2 Samuel 20 - Chahta Holisso Holitopa 1886

¹ Mihma yʋmma Belial hatak, Bichli ushi Benchamait hatak, hohchifo kʋt Sheba yosh anta yoba tok: atuk osh ishit pu̱fa ya̱ olachit, Lewi ya̱ il ahalaia keyu, micha Chesse ushi ya̱ il ai isha he ʋlhpesa ʋt iksho hoke: hatak puta kʋt im ʋlhtipo aiyukali onashke, achi tok.

² Yohmi ho̱ Islael hatak puta kʋt Lewi ya̱ iakaiya tuk ʋt falama cha, Bichli ushi Sheba yak o̱ iakaiya tok: amba Chutah hatak ʋhleha hokʋto i̱ mi̱ko ya̱ asitiʋt Chatan a̱ ashʋt Chelusalem a̱ ona tok.

³ Mihma Lewi ʋt in chuka Chelusalem a̱ ʋla tok; micha mi̱ko ʋt ohoyo pokoli im itaiena chuka yash apistikela chi̱ ho̱ ashachi cha, ia kash osh ishi cha, ai atoni ashachi cha, ipihinta kia, ik iba chukowo tok. Yohmi ho̱ im okshilitʋt, ohoyo ʋlhtakla yosh ai ashʋt nitak ai illi ka ona tok.

⁴ Yohmi ma mi̱ko ʋt Amasa ya̱, Chutah hatak ʋhleha ha̱ nitak tuchina itintakla ya̱ is sʋm itʋnahlashke, micha chishno mʋt ilʋppa ish anta chike, im achi tok.

⁵ Yohmi ho̱ Amasa ʋt Chutah hatak ʋhleha ha̱ itʋnahlit ia tok: yohmi tuk kia nitak ʋlhpisa im apesa tuk a̱ atʋpa ho̱ anta tok.

⁶ Mihma Lewi ʋt Abishai ya̱, Bichli ushi Sheba ʋt himak a̱ nana pim okpʋni kʋt Absalom hatuk ak kia i̱ shahla chi̱ hoke: chi̱ shahli in tishu ʋhleha ha̱ ishi cha, iakaiyʋt hliolí, tʋmaha holihta kʋllo chukowa cha, pi̱ hlakofi ná, im achi tok.

⁷ Mihma Choab in tʋshka ʋhleha, micha Chelehlait ʋhleha, micha Pelehlait ʋhleha, micha hatak hlampko chilita moma kʋt kohchʋt iakaiya tok: micha Chelusalem a̱ a kohchʋt Bichli ushi Sheba ya̱ iakaiyʋt hliolit ia tok.

⁸ Atuk osh tʋli chito ʋt Kibeon hikia ka ona ma, Amasa ʋt tikba hiki̱a tok. Micha Choab i̱ nafohka ishit fohka tuk ʋt ʋskofʋchi isht ashihahchit taiyaha mʋt, alataiya ka ʋskofʋchi isht ʋskofaiyachi ma, bʋshpo falaia ʋt i̱ shukcha foyuka hosh a takali tok: atuk osh a̱ya ma, shu̱fʋt ont itula tok.

⁹ Mihma Choab ʋt Amasa ya̱, Itibapishi li ma! chi achukma̱ka cho? im achi tok. Micha Choab ʋt i̱ su̱ksowa chi̱ hosh ibbak isht impak imma ya̱ Amasa nutakhish a̱ isht ishi tok.

¹⁰ Yohmi kia Amasa ʋt Choab ibbak a̱ bʋshpo falaia ʋt fo̱ka ka yohmi ik ahno tok: yohmi ho̱ naksi foni ont ishit tahlapik fehna ishit bahli na ikfoka ʋt kohchʋt aka ont itula ma, himakma ik isso ki tok; mihma illi tok. Yohmi ho̱ Choab, micha itibapishi Abishai ita tuklo kʋt Bichli ushi Sheba ya̱ iakaiyʋt hlioli tok.

¹¹ Mihma Choab in tʋshka ʋhleha ha̱ ai achʋfa kʋt a hikiʋt, Kʋna hosh Choab a̱ i̱ kana cha, Lewi yak o̱ apelakmʋt, Choab a̱ ik iakaiyá, achi beka tok.

¹² Mihma Amasa ʋt hina iklʋna fehna issish a̱ oka shalali tok. Atuk o̱ okla moma kʋt lumʋt hieli na hatak ash osh pisa mʋt, Amasa ya̱ hina ya̱ kanʋllichit osapa ya̱ isht ona cha, nantʋnna isht ompohomo tok; bili̱ka ʋlakmʋt, lumʋt hikia na pisa mʋt, yʋmihchi tok.

¹³ Atuk osh hina ya̱ kanʋllichi ma, okla moma kʋt Choab ak o̱ iakaiyʋt Bichli ushi Sheba ya̱ hlioli tok.

¹⁴ Atuk o̱ Islael apehlichi moma ka hlopullit Abel, micha Belh‐maachah, micha Belait moma ka isht ona tok: mihma okla ita hoyot itʋnaha cha, iakaiyʋt ia ak inli tok.

¹⁵ Micha okla onʋt Abel Belh‐maachah ak o̱ in tanampit afolubli mʋt, sakti ikbit, tʋmaha holihta ya̱ apakfobli na yakni kula anu̱kaka hikia tok: mihma okla moma Choab a̱ apehʋt a̱ya tuk ʋt akʋcha chi̱ hosh, holihta chaha ya̱ nana ishit komoha tok.

¹⁶ Mihma ohoyo hopoyuksa yosh tʋmaha holihta ya̱ et a pa̱yʋt, Ho hakló, ho hakló; Choab a̱ oh im achí, hʋchim asilhha lishke, Bili̱ka ish la na ak chim anumpulí, achi tok.

¹⁷ Atuk o̱ bili̱ka ʋla ma, ohoyo hash osh, Choab chia hoh cho? achi tok. Mihma afalamichit, Mihiyo sia hoke, achi tok. Yohmi ma, Chin tishu ohoyo im anumpa ha̱ ish haklashke, im achi tok. Mihma afalamichit, Haklo lishke, achi tok.

¹⁸ Mihma anumpulit yak achi tok, Cha̱shpo ka anumpulikmʋt, yak achi beka tok; Abel ak o̱ okla a ponaklo pullashke: micha yakohmichit nana ka issʋchi beka tok.

¹⁹ Ʋno ʋt Islael a̱ it i̱ kanʋt a̱hli achukma ʋhleha ha̱ ai achʋfa sia hoke: tʋmaha holihta ya̱ okpʋnit tahli; micha hatak ishki yosh Islael yakni ahanta ka ʋbi chi bʋnna hosh ish hoyoshke: nanta katiohmi ho̱ Chihowa im ai isha he ʋlhpesa ka isht ish nanʋblit ish kancha chi̱ cho? achi tok.

²⁰ Mihma Choab ʋt afalamichit, Ishit nanʋbli, keyukmʋt ʋbit tahli ka yohmi la he ʋt olanli iksho kashke, olanli iksho kashke, achi tok.

²¹ Nana kʋt yʋmmak keyu, amba Eflaim nʋnih hatak Bichli ushi Sheba hohchifo hosh ibbak a̱ wielit mi̱ko ya̱ im a sanalit, Lewi fehna ka im a sanali hoke: yʋmmak illa ho̱ hʋs sʋmakma, tʋmaha holihta ya̱ i̱ filʋmmit ia lashke, achi tok. Mihma ohoyo hash osh Choab a̱, Yakeh! noshkobo ha̱ tʋmaha holihta ʋbanʋblichit et chi̱ pila chi̱ hoke, im achi tok.

²² Yohmi ma ohoyo hash osh hopoyuksa hosh okla moma ka im ona tok. Mihma Bichli ushi Sheba noshkobo ha̱ okla tʋbli cha, Choab a̱ okla kocha pit i̱ pila tok. Mihma ishit pu̱fa olachi ma, tʋmaha holihta yash okla i̱ filʋmmit, tiapʋt, im ʋlhtipo aiyukali ona tok. Mihma Choab ʋt falamʋt Chelusalem a̱ ʋlʋt, mi̱ko ya̱ im ʋla tok.

²³ Mihma Choab ʋt Islael tʋshka chipota moma ka pehliechi tok: mihma Chehoita ushi Benaiah ʋt Chelehlait ʋhleha, micha Pelehlait ʋhleha aiena ka pehliechi tok:

²⁴ Mikma Atolam ʋt noshkobo atobbi yak o̱ isht ʋtta tok; mikma Ahilut ushi Chehoshafat ʋt holisso takalichi atok:

²⁵ Mikma Shefa ak osh holissochi atok: mikma Satok, micha Abiahla ak osh naholitompa isht a̱shwa atok.

²⁶ Mikma Chailait hatak Ila ak osh pehlichi i̱ shahli osh Lewi im ahanta beka tok.