2 Samuel 19 - Chahta Holisso Holitopa 1886

¹ Mihma Choab a̱ im anolit, Yakeh! mi̱ko ʋt Absalom a̱ ishit yaha̱yʋt tʋbashit isht iʋshke, achi tok.

² Mihma imaiya kash osh nitak yʋmma okla moma ka yaiya in toba tok: nitak yʋmma mi̱ko ʋt ushi ya̱ ishit nukha̱klo fehnʋshke, achi na okla hʋt haklo hokʋt.

³ Yohmi ma nitak yʋmma okla hʋt luma hosh tʋmaha holihta ya̱ chukowa kʋt, okla hosh tʋnʋp a̱yʋt yihlepa tuk osh hofahyʋt lumboa kak inli ho̱ chohmi tok.

⁴ Yohmi kia mi̱ko ʋt nashuka ya̱ ompohomo tok, micha mi̱ko ʋt chitolit yaha̱yʋt, Sʋso Absalom ma! Absalom sʋso ma! sʋso ma! ahanchi tok.

⁵ Mihma Choab ʋt aboha yash ont chukowa cha, mi̱ko ya̱ im ona cha, Himak nitak a̱ chin tishu ʋhleha puta moma, yʋmmak osh chishno, micha chiso ʋhleha, micha chisotek ʋhleha, micha chin tekchi ʋhleha, micha chim itaiena ʋhleha puta ka hlakofichi tuk a̱ nashuka ya̱ ish hofahyalishke.

⁶ Yohmi hosh chin tʋnʋp ʋhleha hak o̱ ish holitobli cha, chi̱ kana ʋhleha ish i̱ nukkillishke: himak nitak a̱ okla pehlichi ʋhleha, micha tishu ʋhleha aiena nana ishit chim ahoba keyu ish otʋninchi hokʋt; Absalom ak osh okcha̱ya na himak nitak a̱ e moma kʋt pilli hatuk okma, chim ʋlhpesa fehna hetuk a̱ himak nitak a̱ ithaiyana li hoka.

⁷ Yʋmohmi hoka, Himak a̱ wakaya cha, kohchʋt iʋt chin tishu ʋhleha ha̱ im anumpa hopohlʋli im anumpulí; kohchʋt chik aiyokma, himak ninak a̱ achʋfa kia chi takla asha chi̱ keyu ka, Chihowa pulla anumpa kʋllo ishit miha lishke: yohmikma yʋmmak osh ik chim achukmo kʋt nana ik achukmo puta kʋt ʋlla chia moma ma, chi onʋtolʋt mihintit himak a̱ ant ʋhli chatuk a̱ i̱ shahla chi̱ hoke, achi tok.

⁸ Yohmi ma mi̱ko ʋt wakaya cha, holihta okhissa ya̱ binili tok. Mihma okla moma ka im anolit, Yakeh! mi̱ko ʋt holihta okhissa ya̱ binili hoke, achi tok. Mihma okla moma kʋt mi̱ko itikba ya̱ ʋla tok: Islael ʋt yihlepʋt im ʋlhtipo aiyukali onʋt taha tuk okʋt.

⁹ Mihma okla moma Islael apehlichi puta hlopulli moma ka it achowʋt, Mi̱ko ʋt pin tʋnʋp puta ibbak a̱ pi hlakofichi tok; micha Filistin okla ibbak a̱ pi hlakofichi tok; atuk ak osh himak a Absalom okʋno i̱ malelit yakni ya̱ kohchʋshke.

¹⁰ Mihma Absalom ʋt pi̱ mi̱ka chi̱ ho̱ nan ahʋmmit il atokoli kash osh tʋnʋp ai illishke. Yʋmohmi hoka himak a̱ nanta katiohmi ho̱ mi̱ko ya̱ falʋmminchit isht ʋla ka anumpa achʋfa kia hʋch ik anumpulo cho? achi tok.

¹¹ Mihma mi̱ko Lewi ʋt Satok, micha Abiahla naholitompa isht a̱shwa ya̱ anumpa i̱ pilʋt, Chutah im asʋnonchi ʋhleha ha̱ im anumpulit, Nanta katiohmi ho̱ mi̱ko ya̱ falʋmminchit in chuka isht ʋla ka hʋsh ishtaiyopi cho? Islael moma im anumpa hʋt mi̱ko ya̱ in chuka fehna ka im ʋla hoka.

¹² Sʋtibapishi hʋchia hoke, sa foni, micha sa nipi hʋchia hoke: yohmi ka nanta katiohmi ho̱ mi̱ko ya̱ in chuka isht ʋla ka hʋsh ishtaiyopi cho? hʋsh achashke,

¹³ Micha Amasa ya̱, Sa foni, micha sa nipi chia keyu cho? Chitokaka ʋt yakohmi, micha i̱ shahli kia si yʋmihchashke, Choab a̱ ʋlhtobʋt sa tikba ya̱ tʋshka chipota i̱ kʋpitʋni yosh ish ahanta na ik biliokma, hʋsh im achashke, achi tok.

¹⁴ Mihmʋt Chutah hatak ʋhleha moma chu̱kʋsh a̱ fullolichit hatak achʋfa chu̱kʋsh chiyuhmichi tok: yohmi ho̱ mi̱ko ya̱ anumpa ilʋppa okla pit i̱ pilʋt, Chishno, micha chin tishu ʋhleha aiena kʋt hʋsh falamashke, im achi tok.

¹⁵ Yohmi ho̱ mi̱ko ʋt falamʋt, Chatan a̱ ʋla tok. Mihma Chutah ʋt mi̱ko ya̱ afama cha, mi̱ko ya̱ ishit hlopullicha chi̱ hosh Kilkal a̱ ona tok.

¹⁶ Mihma Kela ushi Shimei, Benchamait hatak, Bahulim minti ʋt mi̱ko Lewi ya̱ afama chi̱ hosh tu̱shpʋt, Chutah hatak ʋhleha ha̱ awant ona tok.

¹⁷ Mihma Benchamin a̱ ai achʋfa yʋt hatak tahlepa sipokni achʋfa hosh api̱hakma, Sal in chuka achʋfa in tishu Siba, micha ushi auah tahlapi, micha in tishu pokoli tuklo aiena kʋt api̱ha tok; micha mi̱ko itikba iʋt Chatan a̱ hlopulli tok.

¹⁸ Mihma mi̱ko in chuka achʋfa ya̱ hlopullicha chi̱, micha nana ho̱ achukma aiahnikma yʋmihcha chi̱ hosh peni pʋtha ya̱ pit ishit kohcha tok. Atuk o̱ mi̱ko ʋt Chatan a̱ ant kohcha ma, Kela ushi Shimei ʋt itikba ont itula tok.

¹⁹ Micha mi̱ko ya̱, A̱ shahli hʋt nana ai ʋlhpesa keyu yʋmihchi li tuk a̱ ik si onocho kashke, micha a̱ shahli mi̱ko ʋt Chelusalem a kohcha nitak yʋmma chin tishu hʋt nan ashʋchi tuk a̱ ithaiyanʋt chu̱kʋsh isht ik nukfoyuko kashke.

²⁰ Chin tishu hʋt nan ashʋchi tuk ʋt ithana fehna hokʋt: yʋmohmi hatuk osh himak nitak a̱ Chosef in chuka achʋfa ai achʋfa moma ka ti̱kba a̱ shahli mi̱ko ya̱ afama la chi̱ hosh ʋla lishke, im achi tok.

²¹ Yohmi kia Seluiah ushi Abishai ʋt afalamichit, Ilʋppa pulla ka Shimei ʋt illa he ʋlhpesa keyu cho? Chihowa nan ahamʋt im ʋlhtoka ya̱ anumpa kalakshichi onochi tuk okʋt, achi tok.

²² Mihma Lewi ʋt, Seluiah ushi ʋhleha hʋchia ma? nanta ishit hʋchi ahalaia li tuk o̱ himak nitak a̱ hʋs sa̱ sanala hinla cho? Islael a̱ hatak nana kia himak nitak a̱ illa chi̱ cho? himak nitak a̱ Islael i̱ mi̱ko sia hʋt ithaiyana li keyu cho? achi tok.

²³ Yʋmohmi ho̱ mi̱ko ʋt Shimei ya̱, Chilla he keyu, im achi tok: micha mi̱ko ʋt anumpa kʋllo im il onochit i̱ miha tok.

²⁴ Mihma Sal ushi Mefiboshelh ʋt mi̱ko ya̱ afama chi̱ hosh ona tok; micha mi̱ko ʋt kohchʋt ia tok nitak a̱ ʋttʋt ia hosh achukma̱kʋt anonti falamʋt ʋla tuk nitak a̱ ant ʋhli ka, iyi ya̱ nan ik i̱ kaniohmicho, micha nutakhish a̱ ik aiiskiacho, micha i̱ nafohka ya̱ ik achifo tok.

²⁵ Atuk osh mi̱ko ya̱ afama chi̱ hosh Chelusalem a̱ ʋla ma, yakohmi tok: mi̱ko ʋt, Mefiboshelh ma! nanta katiohmi ho̱ si awant chik aiyo tuk o̱h cho? im achi tok.

²⁶ Mihma afalamichi mʋt, A̱ shahli mi̱ko ma! an tishu hʋt sa haksichi tuk oke: chin tishu hʋt, Issuba haksobish falaia om patali likmʋt, om binili lish, mi̱ko ya̱ im ona lashke, achi tuk okʋt, chin tishu hʋt imomokpulo atuk okʋt.

²⁷ Micha chin tishu ha̱ nana mihachit a̱ shahli mi̱ko ya̱ im anoli tuk oke; yohmi kia a̱ shahli mi̱ko ʋt Chitokaka im enchel ak inli ho̱ chiyuhmi hoke: yohmi hokʋt chi̱ holhponayo isht ish pisa kʋt achukma ish aiahni kak osh ish yʋmohmashke.

²⁸ A̱ki in chuka achʋfa moma kʋt a̱ shahli mi̱ko itikba ya̱ hatak illi ʋhleha chiyuhmi tuk oke: yohmi ak inli kia chin tishu ha̱ chim ai impa binilit ai impa ka takla is sa binilechi tuk oke. Yʋmohmi hoka katiohmi kak o̱ himak a̱ mi̱ko ya̱ im ilbʋsha la he ʋlhpesa hoh cho? im achi tok.

²⁹ Mihma mi̱ko ʋt, Nanta katiohmi ho̱ nana chi̱ kaniohmi kʋt himak a̱ isht ish anumpuli cho? Chishno, micha Siba ʋt yakni ya̱ hʋsh itakashapashke, achi li tuk oke, im achi tok.

³⁰ Mihma Mefiboshelh ʋt mi̱ko ya̱, Ome, mominchi hosh ik ishí, a̱ shahli mi̱ko ʋt achukma̱kʋt anonti in chuka ʋla hoka, im achi tok.

³¹ Mihma Kileatait hatak Basillai ʋt Lochelim mintit ʋla cha, mi̱ko ya̱ ilauelit Chatan a̱ hlopullicha chi̱ hosh awant Chatan a̱ hlopulli tok.

³² Micha Basillai ʋt hatak sipokni fehna hosh afʋmmi pokoli untuchina tok: atuk osh mi̱ko ʋt Mahanaim anta moma ma, ilhpak a̱ im ahayuchi tok; hatak nan in laua fehna hatuk okʋt.

³³ Mihma mi̱ko ʋt Basillai ya̱, Si awant hlopullit ish onakma, Chelusalem a̱ a chimpʋchi lashke, im achi tok.

³⁴ Mihma Basillai ʋt mi̱ko ya̱, Si okcha̱ya na hopaka he yatuk osh mi̱ko ya̱ awant Chelusalem a̱ ona la hinla cho?

³⁵ Himak nitak a̱ afʋmmi pokoli untuchina li hoke: nana achukma, micha nana ik achukmo ka akostininchi la hinla cho? chin tishu hʋt nana impa li, micha nana ishko li kʋt yakohmi ahna hinla cho? himak pilla ma hatak taloa ʋhleha, micha ohoyo taloa ʋhleha aiena ka haklo la hinla cho? yʋmohmi kʋt katiohmi ho̱ chin tishu hʋt a̱ shahli mi̱ko ya̱ ataklʋmmi kʋt moyuma la hinla cho?

³⁶ Chin tishu hʋt mi̱ko ya̱ awant Chatan a̱ hlopullit olanli ho̱ ona lashke: mikma nanta katiohmi ho̱ mi̱ko ʋt nan ʋlhtoba yohmi ka a̱ falʋmmincha hinla cho?

³⁷ Chin tishu hʋt anonti falama lish, an tʋmaha holihta yak inli a sʋllikmʋt, a̱ki micha hʋshki itatuklo im ahollopi ya̱ apotoʋt sa hollopashke, chim asilhha lishke: amba yakeh! chin tishu Chimham oke; yʋmmak osh a̱ shahli mi̱ko ya̱ awant iashke: mikma ʋlhpesa ish ahni kak osh ish yʋmihchashke, im achi tok.

³⁸ Mihma mi̱ko ʋt afalamichi mʋt, Chimham ʋt si awant ia chi̱ hoke, mikma nana achukma ish ai ahni kak osh i̱ yʋmihchi la chi̱ hoke: micha nana ho̱ yʋmihchi la he is sʋm ahnikma, chi̱ yʋmihchi la chi̱ hoke, im achi tok.

³⁹ Mihma okla moma kʋt Chatan a̱ hlopulli tok. Atuk o̱ mi̱ko ʋt ont kohcha mʋt, mi̱ko ʋt Basillai ya̱ i̱ su̱ksowa cha, anumpa yukpali onochi tok: mihma falamʋt ilap ai ʋtta ya̱ ona tok.

⁴⁰ Mihma mi̱ko ʋt iʋt Kilkal a̱ ona ma, Chimham ʋt awant ia tok: mihma Chutah okla moma, micha Islael okla iklʋna ak kia aiena kʋt mi̱ko ya̱ ilauelit isht a̱ya tok.

⁴¹ Mihma yakeh! Islael hatak ʋhleha moma kʋt mi̱ko ya̱ im ʋla mʋt, mi̱ko ya̱. Nanta katiohmi ho̱ il itibapishi Chutah hatak ʋhleha hʋt pi̱ hu̱kopʋt ishit chi kʋnia cha, mi̱ko, micha in chuka achʋfa, micha Lewi in tʋshka ʋhleha apehʋt a̱ya tuk aiena ka Chatan a̱ hlopullichit isht ʋla cho? im achi tok.

⁴² Mihma Chutah hatak ʋhleha moyuma kʋt Islael hatak ʋhleha ha̱ afalamichi mʋt, Mi̱ko ʋt pi̱ kanomi fehna yoka; yohmi ka nanta katiohmi ho̱ nana ilʋppa ishit hʋsh nokowa cho? mi̱ko nana i̱ kʋnia ho̱ il impa tuk oh cho? keyukmʋt na hʋlbina nana kia pima tuk oh cho? achi tok.

⁴³ Mihma Islael hatak ʋhleha hʋt Chutah hatak ʋhleha ha̱, Mi̱ko ya̱ kʋshkoa pokoli ho̱ il ahalanli cha, Lewi ʋt pimmi ʋlhpesa kʋt hʋchishno ya̱ i̱ shahli hoke: yohmi ka nanta katiohmi ho̱ hʋsh pi shitilema cha, mi̱ko ya̱ falʋmminchit isht ʋla ka ti̱kba hʋsh pi̱ ponaklo haya tuk keyu cho? achi tok. Mihma Chutah hatak ʋhleha im anumpa hʋt kʋllo kʋt Islael hatak ʋhleha ha̱ i̱ shahli tok.