Atʋloa 106 - Chahta Holisso Holitopa 1886

¹ Chihowa ha̱ hu holittoblichíh. Chihowa hʋt achukma hoka̱, yakoke hʋsh im a̱ha̱chashke; isht i̱ hullo yʋt abillia hoka̱.

² Kʋta hosh na̱ chinto Chihowa hʋt yʋmi̱hi̱chi tuk a̱ ʋnola hinlah choh? kʋta hosh yʋmma̱ hulittoblichi moma ka̱ hakluchecha hinlah choh?

³ Nan ʋpesa tok a̱ hulittobli ʋhleha hʋt nittak aiyukali ka̱ ai ʋlhpiesa yʋmihchi ʋt na̱ yokpa hoke.

⁴ Chihowa ma, chim okla ha̱ isht ish i̱ kanah chatuk mak osh, isht is sʋthaiyanashke; chim ai okcha̱ya ieshit is sa̱ nowashke.

⁵ Yʋmohmi na chim ʋlhtoka ʋhlehah isht im ai achukma ka̱ pisʋt, chim oklushi ʋt na̱ yokpa ka̱ nan ishit yokpʋt, oklah chimmi ha̱ ibai ilawʋta lashke.

⁶ Pi̱ki ʋhleha ha̱ ta̱klʋt il ʋsshʋchi tuk, nan ik ai ʋlhpieso yʋmihchit pi yoshuba tuk oke.

⁷ Pi̱ tikba ʋhleha hʋt Echip aiyashah mʋt, nan inlah fehna ish yʋmi̱hi̱chi tuk a̱ yohmih ik ahno ki tok; isht ish i̱ hullo apakna ka̱ ik ithaiyano hosh, okhʋtah ontʋlaka, Okhʋtah Humma ya̱ ai i̱ filʋmmit chim asʋnali tok oke.

⁸ Yʋmohmih kia ilap hohchifo hatuk pullah mak o̱, nan isht im ai a̱hli ya̱ ottʋnincha chi̱ hosh, okchalinchi tok oke.

⁹ Mihmʋt Okhʋtah Humma ya̱ i̱ meha na shippʋt shilʋt tahah ma̱, ahufobika yash yakni hayaka chomi̱hchit ai ittʋnowʋchit hlupullechi cha,

¹⁰ I̱ nukkilli ibbak a̱ a kohchit okchalinchih mʋt, i̱ tʋnʋp ibbak a̱ a kohchit hlʋkuffichi tok oke.

¹¹ Amba i̱ tʋnampi ʋhleha ha̱ oka yʋt ompohomo na, achʋffah kia hiki̱ya tok keyu hoke.

¹² Mihma̱ im ʋnnumpah putta ka̱ yimmi hatuk osh, hulittoblichit oklah tʋlo̱ho̱wa tok oke.

¹³ Chekosih mak inli ho̱ na̱ yʋmi̱hinchi tuk a̱ oklah im ʋhaksi tok; im anukfila hʋt ai a̱hla chi̱ ka̱ ik hoyo hosh,

¹⁴ Amba yakni hayaka ya̱ a pushkʋnoh fehna cha, chukushmi ya̱ Chitokaka ai imomaka pisa tok.

¹⁵ Mihma̱ nan asilhha tuk a̱ imah mʋt, imish shilombish a̱ chunna yo̱ onucchi tok.

¹⁶ Atuk o̱ binah aiyashah mʋt, Moses micha Chihowa i̱ hulittopa Elon ittʋtuklo ka̱ i̱ putʋnnoh ma̱,

¹⁷ Yakni ʋt wʋkama cha, Tehlan a̱ ishit nanʋblih mʋt, Abailam ittʋpeha ya̱ ompohommo tok.

¹⁸ Mihma̱ luak osh ai ittʋpeha ya̱ a luah mʋt, hʋttak ik ʋlhpeso ʋhleha ha̱ luak libbi hosh hukmit tahli tok oke.

¹⁹ Holeb a̱ wakushi holba ya̱ ai ikbi cha, nan akmi yo̱ im ʋkahchunnoli hosh,

²⁰ Isht a hulittopa yash hʋsshuk a̱ha̱pa wak holba yo̱ isht ittʋtoba tok.

^21-22 Echip a̱ na̱ huchito a yʋmi̱hi̱chit, Ham i̱ yakni ya̱ nan inlah fehna yo̱ a yʋmi̱hi̱chi tuk osh, Okhʋtah Humma ya̱ nanah pʋllʋmmi yo̱ a yʋmi̱hi̱chi hosh okchalinchi tuk Chitokaka ya̱ im ʋhaksi tok oke.

²³ Mihma̱ ʋtokule tuk Moses ʋt im anukhubela yʋt isht ik kancho ka chi̱ ka̱ fʋlʋmmicha chi̱ hosh alʋkofa tʋkanli ka̱, yʋmma̱ itikba hikkia hatuk keyukma̱, ishit kancha chi̱h miha tok oke.

²⁴ Atuk o̱ ʋnonti yakni achukma ya̱ shittilema tok; im ʋnnumpa ha̱ ik yimmoh mʋt,

²⁵ Im ʋlhtipo puttah aiyashʋt ilachua tok; Chihowa im ʋnnumpa ha̱ oklah ik hʋponaklo ki tok.

²⁶ Mihma̱ ibbak a̱ wielit, yakni hayaka ya̱ ai akkakohliche tuk osh,

²⁷ Im ishtatiaka ya̱ oklushi puttah im ai itti̱takla ai akkakohlechi cha, yakni putta ka̱ ai ittʋfemibla he, ʋnnumpah im il onucchi tok oke.

²⁸ Atuk o̱ Baal Peo ya̱ oklah ibʋlhtoh mʋt, nan okcha̱ya keyu putta ka̱ im issʋt isht ayokpʋchi tuk a̱ oklah a̱ha̱pa tok.

²⁹ Mihmʋt nan okpulo yʋmo̱ho̱mit, oklah nukoʋchi kak o̱, ililli okpulo ʋt kucchʋt onuttohla tok oke.

³⁰ Yohmih ma̱ Finehas ʋt wʋkayʋt hikkia cha, nan im apesʋt onucchih ma̱, ililli okpulo ʋt yukopa tok.

³¹ Mihmʋt isht ai unchululi ma̱ha̱yʋt abillia ka̱ ai ʋlhpiesa yo̱ isht im ʋlhpisa tok oke.

³² Atuk o̱ Melibah oka a nukoachi na, yʋmmak atuk pullah mak o̱ nan ik achukmo ʋt Moses a̱ onuttula tok.

³³ Im anukfila ha̱ asʋnnali na, ittiʋlbi ya̱ ahah ik ahno hosh isht ʋnumpuli tok oka̱.

³⁴ Chihowa hʋt i̱ miha tuk okak o̱, oklah putta ka̱ isht ik kancho hosh,

³⁵ Amba oklushi putta ka̱ ʋyokoma cha, yʋmmʋt nanah a kʋniohmih chatuk a̱ oklah ithʋna tok.

³⁶ Mihmʋt i̱ na̱ holbʋt tuba putta ka̱ ayokpa̱ha̱chih ma̱, nan isht a yuka i̱ tuba tok.

³⁷ Mihmʋt ushi ʋhlehah, ushetik ʋhlehah aiena ka̱ shilombish okpulo putta ka̱ ʋbit isht ayokpʋchi tok.

³⁸ Yohmi kʋt nana ho̱ okpʋni tuk keyu issish, ilap ushi micha ushetik ʋhlehah aienah im issish a̱ hlʋtʋblit, na̱ holbʋt tuba Kenan aiyasha ka̱ isht ayokpʋchi ho̱, yakni ʋt issish hlʋta̱ha̱pa yo̱ ishit liteha tok oke.

³⁹ Yʋmo̱ho̱mi kak osh ilap nanah a kʋnio̱ho̱mi ak inli ho̱ isht a liteha cha, nan okpulo yʋmi̱hi̱chi kak osh hawa tuba tok.

⁴⁰ Yohmi hatuk o̱ Chihowa im anukoa yʋt im okla ha̱ isht i̱ nukhubela cha, immih okla ha̱ shittilemah mʋt,

⁴¹ Oklushi putta ka̱ ibbak fohki na, i̱ nukkilli ʋhleha hak osh pehliechi tok.

⁴² Mihma̱ i̱ tʋnʋp ʋhleha hʋt ilbʋsshalih ma̱, ibbak i̱ nutakʋt ʋkahchunnoli tok oke.

⁴³ Himona̱h kohchi̱hi̱chih kia, ilap im anukfilah isht i̱ sʋnalih mʋt, nan ik ʋlhpeso yʋmo̱ho̱mi kak osh akka ittulʋt kʋnia tok.

⁴⁴ Atuk o̱ pa̱ha̱ya na hakloh mʋt, nan im a pʋllʋmmi ka̱ pesa cha,

⁴⁵ Nan ittim apesa tok ʋt ithaiyanʋt, isht i̱ hullo chinto hatuk pullah mak osh i̱ nukha̱klo tok.

⁴⁶ Mihmʋt yukachi tuk ʋt momʋt i̱ nukha̱kla chi̱ ka̱ nukfokki tok.

⁴⁷ Pi̱ Chitokaka Chihowa ma, ish pi hlakuffechi cha, oklushi puttah a kohchit ish pittʋnahli na, chi hohchifoh hulittopa ya̱ yakoke im aiyahnit, chi hulittoblichi ya̱ isht il ilawʋtashke.

⁴⁸ Islael i̱ Chitokaka Chihowa hʋt hulittopa kʋt abillia tok osh abilliashke; mikma̱ oklah moma kʋt, Amen, achashke. Chihowa ha̱ hu holittoblichíh.