2 Timohli 3 - Chahta Holisso Holitopa 1886

Nan ik ʋhlpeso nitak ʋt ʋla hi a̱ tikbanli anoli, 1; 6 ʋbanumpa in tʋnʋp ʋhleha ha̱ otʋninchi; 10 Timohli ʋt ilap ak o̱ nan im ai ithʋnʋt iakaiya he isht miha; 16 mihmʋt Holisso Holitopa ya̱ ahnichit isht anumpuli.

¹ Ilʋppa ish ithana mak inlashke: yohmi kʋt nitak ishtaiyopit ma̱ha̱yakma, nitak yʋmmʋt nan isht a palʋmmi alotowa hi oke.

² Yohmi ka hatak ʋt ilapunla he, tʋli holisso i̱ hullo, nan isht ilauata, ilefehnʋchi, ʋbanumpa ik ahobalo, i̱ki, ishki ita tuklo ik im antio, Chihowa ya̱ yak oke ik im ai ahno, Chihowa ya̱ ik holitoblo,

³ Im ʋlla i̱ hullo ik im iksho, nan it im ʋlhpisa kobʋffi, inla aholʋbechi, ile oktampli ik ithano, anukfila yohbi iksho, hatak hochukma moyuma ka ik i̱ hullo,

⁴ Ilap i̱ yimmi tuk kia haksichi, ahah! ik ahno, anukfila chaha, haknip nan isht ai yukpa yak bano ho̱ i̱ hullo kʋt Chihowa ya̱ im i̱ shahli;

⁵ Chihowa ya̱ holitobli ilahobi kia, ai a̱hli ka ona hosh yohmi keyu ka he: yʋmma chiyuhmi hokʋno ish i̱ filʋmmashke.

⁶ Yohmi ka ilʋppa chiyuhmi kak osh chuka ya̱ chukowʋt, ohoyo im anukfila iksho, ai ashʋchika isht ompoholmot kʋnia, anukfila ik achukmo ilaiyuka ka im antiʋt ahantʋt;

⁷ Nana ka ithaha̱nʋt bilia kia, anumpa ai a̱hli kʋno achukmalit ithʋna he keyu puta ka yukahanchi hoke.

⁸ Yohmi ka Channes, micha Chambles ita tuklo kʋt Moses a̱ i̱ sanali tok oka, ilʋppak ash kia hatak im anukfila okpulot kʋnia, na yimmi kʋt ai ʋlhpesa keyu hosh anumpa ai a̱hli ya̱ i̱ sanali mak inlishke.

⁹ Yohmi kia himak a pilla ma achakalit ia he keyu; yohmi kʋt Channes micha Chambles ita tuklo atok a̱ chiyuhmit, yʋmmʋt nana a kaniohmi kʋt ai ʋlhpiesa keyu kʋt hatak puta ka im otʋna chi̱ mak inlishke.

¹⁰ Amba nana abahanchi li, kaniohmit ahanta li, nan isht ʋm anukfihinla, nan isht ai ahanta la he tuk ʋt ai a̱hli li, nan ilbʋsha pihi̱sa li kʋt sa nuktaiyala, nan i̱ hullo li, nuktanlʋt achunanchi li,

¹¹ Antiak, Ikoniʋm, Lista aiena ka ahanta li ma, kanimihchit a sa hotopahanli na sʋlbaha̱sha, nan isht ilbʋsha kaniohmi ho̱ pihi̱sa li tok a̱ chishno yokʋt ish ithana fehnʋshke: yohmi kia Chitokaka yokʋt yʋmma moyuma ka a sa hlakofihinchi tok oke.

¹² A̱hli mʋhli, Chisʋs Klaist ibai achʋfa hosh Chihowa im ai a̱hli bʋnna moyuma kʋt nan isht a hotopa he pihi̱sa pulla hi oke.

¹³ Amba hatak ik ʋlhpeso, micha na yoshubli aiena kʋto nan ai ʋlhpesa keyu yohmi kʋt i̱ shahlit ma̱ha̱ya hi oke: yohmi kʋt ilap ʋt yoshuhumba hatuk osh inla ya̱ yoshuhumbla hi oke.

¹⁴ Amba nana ka chishno yʋt ish ai ithʋna tuk ʋt, ai a̱hlit chi yimmi hatuk okʋt ish maha̱yashke: yohmi kʋt kʋna ho̱ ish im ai ithʋna tuk ʋt ish ithaiyanʋshke.

¹⁵ Mikmʋt yʋmma ish ithana kʋt ʋlla chi tomba kash inli hosh Holisso Holitopa ak o̱ ish ai ithʋna tok; yʋmmak okʋt chi hopoyuksacha hinla ho̱ Chisʋs Klaist a i̱ yimmit isht chi okcha̱ya hi oke.

¹⁶ Holisso Holitopa moma ka Chihowa hʋt nukfohkichi ho̱ holissohonchi tok oka; nan isht ʋlbʋchi, nan isht ai atokowa, nan isht kostininchi, nan ai ʋlhpiesa aiena isht pithʋnanchi achukma hoke.

¹⁷ Yohmi hatuk o̱ hatak Chihowa immi hʋt ai a̱hli hosh, nan toksʋli achukma puta ka isht ahanta chi̱ kʋt im ʋltaha achukma hinla hoke.