2 Samuel 21 - Chahta Holisso Holitopa 1886

¹ Yohmi ma Lewi ʋt ahanta nitak a̱ afʋmmi hosh afʋmmikma, hohchaha̱fo kʋt afʋmmi tuchina tok: mihma Lewi ʋt Chihowa nashuka ya̱ hoyo tok. Mihma Chihowa ʋt afalaminchi mʋt, Sal ak atok, micha in chuka achʋfa issish hlatʋbli tok ak oke, Kibeonait ʋhleha ha̱ ʋbit tahli tok oka, achi tok.

² Mihma mi̱ko ʋt Kibeonait ʋhleha ha̱ i̱ howa cha, im achi tok; (mihma Kibeonait ʋhleha hʋt Islael im ʋlla ʋhleha ha̱ ai achʋfa keyu, amba Amolait okla ha̱ ai unchololi a tok; mihma Islael im ʋlla ʋhleha hʋt anumpa kʋllo il onochit i̱ miha tok atok: mihma Sal ʋt Islael, micha Chutah aiena ka i̱ hullot amohsholi hosh ʋbi bʋnna tok.)

³ Yʋmohmi ho̱ Lewi ʋt Kibeonait ʋhleha ha̱, Nanta ho̱ hʋchi̱ katiohmichi la chi̱ cho? micha nanta ho̱ isht atobbi li̱, Chihowa im ai isha he ʋlhpesa ya̱ anumpa yukpali hʋsh onocha chi̱ cho? im achi tok.

⁴ Mihma Kibeonait ʋhleha hʋt, Sal immi hatuk a̱ tʋli hʋta, micha tʋli holisso lakna, keyukmʋt in chuka achʋfa immi hatuk ak oh kia pi ahalaia he keyu, micha pishno ak atuk mak o̱ hatak nana kia Islael yakni ya̱ ish ai ʋba he keyu hoke, im achi tok. Mihma, Nana ho̱ hʋsh achikma, yʋmmak o̱ hʋchi̱ yʋmihchi la chi̱ hoke, im achi tok.

⁵ Mihma mi̱ko ya̱ okla afalaminchit, Hatak pi tahli tuk, micha mosholit pi taha cha, Islael aiasha fullota ka kanima il a̱sha he keyu ka chi̱ ho̱, nana anukfillit pi̱ sanali tuk ak o̱,

⁶ Ushi ʋhleha hatak untuklo hosh pibbak a̱ fohka cha, Chihowa ʋt atokoli tok Sal yʋmmʋt ai ʋtta tok Kibeah ak o̱, Chihowa ya̱ il im a takohlichashke, im achi tok. Mihma mi̱ko ʋt, Chima lashke, achi tok.

⁷ Yohmi kia mi̱ko ʋt Sal ushi Chonahlan a̱ ushi Mefiboshelh ano apoanchi tok: anumpa kʋllo Chihowa ya̱ im ikbit it ima tok takali hatuk oka, Lewi, micha Sal ushi Chonahlan it in takanli hatok.

⁸ Amba mi̱ko ʋt Aiah ushetik Lispah ushi tuklo Sal a̱ im eshi tok, Almoni, micha Mefiboshelh, micha Sal ushetik Michal ushi tahlapi yʋmmʋt Meholahlait hatak Basillai ushi Atliel a̱ i̱ hofantichi tok aiena kak o̱ ishi tok.

⁹ Micha Kibeonait ʋhleha ibbak a̱ fohki na nʋnih paknaka Chihowa itikba takohlichi tok: nana ʋmo nitak bali ʋmot isht ia ʋmmona fehna ho̱ ʋbi na untuklo kʋt moma hosh it api̱hʋt akakoha tok.

¹⁰ Mihma Aiah ushetik Lispah ʋt nahishi nantʋnna ishi cha, tʋli ya̱ ai anta chi̱ kʋt ompatali mʋt, nan ʋmot isht ia ak atuk ʋt oka ʋt ʋba minti kʋt onʋtula ont ʋhli ka, nitak a̱ ʋba hushi puta kʋt ik om binilí ik ahno, micha ninak a̱ kowi nampoa puta kʋt ik yʋmohmí, ik ahno beka tok.

¹¹ Atuk o̱ Aiah ushetik Lispah Sal im itaiena yʋt nana yʋmihchi tuk a̱ Lewi ya̱ im anoli tok.

¹² Mihma Lewi ʋt iʋt Sal foni, micha ushi Chonahlan foni ya̱ Chabesh‐kileat hatak ʋhleha, yʋmmak osh Filistin ʋhleha hʋt Sal a̱ Kilboa ya̱ ai ʋbi mʋt, Filistin ʋhleha hʋt Belh‐shan ai itʋnowa hina a takohlichi tuk o̱ ont hu̱kopa tok a̱, ont im ishi tok.

¹³ Micha yʋmma Sal foni, micha ushi Chonahlan foni ya̱ ont ai isht ʋla tok: micha ʋba takohlichi tuk ash foni ya̱ okla aiowa tok.

¹⁴ Mihmʋt Sal, micha ushi Chonahlan foni ya̱ Benchamin i̱ yakni Selah i̱ki Kish im ahollopi ak o̱ okla hohpi tok: micha mi̱ko ʋt nana im apihi̱sa tuk ak o̱ moma yʋmihchi tok. Micha yʋmohmi kak o̱ Chitokaka ʋt yakni yash isht asilhha ma, ʋlhpesa im ahni tok.

¹⁵ Atuk o̱ anonti Filistin ʋhleha hʋt Islael a̱ it in tanampi tok: mihma Lewi, micha in tishu ʋhleha aiena kʋt ia cha, Filistin ʋhleha ha̱ itibi tok: mihma Lewi ʋt hoyʋblit isht ia tok.

¹⁶ Mihma Ishbi‐benob, yʋmmʋt hatak chaha ushi ʋhleha ha̱ ai achʋfa yosh in tʋbi tʋli halupa ontʋla noshkobo asonak lakna yosh weki kʋt shekel tahlepa tuchina tok; micha bʋshpo falaia himona yo̱ ʋskofaiyachi tuk osh Lewi ya̱ ʋbi ka ahni tok.

¹⁷ Yohmi tuk kia Seluiah ushi Abishai ʋt apela cha, Filistin ash fahama mʋt, ʋbi tok. Yohmi ma Lewi in tʋshka ʋhleha hʋt anumpa kʋllo i̱ mihʋt, Himakma pi awant itibit ish ia he keyu, yʋmohmi hosh Islael i̱ pʋla ka chik mosholecho kashke, im achi tok.

¹⁸ Atuk o̱ ilʋppa i̱ himmakma yakohmi tok, anonti Kob a̱ Filistin ʋhleha ha̱ ai itibi tok: yohmi ma Hushahlait hatak Sibbechai ʋt Saf a̱ ʋbi tok, yʋmmʋt hatak chaha ushi ʋhleha ha̱ ai achʋfa hatok.

¹⁹ Atuk osh anonti Filistin ʋhleha ha̱ Kob a̱ ai itibi tok, yʋmmak o̱ Chaale‐olechim ushi Elhanan Behlehem hatak ʋt Kittait hatak Koliah itibapishi ha̱ ai ʋbi tok; yʋmma in tʋbi tʋli halupa ontʋla ʋpi ʋt nantʋnna im iti okhowata ak o̱ chohmi tok.

²⁰ Atuk osh himakma Kalh a̱ ai itibi tok; yʋmma hatak chaha fehna yosh ibbak achʋfa ka ibbak ushi hannali, micha iyi achʋfa ka iyi ushi hannali, holhtina kʋt pokoli tuklo cha, akucha ushta tok; micha yʋmmak kia hatak chaha im ʋtta atok.

²¹ Atuk osh Islael a̱ pa̱fi ma, Lewi itibapishi Shimeah ushi Chonahlan ʋt ʋbi tok.

²² Ushta ilʋppʋt hatak chaha yash im a̱sha tuk osh Lewi ibbak, micha in tishu ʋhleha ibbak ak o̱ isht akakoha tok.