2 Mi̱ko 8 - Chahta Holisso Holitopa 1886

¹ Yohmikma Elisha yʋt ohoyo yʋmma ushi ya̱ falʋmmichit okchalinchi tuk ʋt im anumpulit, Chishno, micha chin chuka achʋfa aiena kʋt hʋsh wakaya cha, kanima ho̱ hʋsh ai aha̱shwa hinlakmʋt, ont hʋsh aha̱shwashke: Chihowa yʋt hohchʋfo hʋt a̱sha chi̱ ho̱ apesa hoka; mikma afʋmmi untuklo ho̱ yakni ya̱ ant onʋtoyula pulla chi̱ hoke, achi tok.

² Atuk o̱ ohoyo hash osh wakaya cha, Chitokaka immi hatak im anumpa hatuk mak o̱ yʋmohmi tok; micha yʋmma, micha in chuka achʋfa aiena kʋt Filistin okla i̱ yakni ya̱ ont ni aha̱shwa na afʋmmi untuklo tok.

³ Atuk osh afʋmmi untuklo kʋt ont taha ma, yakohmi tok, ohoyo hash osh falamʋt Filistin okla i̱ yakni ya̱ kohchʋt ona tok: mihmʋt in chuka, micha im osapa yash mi̱ko ya̱ im asilhha chi̱ hosh kohchʋt ia tok.

⁴ Mihma mi̱ko ʋt Chitokaka immi hatak ash in tishu Kehasi ya̱ im anumpulit, Nana afehna moma Elisha yʋt yʋmihinchi chatuk a̱ is sʋm anolashke, chim asilhha lishke, achi tok.

⁵ Atuk o̱ yakolmi tok, ʋlla illi yatuk a̱ kaniohmit falʋmmichit okchalinchi tuk a̱ mi̱ko ya̱ im anolit isht anta ma, yakeh! ohoyo yʋmma ushi ya̱ falʋmmichit okchalinchi tok ash osh in chuka, micha ian osapa yash mi̱ko ya̱ im asilhha tok. Mihma Kehasi ʋt, A̱ shahli mi̱ko ma! ohoyo hʋt ilʋppak oke, mikma ushi ya̱ Elisha yʋt falʋmmichit okchalinchi tok ʋt ilʋppak oke, achi tok.

⁶ Mihma mi̱ko ʋt ohoyo hash i̱ ponaklo ma, im anoli tok. Mihma mi̱ko ʋt tishu achʋfa im atokoli cha, Immi hatok moma, micha yakni ya̱ kohchʋt ia tok ʋttʋt himak a̱ ant ʋhli ka osapa yash a waya tuk moma ka isht ish i̱ falʋmmichashke, achi tok.

⁷ Mikma Elisha yʋt Tamaskʋs a̱ ona tok: mihma Silia i̱ mi̱ko Benhatat ʋt abeka hosh itonla tok: mihma, Chitokaka immi hatak ʋt ilʋppa ʋlʋshke, achi hosh im annoa tok.

⁸ Mihma mi̱ko ʋt Hasael a̱, Nahʋlbina ish ishi cha, iʋt Chitokaka immi hatak ash ont afamʋt tohnot, Abeka ilʋppa a sa hlakoffa chi̱ cho? ish achi na Chihowa ya̱ i̱ ponaklashke, im achi tok.

⁹ Mihma Hasael ʋt afamʋt ia mʋt, nahʋlbina ya̱ nana achukma ilaiyukali moma Tamaskʋs aiasha ka, kamel shali pokoli ushta ho̱ ieshi cha, ia tuk osh tikba ont hikiʋt, Chiso Benhatat Silia i̱ mi̱ko ʋt et chi̱ sa pilʋt, Abeka ilʋppa a sa hlakoffa chi̱ cho? achishke, achi tok.

¹⁰ Mihma Elisha yʋt, Ia cha, Chi hlakoffa hinla pulla hoke, ont im achi; yohmi kia illi pulla chi̱ ka Chihowa yʋt sa pisachi tuk oke, im achi tok.

¹¹ Mihmʋt nashuka ya̱ atukkolit onochi na hofahyʋt taha tok; mihma Chitokaka immi hatak ash osh nishkin okchi minti tok.

¹² Mihma Hasael ʋt, Nanta katiohmi ho̱ a̱ shahli hʋt nishkin okchi minti cho? achi tok. Mihma, Nana ik achukmo ka Islael im ʋlla ʋhleha ha̱ ish i̱ yʋmihcha chi̱ ka ithana li hokʋt: i̱ holihta kʋllo puta ka luak isht ish hukma chi̱ hoke, micha hatak i̱ himithoa ʋhleha ha̱ bʋshpo falaia isht ish ba chi̱ hoke, micha im ʋlla pi̱shi ʋhleha ha̱ ish kahlalik?-?mʋt, im ohoyo ʋhleha hʋt ʋlla shanli ya̱ ish patʋffa chi̱ hoke, im achi tok.

¹³ Mihma Hasael ʋt, Yohmi kia chin tishu hʋt ofi okmá, nanta hatuk osh nachinto ilʋppa yʋmihcha hinla cho? achi tok. Mihma Elisha yʋt, Silia i̱ mi̱ko chia ho̱ Chihowa yʋt sa pisachí tuk oke, achi tok.

¹⁴ Mihma Elisha ya̱ i̱ filʋmmit ia mʋt, i̱ shahli ha̱ im ona tok: mihma, Elisha yʋt nanta ho̱ chim achi tuk oh cho? im achi tok. Mihma, Chi hlakoffi pulla chi̱ ka ʋm anoli tuk oke, achi tok.

¹⁵ Atuk osh onna ma yakohmi tok, nantʋnna sukko ho̱ ishi cha, oka okʋchi mʋt, nashuka ya̱ ompohomo na illi tok: mihma Hasael ʋt ʋlhtobʋt mi̱ko tok.

¹⁶ Mihma Islael i̱ mi̱ko Ahab ushi Cholam ʋt mi̱ko tok afʋmmi ont ishit tahlapi ho̱, Chehoshafat ʋt Chutah i̱ mi̱ko atuk o̱, Chutah i̱ mi̱ko Chehoshafat ushi Cheholam ʋt mi̱ko tok.

¹⁷ Mi̱ko mʋt, afʋmmi pokoli tuchina akucha tuklo tok; atuk osh afʋmmi untuchina ho̱ Chelusalem a̱ ahantʋt mi̱ko tok.

¹⁸ Mihmʋt Ahab in chuka achʋfa yʋt yʋmohmi tuk a̱ chohmit, Islael i̱ mi̱ko ʋhleha i̱ hina yak o̱ a noho̱wa tok; Ahab ushetik ak osh tekchi yatuk oka: micha Chihowa itikba ya̱ nana ik achukmo kak o̱ yʋmohmi tok.

¹⁹ Yohmi kia Chihowa yʋt in tishu Lewi atok pulla, yʋmma, micha im ʋlla ʋhleha ha̱ nitak moma ka pʋla ihi̱ma he, miha tuk mak osh, Chutah ya̱ chukillissʋchi ik bʋnno tok.

²⁰ I̱ nitak o̱ Etom ʋt Chutah ibbak i̱ nutaka tuk ʋt i̱ filʋmmit i̱ sanali cha, ilap akinli i̱ mi̱ko ya̱ mi̱kochi tok.

²¹ Yohmi ho̱ Cholam, micha itichanʋlli moma aiena kʋt Sai ya̱ ona tok: atuk osh ninak o̱ wakaya cha, Etom okla, micha itichanʋlli kʋpitʋni ʋhleha aiena kʋt afolubli tuk a̱ issot kanchi tok: mihma okla hʋt yihlepʋt im ʋlhtipo puta ka ona tok.

²² Yohmi kia Etom ʋt Chutah ibbak i̱ nutaka tuk ʋt i̱ filʋmmit i̱ sanali tok ʋt himak nitak a̱ moma hoke. Yohmi ma Libnah ʋt mih makinli ho̱ i̱ filʋmmit i̱ sanali tok.

²³ Mikma Cholam nana akaniohmi tok inla kʋt, micha nana yʋmihchi tok moma kʋt Chutah i̱ mi̱ko ʋhleha i̱ nitak holisso ha̱ a holisso keyu cho?

²⁴ Mihmʋt Cholam ʋt i̱ki ʋhleha ta̱kla nusi mʋt, i̱ki ʋhleha ta̱kla Lewi in tʋmaha ha̱ a hollohpi tok: mihma ushi Ahasiah ʋt ʋlhtobʋt mi̱ko tok.

²⁵ Islael i̱ mi̱ko Ahab ushi Cholam ʋt mi̱ko tok afʋmmi ont isht auahtuklo ho̱, Chutah i̱ mi̱ko Cheholam ushi Ahasiah ʋt mi̱ko tok.

²⁶ Ahasiah ʋt mi̱ko mʋt, afʋmmi pokoli tuklo akucha tuklo tok; atuk osh afʋmmi achʋfa ho̱ Chelusalem a̱ ahantʋt mi̱ko tok: micha ishki hohchifo kʋt Ahlaliah yosh Islael i̱ mi̱ko Omli ushetik atok.

²⁷ Mihmʋt Ahab in chuka achʋfa i̱ hina yak o̱ a noho̱wa cha, Ahab in chuka achʋfa yatuk a̱ chohmit, Chihowa itikba ya̱ nana ik achukmo kak o̱ yʋmohmi tok: Ahab in chuka achʋfa ya̱ ai itawaya yatuk okʋt.

²⁸ Mihmʋt Ahab ushi. Cholam a̱ ta̱kla iʋt Silia i̱ mi̱ko Hasael a̱ Lamolh‐kileat a̱ ai itibit ona tok; mihma Silia hatak ʋhleha hʋt Cholam a̱ nʋhli tok.

²⁹ Mihma mi̱ko Cholam ʋt Silia i̱ mi̱ko Hasael a̱ itibi ma, Lamah ya̱ Silia hatak ʋhleha hʋt a nʋhli tuk a̱, Chesleel ak o̱ ont ai ile hlakofficha chi̱ hosh falamʋt ia tok: mihma Chutah i̱ mi̱ko Cheholam ushi Ahasiah ʋt, Ahab ushi Cholam ʋt abeka hatuk oka, pisʋt Chesleel a̱ ona tok.