2 Samuel 4 - Chahta Holisso Holitopa 1886

¹ Atuk o̱ Sal ushi ʋt, Abne ʋt Heblon a̱ ai illi tuk a̱ haklo mʋt, ibbak ʋt kota tok; mihma Islael moma kʋt komunta tok;

² Mihma Sal ushi ʋt hatak tuklo hosh a̱ya achʋfa i̱ kʋpitʋni bi̱ka yosh im a̱shwa tok: achʋfa hohchifo kʋt Baanah okma, achʋfa hohchifo kʋt Lechab Beelohlait hatak Limmon ushi tuklo, Benchamin im ʋlla ʋhleha ai achʋfa hatok: (Beelolh ak kia Benchamin iba holhtina tuk oka.

³ Atuk osh Beelohlait ʋhleha hʋt yihlepʋt Kiltaim a̱ ona tuk osh, yʋmmak o̱ aiasha na himak nitak a̱ ant ai ʋhli hoke.)

⁴ Mihma Sal ushi Chonahlan ʋt ushi yosh iyi imomokpulo yosh im anta tok: yʋmmʋt afʋmmi tahlapi ho̱, Sal, micha Chonahlan itatuklo ka annoa kʋt Chesleel a̱ minti hosh ʋla ma, ilaueli ʋt sholi cha, maleli tok: atuk o̱ yakohmi tok, tu̱shpʋt maleli ma, ont itula cha, iyi imomokpulo tok. Micha yʋmma hohchifo kʋt Mefiboshelh atok.

⁵ Mihma Beelohlait hatak, Limmon ushi Lechab, micha Baanah itatuklo kʋt kohchʋt, nitak lʋshpʋt taha foka ho̱ Ishboshelh in chuka itʋlachi tok: yʋmmʋt tʋbokoli ho̱ in topa ho̱ itonla tok.

⁶ Atuk o̱ onush a̱ isht ia chi̱ chohmi hosh aboha yash iklʋna ya̱ ant chukowa tok; atuk osh naksi foni ishit tahlapi nuta ya̱ issot okla tok: micha Lechab, micha itibapishi Baanah itatuklo kʋt tihlaya tok.

⁷ Aboha ya̱ ant chukowa ma, aboha a nusi ya̱ in topa itonla tuk oka issot ʋbi mʋt, noshkobo ha̱ tʋbli mʋt, noshkobo ha̱ ishi cha, yakni patali ya̱ hlopullit ninak a̱ a̱ya na onna tok.

⁸ Micha Lewi ʋt Heblon a̱ anta tuk o̱ Ishboshelh noshkobo ha̱ isht im ona tok; micha mi̱ko ya̱, Yakeh! chin tʋnʋp chim ilhfiopak hoho̱yo tuk Sal ushi Ishboshelh noshkobo yoke; mihma Chihowa ʋt a̱ shahli mi̱ko ya̱ himak nitak a̱ im il aiokhʋt Sal, micha im ai unchololi ya̱ onochishke, im achi tok.

⁹ Mihma Lewi ʋt afalamichit Beelohlait hatak Limmon ushi tuklo Lechab, micha itibapishi Baanah ya̱, Chihowa ʋt okcha̱ya pulla ka, yʋmmak osh ʋmi shilombish a̱ ai ilbʋsha puta ka a sa hlakofichi tok pulla ka,

¹⁰ Achʋfa kʋt nana achukma ho̱ ʋm anoli im ahobʋt, Yakeh! Sal ʋt illishke, achi ma, ishi lish, nana ʋm anoli ka im atobbi la hi a̱ im ahoba tuk kia, Siklak a ai ʋbi li tuk oka:

¹¹ Hatak haksi ʋhleha yosh hatak ʋlhpesa ya̱ ilap in chuka, micha in topa itonla ho̱ ai ʋbi kʋt i̱ shahli onʋtola he ʋlhpesa keyu cho? yʋmohmi hoka im issish a̱ hʋch ibbak a̱ a hoyo lish, yakni ya̱ a kohchit ishit hʋchi kanchi la he ʋlhpesa keyu cho? im achi tok.

¹² Mihmʋt Lewi ʋt hatak himithoa im asha tuk ʋt im apesa ma, okla ʋbi cha, ibbak, micha iyi aiena ka tʋptuli cha, Heblon oka talaia ka paknaka takohlichi tok: amba Ishboshelh noshkobo hano okla ishi cha, Abne im ahollopi Heblon ak o̱ a hohpi tok.