2 Samuel 10 - Chahta Holisso Holitopa 1886

¹ Atuk o̱ ilʋppa i̱ himmakma yakohmi tok, Ammon in chipota ʋhleha i̱ mi̱ko ʋt illi na ushi Hanun ak osh ʋlhtobʋt mi̱ko tok.

² Yohmi ma Lewi ʋt, I̱ki ʋt a̱ kana tok oka, Nahash ushi Hanun a̱ i̱ kana lashke, achi tok. Micha Lewi ʋt i̱ki ishit nukha̱klo ka hopohlʋla chi̱ ho̱ in tishu ʋhleha ha̱ tohnot pila tok. Mihma Lewi in tishu ʋhleha hʋt Ammon in chipota i̱ yakni ya̱ ona tok.

³ Mihma Ammon in chipota pehlichi ʋhleha hʋt i̱ shahli Hanun a̱, Lewi ʋt chi̱ki ya̱ holitoblichi hosh hopohlʋli ʋhleha et chi̱ pila tuk chim ahoba cho? Lewi ʋt in tishu ʋhleha et chi̱ pila kʋt tʋmaha holihta ya̱ a hopo̱koyot lumʋt pisʋt tahli cha, imaiya chi̱ keyu cho? im achi tok.

⁴ Yohmi ho̱ Hanun ʋt Lewi in tishu ʋhleha ha̱ ishi cha, nutakhish a̱ iklʋna ka sha̱fi cha, i̱ nafohka ya̱ iklʋna isht asha ʋhlichit in tʋptuli cha, falʋmminchit pila tok.

⁵ Lewi ya̱ im anoli ma, hatak ʋhleha hash osh hofahya fehna hatuk o̱, afama chi̱ ho̱ pit pila tok. Micha mi̱ko ʋt Cheliko ak inli ho̱ hʋsh a̱sha na hʋchi nutakhish ʋt falaiʋt tahak mak osh hʋsh falamashke, achi tok.

⁶ Mihma Ammon in chipota hʋt Lewi ya̱ i̱ shua kʋt akostininchi mʋt, Ammon in chipota hʋt Silian ʋhleha Belh‐lehob yakni aiasha, micha Sobah yakni Silian ʋhleha aiasha aiena hatak aka a̱ya tahlepa sipokni pokoli tuklo ho̱ tohnot, micha mi̱ko Maakah a̱ hatak tahlepa sipokni achʋfa, micha Ishtob a̱ hatak tahlepa sipokni auah tuklo ho̱ im a tohno tok.

⁷ Atuk o̱ Lewi ʋt haklo mʋt, Choab, micha tʋshka chipota hatak hlampko chilita puta ka pit pila tok.

⁸ Mihma Ammon in chipota ʋhleha hʋt kohchʋt holihta okhissa achukowa ya̱ itiba chi̱ kʋt achukmalit ile baiʋlichi tok: mihma Silian ʋhleha Sobah minti, micha Lehob minti, micha Istob minti, micha Maakah minti aiena kʋto ila osapa yo̱ ai asha tok.

⁹ Atuk o̱ itiba chi̱ kʋt tikba, micha ashaka aiena ho̱ Choab ʋt pisa mʋt, Islael hatak aiyua hochukma moma ho̱ atokoli cha, Silian ʋhleha hak o̱ itiba chi̱ ka achukmalit baiʋlichi tok.

¹⁰ Micha okla hash inla kano itibapishi Abishai ak o̱ ibbak fohki na Ammon in chipota hak o̱ itiba chi̱ ka achukmalit baiʋlicha chi̱ hatok.

¹¹ Micha, Silian ʋhleha hʋt a̱ kʋllo fehnakma, yohmikma is si apela chi̱ hoke: amba Ammon in chipota ʋhleha hʋt chi̱ kʋllo fehnakma, yohmikma ʋlʋt chi apela la chi̱ hoke.

¹² Nukwia ikshot hʋsh amosholashke, nakni a̱hli chiyuhmi hosh pim okla, micha pin Chitokaka in tʋmaha holihta puta ka il im itibashke: mikma Chihowa ʋt ʋlhpiesa ahni kak osh yʋmihchashke, achi tok.

¹³ Micha Choab, mikmʋt okla apehʋt a̱ya tuk aiena kʋt bili̱ka iʋt Silian ʋhleha ha̱ itibi tok: mihma itikba ya̱ okla yihlepa tok.

¹⁴ Atuk o̱ Ammon in chipota ʋhleha hʋt, Silian ʋhleha hʋt yihlepa na pisa mʋt, yʋmmak kia Abishai itikba ya̱ okla yihlepʋt, tʋmaha holihta yash chukowa tok. Yohmi ma Choab ʋt Ammon in chipota ʋhleha ha̱ i̱ filʋmmit ia cha, Chelusalem a̱ ona tok.

¹⁵ Atuk o̱ Silian ʋhleha hʋt Islael itikba akakoha kʋt pisa mʋt, iti hoyot itʋnaha tok.

¹⁶ Mihma Hatatese ʋt Silian ʋhleha okhina mish tʋnnʋp aiasha ka pit hoyot isht ʋla tok: micha Helam a̱ okla ʋla tok: mihma Hatatese in tʋshka chipota ʋhleha pehlichi Shobach ʋt tikba hikia tok.

¹⁷ Atuk o̱ Lewi ya̱ im anoli ma, Islael moma ka hoyot itʋnahli cha, Chatan a̱ ʋbanʋblit, Helam a̱ ona tok. Mihma Silian ʋhleha hʋt Lewi ya̱ itiba chi̱ kʋt achukmalit ile baiʋlichi cha, itibi tok.

¹⁸ Mihma Silian ʋhleha hʋt Islael itikba ya̱ yihlepa tok; mihma Lewi ʋt Silian ʋhleha ai achʋfa hosh tʋnʋp itichanʋlli tahlepa untuklo isht a̱ya hatak, micha issuba om binili ʋt tahlepa sipokni pokoli ushta aiena ho̱ ʋbit tahli mʋt, micha in tʋshka chipota ʋhleha pehlichi Shobach a̱ isso na yʋmmak o̱ ai illi tok.

¹⁹ Atuk o̱ mi̱ko moma Hatatese in tishu ʋhleha hatuk ʋt Islael itikba akakoha na pisa mʋt, Islael a̱ okla it i̱ nanaiya cha, i̱ nutaka tok. Yohmi ma Silian ʋhleha hʋt Ammon in chipota ha̱ himakma apela kʋt nukwia tok.