2 Samuel 23 - Chahta Holisso Holitopa 1886

¹ Micha Lewi im anumpa ishtaiyopi kʋt ilʋppak oke. Chesse ushi Lewi ʋt, micha chahʋchit ʋba binilechi tok hatak ʋt, Chekob in Chitokaka nan ahamʋt im ʋlhtoka, micha Islael in taloa imponna yʋt yak ahanchi tok.

² Chihowa imi Shilombish ʋt sa tohno na anumpuli li tok; micha im anumpa hʋt sa sunlʋsh a̱ a takali tok.

³ Islael in Chitokaka ʋt yak achi tok, Islael in Tʋli chito ʋt ʋm anumpulit, Hatak ʋhleha ha̱ pehlichi kʋt aiʋlhpiesa he ʋlhpesa, Chitokaka ya̱ i̱ nukwia hosh pehliecha he ʋlhpesa hoke.

⁴ Micha onnahinli tohwikeli hʋshi ʋt kohchʋt mihinti kak o̱, onnahinli hoshonti iksho, hʋshuk waloha achukma yosh umbʋt issa cha, tommi shohkaualikma yakni offot a kohcha kak o̱ chiyuhma he ʋlhpesa hoke, achi tok.

⁵ An chuka achʋfa yʋt Chitokaka ya̱ i̱ yʋmohmi keyu ak inli kia, yohmi kia nana it im ʋlhpisa bilia sa tim apihi̱sa tok ai oklu̱hʋt ʋlhtaiyaha cha, ik a̱hlo keyu ka hi oke: ilʋppak osh ai okcha̱ya li ʋt yʋmmak bano hoke, micha yʋmmak bano ho̱ ai ahni li hoke, offochi keyu ki̱sha ak inli kia.

⁶ Yohmi kia Belial hatak ʋhleha kʋno moma kʋt kʋti ishit kanchi ya̱ chohma hi oke, ibbak a̱ isht isha he keyu hoka.

⁷ Amba kʋna hosh potola hinlakmʋt, tʋli yo̱ im ʋlhtaha he ʋlhpesa, tʋbi falaia tʋli halupa ontʋla yo̱ iesha he ʋlhpesa hoke; mikma yʋmmak inli ho̱ luak okla ishit luʋt ʋmohma hi oke, achi tok.

⁸ Hatak hlampko chilita ʋhleha hosh Lewi ʋt im a̱sha tok hohchifo kʋt ilʋppak oke. Tachmonait hatak kʋpitʋni ʋhleha i̱ noshkoboka yosh ai om binili om binili tok; yʋmmʋt Esnait hatak Atino ak atok; tahlepa tuchina ho̱ in tʋbi tʋli halupa ontʋla o̱ weli mʋt, himonna achʋfa ka ʋbit tahli tok.

⁹ Micha yʋmma iaka̱ya kʋt Ahohait hatak Toto ushi Eleasa, yʋmmʋt Islael hatak ʋhleha hʋt kanima iʋt taha tuk o̱, Filistin ʋhleha hʋt itiba chi̱ hosh iti hoyot itʋnaha ma, hatak hlampko chilita tuchina Lewi apeha hosh pa̱fi tuk a̱ ibai achʋfa tok.

¹⁰ Yʋmmʋt wakaya cha, Filistin ʋhleha ha̱ issot kahanchi mʋt, ibbak ʋt tikambi cha, bʋshpo falaia ya̱ ibbak ʋt a kʋllo tok: mihma Chihowa ʋt nitak yʋmma imaiyʋchichi fehna tok: mihma okla hʋt peh wehpula chi̱ hosh falamʋt iakaiya tok.

¹¹ Mihma iaka̱ya kʋt Halalait hatak Akee ushi Shammah ak atok: atuk o̱ Filistin ʋhleha hʋt iti hoyot itʋnaha cha, yakni iskitini tubi hullo aiasha ho̱ nan ʋlhpoa ʋpa hoyot lokoli tok: mihma okla hʋt Filistin ʋhleha itikba ya̱ yihlepa tok.

¹² Yohmi kia yakni yash iklʋna hikia cha, afoho̱wa mʋt, Filistin ʋhleha ha̱ ʋbit tahli tok: mihma Chihowa ʋt imaiyʋchichi fehna tok.

¹³ Atuk o̱ noshkoboka pokoli tuchina ka tuchina hosh nan ʋmo ai ʋlhpesa ho̱ iʋt Atullam hichukbi Lewi ai ʋtta ka ona tok: mihma Filistin tʋshka chipota hʋt Lefaim okfa hak o̱ binachi tok.

¹⁴ Yohmi ma Lewi ʋt hichukbi yo̱ anta tok; mihmʋno Filistin tʋshka chipota hʋt Behlehem ak o̱ aiasha tok.

¹⁵ Mihma Lewi ʋt bʋnna fehna cha, Kʋna kia Behlehem kʋli hofobi holihta okhissa bili̱ka hiki̱a ka, oka ont ai ishit ant sapetak bano, achi tok.

¹⁶ Mihma hatak hlampko chilita tuchina kash osh Filistin tʋshka chipota ya̱ tiʋblit hlopulli cha, Behlehem kʋli hofobi holihta okhissa bili̱ka hikia tuk ont ai ochit ishi cha, Lewi ya̱ isht ʋla tok: yohmi kia ishka he keyu hosh, amba Chihowa ya̱ in hlatʋbli tok.

¹⁷ Micha, Ilʋppa chiyuhmi ka yʋmihchi la hi ʋt olanli iksho kashke, Chihowa ma! ilʋppʋt ilap im ilhfiopak a̱ ishkʋnʋpachit ia tuk issish mak keyu cho? achi tok: yʋmohmi hatuk osh ishka he keyu tok. Ilʋppa puta ka hatak hlampko chilita tuchina ilʋppak ash osh yʋmihchi tok.

¹⁸ Mihma Choab itibapishi Seluiah ushi, Abishai ak osh tuchina ka i̱ noshkoboka atok: in tʋbi tʋli halupa ontʋla o̱ weli cha, tahlepa tuchina ho̱ ʋbit tahli tok: micha hohchifo hʋt tuchina kak o̱ ibafoyuka tok.

¹⁹ Holitopa kʋt tuchina kash i̱ shahli tok keyu cho? yʋmohmi hosh pehlichi atok: yʋmohmi kia tuchina ʋmmona kʋno ik ono ki tok.

²⁰ Mihma Chehoiata ushi Benaiah, hatak chilita nukwia iksho Kabseel minti ushi yosh, nana kaniohmi kʋt laua tuk ʋt, Moab hatak tuklo hosh koi chito chohmi ho̱ ʋbi tok: micha oktusha ho̱ ia cha, koi chito ʋt yakni kula fo̱ka ma ʋbi tok.

²¹ Micha Echip hatak osh hatak pisa achukma ho̱ ʋbi tok: mihma Echip hatak ash osh tʋbi tʋli halupa ontʋla ieshi tok: mihma tʋbi yo̱ ieshi cha, im ona mʋt, tʋbi tʋli halupa ontʋla Echip hatak ibbak fohka kash mokofit im ishi cha, ilap in tʋbi tʋli halupa ontʋla yash inli ho̱ isht ʋbi tok.

²² Ilʋppa puta kak o̱ Chehoiata ushi Benaiah ʋt yʋmihchi tok; micha hatak hlampko chilita tuchina kak o̱ hohchifo hʋt ibafoyuka tok.

²³ Holitopa kʋt pokoli tuchina kash i̱ shahli tok; yohmi kia ʋmmona tuchina kash ano ik ono tok. Mihma Lewi ʋt ilap atoni ya̱ pehlichi hilechi tok.

²⁴ Choab itibapishi Asahel ʋt pokoli tuchina kash ibafoyuka tok; Behlehem hatak Toto ushi Elhanan,

²⁵ Halotait hatak Shammah, Halotait hatak Elika,

²⁶ Paltait hatak Heles, Tekoait hatak Ikkesh ushi Ila,

²⁷ Anehlohlait hatak Abiese, Hushahlait hatak Mebunnai,

²⁸ Ahohait hatak Salmon, Netofahlait hatak Mahalai,

²⁹ Netofahlait hatak Baanah ushi Heleb, Benchamin im ʋlla ʋhleha ha̱ ai achʋfa Kibiah minti Libai ya̱ ushi Ittai,

³⁰ Pilahlonait hatak Benaiah, Kaash bokushi puta minti Hittai,

³¹ Abahlait hatak Abi‐albon, Bahumait hatak Asmafelh,

³² Shaalbonait hatak Eliahba, Chashen ushi ʋhleha ha̱ ai achʋfa Chonahlan,

³³ Halalait hatak Shammah, Halalait hatak Shala ushi Ahiam,

³⁴ Maachahlait hatak ushi Ahasbai ya̱ ushi Elifelet, Kilonait hatak Ahihlofel ushi Eliam,

³⁵ Kamelait hatak Heslai, Abait hatak Paalai,

³⁶ Sobah minti Nahlan ushi Ikal, Katait hatak Bani,

³⁷ Ammonait hatak Selek, Seluiah ushi Choab i̱ nahalupa sholi Beelohlait hatak Nahalai,

³⁸ Ilhlait hatak Ila, Ilhla hatak Kaleb,

³⁹ Hittait hatak Uliah: moma kʋt pokoli tuchina akucha untuklo tok.