2 Samuel 2 - Chahta Holisso Holitopa 1886

¹ Atuk osh ilʋppa i̱ himmak a̱ yakohmi tok, Lewi ʋt Chihowa ya̱ i̱ ponaklot, Chutah in tʋmaha holihta kanima ka ona la chi̱ cho? achi tok. Mihma Chihowa ʋt, Iá, im achi tok. Mihma Lewi ʋt, Katima yak o̱ ia la chi̱ cho? achi tok. Mihma Heblon a̱ achi tok.

² Yohmi ho̱ Lewi ʋt, tekchi tuklo, Chesleel ohoyo Ahinoam, micha Kamel ohoyo Abikail, Nabal tekchi atok aiena kʋt yʋmmak o̱ ona tok.

³ Micha in tʋshka ʋhleha apeha tuk ʋt in chuka achʋfa aiyukali i̱shi ho̱ Lewi ʋt isht ʋla na Heblon tʋmaha holihta puta yak o̱ aiasha tok.

⁴ Mihma Chutah hatak ʋhleha hʋt ʋla cha, yʋmmak o̱ Lewi ya̱ nan ahʋmmit Chutah in chuka achʋfa ya̱ i̱ mi̱ko atokoli tok. Mihma Lewi ya̱ im anolit, Chabesh‐kileat hatak ʋhleha yʋmmak osh Sal a̱ hohpi tok, achi tok.

⁵ Mihma Lewi ʋt Chabesh‐kileat hatak ʋhleha ha̱ anumpa shali ʋhleha ha̱ i̱ pila mʋt, Chihowa i̱ holitopa hʋchia hashke, hʋchi̱ shahli Sal fehna ka hʋsh i̱ kana cha, hʋsh hohpi tuk okʋt.

⁶ Yohmi ka himak a̱ Chihowa ʋt hʋchi̱ kana cha, aia̱hli ka hʋchi̱ yʋmihchashke: nana ilʋppa hʋsh yʋmihchi tuk oka, i̱ kana ilʋppa ʋno ak kia hʋchim atobbi la chi̱ hoke.

⁷ Yʋmohmi hoka himak a̱ hʋch ibbak ʋt hlampkashke, micha chilitʋt nukwia iksho hosh hʋsh aiashashke: hʋchi̱ shahli Sal ʋt illi hoka; mikma Chutah in chuka achʋfa yʋt nan ahʋmmit i̱ mi̱ko si atokoli akinlishke, im achi tok.

⁸ Yohmi kia Ne ushi, Abne Sal in tʋshka chipota i̱ kʋpitʋni ʋt Sal ushi Ishboshelh a̱ ishi cha, pit hlopullichit Mahanaim a̱ isht ona tok.

⁹ Micha Kileat, mikmʋt Ashulait ʋhleha, micha Chesleel, micha Eflaim, micha Benchamin, micha Islael moma ka i̱ mi̱ko ikbi tok.

¹⁰ Sal ushi, Isboshelh ʋt afʋmmi pokoli ushta hosh Islael, i̱ mi̱kot isht ia tuk osh, afʋmmi tuklo mi̱ko tok: amba Chutah in chuka achʋfa yʋt Lewi ak o̱ iakaiya tok.

¹¹ Mihma Lewi ʋt Chutah in chuka achʋfa ya̱ i̱ mi̱ko hosh Heblon a̱ ahanta kʋt afʋmmi untuklo cha hʋshi hannali tok.

¹² Mihma Ne ushi Abne, micha Sal ushi Ishboshelh in tishu ʋhleha aiena kʋt Mahanaim a̱ akohchʋt, Kibeon a̱ ona tok.

¹³ Mihma Seluiah ushi Choab, micha Lewi in tishu ʋhleha aiena kʋt kohchʋt ia cha, Kibeon oka talaia ho̱ bili̱ka ont ai itafama tok: micha achʋfa kʋt oka talaia in tʋnnʋp achʋfa ka chieya ma, achʋfa kʋt oka talaia in tʋnnʋp a̱ chieya tok.

¹⁴ Mihma Abne ʋt Choab a̱, Hatak himithoa ʋt ik wakaya cha, pi tikba ya̱ ik ai ihloʋllí, im achi tok. Mihma Choab ʋt, Ik wakayá, achi tok.

¹⁵ Yohmi ma holhtina hosh Benchamin a̱ ai achʋfa kʋt auah tuklo hosh Sal ushi Ishboshelh a̱ ibafoyuka tuk ʋt, micha Lewi in tishu ʋhleha ha̱ ai achʋfa kʋt auah tuklo aiena hosh wakaya cha, iʋt ont itafama tok.

¹⁶ Micha ilap aiyukali kʋt noshkobo ha̱ ishi mʋt, bʋshpo falaia isht iti bahli tok: yohmi hosh itapi̱hʋt akakoha tok: yʋmohmi ho̱ yʋmmʋt Helkalh‐hassulim hohchifo hosh Kibeon a̱ talaia tok.

¹⁷ Mihma nitak yʋmma itibi kʋllo fehna tok; mihma Lewi in tishu ʋhleha hʋt Abne, micha Islael hatak ʋhleha ha̱ imaiya tok.

¹⁸ Mihma Seluiah ushi tuchina hosh Choab, micha Abishai, micha Asahel ʋt yʋmma asha tok: mikma Asahel ʋt iyi shohhʋla kʋt issi nukshopa yak o̱ chohmi tok;

¹⁹ Atuk osh Asahel ʋt Abne ya̱ hlioli tok: micha hlioli kʋt isht impakimma, micha ʋlhfʋbekimma kia pit fullotʋt ik aiyo tok.

²⁰ Yohmi ma Abne ʋt im a̱shaka pit filema cha, Asahel chia hoh cho? achi tok. Mihma afalamichit, Mihiyo sia hoke, achi tok.

²¹ Mihma Abne ʋt, Ishtimpakimma, keyukmʋt ʋlhfʋbekimma ya̱ pit ish fullota cha, hatak himithoa ai achʋfa kak o̱ ish halʋlli cha, i̱ nahalupa ya̱ ish ishashke, im achi tok. Yohmi kia Asahel ʋt iakaiya kʋt naksika pit fullota he keyu tok.

²² Mihma Abne ʋt Asahel a̱, Is siakaiya kʋt naksika ish fullotashke: nanta katiohmi ho̱ issot chi akʋchi li pulla chi̱ cho? yohmikmʋt katiohmi kak osh chitibapishi Choab a̱ im aka chakali la hinla cho? anonti im achi tok.

²³ Yohmi kia naksika pit fullota he keyu tok: yohmi ma Abne ʋt tʋbi tʋli halupa ontʋla ya̱ wishakchi a̱shaka ya̱ naksi foni ishit tahlapi nuta ya̱ ishit bahli na hlopullit a̱shaka ont kohcha tok: mihma yʋmmak o̱ itula cha, yʋmmak inli ho̱ ai illi tok: atuk o̱ yakohmi tok, Asahel ʋt ai itulʋt illi tuk a̱ laua kaniohmi kʋt ant pisakmʋt, hikia beka tok.

²⁴ Mihma Choab, micha Abishai itatuklo kʋt Abne ya̱ hlioli tok: atuk osh Ammah nʋnih yʋmmʋt Kiah itikba bachaya Kibeon yakni haiaka hina ya̱ ona ma, hʋshi ʋt oka tula tok.

²⁵ Mihma Benchamin im ʋlla ʋhleha hʋt iti hoyot itʋnaha cha, Abne ya̱ iakaiyʋt tʋshka chipota a̱ya achʋfa toba cha, nʋnih paknaka ya̱ o̱ hieli tok.

²⁶ Yohmi ma Abne ʋt Choab a̱ pit i̱ payʋt, Bʋshpo falaia yʋt ambi na bilia chi̱ cho? ont ishtaiyopi kʋno homi ha chi̱ ka chik ithano cho? yohmi ka katiohmi fokak mak o̱ okla hʋt itibapishi ʋhleha ha̱ iakaiya kʋt falama chi̱ ka ish im apesa chi̱ cho? achi tok.

²⁷ Mihma Choab ʋt, Chitokaka ʋt okcha̱ya pulla ka chik anumpulo ke tuk okma, okla puta kʋt onnahinlik mak o̱ itibapishi ʋhleha ha̱ iakaiya kʋt falama hetuk pulla hoke, achi tok.

²⁸ Mihma Choab ʋt isht pu̱fa ya̱ olachi ma, okla moma kʋt hieli cha, Islael a̱ himakma ik iakaiyo tok, micha himakma ik itibo tok.

²⁹ Mihma Abne, micha in tʋshka ʋhleha aiena kʋt ninak yʋmma a̱yʋt onnʋt yakni patali hlopullit, Chatan a̱ ʋbanʋblit, Bilh‐lon moma ka hlopulli cha, Mahanaim a̱ okla ona tok.

³⁰ Mihma Choab ʋt Abne ya̱ iakaiya tuk ʋt falama tok: atuk osh okla moma ka hoyot itʋnahli ma, Lewi in tʋshka ʋhleha ha̱ hatak auah chakkali cha, Asahel aiena kak osh iksho tok.

³¹ Amba Lewi in tʋshka ʋhleha hʋt Benchamin, micha Abne in tʋshka ʋhleha ha̱ fahamʋt kanchi na hatak tahlepa tuchina cha, pokoli hannali aiena hosh illi tok.

³² Mihma Asahel a̱ okla ishi cha, i̱ki ahollopi Behlehem a hikia ka isht onʋt hohpi tok. Mihma Choab, micha in tʋshka ʋhleha aiena kʋt ninak a̱ a̱ya na hlopulli mʋt, onnʋt mihinti ho̱ Heblon a̱ ona tok.