2 Timohli 4 - Chahta Holisso Holitopa 1886

Ai a̱hlit nan a kaniohma he ʋhlpesa kʋt yʋmihcha chi̱ ka i miha, 1; 6 ai illa he nitak ʋt im atikeli, mihmʋt ʋba achukma ka pisa chi̱ im ai a̱hli kʋt im anoli; 9 chekosi im ʋla chi̱ ka i̱ miha; 16 nan i̱ palʋmmi ʋmmona ka nana kʋt kaniohmit onotuyula tok a̱ anoli.

¹ Chihowa, micha Chisʋs Klaist yʋmmak osh ilap apehlichika i̱shit haiakakmʋt, okcha̱ya, micha illi tok aiena ka nan im apihisa he itikba ya̱ hikia hosh na chi̱ miha lishke.

² Yohmi kʋt ʋbanumpa ha̱ isht ish anumpohonlashke, yohmi kʋt nitak ai yʋmohma he ai ʋlhpiesa, ai ʋlhpiesa keyu aiena ka ish achunanchashke; ai atokolit im anumpo honlit, im alʋmminchit nuktaiyala hosh nana ka ish im abahanchit ish atohnohonchashke.

³ Yohmi ka ʋbanumpa ai a̱hli ka haklo ik bʋnno ka hi a̱ nitak ʋt ʋla hi oke: haksobish yauohlichi i̱shi cha, ilap im anukfila okpulo ilaiyuka im antia kak osh nan‐abʋchi la̱wa ka il im itʋnahanla hi oke:

⁴ Mikmʋt ʋbanumpa ai a̱hli ka haksobish a̱ isht i̱ filʋmmit kʋnia cha, anumpa ik ahobo yak o̱ haklo bʋnna toba hi oke.

⁵ Amba chishno yokʋto nan oklu̱ha ka ahah! ahnit, nan ilbʋsha chi onʋtuyula kia chi nuktanlʋt, ʋbanumpa isht anumpuli yʋt nan isht ai ʋtta he tuk a̱ isht ahantʋt, ʋbanumpa isht ish ahanta hi atuk ʋt ish ai a̱hlichi fehnashke.

⁶ Yohmi ka sʋlla chi̱ kʋt anumpa hʋt si onʋtula ho̱, a sʋlla chi̱ kʋt atukonofʋshke.

⁷ Itibi achukma ka itihimbit atahli lishke, nan isht ai ahanta la hi atuk ʋt atahli lishke, ʋbanumpa sai yimmi kʋt ai a̱hli hosh achunanchi lishke:

⁸ Yohmi hoka himak a pilla ma nan isht ai ʋlhpiesa iachukoli la he ʋmmit ituyula, yʋmma nan ai a̱hli apesa, Chitokaka yʋt nitak yʋmmak fehna ka ʋma hi oke: yohmi kʋt ʋno ak bano ho̱ ʋma he keyu, amba ilap ʋt ʋla ka i̱ hullo moyuma aiena ka ima hi oke.

⁹ Chekosi chim ʋlhtaha pulla cha, ai ahanta li ka ish lashke.

¹⁰ Yohmi ka Temas ʋto himonasi yakni ilʋppak inli kak o̱ i̱ hullo hatuk osh, sʋssʋt ia tok: yohmi tuk osh Hlessalonika ya̱ ia tok: Klesens ʋto Kaleshi yak o̱ ia ma, Titʋs ʋto Talmasia yak o̱ ia tok.

¹¹ Luk ak bano hosh si awant anta hoke; Mak ano ilauelit ish lashke; yʋmmak okʋt ʋbanumpa isht ai ʋtta ya̱ a si apela hinla hoka.

¹² Yohmi ma Tikikʋs ano Efesʋs a̱ ia chi̱ ho̱ tohno li tok.

¹³ Nowʋt a̱ya anchi chito ya̱ Kapʋs Tloas anta ka ibbak fohki li tok a̱ ish mintikmʋt, isht is sʋm ʋlashke; yohmikmʋt holisso moma, micha tʋlhko holisso yokak heno isht ish la pullashke.

¹⁴ Aleksanta tʋli lakna nan isht ai ikbi yʋt nan ik achukmo ilaiyuka si onohonchi tok: ilap nana a kaniohmi tok ak o̱ Chitokaka yokʋt isht im atobbashke.

¹⁵ Yʋmmak oka ahah! ish im ahni mak inlashke; yʋmmak okʋt pim anumpa moyuma ka i̱ sanali fehna hatuk oka.

¹⁶ Ʋmmona isht il anumpuli li kʋno hatak achʋfa kia si awant hikia tok keyu; amba hatak moma kʋt sʋssʋt ia tok; yʋmma yʋmohmi tok ʋt isht ik onʋtuyulo hok bano ai ahnit, Chihowa ya̱ im ilbʋsha lishke.

¹⁷ Yohmi kia Chitokaka yʋt si awant hikia tok; micha sa hlampkohonchi na ʋbanumpa isht anumpohonli li chatuk ʋt ai a̱hli fehnʋt ʋno ak o̱ isht ai otʋni ho̱, Chentail moyuma kʋt haiyaklo tok: yohmi ma koi chito itakha ya̱ sa kohchi tok.

¹⁸ Yohmi ka Chitokaka yʋt nana a kaniohmi ik achukmo moyuma ka a sa hlakfihinchi cha, sai okchalinchit ilap ʋba apehlichika ya̱ isht sai ona hi oke: yʋmma isht a holitopa yokʋt immit biliashke. Amen.

¹⁹ Pliska, micha Akuila, micha Onesifolʋs in chuka chʋfa aiokpʋchí.

²⁰ Elastʋs ʋto Kolinhla yak o̱ anta tok; amba Tlofimʋs ʋto abeka hosh Miletʋm ak o̱ itonla ho̱ issʋt minti li tok.

²¹ Chim ʋlhtaha pulla cha, ik hʋshtulo ki̱sha ho̱ ish lashke. Eubulʋs ʋt pit chi aiokpʋchishke, micha Putens, Linʋs, Klautia, micha itibapishi moyuma kʋt pit chi aiokpʋchi mak inlishke.

²² Chitokaka Chisʋs Klaist ʋt chimi shilombish a̱ ibafoyukashke. Isht i̱ kana yʋt chi anukfoyukashke. Amen.