2 Pita 1 - Chahta Holisso Holitopa 1886

Nan isht il aiyukpa chinto nan ho̱ ʋbanumpuli ʋt isha chi̱ hosh ʋlhtoka ka anoli, 1; 5 nan ai ʋlhpiesa a yʋmihcha he moma ka yʋ mihchi, yohmi pulla hosh ai okcha̱ya pisa chi̱ kʋt ai a̱hlicha chi̱ i̱ miha: 14 ilap ʋt illa chi̱ nitak ʋt ai ʋla̱ hosi ka anoli; mihmʋt Klaist i̱ yimmit akʋllot hiela hi a̱ i̱ miha.

¹ Saimon Pita, Chisʋs Klaist im apostel, micha in tishu hokʋt pin Chihowa, micha pi Okchalinchi, Chisʋs Klaist ʋt nan aiʋlhpiesa yʋmohmi tok pulla mak o̱, na yimmi pi̱ holitopa itilaui ka ahayuchi tok ʋhleha yʋmmak o̱ pit aiokpuchi kʋt,

² Chihowa, micha Chisʋs pin Chitokaka hʋsh ithaiyana kak osh nan isht i̱ kana, micha isht it i̱ nanaiya aiena kʋt hʋchin lauashke;

³ Yohmi kʋt ilap ai a̱hli kak osh nan oklu̱ha isht ai okcha̱ya, micha Chihowa isht holitobli imma aiena ka pihi̱ma kʋt, ilap ithʋna kak osh nan ashʋchi ik pim iksho hosh isht a holitopa ya̱ e pihi̱sa he mak o̱, pi atokoli tok:

⁴ Yʋmmak o̱ nana holitopa, micha achukma chinto puta ka isht a pihi̱ma; yohmi kʋt ilʋppak atuk pulla kak o̱ nan okpulo chu̱kʋsh nan ai ahni yatuk pulla kak o̱ yakni ilʋppa ai asha ka hʋsh i̱ filʋmmi hosh, Chihowa im anukfila ha̱ hʋsh ibai isha chi̱ ha tok.

⁵ Micha ilʋppa atuk pulla kak o̱ achunanchi fehna hosh na hʋchi yimmi ya̱ nan ʋlhpesali ya̱ isht hʋsh otʋninchashke: micha nan ʋlhpesali ya̱ nan ithana ya̱ isht hʋsh otʋninchashke.

⁶ Micha nan ithana ya̱ ile oktampli ya̱ isht hʋsh otʋninchashke: micha ile oktampli ya̱ nuktaiyalʋt achunanchi ya̱ isht hʋsh otʋninchashke; micha nuktaiyalʋt achunanchi ya̱ Chihowa isht holitobli ya̱ isht hʋsh otʋninchashke.

⁷ Micha Chihowa isht holitobli ya̱ itibapishi ʋbanumpuli it i̱ hullo ya̱ isht hʋsh otʋninchashke; micha itibapishi ʋbanumpuli it i̱ hullo ya̱ hatak moma i̱ kana ya̱ aieninchit isht hʋsh otʋninchashke.

⁸ Yohmi ka nana ilʋppa puta kʋt hʋchi anukfoyuka kʋt isht i̱ shahlit lauʋt ia hokmʋt, pin Chitokaka Chisʋs Klaist hʋsh ithaiyana kʋt, in takobit hʋch ik ʋno ka hi o̱ hʋch ikbi keyu hoke.

⁹ Amba nana ilʋppa puta ka ik im iiksho hokmʋto, nishkin tamoa hosh mishema pit pisa he keyu, micha tikba ilap nan ai ashʋchika yʋt i̱ kashofa ha tok ʋt imi haksi hoke.

¹⁰ Yʋmohmi hoka na hʋchi ʋlhtoka, micha na hʋchim annoa aiena kʋt hʋchim ai a̱hla chi̱ kʋt ai yiminta hosh hʋsh achunanchashke: yohmi ka nana ilʋppak o̱ hʋsh yimihchi hokmʋto, chi tula himma keyu hoke:

¹¹ Hʋsh yakohmi hok mak o̱ pin Chitokaka, micha pi Okchalinchi Chisʋs Klaist apehliechi ka bilia ya̱ im ʋltaha achukma hosh ik chʋkowá, hʋchim ai ahni fehna hi oke.

¹² Yʋmohmi hoka nana ilʋppa puta ka hʋsh ithaiyana, micha ʋbanumpa hʋchi yimmi kʋt kʋllot hʋsh a hikia ak inli kia, hʋsh ithaiyana chi̱ ka himonna hʋchi anukfohkihinchi li kʋt an takoba he keyu hoke.

¹³ A̱hli, ʋlhtipo ilʋppa anu̱kaka ahanta li ta̱kla kʋt, hʋsh ithaiyana chi̱ kak o̱ hʋchi anukfokihinchit hʋchi okchʋli li kʋt ilʋppʋt ai ʋlhpiesa, ahni lishke.

¹⁴ Chekosikma ʋm ʋlhtipo ilʋppa mokofit boyuhli la chi̱ pulla ithaiyana li kʋt, pin Chitokaka Chisʋs Klaist ak kia ʋm otʋninchi akinli ha tok ak oke.

¹⁵ Yʋmohmi hoka a sʋlli ha kia, nana ilʋppa puta ka hʋsh ithaiyana bieka hi ak o̱ hʋchim ai ahni li kʋt achunanchi la hi oke.

¹⁶ Pin Chitokaka Chisʋs Klaist ʋt ʋla tok, micha nan im ai a̱hli tok aiena ka e hʋchim anohonli mʋt, anumpa nan isht ik ahobo nan isht haksicha he nana ho̱ il iakaiya ha tok keyu, amba ilap isht a chinto ka nishkin isht ai atokoli pia ha tok.

¹⁷ Yohmi ka, Ilʋppak osh Sʋso a̱ holitopa yoke, yʋmmak o̱ nan isht ʋm ʋlhpiesa hoke, ahanchi anumpa yosh Holitopa chinto ka a minti hosh im ʋla kak osh isht a holitopa, micha isht annoa achukma ka I̱ki Chihowa yak o̱ im ai eshi tok.

¹⁸ Mihma itʋpehʋt nʋnih paknaka holitopa yak o̱ e hieli ho̱, anumpa ilʋppʋt ʋba yak o̱ minti hosh ʋla ho̱ e haiyaklo tok.

¹⁹ Hopaii im anumpa hak osh isht ai atokowa i̱ shahli hʋt pin tonla ak inlishke: yʋmmak oka pʋla hosh ai okhlilika yo̱ hikia chiyuhmi ho̱ hʋsh anukfihinli na onnʋt taha, micha onnahinli fochik ʋt hʋchi chu̱kʋsh a̱ a kohcha hi okʋt hʋchim ʋlhpiesa hoke.

²⁰ Hopaii im anumpa hʋt ilap im anukfila ha tok keyu ka ti̱kba ilʋppa hʋsh ithanashke.

²¹ Yohmi ka hatak nana ai ahni ho̱ nitak tikba kash hopaii im anumpa hʋt ʋla tok keyu, amba hatak holitopa yosh Chihowa nana ai ahni pulla ho̱ Shilombish Holitopa yak osh nukfokihinchi ho̱ anumpohonli tok.