2 Samuel 5 - Chahta Holisso Holitopa 1886

¹ Yohmi ma Islael apehlichi puta moma kʋt Lewi ʋt Heblon anta tuk o̱ im ona cha, im anumpulit, Yakeh! chi foni pia, micha chi nipi pia yoke.

² Micha Sal ʋt pi̱ mi̱ko moma ma, chishno ak osh Islael a̱ pehlichit ish kohoncha, micha pehlichit ish ahanla tok: mihma Chihowa ʋt, Ʋm okla Islael a̱ is sam pehlicha chi̱ hoke, micha Islael a̱ ish i̱ mi̱ko achi̱ hoke, achi tok.

³ Yʋmohmi hosh Islael im asʋnonchi ʋhleha hʋt mi̱ko Heblon anta tuk o̱ im ona tok; mihma mi̱ko Lewi ʋt Heblon ak o̱ Chihowa itikba ya̱ anumpa ai itibai achʋfa it im apesa tok: mihma Lewi ya̱ nan ahʋmmit Islael i̱ mi̱ko okla atokoli tok.

⁴ Lewi ʋt afʋmmi pokoli tuchina hosh mi̱kot isht ia tuk osh, afʋmmi pokoli ushta ho̱ mi̱ko tok.

⁵ Heblon a̱ ahantʋt afʋmmi untuklo, micha hʋshi hannali ho̱ Chutah ya̱ i̱ mi̱ko tok; micha Chelusalem a̱ ahantʋt afʋmmi pokoli tuchina cha, akucha tuchina ho̱ Islael moma, micha Chutah ya̱ i̱ mi̱ko tok.

⁶ Mihma mi̱ko, micha in tʋshka ʋhleha aiena kʋt Chelusalem a̱ onʋt yakni yʋmma ai oklʋt aiasha Chebusait ʋhleha ha̱ im ona tok: yʋmmak ash osh Lewi ya̱ im anumpulit, Ik hoponayo, micha imomokpulo aiena kak o̱ ishit ish kanchi keyukmʋt, ilʋppa ish chukowa he keyu, achi tok: Lewi ʋt ont chukowa he keyu, im ahoba cha.

⁷ Yohmi kia Lewi ʋt Sion holihta kʋllo ya̱ ishi tok: yʋmmak osh Lewi in tʋmaha holihta mak oke.

⁸ Mihma nitak yʋmma Lewi ʋt, Kʋna hosh oka ai yanʋlli ya̱ oiya cha, Chebusait ʋhleha, micha imomokpulo, micha ik hoponayo aiena Lewi imi shilombish i̱ nukkilli ka issot kanchikmʋt, i̱ shahli, micha kʋpitʋni ya chi̱ hoke, achi tok. Ik hoponayo, micha imomokpulo aiena yʋmmak kia chuka yash chukowa he keyu, achi hatuk oke.

⁹ Mihma Lewi ʋt holihta yash ai ʋtta cha, Lewi in tʋmaha holihta hochifo tok. Mihmʋt Lewi ʋt chuka ikbit apakfoblit, Millo yak o̱ ai isht iʋt anu̱kaka isht ia tok.

¹⁰ Mihmʋt Lewi ʋt isht i̱ shahlit chitot ishit ma̱ha̱ya tok; mihma ʋba nan oklu̱ha il aieshi Chitokaka Chihowa ʋt ibafoyuka tok.

¹¹ Mihma Hilam Taia i̱ mi̱ko ʋt Lewi ya̱ anumpa shali ʋhleha ha i̱ pila mʋt, chuahla iti, micha chuka ikbi, micha tʋli toksʋli aiena puta ka i̱ pila tok.

¹² Mihma Lewi ʋt, Chihowa ʋt Islael i̱ mi̱ko ikbit kʋllochit hilechi tuk, micha im okla Islael pulla kak o̱ im apehlichika ya̱ kʋllochit hilechi ka ithaiyana tok.

¹³ Mihmʋt Lewi ʋt Heblon a̱ ai ʋttʋt ʋla ha yʋt himakma tekchi, micha im itaiena ka Chelusalem a̱ ai ishi tok: micha Lewi ʋt ushi ʋhleha, micha ushetik ʋhleha aiena kʋt himakma im asha tok.

¹⁴ Chelusalem a̱ ai im asha tok ʋt hoh hifo kʋt ilʋppak oke; Shammah, micha Shobab, micha Nahlan, micha Solomon,

¹⁵ Micha Ibha, micha Elishua, micha Nephek, micha Chaphia,

¹⁶ Micha Elishama, micha Eliata, micha Eliphalet ak atok.

¹⁷ Mihma Lewi ak o̱ nan ahʋmmit Islael i̱ mi̱ko atokoli tok a̱ Filistin okla hʋt haklo mʋt, Filistin moma kʋt Lewi ya̱ hoyot ʋla tok; mihma Lewi ʋt haklo mʋt, holihta yash ont chukowa tok.

¹⁸ Mihma Filistin ʋhleha hak kia okfa Lefaim ak o̱ ant ile patali tok.

¹⁹ Mihma Lewi ʋt Chihowa ya̱ i̱ ponaklot, Filistin ʋhleha aiasha ka ia la chi̱ cho? sʋbbak a̱ ish fohka chi̱ cho? achi tok. Mihma Chihowa ʋt, Ish iashke, chibbak a̱ fohki li pulla chi̱ hoka, im achi tok.

²⁰ Mihma Lewi ʋt Baal‐pelasim ona cha, ai issot kanchi tok; micha, Chihowa ʋt sa tikba ya̱ an tʋnʋp a̱ o̱ kinafa kʋt oka kinafa kak inli chiyuhmishke, achi tok. Yʋmohmi hatuk o̱ yʋmma Baal‐pelasim hochifo tok.

²¹ Mihma yu̱mmak inli i̱ naholbʋt toba puta ka kanchi tok; mihma Lewi micha in tʋshka ʋhleha hʋt hukmi tok.

²² Atuk o̱ Filistin ʋhleha hʋt himakma anonti ʋla cha, okfa Lefaim ak o̱ ile patali tok.

²³ Mihma Lewi ʋt Chihowa ya̱ i̱ ponaklo ma, Ish ia he keyu: amba apakfopʋt a̱sha ka ish ona cha, bihi iti foka ichapaka yak o̱ ish a sakka chi̱ hoke.

²⁴ Atuk o̱ yakohma chiké, ia na bihi iti puta paknaka ya̱ ish a haiyaklokmʋt, ish ile tu̱shpʋlechashke; yohmikma Chihowa ʋt chi tikba kohchʋt Filistin tʋshka chipota ya̱ issot kancha chi̱ hosh ia chi̱ hoke, achi tok.

²⁵ Mihma Lewi ʋt Chihowa ʋt i̱ miha tuk mak o̱ yʋmohmi tok; micha Filistin ʋhleha ha̱ issot kanchit, Keba ʋttʋt isht ia kʋt Kase ish ona ka isht ona tok.