2 Samuel 11 - Chahta Holisso Holitopa 1886

¹ Atuk o̱ yakohmi tok, afʋmmi ʋt ont taha ha ya̱, mi̱ko puta kʋt kohchʋt tanampit ia chatuk ʋt ʋla ma, Lewi ʋt Choab a̱, micha in tishu ʋhleha aiena, micha Islael moma ka pila tok: mihma Ammon in chipota chuk il issʋchit isht a̱yʋt Labbah ya̱ ont in tanampit apakfoyupʋt a binanchi tok. Amba Lewi ʋto Chelusalem a̱ anta moma tok.

² Atuk o̱ yakohmi tok, opiʋt isht ia ho̱ Lewi ʋt topa itonla tuk osh tani cha, mi̱ko in chuka isht holmo ya̱ a nowa tok: atuk osh chuka isht holmo ya̱ o̱ hikia hosh ohoyo hʋt il achifa hosh anta na pit pisa tok; mihma ohoyo hash osh pisa ka aiokli fehna tok.

³ Mihma Lewi ʋt pila cha, ohoyo hash a ponaklo tok. Mihma achʋfa kʋt, Ilʋppʋt Eliam ushetik Balh‐sheba, Hittait hatak Uliah tekchi keyu cho? achi tok.

⁴ Mihma Lewi ʋt anumpa shali ʋhleha ha̱ pila cha, ishi tok: mihma ant chukowʋt im ʋla na iba tʋshki tok: (alitiha i̱ kashofa hatuk oka:) mihma in chuka ya̱ falamʋt ona tok.

⁵ Mihmʋt ohoyo hash osh ʋlla shali cha, Lewi ya̱ anumpa i̱ pilʋt im anolit, Ʋlla shali lishke, achi tok.

⁶ Mihma Lewi ʋt Choab a̱ anumpa i̱ pilʋt, Hittait hatak Uliah ya̱ et am pilá, achi tok. Mihma Choab ʋt Uliah ya̱ Lewi ya̱ pit i̱ pila tok.

⁷ Atuk o̱ Uliah ʋt im ʋla ma, Choab ʋt kaniohmi tuk, micha okla hʋt kaniohmi tuk, micha tanampi kʋt kaniohmit ishit ma̱ha̱ya aiena ka Lewi ʋt i̱ ponaklo tok.

⁸ Mihma Lewi ʋt Uliah ya̱, Chin chuka ya̱ ia cha, chiyi ya̱ achifá, im achi tok. Mihma Uliah ʋt mi̱ko in chuka ya̱ kohchʋt ia ma, ilimpa ai ʋpa achʋfa ho̱ mi̱ko ʋt ima na iakaiyʋt isht im ona tok.

⁹ Yohmi kia Uliah ʋt mi̱ko in chuka okhissa yak o̱ i̱ shahli in tishu ʋhleha ta̱kla a nusi cha, in chuka ya̱ ik ono tok.

¹⁰ Mihma Lewi ya̱ im anolit, Uliah ʋt in chuka ya̱ ik aiyoshke, achi ma, Lewi ʋt Uliah ya̱, Nowʋt a̱yʋt ish la tuk keyu̱? hokak osh nanta katiohmi ho̱ chin chuka ya̱ chik ono cho? im achi tok.

¹¹ Mihma Uliah ʋt, Itombi holitopa, micha Islael, micha Chutah aiena kʋt ʋlhtipo puta ka aiashʋshke; micha a̱ shahli Choab, micha a̱ shahli ha̱ in tishu ʋhleha aiena kʋt yakni ashahbika yo̱ binanchit aiashʋshke: yohmi ka an chuka ona lish, impʋt, micha nan ishkot ahantʋt, sa tekchi ya̱ iba tʋshki la hinla cho? chi okcha̱ya pulla ka, micha chimi shilombish ʋt okcha̱ya pulla ka nana ilʋppa yʋmihchi la he keyu hoke, im achi tok.

¹² Mihma Lewi ʋt Uliah ya, Himak nitak ak kia ish anta tuk o̱, onnakma ik iá chim ahni li̱ ish iashke, im achi tok. Yohmi ho̱ Uliah ʋt nitak yʋmma, micha onna aiena ka Chelusalem ak o̱ anta tok.

¹³ Atuk o̱ Lewi ʋt hoyo ma, itikba ya̱ impʋt, oka ishkot ahanta tok: mihma oka haksichi tok; atuk o̱ opia ma, i̱ shahli in tishu ʋhleha ta̱kla in topa tʋshka chi̱ hosh kohchʋt ia tok, amba in chuka ano ik aiyo tok.

¹⁴ Atuk o̱ yakohmi tok, onnahinli ma Lewi ʋt Choab a̱ holisso i̱ holissochi cha, Uliah ibbak a̱ fohkit i̱ pila tok.

¹⁵ Micha holisso ha̱ a fohkit holissochit, Uliah ya̱ ai itibi kʋllo i̱ shahli kak o̱ itikba hʋsh hilechi cha, hʋsh i̱ kanʋllashke, yohmikma isso na illashke, achi tok.

¹⁶ Atuk o̱ yakohmi tok, Choab ʋt tʋmaha holihta ya̱ pisʋt tahli mʋt, hatak chilita, nukwia iksho aiasha ka ithana kak osh yʋmmak o̱ Uliah ya̱ hilechi tok.

¹⁷ Mihma tʋmaha holihta hatak ʋhleha hʋt kohchʋt iʋt Choab a̱ itibi tok: mihma Lewi in tishu ʋhleha okla kaniohmi kʋt akakoha tok: mihma Hittait hatak Uliah ak kia illi tok.

¹⁸ Yohmi ma Choab ʋt Lewi ya̱ pit i̱ pilʋt, it in tanampi kʋt kaniohmi hosh aiasha kʋt moma im anoli tok.

¹⁹ Micha anumpa shali ya̱ atokolit, It in tanampi kʋt kaniohmi ka anolit ont ish taiyahlikma,

²⁰ Atuk o̱ yakohmikma, mi̱ko ʋt im ai i̱ nukkilli ʋt libbi cha, Nanta katiohmi ho̱ hʋsh itibi mʋt, tʋmaha holihta ya̱ bili̱ka fehna hʋsh ona tuk o̱? holihta paknaka o̱ hiohlit okla et hu̱sa hinla ka hʋch ik ithano ke tuk o̱?

²¹ Kʋta hosh Chelub‐beshelh ushi Abimelech a̱ ʋbi tok o̱? ohoyo hosh holihta paknaka o̱ hikiʋt tanchi abotoli tʋli tushafa yo̱ om pila na, Hlebes a̱ ai illi tok keyu cho? nanta katiohmi ho̱ holihta bili̱ka ya̱ hʋsh ona tuk o̱? chim achikma, yohmikma, Chin tishu Hittait hatak Uliah ak kia illishke, ish achashke, achi tok.

²² Yohmi ho̱ anumpa shali ash osh mintit ʋla cha, Choab ʋt nana tohno tuk moma ka Lewi ya̱ im anoli tok.

²³ Micha anumpa shali ash osh Lewi ya̱, Hatak ʋhleha hʋt pi̱ kʋllo pulla cha, kohchʋt yakni ashahbika ya̱ pim ʋla ma, o̱ kanʋllit il ia mʋt, holihta okhissa achukowa ya̱ il ona tuk oke.

²⁴ Mihma hu̱sa ʋhleha hʋt holihta paknaka o̱ hiohlit, chin tishu ʋhleha ha̱ et hu̱sa tuk oke: yohmi na mi̱ko in tishu ʋhleha ha̱ a kaniohmi kʋt illishke, mikma chin tishu Hittait hatak Uliah ʋt illishke, im achi tok.

²⁵ Yohmi ma Lewi ʋt anumpa shali yash, Ilʋppak o̱ Choab a̱ ish im anolashke, Nana ilʋppa isht ik chim achukmo kashke; bʋshpo falaia yokʋto ʋbit tahli kʋt achʋfa, micha inla yak kia itilauechi chatuk oka: ish itibi kʋt i̱ shahlichit tʋmaha holihta ya̱ ish i̱ sanalichit yuhlit aka ish patalashke; micha ish aiyimilichichashke, im achi tok.

²⁶ Atuk o̱ Uliah tekchi atuk ash osh i̱ hatak Uliah ʋt illi tuk o̱ haklo mʋt, ishit yaha̱ya tok.

²⁷ Atuk osh yaiya kʋt issa ma, Lewi ʋt pit hoyot in chuka isht ʋla na tekchi toba tok; atuk osh ʋlla nakni yo̱ im eshi tok. Yohmi kia Lewi ʋt nana kaniohmi tuk a̱ Chihowa ʋt ik im ʋlhpeso tok.