2 Samuel 3 - Chahta Holisso Holitopa 1886

¹ Yʋmohmi ma Sal in chuka achʋfa, micha Lewi in chuka achʋfa aiena kʋt itin tanampi na hopaki tok: yohmi kia Lewi ʋt kʋllo kʋt isht i̱ shahlit isht ia ma, Sal in chuka achʋfa ʋto ik kʋllo kʋt isht i̱ shahlit isht ia tok.

² Mihma Lewi ʋt Heblon a̱ ushi ʋhleha im ai asha tok: micha akni fehna ʋt Chesleel ohoyo Ahinoam ʋt im eshi tok Amnon ak atok.

³ Mihma im atukla kʋt Kamelait hatak Nabal tekchi atok Abikail ʋt im eshi tok Chileab ak atok: mikma atuchina kʋt Keshu i̱ mi̱ko Talmai ushetik Maakah a̱ ushi Absalom ak atok.

⁴ Mikma ont ai ushta kʋt Hakkilh a̱ ushi Atonichah ak atok; mikma ont ishit tahlapi kʋt Abital a̱ ushi Shefatiah ak atok.

⁵ Mikma ont ishit hannali kʋt Lewi tekchi Eklah ʋt im eshi tok Ilhleam ak atok. Ilʋppa puta kak osh Lewi ʋt Heblon ak o̱ im ai asha tok.

⁶ Atuk o̱ yakohmi tok, Sal in chuka achʋfa, micha Lewi in chuka achʋfa ʋt itin tanampi moma ma, Abne ʋt ile kʋllohonchit Sal in chuka achʋfa ya̱ apelʋchi tok.

⁷ Mihma Sal ʋt im itaiena ʋt Aiah ushetik osh yʋmma hohchifo kʋt Lispah osh im a̱sha tok: atuk o̱ Ishboshelh ʋt Abne ya̱, Nanta katiohmi ho̱ a̱ki im itaiena ya̱ ish iba nusi tuk oh cho? im achi tok.

⁸ Mihma Ishboshelh ʋt im anumpuli tuk pulla kak o̱, Abne ʋt nukhobela kʋt libbi fehna mʋt, Ʋno ʋt ofi noshkobo sia hoh cho? Chutah ya̱ im asanalit chi̱ki Sal in chuka achʋfa, itibapishi puta, micha i̱ kana puta aiena ka i̱ kanʋt Lewi ibbak a̱ ak chi fohko hokak o̱, ohoyo ilʋppa nan ashʋchi iti̱ yʋmohmi li tuk a̱ is sa̱ miha cho? achi tok.

^9-10 Chihowa ʋt anumpa kʋllo ya̱ il onochit, Lewi ya̱ im achi tok a̱ ʋno ak kia yʋmihchi lashke, yohmi kʋt Sal in chuka achʋfa apehlichi ka tosholit, Lewi ak o̱ im ai om binili holitompa hilechit Tan ʋttʋt ia kʋt, Beesheba ont ai ʋhli Islael, micha Chutah aiena ka pehlichi ikbi lashke; ak yʋmihchokma yakohmi, micha i̱ shahli kia Chitokaka yʋt Abne ya̱ yʋmihchashke, achi tok.

¹¹ Mihma i̱ nukshopa hatuk osh, Abne ya̱ anonti afalamichit anumpa achʋfa im acha he keyu tok.

¹² Mihma Abne ʋt ilap ahni kʋt Lewi ya̱ anumpa shali ʋhleha ha̱ i̱ pila cha, Yakni ʋt kʋta hak o̱ immi hoh cho? anumpa itibai achʋfa is sʋt im apesakma, micha yakeh! sʋbbak ʋt chibafoyuka cha, Islael moma ka fullolichit ishit chim ʋla lashke, achi tok.

¹³ Mihma, Ome; anumpa itibai achʋfa chit im apesa lashke: yohmi kia nana achʋfa ho̱ chi̱ hoyo lishke, yʋmmʋt ilʋppak oke, sa nashuka ya̱ pisʋt ish a̱yakmʋt, Sal ushetik Michal a̱ tikba isht is sʋm ʋlá, keyukmʋt, sa nashuka ya̱ ish pisa he keyushke, achi tok.

¹⁴ Mihma Lewi ʋt Sal ushi Ishboshelh a̱ anumpa shali ʋhleha ha̱ i̱ pila cha, Sa tekchi Michal a̱ Filistin tikba hakshup tahlepa achʋfa ho̱ isht il ai apoʋchi li tok a̱, sʋbbak a̱ ish fohkashke, achi tok.

¹⁵ Mihma Ishboshelh ʋt pit hoyot, i̱ hatak Laish ushi Faltiel a̱ im ishi tok.

¹⁶ Mihma i̱ hatak ʋt iakaiyʋt olbʋl a̱ yaha̱yʋt a̱yʋt, Bahulim a̱ ona tok. Yohmi ma Abne ʋt, Falamit iá, im achi tok. Mihma falama tok.

¹⁷ Mihma Abne ʋt Islael im asʋnonchi ʋhleha ha̱ anumpa it imʋt, Cha̱shpo ka Lewi ya̱ hʋchi̱ mi̱ko ya chi̱ ho̱ hʋsh hoyo tok oke.

¹⁸ Yʋmohmi tok okʋt himak a̱ hʋsh yʋmihchashke: Chihowa ʋt Lewi ya̱ isht anumpulit, An tishu Lewi ibbak ak o̱ ʋm okla Islael a̱ Filistin okla ibbak, micha in tʋnʋp moma ibbak a̱ akohchit ishit hlakofichi la hi oke, achi tok oka, achi tok.

¹⁹ Mihmʋt Abne ʋt Benchamin ak kia haklochit im anumpuli tok: micha Abne ʋt Heblon a̱ ia cha, Lewi ak kia haklochit Islael a̱ kaniohmi kak osh im ʋlhpesa moma ka, micha kaniohmi kak osh Benchamin in chuka achʋfa moma kʋt im ʋlhpesa ka im anumpuli tok.

²⁰ Yohmi hosh Abne, micha hatak pokoli tuklo aiena hosh Lewi ʋt Heblon a̱ anta tuk o̱ im ona tok: mihma Lewi ʋt Abne, micha hatak apehʋt a̱ya tuk aiena ka impʋchi tok.

²¹ Mihma Abne ʋt Lewi ya̱, Wakaya lish, ia likmʋt, Islael moma ka a̱ shahli mi̱ko ya̱, im itʋnahli lashke; mikma anumpa itibai achʋfa okla chit im apesakma, chi chu̱kʋsh ahni kʋt moma ish pehliechashke, im achi tok. Mihma Lewi ʋt Abne ya̱ pila na iti̱ kanʋt a̱ya tok.

²² Mihma yakeh! Lewi in tishu ʋhleha, micha Choab aiena kʋt nawehpuli a̱ya achʋfa ka hlioli tuk ʋt falama cha, na wehpoa chinto isht ʋla tok: yohmi kia Abne ʋt Lewi Heblon anta ka takla ik anto tok; yʋmmʋt pila na iti̱ kanʋt a̱ya tuk atuk okʋt,

²³ Atuk o̱ Choab, micha tʋshka chipota apehʋt a̱ya tuk ʋt ʋla ma, Choab a̱ im anolit, Ne ushi Abne ʋt mi̱ko im ʋla tuk o̱, pila na iti̱ kanʋt ia tuk oke, achi tok.

²⁴ Yohmi ma Choab ʋt mi̱ko ya̱ im ʋla cha, Nanta mak o̱ ish yʋmihchi cho? yakeh! Abne ʋt chim ʋla tuk oke; nanta katiohmi ho̱ ish pila na iʋt kʋnia cho?

²⁵ Ne ushi Abne ya̱ ish im ithanʋshke, yʋmmʋt chi haksichit, kohchʋt ish ia, micha ant ish chukowa aiena, micha nana ish kaniohmi moma ka akostinincha chi̱ hosh ʋla tuk oke, achi tok.

²⁶ Atuk osh Choab ʋt Lewi ya̱ i̱ filʋmmit kohcha mʋt, anumpa shali ʋhleha ha̱ pila na yʋmmʋt Silah kʋli hofobi yak o̱ ont ai ishit, anonti isht ʋla tok: yohmi kia Lewi ʋt ik ithano tok.

²⁷ Atuk o̱ Abne ʋt falamʋt Heblon a̱ ʋla ma, Choab ʋt lumʋt im anumpula chi̱ hosh naksika holihta okhissa ya̱ isht ona cha, itibapishi Asahel im issish atuk pulla mak o̱ naksi foni ont ishit tahlapi nuta ya̱ bahli na illi tok.

²⁸ Atuk o̱ Lewi ʋt himmak o̱ haklo cha, Chihowa itikba ya̱ ʋno, micha ʋm apehlichika aiena kʋt Ne ushi Abne im issish a̱ a si ahalaia keyu a bilia hoke.

²⁹ Choab noshkobo, micha i̱ki in chuka achʋfa moma kak o̱ onʋtoyulashke; micha Choab in chuka achʋfa ya̱ haiyehchi okchusbʋt yanʋlli, keyukmʋt leplosi ʋbi, keyukmʋt tʋbi ieshi, keyukmʋt bʋshpo falaia onʋtola, keyukmʋt pʋska ik im ono aiena kʋt ik im iksho kʋt iksho kashke, achi tok.

³⁰ Yʋmohmi hosh Choab, micha itibapishi Abishai itatuklo kʋt Kibeon a̱ ai itibi ma itibapishi Asahel a̱ ʋbi tok ak o̱ Abne ya̱ ʋbi tok.

³¹ Mihma Lewi ʋt Choab, micha okla moma ka, Hʋchi̱ nafohka ya̱ hʋsh hlilʋffit, nahishi nantʋnna ishit hʋsh ʋskofʋchi cha, Abne itikba ya̱ hʋsh yaiyashke, im achi tok. Mihmʋt mi̱ko Lewi ak kia nipi illi om bohlit isht ia ya̱ iakaiya tok.

³² Mihma Abne ya̱ Heblon ak o̱ okla hohpi tok: mihma mi̱ko ʋt chitolit Abne ahollopi ya̱ a yaiya tok; mihma okla moma kʋt yaiya tok.

³³ Micha mi̱ko ʋt Abne ya̱ ishit yaiyʋt, Im anukfila iksho illi hak inli ho̱ chohmit, Abne ʋt illi keyu cho? achi tok.

³⁴ Chibbak ʋt talakchi tuk keyu, micha chiyi ak kia tʋli ʋlbeha tuk keyushke: hatak osh hatak haksi yo̱ itikba itula kak inli chohmit chitulʋshke, achi tok. Mihma okla moma kʋt anonti ishit yaiya tok.

³⁵ Mihma okla moma kʋt Lewi ya̱ nitak tala̱ya moma ho̱ impʋcha chi̱ hosh ʋla ma, Lewi ʋt anumpa kʋllo il onochit anumpulit, Yakohmi, micha i̱ shahli kia Chitokaka ʋt si yʋmihchashke, hʋshi ʋt ik okʋtulo ki̱sha ho̱ pʋska, keyukmʋt nana hoh kia ʋpʋt pisa likma, achi tok.

³⁶ Mihma okla moma kʋt yohmi ahnit pisa mʋt, aiokpanchi tok: yohmit mi̱ko ʋt nana ho̱ yohmikma, okla moma kʋt aiokpanchi atuk okʋt.

³⁷ Mi̱ko ʋt Ne ushi Abne ya̱ ʋbi ka ahni tuk keyu ka nitak yʋmma okla moma, micha Islael moma kʋt ithaiyana hatuk okʋt.

³⁸ Mihma mi̱ko ʋt in tishu ʋhleha ha̱, Islael a̱ hatak holitompa, micha hatak chito hosh himak nitak a̱ itula ka hʋchik ithano cho?

³⁹ Yohmi na himak nitak a̱ nan ahamʋt mi̱ko si ʋlhtoka ak inli kia, ik sa kʋlloshke: micha Seluiah ushi hatak ʋhleha ilʋppʋt a̱ kʋllo atʋpʋshke. Nana ik achukmo yʋmihchi nan ashʋchi tuk ai it ʋlhpiesa kak o̱ Chihowa ʋt im atobba hi oke, im achi tok.