2 Timohli 2 - Chahta Holisso Holitopa 1886

Timohli ʋt achunanchit Chitokaka in tishu ai a̱hla chi̱ ka Pal ʋt i̱ miha, 1; 16 nana ho̱ ahah! ahna he; 24 mikmʋt Chitokaka in tishu hʋt kaniohmit ai ʋlhpiesʋt im anukfila he im anoli.

¹ Yohmi ka sʋso chia hʋt Chisʋs Klaist nan isht i̱ kana yoka isht ish hlampkashke.

² Nan‐atokowa anoli la̱wa itikba yo̱ chishno yokʋt nana ka is si a haiyaklo tok ʋt, yʋmmak oka hatak ai a̱hli achukma inla ai asha ka nan im abʋcha he ai ʋlhpiesa ak inli kak o̱ ish imashke.

³ Yohmi ka Chisʋs Klaist in tʋshka achukma chia hokʋt na palʋmmi ish pihi̱sa kʋt, ʋlhpesa ish ai ahnashke.

⁴ Hatak kʋna kia tʋshka toba hokʋto, yakni ilʋppa nana a kaniohmi ka isht ataklʋma keyu hoke: tʋshka atokoli tok ak o̱ yukpala chi̱ hosh yʋmohmi hoke.

⁵ Mikma it i̱ shahlichi a̱ bʋnna hosh hatak ʋt achunanchi ak inli mak osh, nan ʋlhpisa yak o̱ holitoblit achunanchi keyu hokʋto, iachukola he keyu hoke.

⁶ Yakni okchali yʋt ʋmmona ka toksʋli ha yak osh nawaya yoka ai ʋpashke.

⁷ Nana chim ahanchi li ka ish anukfihinlashke; mikmʋt nana moma ka ish ithaiyana chi̱ ka Chitokaka yʋt chi anukfohki hokbano.

⁸ Ʋm ʋbanumpa hak atuk mak o̱ Lewi isht ai unchululi Chisʋs Klaist ʋt illi tuk ʋt, falamʋt tani tok a̱ ish ithaiyanʋshke:

⁹ Yʋmmak atuk pulla mak o̱ nan‐ishtakanomi yo̱ chiyuhmit na‐palʋmmi ka pihi̱sa li hosh, pola̱ka sa talaiyakchi tuk oke: yohmi kia Chihowa im anumpa hokʋto talakchi keyu hoke.

¹⁰ Yohmi ka ai‐okcha̱ya pisa he ʋlhtoka tok ʋhleha atuk pulla kak o̱ na‐palʋmmi puta pihi̱sa li kʋt, yʋmmak kia Chisʋs Klaist ʋt ai‐okcha̱ya ataiyahli tok a̱, micha nan isht a holitopa aiena ka isha chi̱ ka si yʋmohmi hoke.

¹¹ Ilʋppʋt anumpa ai a̱hli yoke: il ibai illi hokmʋt, il ibai okcha̱ya chi̱ ak inli hoke.

¹² Nuktanlʋt il achunanchi hokmʋt, il iba mi̱ka he ak inli hoke: Klaist a̱ ak ithanoshke, il achikma, ilap ak kia ik pithano ak inla hi oke:

¹³ Kil i̱ yimmo kia, ilap okʋto ai a̱hlit ahanta: yohmi kʋt ik ile holitoblo ka he keyu hoke.

¹⁴ Ilʋppa puta ka ithana chi̱ mak o̱ ish ithʋnanchashke: yohmi kʋt anumpa illa nan isht achukma he keyu, amba haklot ma̱ya kʋt isht ai okpula hi okʋno isht itachowʋt ik ai asho ka hi o̱, Chitokaka itikba ya̱ anumpa ai a̱hli ka isht ish im apihi̱sashke.

¹⁵ Ʋlhpiesa chi ahni ho̱ Chihowa itikba ya̱ ish hikia chi̱ kʋt ish achunanchashke; yohmi kʋt ish a toksʋli tuk ʋt isht chi hofahya he keyu hosh anumpa ai a̱hli yoka, moyumʋt ai isha he ai ʋlhpiesa ka, ish ita kʋshkolashke.

¹⁶ Yohmikmʋt ʋbanumpa isht ik ahalaio isht anumpa, isht ik ahobo anumpa puta kʋno ish apakfopashke; yʋmmak okʋt Chihowa ik holitoblo i̱ shahli ka ikba hinla hoke.

¹⁷ Mikmʋt im anumpa hʋt kanka yo̱ chiyuhmit okpaha̱na hi oke: yʋmmak oka iba fo̱ka kʋt Himeneʋs, micha Filetʋs ita tuklo kak oke.

¹⁸ Yʋmmak okʋt nan ai a̱hli ka i̱ filʋmmi kʋt, illi falamʋt tani yʋt ant ia tok ahanchi kak atok; mihmʋt na yimmi kaniohmi ka okpʋni hoke.

¹⁹ Yohmi kia Chihowa im intolahpi yʋt kʋllo ai a̱hli hoke: anumpa ilʋppak osh ai o̱ holisso kak o̱, Ilap immi ka Chitokaka yʋto ithana hoke. Mikmʋt Klaist hohchifo hochihi̱fo kʋt moyumʋt nan ai ʋlhpesa keyu ka i̱ filʋmmashke.

²⁰ Yohmi kia chuka chinto anuka̱ka ya̱ nan ai ʋlhto tʋli holisso lakna, micha tʋli hʋta isht a toba aiena kak bano hosh fo̱ka chatuk keyu, amba iti, micha lukfi isht a toba kak kia aiena ak inli chatuk; yohmikma kaniohmi kʋto isht a fehnakma, kaniohmi kʋto isht a kʋllakshi chatuk oke.

²¹ Yohmi ka ilʋppak ash kʋna hosh ai i̱ filʋmmi hok mʋto, nan ai ʋlhto holitopa hosh kashofʋt, i̱ shahli ha̱ isht im ahanta chi̱ kʋt im ʋlhtaha hosh, nan toksʋli achukma puta ka isht ahanta chi̱ kʋt im ʋlhtaha hoke.

²² Haui anukfila himita immi ha̱ tu̱shpʋt ish i̱ filʋmmi mak inlashke; amba nan ai ʋlhpiesa, nan ai a̱hli, it i̱ hullo, micha it i̱ nanaiya aiena ish yʋmohmi kʋt, chu̱kʋsh kashofa Chitokaka isht a hochihi̱fo kak o̱ ish ibai achʋfashke.

²³ Amba isht a hopoyuksa he keyu anumpa tasimbo yokʋno chik ahalaio kashke; mikmʋt yʋmmak okʋt itachowa ikbi yoka ish ithanashke.

²⁴ Mikmʋt Chitokaka in tishu hokʋt itachowa he ʋlhpesa keyu, amba hatak moma i̱ kana, nan im abʋchi kʋt imponna, nan im okpulot isht ilbʋsha kia, nuktanla aiena ʋlhpesa:

²⁵ Im anukfila yohbi hosh ʋbanumpa i̱ sanali ʋhleha yoka nan im abʋchi ʋlhpesa; yohmik mak o̱ Chihowa hʋt nukfohki na ile kostininchit, ʋbanumpa ai a̱hli ka achukmalit ithana yoba ná:

²⁶ Yohmikmʋt nan isht a hullo okpulo i̱ nan isht hokli ya̱ ai i̱ hlakofa hinla; yʋmmak osh ilap ai ahni hosh yʋmmak ash o̱ yukahanchi hatuk oke.