2 Mi̱ko 6 - Chahta Holisso Holitopa 1886

¹ Mihma hopaii ushi ʋhleha hʋt Elisha ya, Yakeh! chi tikba il aiasha yʋt pim atikkonofa fehnʋshke.

² Chatan a̱ il ia cha, yʋmma iti achʋfa aiyukali ont il ai ishi cha, yʋmmak o̱ il ai asha chi̱ kʋt isht il ikbi cha, iloh ai ashashke, e chim asilhhʋshke, im achi tok. Mihma, Oh iá, achi tok.

³ Mihma achʋfa kʋt, Ʋlhpesa ish ahni cha, chin tishu ʋhleha ha̱ awant ish iashke, achi tok. Mihma, Ia lashke, achi tok.

⁴ Mihmʋt awant ia tok. Atuk o̱ Chatan a̱ okla ona mʋt, iti chanlit kinahlichi tok.

⁵ Atuk o̱ achʋfa kʋt iti kinʋffit isht anta ma, iskifa tʋli yʋt oka pit okatula tok: mihma, Ikikkeh! a shahli ma! micha ponta yatuk oke, chitoli hosh achi tok.

⁶ Mihma Chitokaka immi hatak ash osh, Katima yak o̱ itula tuk oh cho? achi tok. Mihma ai okatula tuk a̱ pisachi tok. Mihma iti chanlit kinʋffi mʋt, yʋmmak o̱ pit okʋchi cha, tʋli yash okpalalichi tok.

⁷ Mihma, Pit ishi, im achi tok. Mihma ibbak a̱ pit weli cha, ishi tok.

⁸ Atuk o̱ Silia i̱ mi̱ko ʋt Islael a̱ in tanampi cha, in tishu ʋhleha ha̱ luhmit itim anumpulit, Yʋmmak o̱, micha yʋmmak o̱ ʋm ʋlbina hachi̱ hoke, achi tok.

⁹ Mihma Chitokaka immi hatak ash osh Islael i̱ mi̱ko ya̱ pit i̱ pilʋt, Ahah! ish ahni cha, yʋmmak oka ont chik aiyo kashke: yʋmmak o̱ Silia okla hʋt minti hoka, achi tok.

¹⁰ Mihma Islael i̱ mi̱ko ʋt, Chitokaka immi hatak ash osh im anolit, ahah! ahna he i̱ miha tuk, yʋmma pit pila cha, himonna keyu, micha hitukla keyu ho̱ ahah! ahni tok.

¹¹ Yʋmohmi hatuk o̱ Silia i̱ mi̱ko ʋt nana ilʋppa pulla kak o̱ chu̱kʋsh ik im achukmo fehna tok: mihmʋt in tishu ʋhleha ha̱ pit hoyo cha, E katima kak osh Islael i̱ mi̱ko ya̱ iba fohka ka hʋs sʋm anola he keyu cho? im achi tok.

¹² Mihma in tishu ʋhleha achʋfa kʋt, Iksho, a̱ shahli mi̱ko ma! Elisha hopaii Islael a̱ ahanta kak osh, aboha ish a nusi ish ai anumpuli ka, anumpa hash Islael i̱ mi̱ko ya̱ im anola he bano hoka, achi tok.

¹³ Mihma, Oh ia cha, ai ʋtta ka ont ho pisá; mikma pit hoyot isht ʋla lashke, achi tok. Atuk o̱, Yakeh! Tohlan ak o̱ antʋshke, achi hosh im annoa tok.

¹⁴ Atuk o̱ yʋmma issuba puta, micha itichanʋlli puta, tʋshka chipota laua aiena ho̱ pit pila tok: atuk o̱ ninak o̱ ona cha, tʋmaha ha̱ afolubli tok.

¹⁵ Atuk o̱ onnahinli fehna ho̱ Chitokaka immi hatak ash in tishu hʋt wakaya cha, kohchʋt ia ma, yakeh! tʋshka chipota, micha issuba, micha itichanʋlli aiena hosh tʋmaha ha̱ afolubli tok: mihma in tishu hash osh, Ikikkeh! a̱ shahli ma! e katiohma chi̱ cho? im achi tok.

¹⁶ Mihma, Chi nukshopa ná: pibafoyuka kak osh laua kʋt yʋmma ibafoyuka ka i̱ shahli hoka, achi tok.

¹⁷ Mihma Elisha yʋt anumpa ilbʋsha anumpulit, Chihowa ma! nishkin a̱ ish i̱ fatummi na pisashke, achi tok. Mihma Chihowa yʋt hatak himita yash nishkin a̱ i̱ fatummi na pisa tok: mihma yakeh! nʋnih hʋt issuba luak, micha itichanʋlli luak aiena kʋt alotowa cha, Elisha ya̱ afolubli tok.

¹⁸ Atuk o̱ im onʋt okla ma, Elisha yʋt Chihowa ya̱ anumpa ilbʋsha im anumpulit, Okla ilʋppa nishkin lʋbli yo̱ isht ish issashke, chim asilhha lishke, achi tok. Mihma Elisha im anumpa hatuk mak o̱ nishkin lʋbli yo̱ isht isso tok.

¹⁹ Mihma Elisha yʋt, Hina yʋt ilʋppak keyu, micha tʋmaha hʋt ilʋppak keyu hoke; hʋs siakaiya na hatak hʋsh hoyo ka hʋch isht ona lashke, im achi tok. Atuk ak osh pehliechit, Samalia ak o̱ isht ona tok.

²⁰ Atuk o̱ yakohmi tok, Samalia ya̱ okla ona ma, Elisha yʋt, Chihowa ma! ilʋppa puta ka nishkin a̱ ish i̱ fatummi ha pisashke, achi tok. Mihma Chihowa yʋt nishkin a̱ i̱ fatummi na pisa tok: mihma yakeh! Samalia iklʋna yo̱ hinli tok.

²¹ Mihma Islael i̱ mi̱ko ʋt pisa mʋt, Elisha ya̱, A̱ki ma! fahama la chi̱ cho? fahama la chi̱ cho? im achi tok.

²² Mihma, Ish fahama he keyu: chi̱ bʋshpo falaia, micha chim iti tanampo isht ish yukachi tuk okak osh ish fahama hinla cho? Pʋska, micha oka aiena ka itikba in talali na impʋt ik ishko cha, i̱ shahli ha̱ ik im oná, achi tok.

²³ Mihma impa chito ho̱ im atahli tok: atuk o̱ impʋt, micha ishkot okla im ʋlhtaha ma, ik iá, ahni na i̱ shahli ha̱ im ona tok. Yohmi ho̱ Silia okla a̱ya yʋt himakma Islael i̱ yakni ya̱ ont ik chukowo tok.

²⁴ Atuk o̱ i̱ himmakma Silia i̱ mi̱ko Benhatat ʋt in tʋshka chipota moma ka itʋnahli cha, iʋt Samalia ya̱ ont in tanampit afolublit abinachi tok.

²⁵ Mihma Samalia ya̱ hohchʋfo chito fehna tok: mihma yakeh! okla in tanampit afolublit abinachit aiasha na, issuba haksobish falaia noshkobo achʋfa kʋt tʋli hʋta shekel pokoli untuchina ma, pʋchi yoshuba i̱ yʋlhki kab kʋshkoa aiushta kʋt tʋli hʋta shekel tahlapi tok.

²⁶ Atuk o̱ Islael i̱ mi̱ko ʋt holihta paknaka a̱ya ma, ohoyo achʋfa kʋt chitoli hosh, Si apelá, a̱ shahli mi̱ko ma! im achi tok.

²⁷ Mihma, Chihowa yʋt ik chi apelokma, nanta ho̱ ishit chi apela la hinla cho? anihechi, keyukmʋt abʋshli ak ahinla cho? achi tok.

²⁸ Micha mi̱ko ʋt, Nanta chi̱ katiohmi cho? im achi tok. Mihma, Ohoyo ilʋppʋt, Chiso ha̱ bohli, mikma himak nitak a̱ e pa tukmʋt, onnakma sʋso ha̱ e pashke, ʋm achi tuk oke.

²⁹ Mihma sʋso ha̱ e honi cha, e pa tuk oke: atuk o̱ onna ma, Chiso ha̱ ish bohli na e pashke, im achi li tuk; atuk ak o̱ ushi ya̱ luhmishke, im achi tok.

³⁰ Atuk o̱ yakohmi tok, mi̱ko ʋt ohoyo im anumpa hash haklo mʋt, i̱ nafohka ya̱ hlilʋffi tok: mihmʋt holihta paknaka a̱ya na okla hʋt pisa ma, yakeh! na hishi tʋnna yʋt anu̱kaka nipi ya̱ alataiya tok.

³¹ Yohmi mʋt, Shafat ushi Elisha noshkobo hʋt himak nitak a̱ on talaiakma, Chitokaka yʋt yakohmi, micha i̱ shahli kia si yʋmihchashke, achi tok.

³² Mikma Elisha yʋt in chuka binili ma, asʋnonchi ʋhleha hʋt takla chieya tok: mihma mi̱ko ʋt itikba hikia hatak a̱ pila tok: yohmi kia anumpa shali ʋt ʋla ta̱kla ma, asʋnonchi ʋhleha ha̱, Hatak ʋbi ushi ilʋppʋt sa noshkobo ha̱ isha chi̱ ho̱ et pila tuk a̱ hʋsh pi̱sa cho? Hʋsh hoyo cha, anumpa shali ʋt ʋlakma, okhissa ya̱ hʋsh okhishta cha, okhissa akinli anumpa shali yash kʋllochit hʋsh halanlashke: i̱ shahli iyi yʋt et iaka̱yʋt kitekahanchi keyu cho? im achi tok.

³³ Atuk osh itim anumpuli moma ma, anumpa shali ʋt im ʋla tok: mihmʋt, Yakeh! ilʋppʋt nana ik achukmo Chihowa a minti mak oke; nanta katiohmi ho̱ himakma Chihowa ya̱ anukchietot hoho̱yo la hinla cho? achi tok.