2 Timohli 1 - Chahta Holisso Holitopa 1886

Timohli i̱ hullo kʋt Pal ʋt isht anumpuli, 1; 6 Chihowa nan isht i̱ kana anukfoyuka tok ʋt i̱ shahlichit isht im anukfihinla hi na̱ im achi.

¹ Chihowa nana ai ahni ho̱ Chisʋs Klaist im apostel Pal ʋt ai okcha̱ya Chisʋs Klaist ʋt ataiyahli tok a̱ anohonla chi̱ hosh iso i̱ holitopa fehna Timohli ya̱ aiokpʋchishke;

² Nan isht i̱ kana, isht i̱ nukha̱klo, micha isht it i̱ nanaiya aiena kʋt I̱ki Chihowa, micha pin Chitokaka Chisʋs Klaist ita tuklo ka a mihinti kʋt chi anukfoyukashke.

³ Chihowa ya̱ yak oke im ai ahni li kʋt, an tikba ʋhleha hʋt kaniohmit aiokpahanchi beka tok a̱ chiyuhmit anukfila kashofa ho̱ isht aiokpahanchi li kʋt, ak isso hosh nitak, ninak moyuma ka anumpa ilbʋsha anumpohonli likmʋt, chithaiyana lishke:

⁴ Yohmi kʋt chi nishkin okchi mihinti tok a̱ ithaiyana li mʋt, chi pisa sa bʋnna fehna, yʋmohmit sai yukpa ai a̱hli fehna hokbano ai ahni lishke;

⁵ Yohmi kʋt na yimmi ai a̱hli kʋt chi anukfoyuka ka ithaiyana li mʋt, chipokni Lois ak o̱ ʋmmona ka yʋmmʋt anukfoyuka tok osh, anonti chishki Yunis a̱ anukfoyuka tok osh, chishno ak kia chi anukfoyuka ka sai yimmi akinlishke.

⁶ Yʋmohmi hoka sʋbbak chi onochi li tok ak o̱ nana Chihowa ish i̱ habena tok ʋt chi anukfoyuka, yʋmma achukmalit ish okchʋla chi̱ mak o̱ chim anohonli lishke.

⁷ Yʋmohmi ka anukfila isht nukshopa keyu, amba isht hlampko, mikmʋt isht i̱ hullo, mikmʋt isht a hopoyuksa aiena anukfila ho̱ Chihowa hʋt pima tok oka.

⁸ Yohmi ka pin Chitokaka im anumpa atokowa, mikmʋt yʋmma atuk pulla mak o̱ yuka sia aiena ka chik i̱ hofahyo hosh; amba ʋbanumpa ak atuk pulla mak o̱ nan isht palʋmmi puta ka Chihowa hʋt chi hlampkohonchi mak o̱ isht ish ibai ilbʋshashke;

⁹ Yʋmmak osh pi okchalinchi cha, ʋba nan isht ilaiyuk pa holitopa ho̱ il iesha he mak o̱ pi atokoli kʋt, pishno nan il ai isha he ai ʋlhpiesa kak o̱ yohmi keyu, amba ilap nan isht im anukfihinla hosh, yakni ik tobo pilla kash inli ho̱ ilap isht i̱ kana ya̱ Chisʋs Klaist ak atuk pulla mak o̱ pihi̱ma kak a tok oke:

¹⁰ Amba pi Okchalinchi Chisʋs Klaist ʋt ʋla kak osh himonasi kʋno isht i̱ kana ya̱ otʋninchi kʋt, nan‐illi ho̱ imaiyachit kanchi cha, ai okcha̱ya micha ai illa he keyu aiena ka ʋbanumpa ak pulla kak o̱ isht otʋninchishke:

¹¹ Yʋmmak atuk pulla mak o̱ ʋbanumpa isht ʋtta, micha apostel, micha Chentail ʋhleha nan im abʋchi aiena si ʋlhtoka tok oke.

¹² Yʋmmak atuk pulla mak o̱ na‐palʋmmi puta ilʋppa aiena ka pihi̱sa li; yohmi ak inli kia sa hofahya he keyu; kʋna ho̱ i̱ yimmi li hatuk ʋt ithana li hokʋt; mikma nana ka i̱sha chi̱ ho̱ ibbak fohki li tok a̱ i̱shi na nitak yʋmma ona he bano ka i̱ sai yimmishke.

¹³ Anumpa ai a̱hli achukma is si a haklo tok ʋt, Chisʋs Klaist isht i̱ yimmi, micha isht i̱ hullo aiena ka kʋllot ish ieshashke.

¹⁴ Shilombish Holitopa pi anukfo̱ka kak osh chi apihinla na nana achukma ish iesha chi̱ ho̱ chima tok a̱ ish ieshashke.

¹⁵ Chishno yokʋt ilʋppa ish ithana; yohmi kʋt Asia ai asha tuk ʋt moyumʋt a̱ filʋmmit kʋnia tok: yʋmma iba fo̱ka kʋt Fichellʋs, micha Hemochenes ita tuklo kak oke.

¹⁶ Onesifolʋs in chuka chʋfa yoka Chitokaka yʋt i̱ nukna̱klok bano, yʋmmak okʋt sai yukpahanli beka tok oka, mi cha yukʋt sa talaiyakchi ka ik sa̱ hofahyo ki tok.

¹⁷ Amba Lom a̱ ont anta mʋt, achunanchi fehna hosh sa hoho̱yo cha, si ahayuchi tok.

¹⁸ Chitokaka yokʋt ʋlhpesa im ai ahni na nitak yʋmmak oka Chitokaka yʋt i̱ nukha̱klo ka ahayuchi hok bano; micha Efesʋs a̱ ont anta li ma, nana la̱wa kaniohmi ka isht si apelahanchi tok a̱, chishno yokʋt ish ithana fehnʋshke.