2 Samuel 22 - Chahta Holisso Holitopa 1886

¹ Mihma Chihowa ʋt Lewi ya̱ in tʋnʋp moma ibbak, micha Sal ibbak aiena ka a hlakofichit taiyahli nitak yʋmma taloa anumpa ilʋppa Chihowa ya̱ im anumpuli tok.

² Micha, Chihowa ʋt an tʋli chito, a̱ holihta kʋllo, micha sa hlakofichi yoke.

³ Chitokaka an tʋli chito, yʋmmak o̱ anukchieto la chi̱ hoke: yʋmmak osh an telihpa, micha ʋm ai okcha̱ya lapish, a̱ holihta chaha, micha ʋm ahlakofi, sai okchalinchi yoke: chishno ak osh sa hotopala hinla ka is sa hlakoficha chi̱ hoke.

⁴ Holitopʋt isht anumpa he ʋlhpesa Chihowa ya̱ i̱ pa̱ha̱ya la chi̱ hoke: yohmi li hosh an tʋnʋp puta ka i̱ hlakofi la chi̱ hoke.

⁵ Nan illi banʋtha kʋt si afolubli tuk; hatak haksi puta oka chito yanʋllit pʋlhki chohmi kʋt sa nukshobli tuk;

⁶ Aiokpuloka nukhʋmmi ʋt si apakfoyubli tuk; nan illi isht hokli ʋt si afama tuk;

⁷ Yʋmohmit sa komunta mʋt, Chihowa yak o̱ i̱ pa̱ha̱ya li tuk, micha an Chitokaka yak o̱ ilbʋsha li tuk oke; mihma ʋm anumpa ha̱ im aholitopa et ʋm a haponaklo tok; ʋm anumpa ilbʋsha yʋt haksobish a̱ chukowa tok oke.

⁸ Yohmi ma yakni ʋt winakʋchi cha, wʋnihinchi tok; anukhobela hatuk o̱, ʋba ai ontalaia puta kʋt kanʋlli cha, winakʋchi tok.

⁹ Mihma nukhobela ma, shobulli kʋt kohchʋt ʋba ma̱ya ma, luak ʋt itakha ya̱ kohcha kʋt okpʋnit tahli tok: tobaksi ʋt ishit libbi tok oke.

¹⁰ Ʋba shutik ak kia bichulli cha akowa tok; mihma iyi nutaka ya̱ hoshonti okhlili hosh talaia tok.

¹¹ Micha chelub om binili cha, hikʋt a̱ya tok: micha mahli sanahchi om binili cha a̱ya hosh haiaka tok.

¹² Micha okhlilika, hoshonti umba lusa, micha ʋba hoshonti sukko ka isht im ompoholmo ikbit il afolubli cha a̱ya tok.

¹³ Itikba libbi kʋt tobaksi luak ʋt ishit libbi tok.

¹⁴ Chihowa ʋt ʋba ya̱ hiloha tok, micha Chaha i̱ shahli hʋt et olachi tok.

¹⁵ Micha i̱ naki puta ka pila cha, fimmi tok: hʋshukmʋlli ya̱ pila cha, komuntʋchit yuhli tok.

¹⁶ Micha Chihowa ʋt im alʋmmi ma, im ai i̱ nukkilli fiopa kʋt mahli ma, okhʋta ata̱ya puta kʋt haiaka, yakni ai ontalaia puta kʋt haiaka tok.

¹⁷ Ʋba ya̱ et pilʋt sʋshi tok, oka laua ya̱ halʋllit a sa kohchi tok.

¹⁸ An tʋnʋp kʋllo, micha a̱ nukkilli tuk ʋhleha ha̱ a sa hlakofichishke; an kʋllo fehna tuk oke.

¹⁹ A sʋlbʋsha nitak a̱ okla si afama tok oke; yohmi kia Chihowa ak osh sa halʋlli yatuk oke.

²⁰ Micha kohchit achito ka sʋsht ʋla tok: si ahninchi hatuk osh, sa hlakofichi tok oke.

²¹ Ai ʋlhpiesa si yʋmohmi tuk mak o̱ Chihowa ʋt si yʋmihchi tok; sʋbbak ʋt kashofa tuk mak o̱ ʋm atobbi tok oke.

²² Chihowa i̱ hina foyukʋt a̱ya lish, micha shitilemʋt an Chitokaka ya̱ ak i̱ filʋmmo tok oka.

²³ Nan apesʋt yʋmihinchi moyuma kʋt sa tikba takali chatuk; micha i̱ nan ʋlhpisa puta ka i̱ filʋmmi li chatuk keyu hoka.

²⁴ Micha itikba ya̱ ai a̱hli bieka hosh a̱ya lish, nana ai ashʋchi li ya̱ ak il ahalaiacho chatuk oke.

²⁵ Yʋmohmi hoka nana ai ʋlhpiesa yʋmohmi li tuk mak o̱, i̱ holhponayo itikba ya̱ sa kashofa tuk mak o̱, Chihowa ʋt ʋm atobbi tok oke.

²⁶ Nan i̱ nukha̱klo yokma, nan i̱ nukha̱klo yosh ish im ile haiakʋcha hi oke; ai ʋlhpiesa yʋmohmi hatuk okma, ai ʋlhpiesa yʋmohmi yosh ish im ile haiakʋcha hi oke.

²⁷ Kashofa yokma, kashofa yosh ish im ile haiakʋcha hi oke: isht acheba yatuk okma, ik achukmo hosh ish im ile haiakʋcha hi oke.

²⁸ Micha chishno ak osh okla ilbʋsha ya̱ ish okchalincha hi oke: amba ilefehnʋchi ano aka isht ish la chi̱ hosh chi nishkin ʋt onʋtoyula hoke.

²⁹ Chishno ak osh am pʋla chia hokʋt, Chihowa ma! micha Chihowa ʋt ʋm okhlilika ya̱ an tohwikelicha hi oke.

³⁰ Chishno pulla kak o̱ tʋshka laua ka malelit hlopulli li tuk okʋt: an Chitokaka pulla kak o̱ holihta chaha o̱ walʋbli li tok oke.

³¹ Nan oklu̱ha imaiya ak okʋto im ʋlhtayak ʋt ai a̱hli yoke; Chihowa im anumpa hʋt imomaka pisa yoke: anukchieto puta ka in telihpa yoke.

³² Kʋta hosh Nan oklu̱ha imaiya yo̱? Chihowa ak bano keyu cho? kʋta hosh tʋli chito yo̱? pin Chitokaka ak bano keyu cho?

³³ Chitokaka ak osh ʋm i̱ hlampko, micha isht ai a̱hli li yoke; ata̱ya li ka ʋlhpiesa ho̱ ʋm ikbi hoke.

³⁴ Saiyi ya̱ issi iyi ya̱ chohmichi hoke: micha ʋm achahaka puta ka sa hilechi hoke.

³⁵ Sʋbbak a̱ itibi ka ithʋnanchi hoke; yohmi ho̱ asonak lakna iti tanampo ʋt sa shakba ishit kobafa hoke.

³⁶ Micha chim aiokcha̱ya telihpa ya̱ is sʋma ak inlishke: ish il akanlichi kak osh is sa holitoblishke.

³⁷ Sa nutaka a nowa li ya̱ ish pʋthʋchishke: yohmi na saiyi yʋt ik shakalʋllo tuk oke.

³⁸ An tʋnʋp puta ka hlioli li mʋt, nosholichi li tuk oke; micha ak tahlo kʋt anonti ak falamo tuk oke.

³⁹ Micha tahli li tuk, micha nʋhli li ma, wakaya he keyu tok; a̱hli saiyi nutaka akakoha tok.

⁴⁰ Itibi ka hlampko ho̱ isht is si ʋskofʋchichi tuk oka; wakayʋt a̱ sanali ka imaiyachit, sa nutaka ish ashachi tuk oke.

⁴¹ A̱ nukkilli puta ka mosholicha la chi̱ ka, an tʋnʋp puta choshak a̱ is sʋma tuk oke.

⁴² Okla hopo̱koyo kia, okchalincha chi̱ kʋt iksho tok; Chihowa ya̱ okla hoyo kia, ik im afalamicho tok.

⁴³ Yohmi ma bolit pushechit lukfi pushi ya̱ chiyuhmichi li tok, tʋmaha ai itʋnowa hina lukchuk chohmichit a hʋhlichi li tok, micha fimmit isht a̱ya li tok.

⁴⁴ Micha ʋm okla itachowa ya̱ is si ahlakofichi ak inli tuk oke; is sa halʋlli na oklushi puta ka i̱ noshkoboka toba la hi atuk oke: okla ak ithaiyano tuk kia a̱ nutaka hi oke.

⁴⁵ Okla inla puta kʋt ʋm ile nutakʋcha hi oke: sa haklo mak inli hosh okla ʋm antia hi oke.

⁴⁶ Okla inla puta kʋt mosholit ia hi oke; micha im ai okshilita ya̱ a̱shʋt nukshopa hi oke.

⁴⁷ Chihowa ʋt okcha̱ya hoke; micha an Tʋli chito yʋt holitopashke: micha ʋm ai okcha̱ya tʋli chito Chitokaka ʋt chahashke.

⁴⁸ Chitokaka yak osh ʋm ilaiokha hoke; micha yʋmmak osh okla ha̱ aka isht ʋlʋt sa nutakʋchi hoke.

⁴⁹ Micha yʋmmak osh an tʋnʋp puta ka a sa kohchi hoke: micha waka̱yʋt a sanali tuk puta ka ʋbanʋblichit ʋba sʋsht iʋt achahaka is sʋsht ona tuk oke: hatak o̱ walampli ya̱ is si a hlakofichi tuk oke.

⁵⁰ Yʋmohmi hoka oklushi puta ititakla ya̱ a chi aiokpahanchi la hi oke; micha chi̱ hohchifo ha holitoblichit chin taloho̱wa la chi̱ hoke.

⁵¹ Yʋmmak osh i̱ mi̱ko ya̱ i̱ holihta chaha ai okcha̱ya yoke: micha nan ahamʋt im ʋlhtoka Lewi, micha im ai unchololi ya̱ isht i̱ nukha̱klo ʋt i̱ haiakahanchi na bilia hoke, achi tok.