2 Samuel 15 - Chahta Holisso Holitopa 1886

¹ Atuk o̱ ilʋppa i̱ himmakma yakohmi tok, Absalom ʋt tʋnʋp itichanʋlli puta, micha issuba puta, micha hatak pokoli tahlapi hosh itikba a tihlaha̱ya hi a̱ il atahli tok.

² Micha Absalom ʋt onnahinli fehna wakaya cha, holihta okhissa hina bili̱ka hikia beka tok: atuk o̱ hatak nana kia nan it i̱ kaniohmi na mi̱ko ʋt nana im apesa chi̱ ho̱ ʋlakma, Absalom ʋt pit i̱ howa cha, Tʋmaha holihta nanta chia ho̱? achikma, Chin tishu hʋt Islael apehlichi achʋfa ka sia hoke, achi beka tok.

³ Mihma Absalom ʋt, Yakeh! chishno ak osh nana kʋt achukma, micha ʋlhpesa hoke; yohmi kia mi̱ko ʋt hatak nana ho̱ ik atokolo hatuk o̱, isht ʋtta hi ʋt iksho hoke, im achi beka tok.

⁴ Micha Absalom ʋt, Yakni ya̱ nanapesa tobʋt ahanta likbano; yohmi na hatak nana kia nana it i̱ kaniohmi, keyukmʋt nana im a kaniohmi kʋt ʋno ak o̱ ʋm ʋla na ai ʋlhpiesa kak o̱ i̱ yʋmihchi lashke, achi tok.

⁵ Atuk osh yakohmi beka tok, hatak nana kia im akachunola chi̱ hosh bili̱ka ʋlakma, ibbak a̱ pit welit, halʋlli cha, i̱ su̱ksowa beka tok.

⁶ Micha ilʋppa puta kak o̱ Islael moma kʋt nana im ʋlhpisa bʋnnʋt mi̱ko ya̱ im onakma, Absalom ʋt i̱ yʋmihchi beka tok: yohmi hosh Absalom ʋt Islael hatak ʋhleha chu̱kʋsh a̱ ishi tok.

⁷ Atuk o̱ i̱ himmak afʋmmi pokoli ushta ma yakohmi tok, Absalom ʋt mi̱ko ya̱, Chim asilhha lishke, ak ia cha, anumpa il onochi Chihowa ya̱ im il onochi li tok ʋt, Heblon a̱ ont ai a̱hlichi lashke,

⁸ Chin tishu hʋt Silia yakni Keshu ya̱ ahanta li moma mʋt, anumpa il onochi il onochit, Chihowa ʋt anonti Chelusalem a̱ sʋsht ona mʋhlikma, yohmikma Chihowa ya̱ im antia lashke, achi li tok, im achi tok.

⁹ Mihma mi̱ko ʋt, Achukma̱kʋt ish a̱yashke, im achi tok. Yohmi ho̱ wakaya cha, Heblon a̱ ona tok.

¹⁰ Yohmi tuk kia Absalom ʋt Islael apehlichi moma ka ibata̱kla ʋhleha ha̱ pilʋt hlopullichit, Ishit pu̱fa ʋt ohonla na hʋsh haklo makinli hosh, Absalom ʋt Heblon a̱ a mi̱koshke, hʋsh achashke, ahanchi tok.

¹¹ Mihma hatak tahlepa tuklo hosh im annoa tuk ʋt, Chelusalem a̱ a kohchʋt Absalom a̱ api̱hʋt ia tok; micha nana ik achukmo ik ahno hosh ia cha, nana ka mominchit ik ithano tok.

¹² Mihma Absalom ʋt Kilonait hatak Ahihlofel Lewi ya̱ nana i̱ miha yosh in tʋmaha holihta Kiloh ya̱ anta tuk o̱, nan ʋbit isht aiokpʋchi im issa hosh anta hosh, pit hoyo tok. Micha anumpa luma it im apesa ash osh kʋllo tok; Absalom a̱ okla ibafohka kʋt isht i̱ shahlit ma̱ha̱ya hatuk oka.

¹³ Mihma anumpa shali ʋt Lewi ya̱ im ʋla cha, Islael hatak ʋhleha chu̱kʋsh ʋt Absalom ak o̱ iakaiyʋshke, achi tok.

¹⁴ Mihma Lewi ʋt in tishu ʋhleha moma apehʋt Chelusalem a̱ a̱sha tuk a̱, Hʋsh wakaya na e yihlepashke; keyukmʋt Absalom a̱ il i̱ hlakofa he keyu hokʋt: tu̱shpʋt hʋsh iashke, yakosi itin ta̱kla kia ant pi sakkit, nan ik achukmo ka pi onochi cha, tʋmaha holihta ya̱ bʋshpo falaia halupa isht issot kanchi ná, im achi tok.

¹⁵ Mihma mi̱ko in tishu ʋhleha hʋt mi̱ko ya̱, Yakeh! chin tishu ʋhleha hʋt a̱ shahli mi̱ko ʋt nana ho̱ apesakma, e yʋmihcha chi̱ kʋt pim ʋlhtahʋshke, im achi tok.

¹⁶ Mihma mi̱ko ʋt kohchʋt ia ma, in chuka achʋfa moma kʋt iakaiya tok. Mihma mi̱ko ʋt ohoyo pokoli im itaiena ʋhleha hatuk o̱, chuka apistikela chi̱ ka ashachi cha, ia tok.

¹⁷ Mihmʋt mi̱ko ʋt kohchʋt ia ma, okla moma kʋt iakaiya mʋt, hopaki ho̱ ona cha, aiasha tok.

¹⁸ Mihma in tishu ʋhleha hʋt tahlala̱ka ichapʋt a̱ya tok; mihma Chelehlait moma, micha Pelehlait moma, micha Kittait moma, hatak tahlepa hannali hosh Kalh a̱shʋt iakaiyʋt ia tuk ʋt mi̱ko ya̱ tikba a̱ya tok.

¹⁹ Yohmi ma mi̱ko ʋt Kittait hatak Ittai ya̱, Nanta katiohmi ho̱ chishno ak kia pi awant ish ia cho? falamʋt ish ai ʋtta ya̱ ish ona cha, mi̱ko ya̱ takla ish antashke: okla inla chia, micha i̱ yakni ʋtta chia keyu hokʋt.

²⁰ Pilashash ʋla tuk ish chohmi kʋt, pi apehʋt himak nitak a̱ ish a̱ya na ishit chi fullolihinchi la hinla cho? kanima yo̱ ia la hinlakmʋt, ia li hoka; ish falama cha, chitibapishi ʋhleha ha̱ isht ish iashke: isht i̱ nukha̱klo, micha ai a̱hli ʋt chiba foyukashke, im achi tok.

²¹ Mihma Ittai ʋt mi̱ko ya̱ afalamichit, Chihowa ʋt okcha̱ya pulla ka, micha a̱ shahli mi̱ko ʋt okcha̱ya pulla ka, kanima fehna ho̱ a̱ shahli mi̱ko ʋt ahantakma, okcha̱ya hokma, illi hokma, nanakma, yʋmmak inli fehna chin tishu ak kia ahanta chi̱ hoke, achi tok.

²² Mihma Lewi ʋt Ittai ya̱, Iʋt ish ʋbanʋblashke, im achi tok. Mihma Kittait hatak Ittai, micha in tʋshka ʋhleha, micha chipunta moma apehʋt a̱ya tuk ʋt momʋt ʋbanʋblit ont ia tok.

²³ Mihma yakni moma kʋt chitoli hosh yaiya tok; mihma okla moma kʋt ʋbanʋblit ont ia tok; mi̱ko ak kia bokushi Kitlon a̱ ʋbanʋblit ia ma, okla moma kʋt ʋbanʋblit yakni haiaka hina yo̱ ia tok.

²⁴ Mihma yakeh! Satok ak kia, micha Lefait puta kʋt apeha hosh Chitokaka nan it im apesa itombi holitopa ya̱ shoyulit a̱ya tok: atuk osh Chitokaka im itombi holitopa ya̱ aka talali tok; mihma Abiahla ʋt oiyʋt ma̱ha̱ya na, okla moma kʋt tʋmaha holihta ya̱ kohchʋt taiyaha ma, hikia tok.

²⁵ Mihma mi̱ko ʋt Satok a̱, Chitokaka im itombi holitopa ya̱ falʋmminchit tʋmaha holihta ya̱ isht ish onashke: Chihowa i̱ holhponayo itikba ya̱ isht i̱ kana ai ahayuchi likma, anonti sʋsht ona cha, yʋmma micha ai ahanta aiena ka sʋpisacha hi oke.

²⁶ Amba, Chi ahninchi li keyu, achi hokma; yakeh! yak hikia lishke, kaniohmi kak o̱ ʋlhpesa ahnikmʋt, si yʋmihchashke, im achi tok.

²⁷ Micha mi̱ko ʋt naholitompa isht ʋtta Satok a̱, Napisa chia keyu cho? tʋmaha holihta ya̱ falamʋt chiso tuklo, chiso Ahimaas, micha Abiahla ushi Chonahlan hʋsh aiena kʋt hʋchi achukma̱kʋt hʋsh onashke.

²⁸ Yakeh! yakni haiaka yakni patali ak o̱ anta li tuk o̱, nana ʋm anoli kʋt chim anumpa hʋt ʋm ʋlashke, im achi tok.

²⁹ Yʋmohmi ho̱ Satok, micha Abiahla ʋt Chitokaka im itombi holitopa ya̱ anonti Chelusalem a̱ isht ona tok: micha yʋmmak o̱ a̱shwa tok.

³⁰ Micha Lewi ʋt Alifet nʋnih ha̱ ai oiyʋt ia yak o̱ ia mʋt, noshkobo hʋt ompoholmo cha, iyi bieka hosh yaha̱yʋt ia tok: mihma okla moma apehʋt a̱ya tuk ʋt noshkobo ha̱ ompohomo bieka cha, oiyʋt ia mʋt, yaha̱ya hosh oiya tok.

³¹ Mihma achʋfa kʋt Lewi ya̱ im anolit, Ahihlofel ʋt anumpa luma it im apesa ʋhleha ha̱ ibataklʋt Absalom a̱ iba fohkʋshke, achi tok. Mihma Lewi ʋt, Chihowa ma! Ahihlofel im anumpa ha̱ chik ahobalo kashke, chim asilhha lishke, achi tok.

³² Atuk o̱ yakohmi tok, Lewi ʋt nʋnih paknaka yʋmma ona cha, Chitokaka ya̱ ai aiokpʋchi ma, yakeh! Hushai Achait hatak ʋt nafohka ʋt i̱ hlilafa, micha lukfi pushi ʋt noshkobo ha̱ on a̱sha hosh ʋla tok.

³³ Yʋmma Lewi ʋt, Si awant ish a̱yakmʋt, is si ataklʋmma chi̱ hoke.

³⁴ Amba falamʋt tʋmaha holihta ya̱ ish ona cha, Absalom a̱, Chin tishu sia hachi̱ hoke, mi̱ko ma! cha̱shpo ka chi̱ki in tishu sia hatuk okʋt, chishno ak kia himak a̱ chin tishu sia hachi̱ hoke, ish achikmʋt, yohmikmʋt Ahihlofel im anumpa ha̱ is sa̱ kobʋffa hinlashke.

³⁵ Micha Satok, micha Abiahla naholitompa isht a̱shwa ʋt yʋmma chibafohka keyu cho? yohmi hoka yakohma hi oke, nana hoh kia mi̱ko in chuka ya̱ ish a haiyaklokmʋt. Satok, micha Abiahla, naholitompa isht a̱shwa yak o̱ ish im anolashke.

³⁶ Yakeh! ushi tuklo kʋt yʋmma im a̱shwa hoke, Satok ushi Ahimaas, micha Abiahla ushi Chonahlan, yʋmmak o̱ tohnot nana ka ish haklo moma et hʋs sam pila chi̱ hoke, im achi tok.

³⁷ Yohmi ho̱ Hushai Lewi i̱ kana ʋt tʋmaha holihta ya̱ ant chukowa ma, Absalom ʋt Chelusalem a̱ ant chukowa tok.