Atʋloa 102 - Chahta Holisso Holitopa 1886

Nan i̱ pʋllʋmmi ʋt hliposhikmʋt, nan ik im ʋlhpeso hosh Chihowa itikba ya̱ fuho̱ho̱bli ʋnnumpah ilbʋssha ʋnnumpa hoke.

¹ Chihowa ma, ʋm ʋnnumpah ilbʋssha ya̱ ish haklashke; mikma̱ pa̱ha̱ya li kʋt chim onashke.

² A sʋlbʋssha nittak a̱ chi nʋsshuka ya̱ is sa̱ luhmin náh; chi haksubish a̱ et is sa̱ welashke; chi̱ pa̱ha̱ya li nittakma̱, tu̱shpʋt is sʋm aia̱hlichashke.

³ A̱ nittak ʋt shubulli hak o̱ chohmit tʋmoʋt ta̱ha̱hakma̱, sʋf foni ʋt na̱ lua yak o̱ chohmit luʋt taha hoka̱.

⁴ Sʋ chu̱kʋsh a̱ issokma̱, bʋsshi kʋt hʋsshuk ak o̱ chohmi hoke; a̱ pʋska ʋpa la he tuk ʋt ʋm ihaksi hoka̱.

⁵ Kiffa̱ha̱ha li kak o̱, sʋf foni ʋt sʋn nipi ya̱ ʋkʋlloshke.

⁶ Yakni hayaka a̱ha̱tta chʋlantakoba yak o̱ chohmi li hoke; opa hosh chukkillissa a̱ha̱tta kak o̱ chohmi tuba lishke.

⁷ Ik sʋ noso kak osh, hushi iskitini yosh ilap bieka hosh chukka ishit holmo o̱ binnili kak o̱ chohmi li hoke.

⁸ Nittak aiyukali ka̱ a̱ tʋnʋp ʋhleha hʋt ik si ʋhobalot ʋnumpuli hoke; a̱ nukhubela ʋhleha hʋt inla ʋnnumpah onucchi kʋt, sʋ hochifot, yʋmmak o̱ ohmit i̱ pʋllʋmmi hokbano! ahni hoke.

⁹ Hittuk chubi ya̱ pʋska chomihchit ʋpa likmʋt, nan ishko li kʋt, sʋ nishkin okchi ittʋyummit i̱hi̱shko li hoke.

¹⁰ Yohmi ka̱ chim okpuloh, micha chi nukhubela kʋt, ʋba isht is sʋ ia cha kʋnimma pit is sʋ pela kak oke.

¹¹ A̱ nittak putta kʋt hushontika fʋlayʋt ma̱ha̱ya kak o̱ chohmi hoke, mikma̱ ʋno ʋt hʋsshuk ak o̱ chohmit bʋsshi li hoke.

¹² Amba chishno ʋto ish binnili na bilia chi̱ hoke, Chihowa ma; mikma̱ ishit chithaiyana yʋt isht ai unchululi putta ka̱ tʋkkalit ma̱ha̱ya hi oke.

¹³ I̱ kana he ʋlhpiesa nittak, nittak ʋlhpisa yʋt ʋla hoka̱, ish wʋkaya cha Saion a̱ ish i̱ nukha̱klo hokbano!

¹⁴ Chi̱ tishuh ʋhleha hʋt i̱ tʋli putta ka̱ i̱ hullokmʋt, i̱ lukfi pushi ya̱ ishit nukha̱klo hoka̱.

¹⁵ Mikma̱ oklushi putta kʋt Chihowa hohchifo ha̱ i̱ nukshopakma̱, yakni i̱ mi̱ko moma kʋt chim ahulittopa ya̱ hulittoblashke.

¹⁶ Yohmi ka̱ Chihowa hʋt Saion a̱ ikbit, isht a hulittopa ilai ieshi hosh hayakah mʋt,

¹⁷ Nan ik im iksho im ʋnnumpah ilbʋssha ya̱ pit filemʋt i̱ hulittobli cha, im ʋnnumpah ilbʋssha ya̱ ik shitilemo ke tuk ak ashke.

¹⁸ Ilʋppʋt isht ai unchululi himmak aiyasha hi a̱ i̱ hulissa hi oke, mikma̱ oklah tuba hi ʋt Chihowa ha̱ hulittoblicha hi oke.

¹⁹ Im achahaka hulittopa et hupo̱koyot Chihowa hʋt ʋba binnilit yakni ya̱ et pisa hoka̱.

²⁰ Yohmi kʋt yuka kiffa̱ha̱ha ka̱ awet haiyakla chi̱ kak oke; illa chi̱h im ʋlhpisa ʋhleha ha̱ i̱ hutuffa chi̱ kak oke.

²¹ Yohmi ka̱ Saion a̱ Chihowa hohchifoh, micha Chelusalem a̱ a hulittoblichi ai ʋno̱ho̱la chi̱ kak oke.

²² Yohmi ka̱ oklah puttah, micha apehlichika puttah aiena kʋt ittʋhobʋt Chihowa im antia chi̱ hosh ittʋnahakmak a hi oke.

²³ Ata̱ya ya̱ ʋmi lhampko ha̱ ai akka̱lusechishke, a̱ nittak a̱ yustulolichishke.

²⁴ Nan a̱ha̱chi li kʋt, “A̱ Chitokaka ma, a̱ nittak ai iklʋnna ya̱ chik si ai esho kashke; isht ai unchululi ittʋlbihkʋchi ka̱ chim afʋmmi hʋt hlupullit ma̱ha̱ya hoke.

²⁵ “Ʋmmonah ma̱ yakni ya̱ ish ikbi tok, mikma̱ ʋba putta kʋt chibbak atoksʋli tok ak oke.

²⁶ “Yʋmma̱ putta kʋt aksha hi oke, amba chishno ʋto ish hikkia hi oke; mikma̱ yʋmma̱ moma kʋt na̱fohka chohmit litoʋt taha hi oke; ilefohka yo̱ chomihchit ish inlachi na inlʋt tuba hi oke.

²⁷ “Amba chishno ʋto mihi yash inli hosh ish a̱ha̱tta hoke, mikma̱ chim afʋmmi hʋt ont ai ʋlha he keyu hoke.

²⁸ “Chi̱ tishuh im ʋlla ʋhleha hʋt ma̱ha̱ya he, mikma̱ im ishtatiaka yʋt chi tikba hiela hi oke,” achi lishke.