2 Mi̱ko 5 - Chahta Holisso Holitopa 1886

¹ Yohmi ma Silia i̱ mi̱ko in tʋshka chipota i̱ kʋpitʋni Naaman ʋt i̱ shahli ha̱ i̱ holitopa yosh hatak holitopa atok; yʋmmak atuk mak o̱ Chihowa yʋt Silia ya̱ hlakoffichi tuk oka: micha hatak yʋmmʋt hatak hlampko chilita yosh leplosi ʋbi atok.

² Micha Silia okla a̱ya kanohmi kʋt kohchʋt ia cha, ʋlla tek himita yo̱ Islael yakni ya̱ a yukachit ai ishit isht ia tok: mihma Naaman tekchi ak o̱ nana isht im ʋtta tok.

³ Atuk osh, A̱ shahli hʋt hopaii Samalia anta ka itikba hikia tuk okbano; yohmikma in leplosi ya̱ hlakofficha hinla hoka, i̱ pushnayo ohoyo ha̱ im achi tok.

⁴ Mihma Naaman ʋt iba chukowa cha, i̱ shahli ha̱ im anolit, Ʋlla tek Islael yakni minti ʋt yakohmi, micha yakohmi ho̱ achishke, achi tok.

⁵ Mihma Silia i̱ mi̱ko ʋt, Inta! iá, mikma Islael i̱ mi̱ko ya̱ holisso i̱ pila lashke, achi tok. Mihma tʋli hʋta talent pokoli, micha tʋli holisso lakna shekel tahlepa sipokni hannali, micha nafohka fohka pokoli aiena ho̱ ishi cha, ia tok.

⁶ Atuk osh, Yohmi ka holisso ilʋppʋt chim onakma, yakeh! an tishu Naaman a̱ m leplosi ya̱ ish hlakofficha chi̱ ho̱ chi̱ pila li tuk oke, holisso hʋt achi ho̱ Islael i̱ mi̱ko ya̱ isht im ona tok.

⁷ Atuk o̱ yakohmi tok, Islael i̱ mi̱ko ʋt holisso hash itim anumpuli mʋt, i̱ nafohka ya̱ hlilʋffi cha, Ʋno ak osh Chitokaka sia hatuk osh ʋbi li, micha okchalinchi la hinla ho̱, hatak a̱ in leplosi hlakoffichi la chi̱ ho̱, yʋmmʋt et a̱ pila cho? Yohmi ka yʋmmʋt peh sati̱ nokowa bʋnna ka anukfillit ho pisá, hʋchim asilhha lishke, achi tok.

⁸ Atuk o̱ yakohmi tok, Chitokaka immi hatak Elisha yʋt Islael i̱ mi̱ko ʋt i̱ nafohka ya̱ hlilʋffi tuk a̱ haklo mʋt, mi̱ko ya̱ pit i̱ pilʋt, Nanta katiohmi ho̱ chi̱ nafohka ya̱ ish hlilʋffi tuk oh cho? ʋno ak o̱ ʋm ʋlashke, chim asilhha lishke, mikmʋt hopaii ʋt Islael a̱ ahanta ka ithaiyanashke, achi tok.

⁹ Yohmi ho̱ Naaman ʋt im issuba puta, micha im itichanʋlli aiena kʋt ona cha, Elisha in chuka okhissa itikba ya̱ hikia tok.

¹⁰ Mihma Elisha yʋt anumpa shali pit i̱ pila mʋt, Ish ia cha, Chatan a̱ untuklo ha ish yupashke; mikma chi nipi ʋt anonti chin toba na chi kashofashke, achi tok.

¹¹ Yohmi kia Naaman ʋt nokowa cha, ia mʋt, Yakeh! kohcha pulla cha, ʋm ʋlʋt hikiʋt in Chitokaka Chihowa ya̱ hochihi̱fo hosh aiʋbi ya̱ ibbak o̱ walit leplosi ʋbi yash hlakofficha chi̱, ʋm ahoba tuk oke.

¹² Tamaskʋs okhina, Abana, micha Fapa yʋt Islael oka moma ka achukma kʋt i̱ shahli keyu cho? yʋmmak o̱ a yupit sa kashofa hinla akinli keyu cho? achi tok. Mihmʋt shanaia cha, nukhobela fehna hosh ia tok.

¹³ Mihma in tishu ʋhleha hʋt bili̱ka onʋt im anumpulit, A̱ki ma! hopaii ʋt nana afehna ho̱ ish yʋmihcha chi̱, chi̱ miha hatukma, ish yʋmihcha he tuk keyu cho? yohmi ka, Yupi cha, ik chi kashofá, chim achi hokak heno? okla achi tok.

¹⁴ Yohmi ma okʋttahʋt ia cha, Chitokaka immi hatak ash im anumpa hatuk mak o̱ untuklo ha Chatan a̱ oklubbit kohcha tok: mihma nipi ʋt ʋlla iskitini nipi chohmi hosh anonti toba na kashofa tok.

¹⁵ Mihmʋt i̱ bina ai achʋfa yash momʋt falamʋt Chitokaka immi hatak ash im ona cha, itikba ya̱ hieli tok: micha, Yakeh! yakni moma ka Chitokaka yʋt iksho, amba Islael takla ak illa hoka ithaiyana lishke: yʋmohmi ka himak a̱ nan ishit yukpali ya̱ chin tishu ha̱ ish im ishashke, chim asilhha lishke, achi tok.

¹⁶ Mihma, Chihowa yʋt okcha̱ya pulla ka, yʋmmak o̱ itikba hikia li kʋt, nana ishi la he keyu hoke, achi tok. Mihma isha chi̱ ka im achunanchi tok: yohmi kia ik haklo tok.

¹⁷ Mihma Naaman ʋt, Yohmi ka chin tishu ha̱ yakni ya̱ issuba haksobish falaia shali tuklo ka ima he keyu cho? chim asilhha lishke; chin tishu hʋt himak pilla ka na hukmit isht aiokpʋchi, micha nan ʋbit isht aiokpʋchi nana kia chitokaka inla puta im issa chi̱ keyu hoka, amba Chihowa yak achi̱ hoke.

¹⁸ Nana ilʋppʋno Chihowa yʋt chin tishu ha̱ i̱ kashoffashke; a̱ shahli hʋt aiokpʋcha chi̱ hosh Limmon in chuka yʋmma chukowa cha, yʋmmʋt sʋbbak a̱ ʋtaya na Limmon in chuka ya̱ akachunoli likma; Limmon in chuka ya̱ akachunoli likma, Chihowa yʋt chin tishu ha̱ nana ilʋppa i̱ kashoffashke, achi tok.

¹⁹ Mihma, Achukma̱kʋt ish a̱yashke, achi tok. Yohmi ma i̱ filʋmmit iʋt ik hopako ho̱ ona tok.

²⁰ Mihma Chitokaka immi hatak in tishu Kehasi ʋt, Yakeh! a̱ shahli hʋt Silia hatak ilʋppa Naaman ʋt nana isht ʋla tuk a̱ ik im esho hosh hlakoffichishke; yohmi kia Chihowa yʋt okcha̱ya pulla ka, iakaiyʋt hliohli lish, nana kia im ishi la chi̱ hoke, achi tok.

²¹ Yohmi hosh Kehasi ʋt Naaman a̱ iakaiya tok: atuk o̱ iakaiyʋt hliohlit ma̱ya na Naaman ʋt pisa mʋt, itichanʋlli yash akowʋt afamʋt ia cha, Achukma̱ka cho? achi tok.

²² Mihma, Achukma̱kʋshke. A̱ shahli hʋt et sa pila hosh, Yakeh! himak fehna ka Eflaim nʋnih minti ʋt hopaii ʋhleha ushi yosh hatak himita tuklo kʋt ʋm ʋlʋshke: yʋmmak o̱ tʋli hʋta talent achʋfa, micha nafohka fohka tuklo ho̱ pit ish imashke, chim asilhha lishke, achishke, achi tok.

²³ Mihma, Ʋlhpesa ish ahni cha, talent tuklo ho̱ ish ishashke, achi tok. Micha im achunanchi mʋt, tʋli hʋta talent tuklo ho̱ bahta tuklo fohkit takchi mʋt, nafohka fohka tuklo aiena ho̱ in tishu tuklo ha̱ ima na shali cha, tikba iʋt okla tok.

²⁴ Atuk o̱ nʋnih ha̱ ona mʋt, im ishi cha, aboha anu̱kaka ya̱ bohli tok: mihmʋt hatak tuklo kash, ik iá, ahni na iʋt okla tok.

²⁵ Amba ilap ʋto ont chukowa cha, i̱ shahli ha̱ itikba hikia tok: mihma Elisha yʋt, Katima ish minti cho? Kebasi ma! im achi tok. Mihma, Chin tishu hʋt kanima ia tuk keyu hoke, achi tok.

²⁶ Mihma, Hatak ʋt filemʋt im itichanʋlli ha̱ akowʋt, chi afamʋt minti ma, sa chukʋsh ʋt a̱ya tuk keyu cho? Tʋli holisso a habena he, micha nafohka, micha alif ʋpi puta, micha pa̱kʋpi ahollokchi puta, micha ʋlhpoa chipunta, micha wak, micha hatak tishu puta, micha ohoyo tishu puta aiena ka a habena he nitak ʋlhpesa cho?

²⁷ Yʋmohmi hoka Naaman in leplosi ʋt chishno, micha chim ishtatiaka aiena ka lapali na bilia hi oke, im achi tok. Mihma leplosi ʋbi yosh okti chiyuhmi hosh itikba hikia tuk ʋt i̱ filʋmmit kohcha tok.