2 Samuel 13 - Chahta Holisso Holitopa 1886

¹ Atuk o̱ ilʋppa i̱ himmakma yakohmi tok, Lewi ushi Absalom ʋt in tek ʋt pisa aiokli hosh im anta cha, yʋmma hohchifo kʋt Tama atok: mihma Lewi ushi Amnon ʋt anushkunna tok.

² Micha Amnon ʋt in tek Tama ya̱ anushkunna fehna kak osh il abekʋchi tok; ohoyo himita hatak ik halelo hatuk oka: micha Amnon ʋt nana i̱ kaniohmichi ka nana i̱ kʋlla hinla ahni tok.

³ Yohmi kia Amnon ʋt i̱ kana anta hosh Lewi itibapishi Shimeah a̱ ushi yosh, yʋmmʋt hohchifo kʋt Chonatab atok: micha Chonatab ʋt hatak nan i̱ kostini fehna atok.

⁴ Micha yʋmmak ash osh, Nanta katiohmi ho̱ mi̱ko ushi chia hokak osh, onna hosh onnakma chunnʋt isht ish ia cho? is sʋm anola he keyu cho? im achi tok. Mihma Amnon ʋt, Itibapishi li Absalom in tek Tama yak o̱ anushkunna li hoke, im achi tok.

⁵ Mihma Chonatab ʋt, Chin topa ha̱ ish onʋtonla cha, ish il abekʋchashke; atuk o̱ chi̱ki ʋt chi pisʋt ʋlakma, Chim asilhha lishke, an tek Tama ʋt ik la cha, ilhpak ik sa petá, micha sa tikba ilhpak a̱ ant ik atahli na pisa lish, ibbak a̱ ai ishi lish, ʋpa lashke, ish im achashke, im achi tok.

⁶ Yohmi ma Amnon ʋt itoyula cha, il abekʋchi tok; atuk o̱ mi̱ko ʋt pisʋt ʋla ma, Amnon ʋt mi̱ko ya̱, Chim asilhha lishke, an tek Tama ʋt ik la cha, pʋska lumbo tuklo ka, pi̱sa li ho̱, ʋm ikbi na ibbak a̱ ai ishi lish, ʋpa lashke, im achi tok.

⁷ Yohmi ma Lewi ʋt chuka ya̱ Tama ya̱ pit hoyo cha, Chi nakfi Amnon in chuka ia cha, ilhpak a̱ ish im atahlashke, im achi tok.

⁸ Yohmi ma Tama ʋt i̱ nakfi Amnon in chuka ya̱ ona tok; mihma itonla tok. Mihma yʋmmʋska ishi cha, yʋmʋslit, pi̱sa ho̱, lumbochi cha, lumbo ash nunachi tok.

⁹ Mihma ampo mahaia ai ʋlwʋsha ya̱ ishi cha, itikba ya̱ tosholi tok: yohmi kia ʋpa ik bʋnno tok. Mihma Amnon ʋt, Hatak moma ka a̱ filʋmmichit kocha ho wehlí, achi tok. Mihma hatak puta kʋt issʋt kocha wiha tok.

¹⁰ Mihma Amnon ʋt Tama ya̱, Ilhpak a̱ aboha a nusi yak o̱ isht ish la na chibbak a̱ ai ishi lish, ʋpa lashke, im achi tok. Mihma Tama ʋt pʋska lumbo ikbi tuk ʋt aboha anusi i̱ nakfi Amnon a̱ isht im ona tok.

¹¹ Atuk osh ʋpa chi̱ ho̱ ishit chukowa cha, im ʋla ma, halʋlli mʋt, Minti chá, is sʋba tʋshkashke, an tek ma! im achi tok.

¹² Mihma afalamichit, Ahá a̱ nakfi ma! is sa hoklit is si ai issa ná: Islael a̱ nana chohmi kʋt a yʋmohma he ʋlhpesa keyu hoka: nana ik achukmo ilʋppa ish yʋmohmi ná.

¹³ Mikma ʋno ʋto nan ishit sa hofahya ya̱ katima pit kanchi la hinla cho? mikma chishno yokʋto Islael a̱ im anukfila iksho ak inli ish chohma chi̱ hoke. Yʋmohmi hoka himak a̱ mi̱ko yak o̱ im anumpulí; ʋno ya̱ chim i̱ hulla he keyu hoka, im achi tok.

¹⁴ Yohmi kia im anumpa ha̱ hakla he keyu tok; amba kʋllo kʋt i̱ shahli hatuk osh hoklit ai issa cha, iba tʋshki tok.

¹⁵ Yohmi mʋt Amnon ʋt i̱ nukkilli kʋt atampa tok; yohmi hosh nukkilli isht i̱ nukkilli kʋt anushkunna isht anushkunna kash i̱ shahli fehna tok. Mihma Amnon ʋt, Wakaya cha, iá, im achi tok.

¹⁶ Mihma, Nana kaniohmi keyu: kanima pit is sa chʋffichi ilʋppak osh ik achukmo kʋt, inla nana is si yʋmihchi kash kia i̱ shahlishke, im achi tok. Yohmi kia i̱ haponakla he keyu tok.

¹⁷ Yohmi ma in tishu nana isht im ʋtta beka tuk a̱ hoyo cha, Ohoyo ilʋppa a̱ falʋmminchit kohchi cha, okhissa isht ʋlhkʋma iakaiyachit ashʋnnichí, im achi tok.

¹⁸ Mihma i̱ nafohka ʋt pisa ilaiyukali yo̱ fohka tok: mi̱ko ushetik hatak haleli keyu kʋt nafohka yohmi kak o̱ ʋlbeha chatuk oka. Yohmi ma in tishu hʋt kohchi cha, okhissa isht ʋlhkʋma ya̱ iakaiyachit ashʋnnichi tok.

¹⁹ Mihma Tama ʋt hituk chubbi ya̱ noshkobo ha̱ o̱ ashachi cha, i̱ nafohka pisa ilaiyukali fohka tuk ʋt hlilʋffi mʋt, ibbak a̱ noshkobo onochi cha, yaha̱yʋt ia tok.

²⁰ Mihma i̱ nakfi Absalom ʋt, Chi̱ nakfi Amnon ʋt chibai anta tuk o̱? yohmi kia nana ish achi ná, an tek ma! chi̱ nakfi yoke; nana ilʋppa yohmi ish ahni ná, im achi tok. Yohmi ma Tama ʋt ʋlhtakla hosh i̱ nakfi Absalom in chuka ahanta tok.

²¹ Yohmi kia mi̱ko, Lewi ʋt nana ilʋppa puta ka haklo mʋt, nukhobela kʋt libbi fehna tok.

²² Mihma Absalom ʋt itibapishi Amnon a̱ achukma hokmá, ik achukmo hokmá, nana kia ik im anumpulo tok: in tek Tama ya̱ hoklit ai issa tuk ak o̱ i̱ nukkilli hatuk okʋt.

²³ Atuk o̱ i̱ himmak afʋmmi tuklo ʋlhpiesa ma yakohmi tok, Absalom ʋt Baal‐haso yʋmmʋt Eflaim bili̱ka ya̱ chukfi hishi ʋmo hosh im a̱sha tok: micha Absalom ʋt mi̱ko ushi ʋhleha moma ka im anoli tok.

²⁴ Micha Absalom ʋt mi̱ko ya̱ im ʋla cha, Yakeh! chin tishu hʋt chukfi hishi ʋmo hosh im a̱shʋshke: mi̱ko, micha in tishu ʋhleha aiena kʋt chin tishu ha̱ apehʋt iashke, chim asilhha lishke, achi tok.

²⁵ Mihma mi̱ko ʋt Absalom a̱, Aha̱! sʋso ma! himak a̱ momʋt kil aiyo kashke, yohmi cha nana e chi tahli ná, im achi tok. Mihma im achunanchi tok; yohmi kia ia he keyu hosh, amba anumpa yukpali onochi tok.

²⁶ Yohmi ma Absalom ʋt, Yohma he keyukma, itibapishi li Amnon ʋt pi awant iashke, chim asilhha lishke, achi tok. Mihma mi̱ko ʋt, Nanta katiohmi ho̱ yʋmmak osh chi awant ia hinla ho̱? im achi tok.

²⁷ Yohmi kia Absalom ʋt im achunanchi na Amnon, micha mi̱ko ushi ʋhleha moma ka ik iá, ahni tok.

²⁸ Mihma Absalom ʋt in tishu ʋhleha ha̱, yakohmi hʋsh ahni cha, Amnon chu̱kʋsh ʋt oka pa̱ki isht im achukmʋt tahakma, Amnon a oh ʋbí, hʋchim achi likma; yohmikma hʋsh bashke; hʋchi nukshopa ná, hʋchim apesa li tuk keyu cho? nukwia ikshot amosholit hʋsh chilitashke, im achi tok.

²⁹ Mihma Absalom in tishu ʋhleha hʋt, Absalom ʋt im apesa tuk mak o̱ Amnon a̱ yʋmihchi tok. Mihma mi̱ko ushi ʋhleha moma kʋt wakaya cha, im issuba haksobish falaia aiyukali oiyʋt om binili cha, yihlepa tok.

³⁰ Atuk o̱ yakohmi tok, hina takla a̱ya moma ho̱ annoa kʋt Lewi ya̱ im ʋla cha, Absalom ʋt mi̱ko ushi ʋhleha moma ka ʋbit tahli na achʋfa kia ik hlakofoshke, achi tok.

³¹ Mihma mi̱ko ʋt wakaya cha, i̱ nafohka ya̱ hlilʋffi mʋt, aka itoyula tok: mihma in tishu ʋhleha moma kʋt i̱ nafohka hlilafa yosh afolublit hieli tok.

³² Mihma Lewi itibapishi Shimeah a̱ ushi Chonatab ʋt afalamichit, A̱ shahli hʋt mi̱ko ushi hatak himithoa moma ka ʋbit tahli ka ik im ahobo kashke; Amnon ak illa hosh illi hoka: Absalom ak osh apesa ho̱, in tek Tama ya̱ hoklit ai issa tok, yʋmmak atuk nitak takla ka ilʋppʋt yʋmohma he aiahni tok oka, achi tok.

³³ Yʋmohmi hoka himak a̱ a̱ shahli mi̱ko ʋt mi̱ko ushi ʋhleha hʋt illit taha ka ahnit, chu̱kʋsh anukfoyukʋt isht ik ilbʋsho kashke: Amnon ak illa hosh illi hoka.

³⁴ Amba Absalom ʋto malelit kʋnia tok. Mihma hatak himita nan atoni ʋt akachakalit hopo̱koyo ma, yakeh! okla laua hosh nʋnih abaksacheka hina im a̱shaka ya̱ minti tok.

³⁵ Mihma Chonatab ʋt mi̱ko ya̱, Yakeh! mi̱ko ushi ʋhleha hʋt ʋlʋshke: chin tishu achi tuk mak o̱, yʋmohmishke, im achi tok.

³⁶ Atuk o̱ yakohmi tok, anumpuli kʋt ont tahli mak inli ho̱ yakeh! mi̱ko ushi ʋhleha hʋt ʋla mʋt, chitoli hosh yaiya tok: mihma mi̱ko ak kia, micha in tishu ʋhleha moma aiena kʋt yaiya fehna tok.

³⁷ Amba Absalom ʋt malelit, Ammihut Keshu i̱ mi̱ko ushi Talmai yak o̱ im ona tok. Mihma Lewi ʋt nitak moma ka ushi ya̱ ishit yaha̱ya tok.

³⁸ Yohmi ma Absalom ʋt malelit, Keshu ya̱ ona cha, ahanta na afʋmmi tuchina tok.

³⁹ Mihma mi̱ko Lewi ʋt ushi Absalom a̱ i̱ palata fehna tok: Amnon ʋt illi tuk ano hopohlʋt taha hokʋt.