2 Samuel 16 - Chahta Holisso Holitopa 1886

¹ Atuk o̱ Lewi ʋt nʋnih paknaka ya̱ ont ia chohmi ma, yakeh! Mefiboshelh in tishu Siba ʋt issuba haksobish falaia tuklo hosh umpotʋlhpo yo̱ pʋska lumbo tahlepa tuklo, pa̱ki shila champuli lokussa tahlepa achʋfa, micha toffa nan ʋni tahlepa achʋfa, micha oka pa̱ki kotoba achʋfa aiena hosh ʋbanaiya ho̱ ishi cha, ont afama tok.

² Mihma mi̱ko ʋt Siba ya̱, Ilʋppa nanta isht ish ahni cho? im achi tok. Mihma Siba ʋt, Issuba haksobish falaia ano mi̱ko in chuka achʋfa yak osh om binila chi̱ hoke; mikma pʋska, micha toffa nan ʋni ano hatak himithoa ʋt ʋpa chi̱ hoke; mikma oka pa̱ki ano yakni haiaka a̱yʋt hoyʋbli kʋt ishka chi̱ hoke, achi tok.

³ Mihma mi̱ko ʋt, Chi̱ shahli ushi mʋto? achi tok. Mihma Siba ʋt mi̱ko ya̱, Yakeh! Chelusalem ak o̱ antʋshke: Himak nitak a̱ Islael in chuka achʋfa ʋt a̱ki im apehlichika ya̱ a̱ falʋmmincha chi̱ hoke, achi hatuk okʋt, achi tok.

⁴ Yohmi ma mi̱ko ʋt Siba ya̱, Yakeh! Mefiboshelh immi hatuk moma kʋt chimmi hoke, im achi tok. Mihma Siba ʋt, Chu̱kʋsh akanlosi hosh chi̱ holhponayo itikba isht ish i̱ kana chi ai ahayuchi likbano, ahnit chim asilhha lishke, a̱ shahli, mi̱ko ma! achi tok.

⁵ Atuk o̱ mi̱ko Lewi ʋt Bahulim a̱ ona ma, yakeh! yʋmma Sal in chuka achʋfa ai achʋfa ʋt a kohcha hosh, hatak yʋmma hohchifo kʋt Shimei yosh Kela ushi ʋt minti mʋt, anumpa kalakshichi onohonchi hosh kohchʋt minti tok.

⁶ Mihma Lewi ya, micha mi̱ko Lewi in tishu ʋhleha moma ka tʋli ishit boli tok: mihma okla moma, micha hatak hlampko chilita moma kʋt im ishtimpak imma, micha ʋlhfʋbek imma aiena ka a̱ya tok.

⁷ Mihma Shimei ʋt anumpa kalakshichi onochi kʋt yak achit, Kohchá, kohchá, issish hatak chia, micha Belial hatak chia ma!

⁸ Sal in chuka achʋfa yʋmmak o̱ ʋlhtobʋt ish mi̱ko hoka, Chihowa ʋt im issish moma ka falamminchit chi onochishke; micha Chihowa ʋt ish apehlichika ya̱ chiso Absalom ak o̱ ibbak fohkishke: micha yakeh! nana okpʋnit isht ish anta moma ho̱ chishishke, issish hatak chia hoka, achi tok.

⁹ Yohmi ma Seluiah ushi Abishai ʋt mi̱ko ya̱, Nanta katiohmi ho̱ ofi illi ilʋppʋt a̱ shahli mi̱ko ya̱ anumpa kalakshichi onocha hinla cho? ak ʋbanʋbli cha, noshkobo ha̱ ont ak tʋblí, achi tok.

¹⁰ Mihma mi̱ko ʋt, Nanta ishit hʋchi ahalaia li cho? Seluiah ushi ʋhleha hʋchia ma! yohmit anumpa kalakshichi ik onochí, Chihowa ak osh Lewi ya̱ anumpa kalakshichi ik onochí, im achi hatuk oka. Yohmi ka kʋta hosh, Nanta katiohmi ho̱ ish yʋmihchi cho? acha hinla? achi tok.

¹¹ Mihmʋt Lewi ʋt Abishai, micha in tishu ʋhleha moma ka, Yakeh! sʋso hʋt sakfohka a kohcha tuk ʋt ʋm ilhfiopak a̱ hoyoshke: yohmi ka himak a̱ Benchamait ilʋppak okak heto yohma he ʋlhpesa keyu̱? ik a̱shá, anumpa kalakshichi ik onochí, Chihowa ʋt im achi tuk oka.

¹² Chihowa ʋt nan ashʋchi li tuk osh sʋlbʋsha ka pisa cha, Chihowa ʋt himak nitak a̱ anumpa kalakshichit isht si onochi ka achukma ho̱ a̱ falʋmmincha hinla yoba ká, im achi tok.

¹³ Atuk o̱ Lewi, micha in tishu ʋhleha aiena kʋt ia hosh a̱ya ma, Shimei ʋt nʋnih abaksacheka ichapʋt a̱ya mʋt, kalakshichit anumpohonlit a̱ya mʋt, tʋli ya̱ ishit boli mʋt, lukfi pushi ya̱ pila tok.

¹⁴ Mihma mi̱ko, micha okla moma apehʋt a̱ya tuk ʋt hoyʋbli hatuk osh yʋmmak o̱ ont ai ile fohʋchi tok.

¹⁵ Mihma Absalom, micha okla moma, Islael hatak ʋhleha aiena kʋt Chelusalem a̱ ʋla ma, Ahihlofel ʋt iba fo̱ka tok.

¹⁶ Atuk o̱ yakohmi tok, Achait hatak Hushai Lewi i̱ kana ʋt Absalom a̱ im ʋla mʋt, Chitokaka ʋt mi̱ko ya̱ okchalinchashke, Chitokaka ʋt mi̱ko ya̱ okchalinchashke, ahanchi tok.

¹⁷ Mihma Absalom ʋt Hushai ya̱, Chi̱ kana ha̱ ilʋppak o̱ isht ish i̱ kana mak oh cho? nanta katiohmi ho̱ chi̱ kana ya̱ awant chik aiyo tuk oh cho? im achi tok.

¹⁸ Mihma Hushai ʋt Absalom a̱, Aha̱! amba kʋna ho̱ Chihowa, micha okla ilʋppa, micha Islael hatak ʋhleha moma kak osh atokolikma, yʋmmak o̱ immi sia ha chi̱ hoke, micha takla ahanta la chi̱ hoke.

¹⁹ Micha anonti kʋta hak o̱ im antia la hinla cho? ushi itikba ahantʋt im antia la he ʋlhpesa keyu cho? chi̱ki itikba ahantʋt im antia li chatuk ʋt, yohmi hosh chi tikba ahanta la chi̱ hoke, im achi tok.

²⁰ Mihma Absalom ʋt Ahihlofel a̱, Nana e kaniohma chi̱ ka hʋchishno ak osh anumpa hʋsh it im apesashke, im achi tok.

²¹ Mihma Ahihlofel ʋt Absalom a̱, Chi̱ki im itaiena ʋhleha chuka apistikela chi̱ ho̱ ashachi cha ia tuk o̱, ish iba chukowashke; mikma Islael ʋhleha moma kʋt, chi̱ki ʋt chi̱ yuwala ka hakla hi oke; yohmikma chi apehʋt a̱sha kʋt momʋt ibbak ʋt kʋlla hi oke, im achi tok.

²² Mihma Absalom a̱ aboha paknaka ʋlhtipo okla in takalichí tok; mihma Islael moma kʋt pi̱sa ho̱, Absalom ʋt i̱ki im itaiena ʋhleha ha̱ iba chukowa tok.

²³ Mihma Ahihlofel im anumpa anumpohonli kʋt, nitak yʋmma foka ka hatak osh Chitokaka i̱ ponaklo tuk ak o̱ chiyuhmi beka tok: yohmi hosh Ahihlofel ʋt Lewi, micha Absalom ita tuklo ka nana i̱ mihi̱ha beka tok.