3 Chan 1 - Chahta Holisso Holitopa 1886

Kaiʋs ʋbanumpa anukfoyuka ka im ahninchit miha, 1; 5 i̱ kanʋt hiahni ka im aiokpanchi; 9 Tiotifʋs nan akaniohmi kʋno ʋlhpesa ik im ahno; 12 Temetiʋs ʋno ahninchit isht anumpuli.

¹ Ʋbanumpeshi sipokni yokʋt Kaiʋs holitopa fehna yʋmma ai a̱hli hosh i̱ hullo li chatuk mak o̱ pit ai okpʋchishke.

² Holitopa ma! chi haknip ʋt achukma̱ka cha, i̱ shahlit ia kʋt, chi shilombish ʋt isht i̱ shahlit ia kak inli ho̱ chohma hi a̱ ahni li kak osh nana moma ka ʋm i̱ shahlishke.

³ Il itibapishi ʋhleha hʋt ai ʋla mʋt, nan ai a̱hli ka yʋt a chi anukfoyuka cha, nan ai a̱hli ka ai ish ata̱ya ka atokowa anohonli ka a sa yukpa fehna tok.

⁴ Na sa yukpa kʋt, ʋm ʋlla ʋhleha hʋt nan ai a̱hli ka ya̱ ai itʋnowa na haklo li ka ʋm i̱ shahli kʋt iksho.

⁵ Holitopa ma! il itibapishi ʋhleha, micha hatak itʋnowʋt a̱ya aiena ka nana ho̱ ish ai i̱ kaniohmi kʋt, ish ai a̱hli achukma bieka hoke.

⁶ Yʋmmak ash ot, i̱ hullot ish apelahanchi ka, chʋch a̱ im a chi atokowʋshke; yʋmmak oka nowʋt a̱ya ka Chihowa aiahni ʋlhpiesa ho̱ pit ai ish apelahanchi hokmʋt ish ai ʋlhpiesa he mak oke:

⁷ Yʋmmak okʋt yʋmma hohchifo pulla hatuk mak o̱ Chentail a̱ nanasi kia ik im ai esho hosh itʋnowʋt a̱ya hatuk oka.

⁸ Yohmi hoka pishno ʋt nan ai a̱hlika ya̱ pit ai im apelʋchi pia ha chi̱ kʋt, yʋmma chohmi ka ai okpʋchit nana il im atahanla he ʋlhpiesa hoke.

⁹ Chʋch a̱ pit i̱ holissochi li tok; yohmi kia yʋmma ai i̱ shahli bʋnna hosh Tiotlefes yʋmmak okʋt ik pim ai okpacho tok oke.

¹⁰ Yohmi hoka ʋla li hokmʋt, yʋmmʋt nana a kaniohmi tuk, anumpa okpulo ka isht a pi achukushpʋli tuk: mikmʋt yʋmma illa hokʋto ik im ono mʋt, anonti il itibapishi ʋhleha ha̱ ai okpʋchit nan ik im atahlo mʋt, anonti kanima kʋto yohma he tuk a̱ im alʋmmit, yʋmmak ash chʋch a̱ akocha weli tuk a̱ ithaiyana la he mak oke.

¹¹ Holitopa ma! nana kʋt achukma keyu hokʋno chik iakaiyo hosh, amba achukma kak ashke. Kʋna hosh achukma ho̱ a yohmi hokʋto, Chihowa yʋt anukfoyuka hoke, amba kʋna hosh nan ik achukmo ya̱ yohmi kʋto, Chihowa ya̱ pisa tok keyu mak oke.

¹² Hatak moma, micha nana ai a̱hli ka fehna aiena kash kia Temetiʋs a̱ annoa achukma ka anolishke; a̱hli, micha pishno ak kia yʋmma ai atokoli kʋt il anoli ak inlishke; yohmi kʋt pishno nan il atokoli ka ai a̱hli ka hʋsh ithaiyanʋshke.

¹³ Nana ka holissochi la he ʋt lauʋt a̱sha hatuk: yohmi kia isht holissochi okchi, micha isht holissochi aiena ak okʋno isht pit ak chi̱ holissocho ka chi̱shke:

¹⁴ Yohmi kia chekosikma chi pisʋt, nashuka ai it atokowʋt isht chim anumpuli la chi̱ ka ʋm ahoba hoke, Nan isht il ai yukpa yʋt chi anukfoyukashke. Pi̱ kana ʋhleha hʋt pit chi ai okpʋchishke. Il iti̱ kana ʋhleha ha̱ hochifo cha, pit ish ai okpʋchashke. Amen.