2 Samuel 24 - Chahta Holisso Holitopa 1886

¹ Anonti Chihowa im ai i̱ nukkilli ʋt Islael a̱ i̱ sanalit libbi tok; Lewi ya̱ anukfohki na, Ia cha, Islael micha Chutah ya̱ ish hohtinashke, im achi tok oke.

² Mihma mi̱ko ʋt tʋshka chipota ʋhleha i̱ kʋpitʋni ibafoyuka tuk Choab a̱, Himak a̱ ia cha, Islael apehlichi moma Tan ʋttʋt ia kʋt Bee‐sheba ont ʋhli ka hlopullit, okla ha̱ ish hotihnashke, yohmi na okla holhtina ka ithana lashke, im achi tok.

³ Mihma Choab ʋt mi̱ko ya̱, Yohmi ka holhtina kʋt ik kaniohmi hoh kia chin Chitokaka Chihowa ʋt okla ha̱ in lohmi tahlepa achʋfa ka ibafohkashke, mikma a̱ shahli mi̱ko nishkin ʋt pisashke: yohmi kia nanta katiohmi ho̱ a̱ shahli mi̱ko ʋt nana ilʋppa isht im achukma cho? im achi tok.

⁴ Yohmi kia mi̱ko im anumpa hʋt Choab, micha tʋshka chipota i̱ kʋpitʋni ʋhleha aiena ka imaiya tok. Mihma Choab, micha tʋshka chipota i̱ kʋpitʋni ʋhleha aiena kʋt Islael okla ha̱ hotihna chi̱ hosh mi̱ko itikba ya̱ a kohchʋt ia tok.

⁵ Mihmʋt Chatan a̱ hlopullit ia mʋt, tʋmaha holihta okhina Kat iklʋna talaia im ishtimpak imma, Chase pilla Aloe yak o̱ ont binachi tok.

⁶ Yohmi mʋt Kileat a̱ okla ona cha, Tahtim‐hotshi yakni ya̱ ona tok: micha Tan‐chaan a̱ ona mʋt, fullotʋt Siton a̱ ona tok.

⁷ Micha Taia holihta kʋllo ya̱ onʋt, Hifait okla in tʋmaha holihta puta, micha Kenanait okla in tʋmaha holihta puta moma ka ona tok: micha Chutah ya̱ im oka mahli pilla okla iʋt Bee‐sheba ont ʋhlichi tok.

⁸ Yʋmohmi tuk osh yakni moma ka hlopullit taiyahli mʋt, hʋshi chakkali cha, nitak pokoli tuklo kʋt ont taha ma, Chelusalem a̱ okla ʋla tok.

⁹ Mihma Choab ʋt okla holhtina moma ka mi̱ko yash ant ima tok: mihma Islael a̱ hatak chilita nukwia iksho bʋshpo falaia ieshi kʋt tahlepa sipokni tahlepa untuchina tok: mikma Chutah hatak ʋhleha hʋt tahlepa sipokni tahlepa tahlapi tok.

¹⁰ Atuk o̱ okla ha̱ hotihna hayak o̱, Lewi chu̱kʋsh ʋt nʋhli tok. Mihmʋt Lewi ʋt Chihowa ya, Yʋmma yʋmihchi li kʋt ashʋchi li fehna tuk oke: yohmi ka Chihowa ma! himak a̱ chin tishu nanashʋchi ya̱ isht ish kanʋllichashke, chim asilhha lishke; ʋm anukfila iksho hosh yʋmihchi li tuk oka, im achi tok.

¹¹ Onnahinli Lewi ʋt tani ma, Chihowa im anumpa hʋt hopaii Kat, Lewi i̱ napisa ya̱ im ʋla cha,

¹² Ia cha, Lewi ya̱ yak im achí, Chihowa ʋt, Nana tuchina ho̱ chin takalichi lishke; achʋfa ho̱ ish atokolashke, yohmikma chi̱ yʋmihchi lashke, yak achishke, ish im achashke, achi tok.

¹³ Yohmi ma Kat ʋt Lewi ya̱ im ʋla cha, im anolit, Afʋmmi untuklo hohchʋfo hosh chi̱ yakni ya̱ chim ʋla chi̱ cho? ak cho? hʋshi tuchina ho̱ chin tʋnʋp puta kʋt chi hlioli na ish in chaha̱fa chi̱ cho? ak cho? ililli okpulo ʋt nitak tuchina ho̱ chi̱ yakni ya̱ a̱ya chi̱ cho? himak a̱ ish anukfilli cha, anumpa falama kaniohmi ho̱ et sa pila tuk a̱ falʋmmichit isht im ona la chi̱ ka ish mihashke, im achi tok.

¹⁴ Mihma Lewi ʋt Kat a̱, Ai atikonofa fehna ho̱ hikia lishke: himak a̱ Chihowa ibbak ak o̱ e fohkashke; isht i̱ nukha̱klo ʋt chinto hoka; micha hatak ibbak ano ak fohko kashke, im achi tok.

¹⁵ Yohmi ho̱ Chihowa ʋt Islael a̱ ililli okpulo et onochi na onnahinli yo̱ isht ia mʋt, nitak ʋlhpisa tuk ont ai ʋlhpiesa tok: mihma okla illi kʋt Tan ʋttʋt iʋt Bee‐sheba ont ʋhli ka hatak tahlepa sipokni pokoli untuklo tok.

¹⁶ Atuk o̱ enchel ʋt Chelusalem a̱ issot kancha chi̱ hosh ibbak weli ma, Chihowa ʋt nana ik achukmo ka ishit nukha̱klo mʋt, okla issot kanchi enchel a̱, Ʋlhpesá, himak a̱ chibbak a̱ ish issʋchashke, im achi tok. Mihma Chihowa im enchel ash osh Chebusait hatak Alaunah im anihechi yak o̱ bili̱ka hikia tok.

¹⁷ Atuk o̱ Lewi ʋt okla issot kanchi enchel a̱ pisa mʋt, Chihowa ya̱ im anumpulit, Yakeh! ʋno ak osh nan ashʋchit, ʋno ak osh nan ik ʋlhpeso fehna yʋmihchi li tuk oke: yohmi kia chukfʋlhpoa ilʋppʋt nanta ho̱ katiohmi tuk oh cho? chibbak ʋt ʋno, micha a̱ki in chuka achʋfa yak o̱ i̱ sanalashke, chim asilhha lashke, achi tok.

¹⁸ Mihma Kat ʋt nitak yʋmma Lewi ya̱ im ʋla cha, Ia cha, Chebusait hatak Alaunah im anihechi ya̱ alta Chihowa ya̱ im ikbit ish hilechashke, im achi tok.

¹⁹ Mihma Chihowa ʋt nana apesa na Kat ʋt achi tuk mak o̱, Lewi ʋt ia tok.

²⁰ Mihma Alaunah ʋt hopo̱koyo mʋt, mi̱ko, micha in tishu ʋhleha aiena kʋt minti na pisa tok. Micha Alaunah ʋt kohcha cha, mi̱ko itikba ya̱ akachunolit nashuka ya̱ aka ishit hlipia tok.

²¹ Mihma Alaunah ʋt, Nanta katiohmi ho̱ a̱ shahli mi̱ko ʋt in tishu ha̱ im ʋla cho? achi tok: mihma Lewi ʋt, Chim anihechi ya̱ chumpa lish, Chihowa ya̱ alta im ai ikbi likma, ililli okpulo ʋt okla ha̱ i̱ yokopa chi̱ kak oke, achi tok.

²² Mihma Alaunah ʋt Lewi ya̱, A̱ shahli mi̱ko ʋt nana kak osh im ʋlhpesakmʋt, ishi cha, isht aiokpʋchashke: yakeh! na hukmit isht aiokpʋchi ʋto wak ʋt yak hinlishke, iti yokʋto nana ishit nihechi, micha wak ishit toksʋli aiena kʋt yak a̱shʋshke, im achi tok.

²³ Nana ilʋppa puta moma ka Alaunah ʋt mi̱ko chohmit mi̱ko yash ima tok. Micha Alaunah ʋt mi̱ko ya̱, Chin Chitokaka Chihowa ʋt chim aiokpʋchashke, im achi tok.

²⁴ Mihma mi̱ko yash osh Alaunah ya̱ Ahá! amba ʋlbi ho̱ chin chumpa li pulla chi̱ hoke: micha an Chitokaka Chihowa ya̱ nana a̱ kʋnia tuk keyu hokʋto na hukmit isht aiokpʋchi la he keyu hoke. Yohmi ho̱ Lewi ʋt anihechi, micha wak aiena ka tʋli hʋta shekel pokoli tahlapi ho̱ chumpa tok.

²⁵ Mihma Lewi ʋt Chihowa ya̱ yʋmma alta im ai ikbi cha, na hukmit isht aiokpʋchi puta, micha it i̱ nanaiyʋchi isht aiokpʋchi puta aiena ka im issa tok. Yohmi ho̱ yakni ya̱ isht ilbʋshʋt anumpuli ka Chihowa ʋt ʋlhpesa im ahni na ililli okpulo ʋt yokopa tok.