2 Mi̱ko 9 - Chahta Holisso Holitopa 1886

¹ Mihma hopaii Elisha yʋt hopaii ushi ʋhleha achʋfa ka hoyo mʋt, Ish ʋskofʋchi cha, kotoba bila ʋlhto ilʋppa ish ieshi cha, Lamolh‐kileat a̱ ish iashke:

² Atuk osh yʋmma ish onakmʋt, Nimshi ushi Chehoshafat a̱ ushi Chehu ya̱ ont ish pisashke; micha ish iba chukowakmʋt, itibapishi ʋhleha ai ititakla ya̱ ish wakayʋchi cha, aboha anu̱kaka fehna ka isht ish onashke:

³ Yohmikmʋt kotoba bila ʋlhto yash ish ishi cha, noshkobo ha̱ ish on hlatʋblashke, micha, Chihowa yʋt yak achishke, Islael a̱ ish i̱ mi̱ko yachi̱ ho̱ na chi ahʋmmi lishke, ish achashke: yohmikmʋt okhissa ya̱ ish tiwi cha, ish malelashke, micha ish hikia he keyu, im achi tok.

⁴ Mihma hatak himita, hopaii hatak himita yash osh Lamolh‐kileat a̱ ia tok.

⁵ Atuk osh ona ma, tʋshka chipota i̱ kʋpitʋni ʋhleha hʋt chieya tok: mihma, Kʋpitʋni chia ha̱ anumpa ishit chim a̱ya lishke, achi tok. Mihma Chehu ʋt, E moma ka pi katima kak o̱? achi tok. Mihma, Chishno yá, kʋpitʋni ma! achi tok.

⁶ Mihma wakaya cha, aboha ya̱ ont chukowa tok; mihma bila yash noshkobo ha̱ on hlatʋbli tok; micha, Islael in Chitokaka Chihowa yʋt yak achishke, Chihowa im okla Islael a̱ ish i̱ mi̱ko yachi̱ ho̱ na chi ahʋmmi lishke.

⁷ Mikma chi̱ shahli Ahab in chuka achʋfa ya̱ issot ish kancha chi̱ hoke; yohmi na an tishu ʋhleha, hopaii puta im issish, micha Chihowa in tishu moma im issish atuk a̱ Chesebel ibbak ak o̱ a hoyot ilaiokha la chi̱ hoke.

⁸ Yohmikma Ahab in chuka achʋfa oklu̱ha kʋt illit taha chi̱ hoke; mikma Ahab immi, ʋlla nakni, micha yuka, micha yuka issa aiena hosh Islael aiasha ka, ishit kanchi la chi̱ hoke.

⁹ Micha Ahab in chuka achʋfa ya̱ Nebat ushi Cheloboam in chuka achʋfa yatok a̱ chohmichi la chi̱ hoke, micha. Ahichah ushi Baasha in chuka achʋfa yatok a̱ chohmichi la chi̱ hoke.

¹⁰ Mikma ofi puta kʋt Chesebel a̱ Chesleel i̱ yakni ya̱ ai ʋpakma, hohpi ʋt iksho ka hi oke, im achi tok. Mihmʋt okhissa ya̱ tiwi cha, maleli tok.

¹¹ Mihma Chehu ʋt kohchʋt i̱ shahli in tishu ʋhleha ha̱ im ona tok: mihma achʋfa kʋt, Achukma hoh cho? nanta katiohmi ho̱ tasimbo ilʋppʋt chim ʋla cho? im achi tok. Mihma, Hatak, micha im anumpa ha̱ hʋsh ithaiyanʋshke, im achi tok.

¹² Mihma, A̱hli keyu; pim anoli, e chim asilhhʋshke, okla achi tok. Mihma, Yakohmichit, micha yakohmichit ʋm anumpulit, Chihowa yʋt yak achishke, Islael ish i̱ mi̱ko yachi̱ ho̱ na chi ahʋmmi lishke, achishke, achi tok.

¹³ Mihma okla tu̱shpʋt hatak ʋt i̱ nafohka aiyukali ka atuya paknaka ya̱ i̱ patali cha, ishitpu̱fa olachit, Chehu ʋt mi̱koshke, achi tok.

¹⁴ Yohmi ho̱ Nimshi ushi Chehoshafat a̱ ushi Chehu ʋt anumpa luma ikbit Cholam a̱ i̱ sanali tok: (yohmi ka Silia i̱ mi̱ko itikba ya̱ Cholam, micha Islael moma aiena kʋt Lamolh‐kileat a̱ atonit a̱sha hatok.

¹⁵ Amba Cheholam ʋto Silia i̱ mi̱ko Hasael a̱ itibi ma, Silia hatak ʋhleha hʋt nʋhli tuk a̱, ile hlakofficha chi̱ hosh falamʋt Chesleel a̱ ia tuk atok.) Mihma Chehu ʋt, Hʋchim anukfila hokma, hlakoffi achʋfa kia tʋmaha ha̱ kohchʋt iʋt Chesleel a̱ ont ik ai anolo kashke, achi tok.

¹⁶ Mihmʋt Chehu ʋt om binili cha, Chesleel pila ha̱ ia tok; Cholam ʋt yʋmmak o̱ itonla hatuk oka. Mihma Chutah i̱ mi̱ko Ahasiah ʋt Cholam a̱ pisʋt ona tuk atok.

¹⁷ Mihma Chesleel aboha kʋllo chaha paknaka ya̱ hatak hopo̱koyo yʋt o̱ hikia tuk ʋt Chehu in tʋshka a̱ya achʋfa yʋt minti na pisa mʋt, Tʋshka a̱ya achʋfa ya̱ pisa lishke, achi tok. Mihma Cheholam ʋt, Issuba ombinili achʋfa isli ishi cha, ish pila na ont afamʋt, Achukma hoh cho? im achashke, achi tok.

¹⁸ Mihma issuba ombinili yʋt iʋt ont afama cha, Mi̱ko ʋt yak achishke, Achukma hoh cho? achi tok. Mihma Chehu ʋt, Achukma ya̱ nanta ishit chi ahalaia hosh? fullotʋt ʋm a̱shaka pila iá, achi tok. Mihma hatak hopo̱koyo yash osh, Anumpa shali ʋt im ona tuk kia, ik falamoshke, achi tok.

¹⁹ Mihma issuba ombmili atukla ho̱ pila na im ona mʋt, Mi̱ko ʋt yak achishke, Achukma hoh cho? achi tok. Mihma Chehu ʋt, Achukma ya̱ nanta ishit chi ahalaia hosh? fullotʋt ʋm a̱shaka pila iá, achi tok.

²⁰ Mihma hatak hopo̱koyo yʋt anolit, Im ona hokak osh, ik falamoshke; mikma tihleli kʋt Nimshi ushi Chehu tihleli ak o̱ chohmishke; tasimbo chohmit aiyimita hosh tihlela he bano chatuk okʋt, achi tok.

²¹ Mihma Cheholam ʋt, Shalichi, achi tok. Mihma im itichanʋlli ya̱ shalichi tok. Mihma Islael i̱ mi̱ko Cheholam, micha Chutah i̱ mi̱ko Ahasiah itatuklot im itichanʋlli bi̱ka om binili cha, Chehu ya̱ afamʋt ia tuk osh Chesleel hatak Nabolh im osapa ak o̱ ahayuchi tok.

²² Atuk osh yakohmi tok, Cheholam ʋt Chehu ya̱ pisa mʋt, Chehu ma! achukma hoh cho? achi tok. Mihma, Achukma yʋt nanta hosh? chishki Chesebel ʋt ahaui, micha ishtahullo laua kʋt yakohmi fehna ka? achi tok.

²³ Mihma Cheholam ʋt fulullichi mʋt, maleli tok; micha Ahasiah ya̱, Haksichi yoke, Ahasiah ma! im achi tok.

²⁴ Mihma Chehu ʋt im ititanampo ya̱ ai oklu̱hʋchit shebli mʋt Cheholam a̱ shakba ititakla nʋhli ma, oski naki ʋt chu̱kʋsh a̱ ont kohcha na im itichanʋlli ya̱ itula tok.

²⁵ Mihma im itichanʋlli i̱ kʋpitʋni Bitka ya̱, Ish ishi cha, Chesleel hatak Nabolh im osapa ya̱ ish pilashke: ʋno, micha chishno il itatuklo kʋt on chieyʋt i̱ki. Ahab a̱ iakaiyʋt il a̱ya ma, naweki yakohmi ka Chihowa yʋt onochi tok a̱ ish ithaiyanashke:

²⁶ Nabolh im issish, micha ushi ʋhleha im issish aiena ka pilashash pisa li tuk keyu cho? Chihowa yʋt achishke; atuk osh osapa ilʋppa a chim atobbi la chi̱ pulla hoke, Chihowa yʋt achishke. Yʋmohmi hoka himak a̱ Chihowa im anumpa hatuk mak o̱ ishi cha, osapa ya̱ pilá, im achi tok.

²⁷ Amba Chutah i̱ mi̱ko Ahasiah ʋto pisa mʋt, osapushi chuka hina ya̱ maleli tok: mihma Chehu ʋt iakaiyʋt hliohli cha, Yʋmmakmá, achi tok. Atuk o̱ im itichanʋlli fo̱ka na Ku oiyʋt atia, yʋmmʋt Ibleam bili̱ka talaia ka a nʋhli tok: mihma malelit Mekitto ya̱ ona cha, yʋmmak o̱ ai illi tok.

²⁸ Mihma in tishu ʋhleha hʋt itichanʋlli fohkit Chelusalem a̱ isht ona cha, im ahollohpi ya̱ i̱ki ʋhleha ta̱kla Lewi in tʋmaha hak o̱ a hohpi tok.

²⁹ Mihma Ahab ushi Cholam ʋt mi̱ko tok afʋmmi ont isht auahchʋfa ho̱, Ahasiah ʋt Chutah ya̱ i̱ mi̱ko tok.

³⁰ Atuk o̱ Chehu ʋt Chesleel a̱ ʋla ka, Chesebel ʋt haklo tok; mihmʋt nashuka ya̱ anchahli mʋt, noshkobo ha̱ shemʋchi cha, okhissushi ya̱ pit ʋtaya tok.

³¹ Atuk osh Chehu ʋt holihta okhissa ya̱ ant chukowa ma, Simli ʋt i̱ shahli ha̱ ʋbi mʋt, im achukma̱ka tok o̱? achi tok.

³² Mihma nashuka ya̱ akachakalichit okhissushi ya̱ pit pisa mʋt, Kʋta hosh sʋbafo̱ka cho? kʋta? achi ma, tishu tuklo, tuchina kanima hosh et ʋtaya tok.

³³ Mihma, Aka et ho pilá, achi tok. Mihma okla aka et pila tok: mihma im issish kaniohmi kʋt aboha, micha issuba puta aiena ka o̱ fimimpa tok: mihma yakni ya̱ ahʋhlichi tok.

³⁴ Atuk osh ont chukowa cha, impʋt ishko tok: micha, Oh ia cha, ohoyo kalakshi ilʋppa ont ho pisa cha, ho hohpi; mi̱ko ushetik oka, achi tok.

³⁵ Mihma okla hohpit ia tok; yohmi tuk kia noshkobo foni, micha iyi, micha ibbak pʋtha aiena ak illa ho̱ ahayuchi tok.

³⁶ Mihmʋt okla falamʋt ant im anoli tok: mihma, Ilʋppak osh Chihowa im anumpa hoke, yʋmma Tishbeh hatak Elichah ya̱ tohno na anumpulit, Chesleel i̱ yakni ofi puta kʋt Chesebel a̱ ai ʋpa chi̱ hoke:

³⁷ Mikma Chesebel haknip illi ʋt yʋlhki chohmit yakni paknaka Chesleel i̱ yakni ya̱ aiasha chi̱ hoke; yohmikma, Ilʋppʋt Chesebel oke, acha he keyu, achi tok mak oke, achi tok.