2 Samuel 8 - Chahta Holisso Holitopa 1886

¹ Atuk osh ilʋppa i̱ himmakma, yakohmi tok, Lewi ʋt Filistin ʋhleha ha̱ issot kanchi cha, imaiya tok: micha Lewi ʋt Mehlek‐ammah ha̱ Filistin ʋhleha ibbak a̱ akohchit im ishi tok.

² Micha Moab a̱ issot kanchi tok, micha akʋchit taiyahli cha, aseta isht apesa tok; aseta tuklo pulla ho̱ ʋba chi̱ kʋt isht apesa mʋt, aseta achʋfa ʋlhpiesa kano okchalincha chi̱ hatok. Mihma yohmi ho̱ Moab okla hʋt Lewi ya̱ i̱ nutaka cha, na hʋlbina puta ka isht im ʋla tok.

³ Lewi ʋt i̱ yakni ai ʋhli Euflates okhina ya̱ falʋmminchit isha chi̱ hosh iʋt a̱ya mʋt, Lehob ushi Hatatese Sobah i̱ mi̱ko ya̱ issot kanchi tok.

⁴ Micha Lewi ʋt tʋnʋp itichanʋlli tahlepa sipokni achʋfa, micha issuba om binili ʋt tahlepa untuklo, micha aka a̱ya hatak tahlepa sipokni pokoli tuklo ho̱ im ishi tok: micha Lewi ʋt issuba itichanʋlli shali ya̱ iyi̱kala̱kshish a̱ tʋptuli tok, amba itichanʋlli tahlepa achʋfa shali yo̱ apoanchi tok.

⁵ Atuk o̱ Silian ʋhleha Tamaskʋs minti kʋt Sobah i̱ mi̱ko Hatatese ya̱ apelʋt ona ma, Lewi ʋt Silian ʋhleha ha̱ ai achʋfa tahlepa sipokni pokoli tuklo akucha tuklo ho̱ ʋbi tok.

⁶ Yohmi mʋt Lewi ʋt Silia Tamaskʋs a̱ tʋshka chipota ai ashachi tok: mihma Silian okla hʋt Lewi ya̱ i̱ nutaka cha, nahʋlbina puta ka isht im ahanla tok. Atuk o̱ Lewi ʋt kanima iakma, Chihowa ʋt okchalinchi beka tok.

⁷ Mihma Lewi ʋt tʋli holisso lakna telihpa puta Hatatese in tishu ʋhleha hʋt ieshi tuk a̱ ishi cha, Chelusalem a̱ isht ʋla tok.

⁸ Micha Betah, micha Belohlai aiena Hatatese in tʋmaha holihta puta ka asonak lakna laua atampa ho̱ mi̱ko Lewi ʋt ai ishi tok.

⁹ Atuk o̱ Hamalh i̱ mi̱ko Toi ʋt, Lewi ʋt Hatatese in tʋshka chipota moma ka issot kanchi tuk o̱ haklo mʋt,

¹⁰ Hatatese ya̱ itibi cha, issot kanchi tuk ak o̱, Toi ʋt aiokpʋchi cha, anumpa yukpali onocha chi̱ ho̱, ushi Cholam a̱ Lewi mi̱ko ya̱ i̱ pila tok: (Hatatese ʋt Toi ya̱ it in tanampi hatuk oka.) Micha Cholam ʋt nana ai ʋlhto tʋli hʋta, micha nana ai ʋlhto tʋli holisso lakna, micha nana ai ʋlhto asonak lakna aiena ka ieshi hosh ʋla tok:

¹¹ Yʋmmak kia mi̱ko Lewi ʋt okla inla puta imaiya cha, tʋli hʋta, micha tʋli holisso lakna im ishi cha, hullochi tok ibafohkit Chihowa ya̱ i̱ hullochi tok;

¹² Silia, micha Moab, micha Ammon in chipota ʋhleha, micha Filistin okla, micha Amalek, micha Lehob ushi, Sobah i̱ mi̱ko Hatatese i̱ nawehpoa puta im ai ishit Chihowa ya̱ i̱ hullochi tok.

¹³ Micha Lewi ʋt hʋpi okfa ya̱ Silian tahlepa sipokni auah untuchina ho̱ ʋbit a̱yʋt falamʋt, hohchifo ilai ishi tok.

¹⁴ Micha Etom a̱ tʋshka chipota ai ashachi tok: Etom a̱ hlopulli moma ka tʋshka chipota ai ashachi na Etom aiasha moma kʋt Lewi ya̱ i̱ nutaka tok. Mihma Chihowa ʋt Lewi ʋt kanima iakma, okchalinchi beka tok.

¹⁵ Mihma Lewi ʋt Islael moma ka i̱ mi̱ko tok: micha Lewi ʋt nan ʋlhpisa, micha ai ʋlhpiesa aiena kak o̱ im okla moma ka im apihi̱sa tok.

¹⁶ Mihma Seluiah ushi Choab ak osh tʋshka chipota ya̱ pehlichi tok: mikma Ahilut ushi Chehoshafat ak osh holisso takalichi atok.

¹⁷ Mikma Ahitub ushi Satok, micha Abiahla ushi Ahimelech itatuklo kak osh naholitompa isht a̱shwa tok: mikma Selaiah ak osh holissochi atok.

¹⁸ Mikma Chehoiata ushi Benaiah ak osh Chelehlait ʋhleha, micha Pelehlait ʋhleha aiena ka pehlichi atok: mikma Lewi ushi ʋhleha hʋt pehlichi ʋhleha i̱ shahli hatok.