2 Pita 3 - Chahta Holisso Holitopa 1886

Nan ʋlhpisa chinta he nitak a̱ Klaist ʋt ʋla pulla hi a̱ a̱hlichit im anoli 1, 10 kaniohmit yakni, micha ʋba pit a moyuma kʋt ont ai okpulo ka he anoli; 14 nan ai okpula hi pit anukfoyukʋt anumpuli mʋt nan ashʋchi ikshot holitopʋt itanowa chi̱ ka i̱ miha.

¹ A̱ holitopa ʋhleha ma! ilʋppʋt holisso atukla mak o̱ himonasi ka pit hʋchi̱ holissohonchi li kʋt, ita tu̱klo ka nana ka isht hʋsh ithaiyana chi̱ ho̱ hʋchim anukfila tohwikeli tok a̱ isht okchʋli lishke.

² Yohmi na hopaii ʋhleha hokʋt tikba kash anumpa puta isht anumpohonli tok; micha Chitokaka, micha Okchalinchi im anumpeshi pia hʋt nana e hʋchim apihi̱sa tok aiena ka isht hʋsh ithaiyana chi̱ hatuk;

³ Ilʋppa ti̱kba hʋsh ithana, yohmi ka ishit yopula anumpuli, micha chu̱kʋsh nan ahni iakaiya puta kʋt ont ai ishtaiyopi nitak puta ka ʋla hi oke;

⁴ Mikmʋt, Yʋmmʋt ʋla he anumpohonli tok mʋto katimak o̱? hatak tikba ʋhleha hʋt nusi tok takla ha ya, nan oklu̱ha hokʋto tikba ʋmmona tok ash osh imomʋt ma̱ha̱ya hoka, ahancha hi oke.

⁵ Yohmi ka ilʋppa ithʋna ik bʋnno hokʋt, hopaki pilla kash ʋba yakni okʋt Chihowa im anumpa hak o̱ isht atoba tok, mihma yakni ilʋppʋt oka akohcha cha, itin takla talaia tok:

⁶ Yʋmmak o̱ yakni yʋmmak atuk ʋt oka yosh isht ompoholmot kʋnia ho̱, isht ai okpulot kʋnia tok.

⁷ Amba ʋba shutik, micha yakni ilʋppa ita tuklo hokʋno Chihowa im anumpa yʋmmak ash inli hosh Chihowa ik holitoblo hatuk puta kʋt ai okpulot kʋnia chi̱ nan ʋlhpisa nitak mak o̱ lua he ai ahni hosh achukmalit ieshi hoke.

⁸ Amba a̱ holitopa ʋhleha ma! nana achʋfa ilʋppa hʋch ik ithano ki ná, yohmi kʋt nitak achʋfa kʋt Chitokaka yokʋno afʋmmi tahlepa sipokni achʋfa ka im itilaui; micha afʋmmi tahlepa sipokni kʋt nitak achʋfa ka im itilaui hoke.

⁹ Chitokaka yokʋt nana ka im ihi̱sa tok ʋt, a sʋlaha hatak kaniohmi kʋt ahni kia, sʋlaha keyu hoke; amba pi̱ nukha̱klo hosh pi̱ sʋlaha kʋt, achʋfona kia okpunlot ik kʋnio hosh, amba moyuma kʋt ile kostinincha he, im ai ahni hoke.

¹⁰ Yohmi kia Chitokaka i̱ nitak okʋt, ninak anu̱kaka yo̱ na hu̱kopa yʋt a̱ya chatuk mak o̱, chiyuhmit ʋla hi oke; yʋmohmikma shutik moma kʋt nan ola chinto ho̱ isht ai okpulot ont ai iksho ka he, mikma fochik moma kʋt luak lʋshpa fehna ho̱ isht a luʋt bihinlakma, yakni, micha nan oklu̱ha ai ʋlhtaiyaha puta tuk ʋt luʋt taiyaha hi oke.

¹¹ Yʋmohmi ka nan oklu̱ha ilʋppʋt ont ai ʋhlit kʋnia chi̱ hoka, hatak kaniohmi hosh nana a kaniohmi puta ka nan ai ashʋchi iksho hosh Chihowa holitoblit hʋsh ai asha hi atuk o̱?

¹² Micha Chihowa i̱ nitak ʋt ʋlakma, ʋba shutik moma kʋt lua hatuk osh ont ai ʋhlit kʋniakma, fochik moyuma kʋt luak lʋshpa fehna ho̱ isht a luʋt bihinla he, yʋmmak o̱ hoho̱yot tu̱shpʋt hʋsh ma̱ha̱ya hokʋt.

¹³ Yohmi kia pishno yokʋto nana ka pim ihi̱sa tok pulla kak o̱, ʋba shutik himona, micha yakni himona ita tuklo nan ai ʋlhpiesa ai ahanta yʋmmak o̱ e hoho̱yo hoke.

¹⁴ Yʋmohmi ka a̱ holitopa ʋhleha ma! nana ilʋppa chiyuhmi puta ho̱ hʋsh hoho̱yo hokʋt, anumpa isht ai onʋtula he, micha na liteha aiena ik hʋchim iksho hosh hʋsh i̱ nanaiya ho̱, hʋsh im otaiyana hi ʋt hʋsh achunanchashke.

¹⁵ Mikmʋt pin Chitokaka yʋt ilbʋshala chi̱ kʋt sʋlaha kʋt isht pi ai okcha̱ya he atuk, il ai ahnashke; ilʋppa chiyuhmi il itibapishi Pal ak kia isht a hopoyuksa ya̱ anukfokihinchi ho̱ hʋchi̱ holissohonchi tok:

¹⁶ Yohmi kʋt holisso ihi̱kbi puta kʋt nana ilʋppa moma ka isht anumpohonli ak inli hatok okʋt; yʋmmak oka nana kaniohmi kʋt akostininchi kʋllo kʋt ai asha, yʋmmak oka nan ik ithano, micha anukfila apissali iksho aiena hokʋto ilap isht ai okpula chi̱ kʋt anumpa holitopa inla ka yʋmihinchi hatuk ash osh, chohmichit shanaiyʋchi hoke.

¹⁷ Yʋmohmi ka a̱ holitopa hʋchia ma! ti̱kba nana ilʋppa puta ka hʋsh ithana hatuk okʋt ahah! hʋchik ai ahnokmʋt, hatak nan ʋlhpiesa ik holitoblo isht ai yoshuba ya̱ isht ai yoshubʋt isht a hʋchi yimmi kʋllo kash i̱ filʋmmit chi tula ná.

¹⁸ Amba isht i̱ kana hʋchi anukfo̱kʋt hʋsh yʋmohmi kʋt i̱ shahlichit ma̱ha̱yʋt, pin Chitokaka pi Okchalinchi Chisʋs Klaist a̱ hʋsh ithaiyana kʋt i̱ shahlichit hʋsh ma̱ha̱yashke. Yʋmmak oka isht a holitopa yokʋt, himonasi, micha himak a pilla ka immit biliashke. Amen.