Atʋloa 105 - Chahta Holisso Holitopa 1886

¹ Chihowa ha̱ yakoke hʋsh im achashke; hohchifo ha̱ hʋsh i̱ pa̱yashke; nanah a yʋmi̱hi̱chi tuk a̱ oklah puttah im ai itti̱takla hʋsh ai ottʋninchashke.

² Hʋsh i̱ tʋloashke; nan ulachit hʋsh ayokpʋchashke; nanah fehna yʋmi̱hi̱chi tuk moma ka̱ isht anukfillit hʋsh tʋlo̱ho̱washke.

³ Hohchifoh hulittopa ya̱ isht hʋsh ilawʋtashke; Chihowa ho̱ho̱yo ʋhleha hʋt chu̱kʋsh na̱ yokpashke.

⁴ Chihowa ha̱, micha imi lhampko ya̱ hʋsh hoyashke; nʋsshuka ya̱ hʋsh ho̱ho̱yo na billiashke.

^5-6 I̱ tishuh Eblaham im ishtatiaka, Chekob im ʋlla ʋhlehah, im ʋlhtoka ʋhlehah ma, nanah fehna yʋmi̱hi̱chi tok a̱, i̱ na̱ fehna puttah, itih nan ʋpehi̱sa tok aiena ka̱ hʋsh ithaiyanashke.

⁷ Yʋmmak osh pi̱ Chitokaka Chihowa hoke; nan ʋpehi̱sa tuk ʋt yakni moma ka̱ aiyasha hoke.

⁸ Nan ittim ʋpesa tok ʋt ithaiyana na billiʋshke; ʋnnumpah ʋpesa tok ʋt ithaiyana kʋt isht ai unchululi tʋhlepah sipoknih kia ona hoke.

⁹ Yohmi kʋt yʋmmak oka̱ Eblaham a̱ nan ittim ʋpesa tuk osh, Aisak a̱ ʋnnumpah kʋllo im il onucchi tuk osh,

¹⁰ Chekob a̱ nan ʋlhpisa mak o̱ i̱ hillechit, Islael a̱ nan ittim ʋlhpisa billia mak o̱ i̱ hillechi kʋt,

¹¹ “Kenan yakni ʋt hʋchimmi hosh yakni hʋchim ʋlhpisa ya chi̱ ho̱, chishno ak o̱ chima la hi oke,” a̱ha̱chi tok.

¹² Hʋttak holhti̱na, kʋnomosih, micha oklah ik ithano yosh yʋmmak o̱ a hieli hosh,

¹³ Oklushi achʋffa ka̱ a kohchʋt oklushi inla im onʋt ittʋno̱ho̱wʋt, apehlichika achʋffa ka̱ a kohchʋt oklah inla im onʋt ittʋno̱ho̱wah ma̱,

¹⁴ Hʋttak nanah kia, ik ilbʋsshalí, ik ahnoh mʋt, yʋmmak atuk pullah mak o̱ mi̱ko putta ka̱ im alʋmit,

¹⁵ “Nan ʋhamʋt ʋm ʋlhtoka ʋhleha ha̱ hʋsh putolin náh, micha a̱ hupayi ʋhleha ha̱ nan ik achukmo hʋsh i̱ yʋmihchin náh,” a̱ha̱chi tok.

¹⁶ Atuk osh hohchʋfoh chinto kʋt yakni ya̱ onuttula chi ho̱ ʋpesa tok; isht ai okcha̱ya pʋska ya̱ kubʋffit kanchi tok.

¹⁷ Oklah itikba ya̱ hʋttak achʋffa ka̱ chʋffichi tuk ʋttok; yuka ha chi̱ ho̱ Chosef a̱ oklah kanchi tok.

¹⁸ Iyi ya̱ tʋlabehlit huttupali tok; i̱ pʋllʋmmi hosh tʋli chukkoa tok.

¹⁹ Chihowa hʋt nan achi tuk ʋt imomaka pi̱hi̱sa na, im ʋnnumpa hʋt ont ai a̱hlih nittak a̱ onah ma̱,

²⁰ Mi̱ko ʋt ʋnnumpah pit pilʋt i̱ mukuffi tok; oklah puttah pehlichi ash kia pit pela cha, yuka issʋchi tok.

²¹ Ilap i̱ chukkachʋffa ya̱ i̱ shahli, micha im i̱la̱yak moma ka̱ pehlichi ikbit hilechi tok oke.

²² Yohmi ka̱ ʋlhpesah ahnikmʋt, i̱ kʋpitʋni ʋhleha ha̱ takcha chi̱h, micha im ʋssʋnonchi ʋhleha ha̱ hupoyuksʋla chi̱ kak ʋttok oke.

²³ Atuk o̱ Islael ʋt Echip a̱ ona cha, Chekob ʋt Ham i̱ yakni ya̱ ai a̱ha̱tta tok.

²⁴ Mihma̱ im okla ha̱ ʋpaknʋchih fehna cha, hlampkochi kʋt i̱ tʋnampi ʋhleha ha̱ i̱ shʋlihchi tok.

²⁵ Chu̱kʋsh a̱ filimmechi na, im okla ha̱ i̱ nukkillit, i̱ tishuh ʋhleha ha̱ haksi̱hi̱chi tok.

²⁶ I̱ tishuh Moses a̱, micha ilap ʋt ʋtokuli tuk Elon ittʋtuklo ka̱ pit tihleli tok.

²⁷ I̱ nan isht ʋtukkoa puttah, i̱ na̱ fehna puttah aiena ka̱ Ham i̱ yakni ya̱ okla ha̱ ai i̱ hayaka̱ha̱chit okla tok.

²⁸ Okhlili ho̱ et pela cha, okhlilechi tok; mihma̱ im ʋnnumpa ha̱ ik i̱ sʋnalo kit okla tok.

²⁹ Im oka ya̱ inlʋchit issish ikbi cha, i̱ nʋni ya̱ ʋbit tahli tok.

³⁰ I̱ yakni ya̱ shukʋtti putta kʋt ʋlota tok; i̱ mi̱ko ʋhlehah im ʋboha yak kia aiyasha tok.

³¹ “Ik yohmí,” achih ma̱, wʋhlana holba yʋt ant kohchah ma̱, issʋp kia i̱ yakni ont ai ʋlhih fullota ka̱ ant kohcha tok.

³² Umbah omihchi hosh hʋta̱ffo, luak libbi ho̱ i̱ yakni ya̱ ai ema cha,

³³ I̱ pa̱kkʋpi, i̱ fikʋpi aiena ka̱ issot kanchih mʋt, i̱ yakni ont ai ʋlhih fullotah iti aiyasha ka̱ chulhit kanchi tok.

³⁴ “Ik yohmí,” achih ma̱, ha̱wa, shʋkinli aiena kʋt aholhtina iyiksho hosh ʋlah mʋt,

³⁵ Haiyu̱kpulo i̱ yakni aiyasha ka̱ mominchit ʋpʋt tahlih mʋt, i̱ yakni nan a waya tuk a̱ ʋpʋt tahli tok.

³⁶ Atuk o̱ ʋttahpi, i̱ yakni aiyasha moma ka̱, imi lhampko moiyumah tuba ʋmmona ya̱ issot kanchi tok.

³⁷ Mihmʋt tʋli hʋta, tʋli hulisso lakna aiena ka̱ i̱shi ho̱ pehlichit ishit kohcha tok; apehlichi puttah yʋmma̱ hʋttak ik ʋhoboh imma kʋt iksho ki tok oke.

³⁸ Kohchʋt ilhkolih ma̱, Echip ʋt na̱ yokpa tok; i̱ nukshopah fehna hatuk okʋt.

³⁹ A luma chi̱ ka̱ hushonti ho̱ wʋtʋmmit, ninak a̱ i̱ tohwikelicha chi̱ ka̱ luak o̱ ʋba tʋkalichi tok oke.

⁴⁰ Oklah asilhhah ma̱, kufi ho̱ isht im ʋla tok, mihmʋt ʋba pʋska yo̱ okla ha̱ ishit fihobli tok.

⁴¹ Tʋli chito mitʋffih ma̱, oka yʋt et fuhopah mʋt, okhina yosh chukushmi ya̱ a yʋnʋlli tok oke.

⁴² Im ʋnnumpah hulittopa ya̱ i̱ tishuh Eblaham ittim apesa tok ʋt ithaiyana tok okʋt.

⁴³ Yohmi hatuk osh im okla hʋt na̱ yokpa ho̱, ʋtokuli tok ʋhleha hʋt yukpʋt tʋlo̱ho̱wa ho̱ pehlichit kohcha tok oke.

⁴⁴ Atuk osh oklushi puttah i̱ yakni ya̱ i̱hi̱ma na, oklah putta kʋt toksʋlit nan ʋtahli tuk a̱ ishi tok oke.

⁴⁵ Yohmi ka̱ im ʋnnumpah ʋlhpisa putta ka̱ hulittobli cha, i̱ nan ʋlhpisa putta ka̱ hulittoblit iesha chi̱ kak ʋttok oke. Chihowa ha̱ hu holittoblichíh.