Atʋloa 103 - Chahta Holisso Holitopa 1886

Atʋloa Lewi ʋt ikbi tok.

¹ Chihowa ha̱ ish ayokpʋchashke, ʋmish shilombish ma, micha nanah sʋ foiyukkah moma kʋt hohchifoh hulittopa ya̱ ish ayokpʋchashke.

² Chihowa ha̱ ish ayokpʋchashke, ʋmish shilombish ma, mikmʋt nanah achukma momah ʋm ʋta̱ha̱hli tuk a̱ ik chim ʋhakso kashke.

³ Yohmi ka̱ yʋmmak osh nan ik chi ai ʋlhpeso puttah moma ka̱ chi̱ kʋsho̱ho̱ffi, chi ʋbeka puttah moma ka̱ chi hlakuffi̱hi̱chi,

⁴ Chim ilhfiopak a̱ ahulluppi chi a hlʋkuffi̱hi̱chi, isht i̱ hullo micha isht i̱ nukha̱klo aiena ho̱ ishit chiachukoli̱hi̱chi yoke.

⁵ Ish a̱ha̱tta nittak a̱ nanah achukma ishit chi feho̱ho̱bli hatuk o̱, u̱ssi ak o̱ chohmit ʋlbitʋt chi hemitta hoke.

⁶ Inla yosh i̱ pʋlʋmmiche tuk moma ka̱ Chihowa hʋt ai ʋlhpiesa nan im ʋpehi̱sa yoke.

⁷ Im ata̱ya putta ka̱ Moses a̱ im ottʋninchit, na̱ fehna yʋmi̱hi̱chi ya̱ Islael im ʋlla ʋhleha ha̱ im ottʋninchih beka tok oke.

⁸ Chihowa hʋt i̱ nukha̱klo, micha i̱ kana, nukhubelah sʋlaha, micha isht i̱ hullo i̱ lawa yoke.

⁹ Im afoa kʋt abillia he keyukmʋt, nukhubelah ieshi kʋt abillia he keyu hoke.

¹⁰ Yohmi kʋt nan il ʋssha̱ha̱chi ak o̱ ai iakaya hosh na̱ pi kaniomihchih keyukmʋt, na̱ pi yosho̱ho̱ba yak o̱ ai iakaya hosh na̱ pi onucchih keyu hoke.

¹¹ Yohmi kʋt ʋba yʋt chaha kʋt yakni ya̱ i̱ shahli ka̱ chohmit, im isht i̱ hullo yʋt i̱ nukshopa ʋhleha ha̱ onuttoiyula kʋt chinto hoke.

¹² Hʋshakuchaka yʋt hupaki kʋt hʋshaiokʋttula kak o̱ chomihchit, nan ʋlhpisa e kuba̱ha̱ffi tuk a̱ hupakichit pi̱ filʋmmichi yoke.

¹³ I̱ki yosh im ʋlla ʋhleha ha̱ i̱ nukha̱klo ka̱ chohmit, Chihowa hʋt i̱ nukshopa ʋhleha ha̱ i̱ nukha̱klo hoke.

¹⁴ Yʋmmak osh lukfi pia ha̱ ʋkostininchih mʋt, kʋniohmi hosh e tuba tok a̱ ithana hokʋt.

¹⁵ Hʋttak okʋto i̱ nittak ʋt hʋsshuk ak o̱ chohmi hoke; na̱ pʋkanli ʋt hayaka aiyasha kak o̱ chohmit, yʋmmʋt pʋkanli hoke.

¹⁶ Mahli hʋt ʋbanʋblikma̱, iksho hoka̱: yohmikma̱ a hikia tuk ʋt himakma̱ ithana he keyu hoke.

¹⁷ Amba Chihowa im isht i̱ hullo yʋt i̱ nukshopa ʋhleha ha̱ onuttoiyula kʋt abillia tok osh abillia hi oke, micha nan im ai ʋlhpiesa yʋt ushi ʋhleha ha̱ im ʋlla yak kia onʋt onuttoiyula kʋt,

¹⁸ I̱ nan ittim ʋlhpisa hulittobli ʋhlehah, i̱ nan ʋlhpisa putta ka̱ ithaiyanʋt yʋmihchi ʋhleha ha̱ onuttoiyula hoke.

¹⁹ Chihowa hʋt im ai o̱ binili hulittopa ya̱ ʋba yak o̱ a hillechih ma̱, im apehlichika yʋt mominchit a pehliechi yoke.

²⁰ Yohmi hoka̱ hlampkoh i̱ chinto, im ʋnnumpah hʋponaklo hosh im ʋnnumpah yʋmi̱hi̱chi, im enchel hʋchiah ma, Chihowa ha̱ hʋsh ayokpʋchashke.

²¹ Nan isht im ʋtta hʋchia, nan ai ahni ka̱ hʋsh yʋmi̱hi̱chi, i̱ tʋshka puttah ma, Chihowa ha̱ hʋsh ayokpʋchashke.

²² Im apehlichika kʋnimmah momah aiyasha, nan ʋta̱ha̱hli tok puttah momah ma, Chihowa ha̱ hʋsh ayokpʋchashke; Chihowa ha̱ ish ayokpʋchashke, ʋmish shilombish ma.