2 Samuel 1 - Chahta Holisso Holitopa 1886

¹ Atuk o̱ yakohmi tok, Sal ʋt illi ha ya̱, Lewi ʋt Amalek okla ʋbit a̱ya tuk ʋt falamʋt ʋla cha, nitak tuklo ho̱ Siklak a̱ ahanta tok.

² Micha nitak ont atuchina ho̱ yakohmi tok, yakeh! hatak ʋt Sal im ʋlbina ha̱ akohchʋt minti hosh, i̱ nafohka hʋt hlilafa cha, lukfi pushi ʋt noshkobo onʋtoyula hosh ʋla tok: atuk osh Lewi ya̱ im ʋla mʋt, yakohmi tok, aka pit hlipia cha, aiokpʋchi tok.

³ Mihma Lewi ʋt, Katima ish minti cho? im achi tok. Mihma Sa hlakofi cha, Islael im ʋlbina hak o̱ akohchʋt a̱ya li hoke, im achi tok.

⁴ Mihma Lewi ʋt, Nana kʋt katiohmi tuk oh cho? ʋm anoli, chim asilhha lishke, im achi tok. Mihma afalamichi mʋt, Okla hʋt itibi tuk ʋt yihlepa cha, okla laua kʋt akakohʋt illi ma; Sal micha ushi Chonahlan itatuklo kak kia illishke, achi tok.

⁵ Mihma Lewi ʋt nan im anoli tuk hatak himita yash, Katiohmi kak osh Sal, micha ushi Chonahlan itatuklo kʋt illi ka ish ithana cho? im achi tok.

⁶ Mihma hatak himita nan im anoli yash osh, Kilboa nʋnih ha̱ ona li yoba ho̱ yakeh! Sal ʋt in tʋbi tʋli halupa ontʋla ya̱ onʋtola tuk oke; mihma yakeh! tʋnʋp itichanʋlli puta, micha issuba om binili ʋhleha aiena kʋt hliolit sakki tok.

⁷ Atuk o̱ im a̱shaka pilla pit hopo̱koyo cha, sa pisa mʋt, a̱ howa tuk oke. Mihma afalamichit, Yak hikia lishke, im achi li tuk oke.

⁸ Mihma, Kʋta chia hoh cho? ʋm achi ma, afalaminchit, Amalekait hatak sia hoke, im achi li tuk oke.

⁹ Mihma anonti, Is si o̱ hikia cha, is sʋbashke, chim asilhha lishke: ʋm ilhfiopak ʋt achukma hosh sa fo̱ka moma hatuk osh, shimoha kʋt si onʋtola hoka, ʋm achi tuk oke.

¹⁰ Yohmi ho̱ akama ha yokʋt okcha̱ya heto, ithana li hatuk osh o̱ hikia lish, ʋbi li tuk oke: micha iachuka noshkobo on talaia tuk, micha shakba abeha tuk aiena ka ishi li tuk osh, a̱ shahli ha̱ isht im ʋla lishke, achi tok.

¹¹ Yohmi ma Lewi ʋt i̱ nafohka ya̱ halʋllit hlilʋffi tok; mihma hatak apehʋt aiasha tuk kak kia moma kʋt yʋmihchi tok.

¹² Mihmʋt Sal, micha ushi Chonahlan, mikma Chihowa im okla ʋhleha, micha Islael in chuka achʋfa aiena ka bʋshpo falaia isht akakoha pulla kak o̱ ishit nukha̱klot yaiyʋt, ik impo hosh okla anta na opia tok.

¹³ Mihma Lewi ʋt hatak himita im anoli kash, Katima ish minti cho? im achi tok. Mihma afalamichi mʋt, Oklushi inla ushi Amalekait sia hoke, achi tok.

¹⁴ Mihma Lewi ʋt, Chihowa ahamʋt im ʋlhtoka ya̱ chibbak a̱ o̱ wielit ʋbi ka katiohmi ho̱ ik chi nukshopo tuk oh cho? im achi tok.

¹⁵ Mihmʋt Lewi ʋt hatak himithoa ai achʋfa ka, Bili̱ka ish ona cha, ish onʋtolashke, im achi tok. Mihma isso na illi tok.

¹⁶ Mihma Lewi ʋt, Chim issish ʋt chi noshkobo ak inli onʋtoyulashke; chishno chitih ak inli hosh chi atokolit, Chihowa ahamʋt im ʋlhtoka ya̱ ʋbi li tuk oke, achi hoka, im achi tok.

¹⁷ Mihmʋt Lewi ʋt Sal, micha ushi Chonahlan a̱ ishit yaiyʋt ilʋppa ahanchi tok.

¹⁸ Micha Chutah im ʋlla ʋhleha ha̱ iti tanampo ieshi ka ithʋnancha he im apesa tok: yakeh! Chashe i̱ holisso ha̱ a holissot takali hoke.

¹⁹ Islael isht aholitopa ʋt chim achahaka ai illishke: ikikkeh! chilita nukwia iksho ʋhleha hʋt akokahʋshke!

²⁰ Kalh a̱ hʋsh ai anoli ná, Askelon hina puta ai itʋnowa ya̱ ai anolit hʋsh yukpʋchi ná; yohmi na Filistin ushetik ʋhleha hʋt nan ishit yukpa ná, yohmi na hakshup ik tapo ushetik ʋhleha hʋt ishit hihla ná.

²¹ Kilboa nʋnih ʋhleha hʋchia ma! fichak ʋt ik hʋchi onʋtolo kashke, micha umba kʋt ik hʋchi onʋtolo kashke, micha na wayahpi nan im issa ai offo osapa ʋt ai iksho kashke; yʋmmak o̱ hatak chilita nukwia iksho in telihpa, Sal in telihpa, bila ahamʋt ʋlhtoka keyu chohmichit ik ahobalot a kanchi tuk oka.

²² Illi im issish a̱, micha hatak chilita nukwia iksho ʋhleha ha̱ nia ya̱ Chonahlan im iti tanampo ʋt i̱ fullotʋt falama tuk keyu hoke; mikma Sal i̱ bʋshpo falaia ʋt iksho ho̱ falama tuk keyu hoke.

²³ Sal, micha Chonahlan ita tuklo kʋt okcha̱yʋt a̱shwa mʋt, holitopa, micha achukma tuk oke, atuk osh illi mʋt, ik it i̱ filʋmmo tuk oke; shinimpa kʋt o̱ssi ya̱ i̱ shahlit okla cha, kʋllo kʋt koi chito ya̱ i̱ shahlit okla tuk oke.

²⁴ Islael ushetik ʋhleha hʋchia ma! Sal ak osh na tishepa hʋchi fohkʋchit, nan isht aiyukpa inla aiena ka hʋchim atahli tuk, yʋmmak osh hʋchi nafohka ya̱ tʋli holisso lakna ya̱ ishit shemʋchi tuk oka, ishit hʋsh yaiyashke.

²⁵ Ikikkeh! itibi ai ititakla ya̱ chilita nukwia a̱shwa tuk ʋt akakohʋshke; Chonahlan ma! chim achahaka ya̱ a chilli tuk oke.

²⁶ Itibapishi li Chonahlan ma! chisht sʋlbʋshʋshke: is sʋm achukma fehna tuk oke: is sa̱ hullo kʋt atampa fehna kʋt, ohoyo na heh ahni ka i̱ shahli tuk oke.

²⁷ Ikikkeh! chilita nukwia iksho a̱shwa tuk ʋt akakohʋshke: mikma na halupa isht itibi ʋt okpulot tahʋshke.