Atʋloa 104 - Chahta Holisso Holitopa 1886

¹ Ʋmish shilombish ma, Chihowa ha̱ ish ayokpʋchashke; a̱ Chitokaka Chihowa ma, chi chintoh fehna hoke; isht a hulittopa chitoh fehna ka̱ ish a foiyukka hoke.

² Yohmi kʋt tohwikeli ha̱ anchi ak o̱ chomihchit ish anchi hoke; ʋba shutik a̱ isht ʋlhtipo nantʋnna yak o̱ chomihchit ish wʋtʋmmi hoke.

³ Yʋmmʋt im ʋba putʋlhpo ya̱ oka yak o̱ ikbit a tʋlali yoke; hushontih putta kak o̱ im itichʋnʋlli ikbi yoke; mahlih sʋnahchi yak o̱ o̱ binilit kʋnʋllit a̱ya yoke.

⁴ Mahlih putta kak o̱ im ʋnnumpah shali ikbi hoke; luak libbi yak o̱ nan isht im ʋtta ʋhleha ikbi hoke.

⁵ Yakni ya̱ nuta i̱ tola ikbit ai o̱ tʋlali tok o̱, yʋmmʋt kʋnʋlla he keyu ho̱ billiʋt billia hoke.

⁶ Ahufobika ya̱ anchi chomihchit isht ish ompohomo na, oka yʋt nʋnih chaha putta ka̱ ompoholmot tʋllaya tok oke.

⁷ Ish im olʋbih ma̱, tʋmoa tok oke; chi̱ hiloha hʋt olah ma̱, tu̱shpʋt tʋmoa kʋt,

⁸ Nʋnih chaha putta kʋt ʋba iya na, okfah putta kʋt akka iah ma̱, kʋnimma ish ai im ʋtahli tuk a̱ ont tʋllaya tok oke.

⁹ Fʋlamʋt yakni ya̱ ik ompohomo ka he mak o̱, im ai ʋlhi ik ʋbanʋblo ka chi̱ ho̱ ish im apesa tok oke.

¹⁰ Kʋlih putta ka̱ okfah pit yʋnʋllechi na, nʋnih itti̱takla ya̱ a yʋna̱ha̱lli hoke.

¹¹ Yakni hayaka nampoa aiyasha putta ka̱ oka ipeta hoke; issubah nashoba nukshopa putta kʋt itukshila tuk ʋt im a yukopa hoke.

¹² Paknaka ya̱ ʋba hushi putta kʋt aiyasha hoke; iti naksish puttah itti̱takla ka̱ binilit awet ai o̱ho̱la hoke.

¹³ Im ʋba putʋlhpo yak o̱ nʋnih chaha putta ka̱ et ai on umbʋchi hoke; yohmi ho̱ nan ish ʋta̱ha̱hli a waya yak o̱ yakni ʋt isht ʋlota hoke.

¹⁴ Nan ʋlhpoa ya̱ hʋsshuk im uffochechi cha, hʋttak ʋt yakni ya̱ illimpa a kohchi hosh isht im ai achukma ka̱, nan uffo a̱ im uffochechi hoke.

¹⁵ Yohmi kʋt oka pa̱kki ʋt hʋttak chu̱kʋsh yokpalikma̱, nʋsshuka ya̱ bila ishit shohmʋlalichikma̱, pʋska yʋt hʋttak chu̱kʋsh a̱ hlampkochih aiena chi̱ kak oke.

¹⁶ Chihowa im iti puttah, chuahla ya̱ Lebanon a hokchi tok a̱ isht a shummit ʋluttoa hoke.

¹⁷ Yʋmma̱ hushi chipinta yʋt ʋlhpicchik ai ikbi hoke; iti kʋsha yaya holba yak okʋto sha̱kulo hak osh i̱ chukka yoke.

¹⁸ Nʋnih chaha putta kak osh issikusoma nukshopa aiasha yoke; tʋli huchito yak osh chukfi holba puttah a luma yoke.

¹⁹ Hʋshi isht ʋlhpisa ya chi ho̱, hʋsh ninak a̱ya ya̱ ikbi tok oke; hʋshi ʋt ai okʋttula hi ʋt ithana hoke.

²⁰ Okhlili ha̱ ish ʋpesakma̱, ninak oke; yohmikma̱ nampoa puttah kowih aiyasha moma kʋt ilhkolit wʋkaya hoke.

²¹ Koi huchito himithoa yʋt im ilhpak a̱ Chitokaka im a hoyo hosh, nan ʋbih bʋnnʋt kili̱hi̱ha hoke.

²² Hʋshi ʋt kohchakma̱, tʋmoa cha, im aiasha ya̱ ont kahpoa hoke.

²³ Hʋttak okʋto atoksʋli micha nan isht ai ʋtta iʋt ont isht a̱ha̱tta na opya hoke.

²⁴ Nan ish ai ʋtahli tok ʋt lawah fehnʋshke, Chihowa ma; im punna hosh yʋmma moma ka̱ ish ikbi tok oke; yakni ʋt na̱ chimmi ya̱ isht ʋluttoʋshke.

²⁵ Ilʋppak osh okhʋtah chitoh micha ʋwatah bieka hoke: yʋmmak o̱ nan ilhkoli aholhtina iksho kʋt nampoa chipunta, huchito aiena hosh aiyasha hoke.

²⁶ Yʋmmak o̱ peni huchito ʋt ai ittʋnnowakma̱, yʋmma̱ ai ihlawʋlla chi̱ ho̱ ish ikbi tok ak o̱, lefayahlan ʋt a̱ya hoke.

²⁷ Ont ai ʋlhpiesakma̱ im ilhpak ish ipeta chi̱ ho̱, yʋmma̱ moma kʋt pit chi anukchieto hoke.

²⁸ Ish ipetakma̱, ayowa hoke; chibbak a̱ ish wʋkʋmmikma̱, nanah achukma ishit fihopa hoke.

²⁹ Chi nʋsshuka ya̱ ish i̱ luhmikma̱, kummunta hoke; im ilhfiopak a̱ ish im ai ishikma̱, illi cha, a tuba tok lukfi a̱ fʋlamʋt tuba hoke.

³⁰ Chimish shilombish a̱ ish pilakma̱, tuba kak o̱, yakni paknaka ya̱ ish himonʋchi hoke.

³¹ Chihowa a hulittopa kʋt abilliashke; Chihowa hʋt nan ʋta̱ha̱hli tuk ʋt isht a yokpashke.

³² Yʋmmʋt yakni ya̱ et o̱ hupo̱koyokma̱, winakʋchi hoke; nʋnih chaha putta ka̱ putolikma̱, shubulli hoke.

³³ Si okcha̱yah ta̱kla kʋt Chihowa ha̱ i̱ tʋlo̱ho̱wa lashke; a̱ha̱tta lih immomah itti̱ta̱kla kʋt a̱ Chitokaka ya̱ nan ulachit ayokpʋche lashke.

³⁴ Yʋmma̱ isht anukfillit tʋlo̱ho̱wa li kʋt i̱ champulashke; ʋno mʋt Chihowa ha̱ isht a sʋ yokpashke.

³⁵ Nan ʋsshʋchi ʋhleha hʋt yakni ya̱ a lushomʋt kʋnnia cha, hʋttak ik ʋlhpeso ʋhleha hʋt himakma̱ iksho kashke: ʋmish shilombish ʋt Chihowa ha̱ ish ayokpʋchashke. Chihowa ha̱ hu holittoblichíh.