2 Samuel 18 - Chahta Holisso Holitopa 1886

¹ Mihma Lewi ʋt okla hʋt apehʋt a̱ya tuk a̱ hotihna cha, tahlepa sipokni puta i̱ kʋpitʋni ʋhleha, micha tahlepa puta i̱ kʋpitʋni ʋhleha hʋt pehlicha chi̱ ka hilechi tok.

² Mihma Lewi ʋt okla isht atuchina kashapa ka Choab ak o̱ ibbak fohki mʋt, isht atuchina kashapa ka Seluiah ushi, Choab itibapishi Abishai ak o̱ ibbak fohki mʋt, isht atuchina kashapa ka Kittait hatak Ittai ak o̱ ibbak fohkit pila tok. Micha mi̱ko ʋt okla ha̱, Ʋno ak kia hʋchi awant kohchʋt ia li pulla chi̱ hoke, im achi tok.

³ Yohmi kia okla hʋt afalamichit, Kohchʋt ish ia he keyu hoke: e yihlepa kia pishno ya̱ nana isht im ahoba he keyu; iklʋna kak osh ik pilli hok mak o̱ nana isht im ahoba he keyu hoke: amba tahlepa sipokni e pokoli hoh kia ish itilaui: yʋmohmi hoka tʋmaha holihta ya̱ ish anta tuk osh, ish pi apela kak osh achukma kʋt i̱ shahli hoke, achi tok.

⁴ Mihma mi̱ko ʋt, Kaniohmi kak osh ʋlhpesa ka hʋchim ahobakma, yʋmihchi lashke, im achi tok. Mihma mi̱ko ʋt holihta okhissa bili̱ka hikia ma, okla moma kʋt tahlepa yosh, micha tahlepa sipokni yosh kocha wiha tok.

⁵ Mihma mi̱ko ʋt Choab, micha Abishai, micha Ittai aiena ka im apesʋt, Hatak himita Absalom a̱ ʋno ak atuk pulla kak o̱ hʋsh i̱ kanashke, achi tok. Atuk o̱ mi̱ko ʋt kʋpitʋni ʋhleha moma ka Absalom a̱ nana achi ka okla moma kʋt ha̱klo tok.

⁶ Yohmi ho̱ okla hʋt Islael a̱ itiba chi̱ hosh kohchʋt yakni haiaka ya̱ ia tok: mihma ai itibi kʋt Eflaim kowi ak atok.

⁷ Yʋmmak o̱ Islael okla hʋt Lewi in tishu ʋhleha itikba ya̱ ai akakoha tok; mihma yʋmma ai ahambi na hatak tahlepa sipokni pokoli tuklo akucha tuklo hosh illi tok.

⁸ Itibi kʋt yakni moma ka fimimpʋt isht a̱ya hatuk oka: mihma kowi yak osh nitak yʋmma okla tahli kʋt, bʋshpo falaia ʋt tahli ka i̱ shahlichi tok.

⁹ Mihma Absalom ʋt Lewi in tishu ʋhleha ha̱ afama tok. Micha Absalom ʋt issuba haksobish falaia om binili tuk o̱, issuba haksobish falaia yash osh nosʋpi chito naksish sukko hikia yatuk o̱ nutaka ont ia ma, noshkobo hʋt nosʋpi ash isht ashekonowa cha, shutik, micha yakni ititakla takali tok: mihma issuba haksobish falaia om binili kamo ont ia tok.

¹⁰ Mihma hatak achʋfa hosh pisa tuk osh, Choab a̱ im anolit, Yakeh! Absalom ʋt nosʋpi a̱ takanli ho̱ pi̱sa li tuk oke, achi tok.

¹¹ Mihma Choab ʋt im anoli tuk hatak ash, Mihma yakeh! ish pi̱sa hokak osh, nanta katiohmi ho̱ issot chik akʋcho ke tuk oh cho? atukma tʋli hʋta shekel pokoli, micha ʋskofʋchi achʋfa chima la he tuk oke, im achi tok.

¹² Mihma hatak ash osh Choab a̱, Tʋli hʋta shekel tahlepa sipokni hosh sʋbbak a̱ ik fo̱ka chi̱ hoh kia, mi̱ko ushi ya̱ sʋbbak a̱ o̱ wielit i sanali la he keyu hoke: e ha̱klo ho̱, mi̱ko ʋt chishno, micha Abishai, micha Ittai aiena ka atokolit hʋchi̱ mihʋt, Ahah! hʋsh aiahni cha, hatak himita Absalom a̱ hʋch ik potolo kashke, achi tuk oka.

¹³ Keyukmʋt ʋno ʋm ilhfiopak ak inli kash ak im a̱hlo ka hinla tuk oke: mi̱ko ya̱ nana kia in luma he keyu hoka, micha chishno ak oh kia is sa̱ sanalit ish hikia he tuk oke, im achi tok.

¹⁴ Yohmi ma Choab ʋt, Yakohmit chi takla hikia la he ʋlhpesa keyu hoke, achi tok. Mihmʋt tʋbi tʋli halupa ontʋla tuchina ho̱ ishi cha, ia mʋt, okcha̱ki moma hosh nosʋpi iklʋna atakali ma Absalom a̱ chu̱kʋsh fehna ishit nʋhlit hlopullichi tok.

¹⁵ Mihma hatak himithoa pokoli hosh Choab i̱ nahalupa shoyuli atuk ʋt afolubli cha, Absalom a̱ nʋhlit ʋbi tok.

¹⁶ Mihma Choab ʋt ishit pu̱fa olachi ma, okla hʋt Islael a̱ iakaiyʋt hlioli tuk ʋt falama tok: Choab ʋt okla ha̱ im alʋmmi hatuk oka.

¹⁷ Mihma Absalom a̱ okla ishi cha, hichukbi chito ʋt kowi anuka̱ka hiki̱a tuk o̱, pit pila cha tʋli itʋnaha chito fehna ho̱ o̱ ashachi tok: mihma Islael moma kʋt im ʋlhtipo aiyukali yihlepʋt ona tok.

¹⁸ Absalom ʋt okcha̱ya moma mʋt, mi̱ko im okfa ha̱ tʋli toni̱k a̱ ishit a hilechi tok: achi kʋt, Sa hohchifo ha̱ isht ithaiyana hi a̱ sʋso hʋt iksho hokʋt, achi hatok: micha tʋli toni̱k a̱ ilap ak inli ho̱ il ai a hochifochi tok: yʋmohmi tok o̱ himak nitak ak kia Absalom ibbak achi hoke.

¹⁹ Yohmi ma Satok ushi Ahimaas ʋt, Himak a̱ ʋno ak osh ak maleli cha, mi̱ko ya̱ anumpa isht ak im ia cha, Chihowa ʋt in tʋnʋp puta ka im il aiokha ka ont anoli lashke, achi tok.

²⁰ Mihma Choab ʋt, Himak nitak a̱ anumpa isht ish ia he keyu, amba nitak inlak mak o̱ anumpa isht ish ia hi oke: amba himak nitak okʋno anumpa isht ish ia he keyu, mi̱ko ushi ʋt illi hoka, im achi tok.

²¹ Yohmi mʋt Choab ʋt Kushi ya̱, Ia cha, nana ish pi̱sa tuk ʋt mi̱ko ya̱ ont im anolí, im achi tok. Mihma Kushi ʋt Choab a̱ il im akachunolichi mʋt, maleli tok.

²² Mihma Satok ushi Ahimaas ʋt anonti Choab a̱, Ik yohmi kia chim asilhha lishke, ʋno ak kia Kushi ya̱ iakaiyʋt ak malelí, im achi tok. Mihma Choab ʋt, Nanta katiohmi ho̱ ish malela hinla cho? sʋso ma! anumpa isht ish ia he ʋt ik ʋlhtaho ki̱sha hoka, achi tok.

²³ Mihma, Ik yohmi kia ak malelí, achi tok. Mihma, Malelí, im achi tok. Yohmi ma Ahimaas ʋt yakni patʋssʋchi hina yak o̱ pit maleli cha, Kushi ya̱ ont imaiya tok.

²⁴ Mihma Lewi ʋt holihta okhissa tuklo ititakla binili ma, hatak hopo̱ko̱yo ʋt holihta okhissa paknaka ishit holmo ya̱ oiyʋt holihta chaha ya̱ ona cha, akachakalit hopo̱koyo ma, yakeh! hatak achʋfa ilap bano hosh chaha̱fa tok.

²⁵ Mihma hatak hopo̱koyo yash osh pa̱ya mʋt, mi̱ko ya̱ im anoli tok. Mihma mi̱ko ʋt, Ilap banokmʋt, itih ha̱ anumpa hʋt foyukʋshke, achi tok. Atuk osh pʋlhkit mihinti mʋt, bili̱ka ʋla tok.

²⁶ Mihma hatak hopo̱ko̱yo yash osh hatak inla yosh chaha̱fa na pisa tok: micha hatak hopo̱koyo yash osh okhissa apistikeli ya̱ pit i̱ howa mʋt, Yakeh! hatak inla yosh ilap bano hosh chaha̱fʋshke, achi tok. Mihma mi̱ko ʋt, Yʋmmak kia anumpa isht a̱ya hoke, achi tok.

²⁷ Mihma hatak hopo̱koyo yash osh, Tikba chʋfa hokʋto Satok ushi Ahimaas chʋfa kak o̱ holba, ʋm ahobʋshke, achi tok. Mihma mi̱ko ʋt, Hatak achukma hoke, micha anumpa achukma ho̱ isht a̱ya hoke, achi tok.

²⁸ Mihma Ahimaas ʋt pa̱ya mʋt, mi̱ko ya̱, Achukma banoshke, im achi tok. Micha mi̱ko itikba ya̱ hʋchukbihlepʋt nashuka ya̱ aka ishit hlipia cha, Yʋmmak osh a̱ shahli mi̱ko ya̱ ibbak a̱ ʋba wielit i̱ sanali tuk a̱ ibbak foyuki tuk okʋt chin Chitokaka Chihowa ʋt holitopashke, achi tok.

²⁹ Mihma mi̱ko ʋt, Hatak himita Absalom ʋt okcha̱ya cho? achi tok. Mihma Ahimaas ʋt afalamichi mʋt, Choab ʋt mi̱ko in tishu ha̱, micha chin tishu ʋno ya̱ et pi pila ma, shakapa chito fehna ho̱ pisa li kia, nana kaniohmi ho̱ yohmi ka ak ithano tuk oke, achi tok.

³⁰ Mihma mi̱ko ʋt, Naksika fullota cha, ilʋppak o̱ hikiá, im achi tok. Mihma naksika fullota cha, lumʋt hikia tok.

³¹ Mihma yakeh! Kushi ʋt ʋla tok: mihma Kushi ʋt, Anumpa hoke, a̱ shahli mi̱ko ma! wakayʋt chim i̱ sanali tuk puta ka, Chihowa ʋt himak nitak a chim il aiokhʋshke, achi tok.

³² Mihma mi̱ko ʋt Kushi ya̱, Hatak himita Absalom ʋt okcha̱ya cho? im achi tok. Mihma Kushi ʋt afalamichi mʋt, A̱ shahli mi̱ko ya̱ in tʋnʋp puta, micha kʋna hosh chi hotopala chi̱ hosh wakayʋt chi̱ sanali moma kʋt, hatak himita yʋmmak o̱ chiyuhmashke, im achi tok.

³³ Mihma miko ʋt nukha̱klot wʋnihinchi fehna mʋt, aboha holihta okhissa paknaka talaia ka oiya cha, yaha̱ya tok: micha ia hosh a̱ya mʋt, yak achi tok, Sʋso Absalom ma! sʋso ma! sʋso Absalom ma! Chitokaka ʋt ahni na ʋno ak osh chi ʋlhtobʋt sʋlli tuk bano! Absalom ma! sʋso ma! sʋso ma! ahanchi tok.