2 Pita 2 - Chahta Holisso Holitopa 1886

Ʋbanumpa ithʋnachi ik ai a̱hlo ʋt wakaya he, atuk kia yʋmmak ashot im antia pit a moma ka Chihowa yʋt okpʋnit tahla he; amba hopoyuksa ʋhleha hokʋno okchalincha he tikbanli anoli, 1; 10 nan ithʋnanchi ik ʋlhpeso ilʋppak ash achukmʋt anoli.

¹ Yohmi kia hopaii ai a̱hli keyu ʋhleha hʋt okla ai itin takla ya̱ ai asha ak inli beka tok a̱, anonti nan ithʋnanchi ai a̱hli keyu kʋt hʋch itin takla ai asha he ak inli; yʋmmak okʋt isht okpula he ai a̱hli isht anumpa keyu puta ka lumʋt isht hʋch iba chukowa mʋt, ilap a̱ chumpa tok, Chitokaka kanchi hosh isht ai okpulo ya̱ tu̱shpa fehnʋt isht il onocha hi oke.

² Mikma la̱wa kʋt yʋmmʋt nan isht ai okpuloka he ai yʋmohmi puta ka hobacha he; yʋmmʋt yʋmohmi kak o̱ hina ai a̱hli yʋt nan isht ik ahobot isht anumpa hi oke.

³ Micha yʋmmʋt nan ahayuchi bʋnna kak osh isht haksichi anumpa ho̱ nan isht itatoba yo̱ isht hʋch ikba hi oke; yʋmma nan isht im ʋlhpisa tok a̱ hopaki kia sʋlaha he keyu, micha yʋmma isht ilbʋsha hi ʋt nosilhha keyu hoke.

⁴ Yohmi ka Chihowa yʋt enchil ʋhleha hʋt nan ashʋchi ma ik il atombo hosh, amba ai okhlilika tʋli itatakʋli isht takchi cha, ai okpuloka ya̱ pit ashachi kʋt yʋmma ai asha na nan ʋlhpisa hi ʋt ai ona hi a tokma;

⁵ Micha yakni ʋmmona ka ila tomba tok keyu, Chihowa holitobla he keyu ʋhleha yakni paknaka ai asha tuk ash oka falama yo̱ isht onochi tok: yohmi kia Noah hatak isht untuchina nan ai ʋlhpiesa isht anumpohonli yano okchalinchi tok.

⁶ Chihowa ik holitoblo himak a pilla ai asha he ak osh isht im ʋlbʋcha hi o̱ ihi̱kbi hosh, tʋmaha hochito Sotom micha Komola ita tuklo ka hushmit hituk chubbi banochi kʋt, okpulo ai a̱hli mak o̱ im apihi̱sa tok.

⁷ Mihmʋt hatak achukma Lot okʋt, hatak haksi nan a kaniohmi liteha ya̱ isht nukha̱klot ik im achukmot ahanta tuk a̱, a hlakofichi tok.

⁸ Yohmi ka hatak ai ʋlhpiesa yʋmmʋt yʋmma ai itintakla ahantʋt, nana ka pihi̱sa, micha haha̱klot, nan ai ʋlhpiesa keyu ai yʋmohmi kak o̱ onna hosh onnakma chu̱kʋsh ʋt isht a hotoyupa tok:

⁹ Chitokaka yokʋt Chihowa i̱ hullo yokʋno isht imomaka pisa ya̱ kanimihchit akohchi kʋt ithana; micha ai ʋlhpiesa ka yʋmihincha he keyu yokʋno kanimihchit i̱shi na nan im ʋlhpisʋt isht ilbʋsha chi̱ nitak ʋt ai ona hi oka ithana hoke:

¹⁰ Micha haknip isht ai yukpa anuksitia hosh chu̱kʋsh nan ai ahni kak bano iakaiya, micha nan ʋlhpisa yo̱ ik holitoblo aiena kak fehna ho kak heno i̱ yʋmihcha hi oke. Ilapunla, ilap nan ai ahni kak bano, nan ʋlhtoka puta ka nan isht ik ahobalot anumpuli kʋt ik nukshoposhke.

¹¹ Yohmi kia enchil ʋhleha hokʋto isht ai a̱hli, micha isht hlampko aiena kʋt yʋmma i̱ shahli fehna kia, Chitokaka itikba ya̱ isht ik ahobalo anumpa kia yʋmma ai onochi keyu hoke.

¹² Amba ilʋppʋto nampoa nan ithana keyu ilap nan ahni bano hosh itʋnowa ka, ishit okpʋna hi o̱ toba tok chiyuhmit nana ka akostininchi keyu kʋt, isht ik ahobalot anumpulishke; yohmi kʋt ilap im anukfila okpulo nan isht ai yʋmohmi kak osh isht ai okpulot kʋnia chi̱ hoke:

¹³ Micha yʋmmʋto nitak kia nan impʋt, nan ishkot isht a haui kʋt nan isht ilaiyukpa yo̱ im ahobʋt ai asha kia, nan ai ʋlhpiesa keyu ai yʋmohmi isht ʋlhtoba ka isha chi̱ hoke: yʋmmʋt na liteha okpulo, na hofahyali yosh yʋmmʋt hʋch ibai impa itin ta̱kla kʋt na haksichi kak osh nan isht ilaiyukpa hoke:

¹⁴ Yohmi kʋt nishkin mʋt isht a haui yak osh alotowa, micha nan ashʋchi kʋt issa keyu hosh, hatak im anukfila fitikʋchi ya̱ haksihinchi hoke; micha nan ahayuchi bʋnna atampa isht ai yʋmohmi puta ka chu̱kʋsh isht a toksahanli hosh, isht ai ilbʋshʋt onʋtula he ʋlhpiesa ʋlla ʋhleha hoke.

¹⁵ Yʋmmak okʋt hina ai ʋlhpiesa issa cha, yoshubʋt kʋnia hosh Boso ushi, Belam, yʋmmʋt nan ai ʋlhpiesa keyu isht ʋlhtoba yak o̱ anuksitia hosh nan a kaniohmi tok ak o̱ iakaiya hoke:

¹⁶ Yohmi kia Belam ash ot nan ai ʋlhpiesa keyu yʋmohmi kʋt ik ʋlhpieso ka im otʋninchi kʋt, issuba haksobish falaia anumpula he keyu kia, hatak im anumpa ho̱ anumpuli hosh, hopaii im anukfila tasimbo yash im olʋbi tok.

¹⁷ Ilʋppʋt kʋli oka iksho puta, micha hoshonti ha̱ apeli ʋt isht a̱ya mak oke: yʋmmak okʋno okhlili chinto yak osh immit bilia hi osh takali hoke.

¹⁸ Yohmi ka yʋmmak okʋt nan isht ik ahobo isht anumpa ilauatʋt anumpohonlikmʋt, haknip imma nan ahni, micha haui anukfilli isht alotowa kak osh nan ashʋchi aiasha yʋmma yakosi itin ta̱kla ho̱ ai i̱ filʋmmi tok ash yʋmmak o̱ haksihinchi hoke.

¹⁹ Ilap ai ahni hosh nana ka yʋmmʋt yʋmohma he im ihi̱sa ak inli kia, ilap ak okʋto nan ai ashʋchi yak o̱ chu̱kʋsh okpulo ai yʋmohmi yak o̱ i̱ yuka ʋhleha hoke: yohmi ka kʋna hosh hatak a̱ imaiyachi hokma, yʋmmak ash inli ho̱ i̱ yuka toba chatuk oka.

²⁰ Yohmi ka pin Chitokaka, micha pi Okchalinchi Chisʋs Klaist oka ithaiyana kak osh yakni ilʋppak inli isht a liteha puta ka ai i̱ filʋmmi ha ya tuk osh, anonti yummak ash inli ho̱ isht ai apakfoʋt isht ai imaiya hokmʋt, yʋmmʋt ont im ai ishtaiyopi kʋt ik achukmo kʋt im ai ishtia ʋmmona tuk ash i̱ shahli hoke.

²¹ Yohmi ka yʋmmak okʋt nan ai ʋlhpiesa hina ya̱ ik ithano hatuk mak osh im achukma kʋt yʋmma ithana cha, anumpa ʋlhpisa holitopa yʋt im anoho̱wa ha ya tuk osh i̱ filʋmmi kʋt, im i̱ shahla he atuk oka.

²² Yohmi kia yʋmmak okʋt nan isht ʋlhpisa ai a̱hli ho̱ ai yʋmohmishke; yohmi ka, Ofi yʋt hoita kash osh falaminchit ʋpʋshke; mikma, Shukha tek ʋt ʋlhchifa kash osh, falamʋt lukchuk a̱ oka tonolishke, achishke.