2 Samuel 9 - Chahta Holisso Holitopa 1886

¹ Mihma Lewi ʋt, Sal in chuka achʋfa ya̱ ai achʋfa kʋt okcha̱ya tuk o̱, Chonahlan ak atuk pulla kak o̱ i̱ kana la hinla cho? achi tok.

² Micha Sal in chuka achʋfa ya̱ tishu achʋfʋt anta hosh yʋmmʋt hohchifo kʋt Siba atok. Mihma okla hoyo cha, Lewi ya̱ isht im ona ma, mi̱ko ʋt, Siba chia hoh cho? im achi tok. Mihma, Chin tishu hʋt mihiyo yoke, achi tok.

³ Mihma mi̱ko ʋt, Sal in chuka achʋfa ya̱ ai achʋfa kia anta tuk o̱, Chitokaka im isht i̱ kana ya̱ i̱ yʋmihchi la hinla cho? achi tok. Mihma Siba ʋt mi̱ko ya̱, Chonahlan ak osh ushi achʋfa kʋt im anta momʋshke, micha yʋmmʋt iyi imomokpulo yoke, achi tok.

⁴ Mihma mi̱ko ʋt, Katima anta cho? achi tok. Mihma Siba ʋt mi̱ko ya̱, Yakeh! Loteba yak o̱ Ammiel ushi Machi in chuka ak o̱ anta hoke, achi tok.

⁵ Mihma Lewi ʋt hoyo cha, Ammiel ushi Machi in chuka Loteba talaia ka akohchit isht ʋla tok.

⁶ Atuk o̱ Sal ushi Chonahlan a̱ ushi Mefiboshelh ʋt Lewi ya̱ im ʋla mʋt, nashuka ishit hlipia cha, aiokpʋchi tok. Mihma Lewi ʋt, Mefiboshelh ma! achi tok. Mihma afalaminchit, Yakeh! chin tishu hoke, achi tok.

⁷ Mihma Lewi ʋt, Chi nukshopa ná: chi̱ki Chonahlan ak atok pulla kak o̱, chi̱ kana li pulla chi̱, micha chi̱ki Sal i̱ vakni atok moma ka chi̱ falʋmminchi la chi̱ hoka: mikma ʋm ai impa ak o̱ ish ai ihimpa na bilia chi̱ hoke, im achi tok.

⁸ Mihma il aka chunolechi cha, Chin tishu hʋt nanta ho̱ ofi illi sa chiyuhmi ka chi holhponayo hanta ya̱ ish onocha hinla cho? achi tok.

⁹ Yohmi ma mi̱ko ʋt Sal in tishu, Siba ya̱ i̱ howa cha, Chi̱ shahli ushi ya̱ Sal, micha in chuka achʋfa moma nana ahala̱ya tok moma ka ima lishke.

¹⁰ Yohmi hoka chishno, micha chiso ʋhleha, micha chin tishu ʋhleha aiena kʋt yakni yash hʋsh i̱ pilisa cha, nana awaya ka chi̱ shahli ushi ya̱ ishit hʋsh la na ilhpak ʋpa chi̱ kʋt im a̱shashke: yohmi kia chi̱ shahli ushi Mefiboshelh ʋto ʋm ai impa ak o̱ ai ihimpa na biliashke, im achi tok. Mihma Siba ʋt ushi ʋhleha hʋt im auah tahlapi cha, in tishu ʋhleha hʋt i̱ pokoli tuklo tok.

¹¹ Yohmi ma Siba ʋt mi̱ko ya̱, A̱ shahli mi̱ko ʋt in tishu im apesa tuk mak o̱, chin tishu hʋt yʋmihcha chi̱ hoke. Mi̱ko ʋt Mefiboshelh ak okʋto mi̱ko ushi ʋhleha hak inli ho̱ chohmit, ʋm ai impa ak o̱ ai ihimpa chi̱ hoke.

¹² Mihma Mefiboshelh ʋt ushi ʋt ʋlla yosh hohchifo kʋt Micha yosh im anta tok. Mihma Siba in chuka achʋfa aiasha kʋt moma kʋt Mefiboshelh in tishu ʋhleha hatok.

¹³ Yohmi hosh Mefiboshelh ʋt Chelusalem ak o̱ ʋtta tok: mi̱ko im ai impa ak o̱ ai ihimpa na bilia hatuk okʋt: micha iyi yʋt iti champʋt imomokpulo atok.