2 Samuel 7 - Chahta Holisso Holitopa 1886

¹ Atuk o̱ yakohmi tok, Chihowa ʋt in tʋnʋp ʋhleha apakfoyupʋt aiasha moma ka im aiyachi cha, fohachi ma, mi̱ko yash osh in chuka ya̱ binili mʋt,

² Mi̱ko ʋt hopaii Nahlan a̱, Yakeh! chuahla chuka yo̱ ahanta lishke; amba Chitokaka im itombi holitopa ʋt nantʋnna takali ho̱ anu̱kaka ya̱ talaiʋshke, im achi tok.

³ Mihma Nahlan ʋt mi̱ko ya̱, Ia cha, chi chu̱kʋsh nana chi nukfoyuka kʋt moma ish yʋmihchashke: Chihowa ʋt chibafoyuka hoka, im achi tok.

⁴ Atuk o̱ yakohmi tok, yʋmma ninak a̱ Chihowa im anumpa hʋt Nahlan a̱ im ʋlʋt,

⁵ Ia cha, an tishu Lewi ya̱ ont im anolit, Chihowa ʋt yak achishke, Ai ahanta la chi̱ chuka ya̱ is sʋm ikba chi̱ cho?

⁶ Yakohmi ik chokʋsh osh Islael im ʋlla ʋhleha ha̱ Echip isht a kohchʋt minti li tok takla, himak nitak ant ʋhli ka chuka nana ho̱ ai ʋtta li chatuk keyu, amba ʋlhtipo, micha tabenakel o̱ a noho̱wa li chatuk oke.

⁷ Kanima moma Islael im ʋlla ʋhleha iba nohowa li kʋt, Islael apehlichi puta achʋfa kia ʋm okla Islael puta ka pehlicha he im apihi̱sa li kia, Nanta katiohmi ho̱ chuahla chuka hʋch ik sʋm ikbo cho? achi li tok oh cho? ish achashke, achi tok.

⁸ Yʋmohmi hoka himak a̱ in tishu Lewi ya̱ yakohmichit ish im achaske, Ʋba nan oklu̱ha il aieshi Chihowa ʋt yak ahanchishke, Ʋm okla Islael a̱ pehliecha chi̱ ho̱ chukfʋlhpoa iakaiyʋt a̱ya tuk a̱, chukfʋlhpoa ai asha ya̱ chi ai ishi li tok oke:

⁹ Micha kanima yo̱ ish iakma, chibafoyuka li tuk oke, micha chin tʋnʋp moma ka chi tikba ya̱ ai ishit kanchi li tuk, micha yakni hatak hochitoka hohchifo ha̱ chohmichit hohchifo chito chim ikbi lishke.

¹⁰ Micha ʋm okla Islael ai asha yo̱ im apesa lish, hokchi la chi̱ hoke, yohmikma ilap immi aiasha yosh aiasha cha, himakma ik kanʋllo ka chi̱ hoke; mikma himakma nan ashʋchi in chipota ʋhleha hʋt tikba chatuk chohmichit ilbʋshala he keyu hoke.

¹¹ Micha nanapesa yosh ʋm okla Islael a̱ pehliecha he apihi̱sa li tok takla ka, chiyuhmichit chin tʋnʋp moma ka imaiyachit chi fohachi li tuk oke. Micha Chihowa ʋt chuka chim ikba chi̱ kʋt chim anolishke.

¹² Atuk osh chi̱ nitak ʋlhpisa kʋt ont taha na chi̱ki ʋhleha ta̱kla chi nusikma, chi ai unchololi yʋt chikfoka a kohcha tuk ak inli hosh chiakaiya ka hilechi likmʋt, im apehlichika ya̱ kʋllochit hilechi la hi oke.

¹³ Yʋmmak osh sa hohchifo ishit holitopa he chuka ʋm ikbikma, im apehlichika ai om binili ya̱ kʋllochit hilechi li̱ bilia hi oke.

¹⁴ I̱ki sia hokma, sʋso ahi oke. Nana ik ʋlhpeso yʋmohmikma, hatak fuli yo̱ ishit hotopali la hi oke, micha hatak im ʋlla ʋhleha ishit fʋma aiena ho̱ ishit kostininchi la hi oke:

¹⁵ Yohmi kia ai isht i̱ nukha̱klo li yokʋto i̱ filʋmmit kʋnia he keyu, Sal a̱ im ai ishi lish, Sal a̱ chi tikba ai ishit kanchi li tok, yʋmmak oka chohma he keyu hoke.

¹⁶ Micha chi tikba ya̱ chin chuka achʋfa, micha ish apehlichika aiena kʋt kʋllot hikia na bilia hi oke: micha ish ai om binili ʋt kʋllot hikia na bilia hi oke, achi tok.

¹⁷ Yohmi ho̱ anumpa ilʋppa puta, micha nan im otʋni ilʋppa moma aiena kak o̱, Nahlan ʋt Lewi ya̱ im anumpuli tok.

¹⁸ Yʋmohmi ma mi̱ko Lewi ʋt chukowa cha, Chihowa itikba ya̱ binili cha, Kʋta sia hoh cho? Chitokaka Chihowa ma! micha an chuka achʋfa ʋt nanta ho̱ himak a̱ ant ʋhli ka isht is sa̱ mihinti tuk oh cho?

¹⁹ Mihma yohmi ak inli kia nana ilʋppʋt chi tikba ya̱ iskitinishke, Chitokaka Chihowa ma! amba chin tishu in chuka achʋfa ak kia nitak hopaki pilla minti ka isht ish anumpulishke, Chitokaka Chihowa ma! hatak ʋt a yohmi chatuk oh cho?

²⁰ Micha himakma Lewi ʋt nanta ho̱ chim acha hinla cho? Chitokaka Chihowa ma! chishno ʋt chin tishu ha̱ ish ithana hoka.

²¹ Chim anumpa pulla kak o̱, micha chi̱ chu̱kʋsh ai ahni pulla hosh nana afehna ilʋppa puta ka ish yʋmihchi kʋt, chin tishu ha̱ ish ithʋnancha chi̱ hatuk oke.

²² Yʋmohmi hokʋt chi holitopʋshke, Chitokaka Chihowa ma! pi haksobish ʋt haiyaklo tuk pulla moma ka chishno chiyuhmi kʋt iksho, micha inla kʋt Chitokaka ʋt iksho hoka.

²³ Micha okla achʋfa nanta hak osh yakni paknaka aiasha kʋt chim okla Islael, yʋmmak oka Chitokaka ʋt falʋmminchit, im okla ikbit ilai ishit, mnicha hohchifo ilai ikbit chishno ya̱, micha chi̱ yakni ya̱ nana chinto, micha nana palʋmmi ka chim okla itikba ya̱ a yʋmihchit, yʋmmak oka falʋmminchit chumpʋt Echip a̱ akohchit, micha okla puta, micha i̱ naholbʋt toba aiena puta ka a kohchit, ish ilai ihi̱shi tuk chohmi cho?

²⁴ Islael a̱ chim okla ikbit ish ilai ieshi na bilia chi̱ hoka; micha Chihowa chishno ak osh in Chitokaka ish tobʋshke.

²⁵ Micha Chitokaka Chihowa ma! himak a̱ chin tishu ha̱ nana ish achi tuk, micha in chuka ya̱ nana ish achi tuk ʋt kʋllochit ish hilechi na biliashke, micha nana ish ahanchi tuk ʋt ish yʋmihchashke.

²⁶ Micha chi hohchifo kʋt holitopa na biliashke, Ʋba nan oklu̱ha il aieshi Chihowa ak osh Islael in Chitokaka yoke, ahanchashke: mikma chin tishu Lewi in chuka achʋfa yʋt chi tikba ya̱ kʋllot hikia na biliashke.

²⁷ Ʋba nan oklu̱ha il ai eshi Chihowa, Islael in Chitokaka ma! chishno ak osh chin tishu im otʋninchit, Ʋno ak osh chuka ya̱ chim ikbi la chi̱ hoke, ish achi tuk oka: yʋmohmi hoka chin tishu hʋt anumpa ilbʋsha ilʋppa chu̱kʋsh si anukfoyukʋt chim asilhha lishke.

²⁸ Yohmi ka himak a̱ Chitokaka Chihowa ma! chishno ak osh Chitokaka yʋmma chia, micha chim anumpa hʋt a̱hli hoke, micha nana achukma ilʋppa chin tishu ha̱ ish im ihi̱sa tuk oke.

²⁹ Yʋmohmi hokʋt himak a̱ chin tishu in chuka achʋfa ya̱ ish yukpali na chi tikba ya̱ hikia na biliashke: Chitokaka Chihowa chishno ak osh ish anumpuli tuk okʋt: micha chin tishu in chuka achʋfa yʋt nan isht ish yukpali ya̱ ishit yukpa na biliashke, achi tok.