2 Samuel 12 - Chahta Holisso Holitopa 1886

¹ Micha Chihowa ʋt Nahlan a̱ Lewi ya̱ i̱ pila tok. Mihma im ʋla tok; micha, Hatak tuklo hosh tʋmaha holihta achʋfa ka a̱shwa tok: achʋfa kʋt nan in laua yokma, achʋfa ʋto ilbʋsha tok.

² Hatak nan in laua ʋt nan ʋlhpoa chipunta, micha nan ʋlhpoa hochito aiena kʋt im apakna atampa tok.

³ Amba hatak ilbʋsha ʋto nana ik im iksho, chukfʋlhpoa ushi tek iskitini achʋfa, yʋmmak oka chumpa cha, ipetʋt hofantihinchi ak illa tok: takla ahantʋt, im ʋlla ʋhleha ha̱ ibahofanti tok; ilap im ilhpak ak inli ho̱ ai ʋpakmʋt, ilap im isht ishko ak inli ho̱ ai ishkokmʋt, shakba foyukʋt itoyula beka cha, ushetik ak inli in chiyuhmi tok.

⁴ Atuk o̱ hatak nowʋt a̱ya ʋt hatak nan in laua yash im ona tok; mihma i̱ hullo cha, ilap i̱ nan ʋlhpoa chipunta ak inli, micha ilap i̱ nan ʋlhpoa hochito aiena ak inli ka ai ishit hatak nowʋt a̱ya im ʋla tuk a̱, ik im atahlo hosh, amba hatak ilbʋsha in chukfʋlhpoa ushi ak o̱ ishi cha, hatak im ʋla kash im atahli tok, im achi tok.

⁵ Mihma Lewi ʋt hatak ash i̱ sanalit nukhobela kʋt libbi fehna tok; micha Nahlan a̱, Chihowa ʋt okcha̱ya pulla ka, nana ilʋppa yʋmihchi tok hatak yʋmmʋt illi pulla chi̱ hoke.

⁶ Micha chukfʋlhpoa ushi ʋt inlohmi ushta ho̱ falʋmmincha chi̱ hoke, nana ilʋppa yʋmihchi tuk okʋt, micha ik i̱ nukha̱klo tok okʋt, im achi tok.

⁷ Mihma Nahlan ʋt Lewi ya̱, Hatak yʋmmʋt chishno ak oke. Islael in Chitokaka Chihowa ʋt yak achishke, Nan ahʋmmit Islael i̱ mi̱ko chi atokoli li tok, micha Sal ibbak a̱ a chi hlakofihinchi li tok oke.

⁸ Micha chi̱ shahli in chuka ya̱ chima li tok, micha chi̱ shahli tekchi ʋhleha chi shakba ya̱ fohkit chima li tok, micha Islael in chuka achʋfa, micha Chutah in chuka achʋfa aiena ka chima li tok; atuk o̱ yʋmmʋt chim iskitini fehna hatuk okma, himakma nana yakohmi, micha nana yakohmi aiena ka chima la hi atok.

⁹ Yohmi ka katiohmi ho̱ Chihowa i̱ nan ʋlhpisa ya̱ ish shitilema cha, itikba ya̱ nana ik achukmo ish yʋmihchi tuk oh cho? Hittait hatak Uliah ya̱ bʋshpo falaia isht ish bishke, micha Ammon in chipota i̱ bʋshpo falaia yo̱ isht ish bi cha, tekchi yatuk a̱ chi tekchi ya chi̱ ho̱ ish ishi tuk oke.

¹⁰ Yohmi hoka himak a̱ bʋshpo falaia ʋt chin chuka ya̱ i̱ filʋmma he keyu; is sa shitilema cha, Hittait hatak Uliah tekchi yatuk a̱ chi tekchi ya chi̱ ho̱ ish ishi hokʋt.

¹¹ Chihowa ʋt yak achishke, Yakeh! chin chuka achʋfa yash ak inli nana ik achukmo ka, chi̱ sanalichit hilechi la chi̱ hoke; micha chi tikba fehna chi tekchi ʋhleha ha̱ chim ai ishi lish, ish ai itilaui yo̱ ima likma, hʋshi ilʋppa itikba ya̱ chi tekchi ʋhleha ha̱ iba tʋshka hi oke.

¹² Luma hosh ish yʋmihchi tuk oka, amba ʋno ʋto nana ilʋppa Islael moma itikba, micha hʋshi itikba ya̱ a yʋmihchi la hi oke, im achi tok.

¹³ Mihma Lewi ʋt Nahlan a̱, Chihowa ya̱ i̱ sai yoshubʋshke, im achi tok. Mihma Nahlan ʋt Lewi ya̱, Chihowa ak kia nan ish ashʋchi ya̱ ishit chi̱ kanchishke; chilla he keyu, im achi tok.

¹⁴ Yohmi kia ilʋppa yakohmit, Chihowa im i̱ sanali ʋhleha hʋt nana isht a mihʋt kalakshicha hi a̱ ish takalichi hoka, ʋlla chim ʋtta tuk ash kia illi pulla chi̱ hoke, im achi tok.

¹⁵ Mihma Nahlan ʋt in chuka ia tok. Mihma Chihowa ʋt ʋlla yash Uliah tekchi atuk ʋt Lewi ya̱ im eshi tok a̱ isso na abeka fehna tok.

¹⁶ Yʋmohmi hatuk o̱ Lewi ʋt ʋlla ya̱ Chitokaka isht im asilhha tok: micha Lewi ʋt ik impo hosh ont chukowʋt aka itoyula na ninak ʋt ont onna tok.

¹⁷ Mihma in chuka achʋfa im asʋnonchi ʋhleha hʋt aka itoyula ka tanicha chi̱ hosh im ona tok: yohmi kia yohma he keyu, micha pʋska yak kia ibai ʋpa he keyu tok.

¹⁸ Atuk o̱ yakohmi tok, nitak ont isht untuklo ma ʋlla ash osh illi tok. Mihma Lewi in tishu ʋhleha hʋt ʋlla ʋt illi ka im anoli kʋt nukwia tok: Yakeh! ʋlla ʋt okcha̱ya moma ka il im anumpuli ma, pi̱ haponakla he keyu tuk ʋt, ʋlla ʋt illi ka il im anoli kak heno il ilbʋshali fehna chi̱ hoke, achi tok.

¹⁹ Yohmi kia in tishu ʋhleha hʋt lumʋt it im anumpuli ka Lewi ʋt pisa mʋt, ʋlla ʋt illi ka Lewi ʋt akostininchi tok: atuk osh Lewi ʋt in tishu ʋhleha ha̱, Ʋlla ash osh illi cho? im achi tok. Mihma, Illishke, okla achi tok.

²⁰ Yohmi ma Lewi ʋt aka itoyula tuk ʋt wakaya cha, okami mʋt, nan il ahʋmmit, nafohka inla ishit fohka cha, Chihowa im aboha ont chukowa cha, aiokpʋchi tok: yohmi mʋt ilap in chuka yak inli ant chukowa tok: micha hoyo ma, pʋska ya̱ itikba in talali ma, impa tok.

²¹ Yohmi ma in tishu ʋhleha hash osh, Nana ilʋppa nanta mak o̱ ish yʋmihchi cho? okcha̱ya moma kano chik impot ʋlla ya̱ isht ish yaha̱ya kash osh, amba ʋlla ʋt illi ma, ish wakaya cha, ish impʋshke, okla im achi tok.

²² Mihma, Ʋlla ash osh okcha̱ya moma kano ak impo hosh yaha̱ya li tuk: Chitokaka ʋt a̱ nukha̱klo yoba na ʋlla ʋt okcha̱ya hi a̱, kʋta hosh ithana hinla cho? achi li hatuk okʋt,

²³ Yohmi tuk kia himak ano illi ka nanta katiohmi ho̱ ak impo ka hinla cho? anonti falʋmminchit isht ʋla la hinla cho? ʋno ak osh im ona la chi̱, amba yʋmmak okʋto ʋm ʋla he keyu hoke, achi tok.

²⁴ Mihma Lewi ʋt tekchi Balh‐sheba ya̱ hopohlʋli tok; micha iba chukowa cha, iba tʋshki tok: mihma ʋlla nakni yo̱ eshi ma, Solomon hochifo tok: mihma Chihowa ʋt i̱ hullo tok.

²⁵ Micha Nahlan hopaii ya̱ tohnot pila tok; micha Chihowa ak atuk pulla kak o̱ Chetitiah hochifo tok.

²⁶ Mihma Choab ʋt Ammon in chipota Labbah ya̱ itibi cha, mi̱ko in tʋmaha holihta ya̱ ishi tok.

²⁷ Mihma Choab ʋt Lewi ya̱ ankmpa shali ʋhleha ha̱ i̱ pila cha, Labbah ya̱ itibi lish, tʋmaha holihta oka ya̱ im ishi lishke.

²⁸ Yʋmohmi hoka okla a̱sha tuk a̱ hoyot itʋnahli cha, tʋmaha holihta ya̱ ant in tanampit binanchit ish ishashke; keyukma tʋmaha holihta ya̱ ʋno ak osh ishi likma, si a hochifocha hinla hoke, achi tok.

²⁹ Mihma Lewi ʋt okla moma ka hoyot itʋnahli cha, Labbah ya̱ ona tok: micha itibi cha, ishi tok.

³⁰ Micha i̱ mi̱ko im iachuka noshkobo iachukoli tuk a̱ ishi tok; (mihma weki kʋt tʋli holisso lakna talent achʋfakma, tʋli holitopa puta kʋt ontʋla tok:) micha Lewi noshkobo ha̱ on talaia tok. Mihmʋt tʋmaha holihta ya̱ nawehpoa laua fehna ho̱ ishit kohcha tok.

³¹ Micha okla yʋmma aiasha tuk a̱ ishit kohcha mʋt, iti ishit bʋsha, micha iti tʋli noti halupa, micha tʋli iskifa nutaka ashachi mʋt, lukfi nuna atoba aiena ka hlopullichi tok: yakohmichi hosh Ammon in chipota ʋhleha in tʋmaha holihta moma ka yʋmihchi tok. Yohmi mʋt Lewi, micha okla moma kʋt falamʋt Chelusalem a̱ ona tok.