu hoke; Chihowa anukchieto kak osh, chu̱kʋsh ʋt kʋllot nukfoiyukka hoke.

⁸ Chu̱kʋsh ʋt kʋllot nukfoiyukka hatuk osh, nukshopa he keyu hosh i̱ tʋnampi ʋhleha ha̱ na̱ yokpʋt ont pisa hi oke.

⁹ Ittʋfimmit nan ik im iksho ʋhleha ha̱ nan imah chatuk okʋt, im ai ʋlhpiesa yʋt aiyasha na billia hoke; lʋpish ʋt hulittopʋt chaha chi̱ hoke.

¹⁰ Hʋttak ik ʋlhpeso ʋt pesa cha, im okpula hi oke; in nuti ya̱ killisli̱hi̱chi cha, bilʋt kʋnia hi oke; hʋttak ik ʋlhpeso ʋhlehah nan ahni ʋt ont okpulot taha hi oke.