2 Mi̱ko 4 - Chahta Holisso Holitopa 1886

¹ Atuk o̱ hopaii ushi tekchi ʋhleha ha̱ ai achʋfa yosh Elisha ya̱ i̱ pa̱ya mʋt, A̱ hatak chin tishu hʋt illishke; mikma chin tishu hʋt Chihowa i̱ nukwia yatuk a̱ chishno ʋt ish ithanʋshke; atuk o̱ nan ahekʋchi ʋt ʋm ʋlla tuklo ka ishit yuka ikba chi̱ hosh ʋlʋshke, achi tok.

² Mihma Elisha ʋt, Nanta ho̱ chi̱ yʋmihchi la chi̱ cho? nanta hosh aboha ya̱ chi̱ fo̱ka cho? ʋm anolí, im achi tok. Mihma, chin tishu ohoyo hʋt aboha ya̱ nana kia ik im iksho kʋmohmi, bila kotoba achʋfa ak illʋshke, achi tok.

³ Mihma, Ish ia cha, chin chukapanta moma ka nan aiʋlhto nana a̱lhto keyu ho̱ ont ish potashke; ish kanomo?-?sichi ná.

⁴ Atuk osh ant ish chukowakmʋt, ish il on okshita cha, chiso tuklo kash ish on okshitakmʋt, tosholit nan aiʋlhto yʋmma moma ka ish apitta cha, alotakma naksika ish tala?-?lashke, achi tok.

⁵ Mihma i̱ filʋmmit ia mʋt, il on okshita cha, ushi tuklo kash on okshita ma, ihi̱ma na toshohonli tok.

⁶ Atuk o̱ yakohmi tok, nan aiʋlhto puta kʋt alota ma, ushi ya̱, Himakma nan aiʋlhto isht ʋm ʋlá, im achi tok. Mihma, Nan aiʋlhto ʋt himakma iksho, im achi tok. Mihma bila yʋt yokopa tok.

⁷ Yohmi ma onʋt Chitokaka immi hatak ash im anoli tok. Mihma, Ish ia cha, bila ya̱ ish kanchi cha, nana ish aheka tuk ʋt isht ish atobbi cha, atampa ka chishno, micha chiso tuklo aiena kʋt hʋsh ai okcha̱yashke, achi tok.

⁸ Atuk osh nitak kaniohmi ma, Elisha ʋt a̱yʋt Shunem, yʋmma ohoyo chito yosh ʋtta ho̱ ona tok; mihma pʋska ʋpa chi̱ ka im achunanchi tok. Atuk o̱ yakohmi beka tok, a̱yakmʋt, pʋska ʋpa chi̱ hosh folotʋt chukowa beka tok.

⁹ Mihma i̱ hatak a̱, Yakeh! Ilʋppʋt Chitokaka immi hatak chu̱kʋsh ai ʋlhpiesa yo̱ ithana lishke; atuk o̱ pim a̱ya beka na biliʋshke.

¹⁰ Ʋba potʋlhpo iskitini ikbit aboha ya̱ il onochashke; micha yʋmma topa, micha aiimpa, micha aiombinili, micha pʋla aio̱hikia aiena ka il i̱ hilechashke, chim asilhha lishke; atukma yakohma hi oke, pim ʋlakmʋt, yʋmmak o̱ folotʋt chukowa hi oke, im achi tok.

¹¹ Atuk o̱ nitak kaniohmi ma, yʋmma ona cha, ʋba potʋlhpo yak o̱ folotʋt chukowa cha, yʋmma itonla tok.

¹² Atuk osh in tishu Kehasi ya̱, Shunem ohoyo ilʋppa i̱ howá, im achi tok. Atuk o̱ i̱ howa ma, itikba ya̱ ant hikia tok.

¹³ Mihma, Yohmi ka, Yakeh! nan isht anukfila ilʋppa moma ka isht ish pi anukfilli tuk oke; nanta hosh chi̱ katiohma hinla cho? mi̱ko ak okmá, tʋshka chipota i̱ kʋpitʋni chito ak okmá, kanimampo ka im anolit ishit si anumpulik?-?bano, ish ahni cho? im achí, im achi tok. Mihma, Ʋm okla akinli takla ahanta li hoke, achi tok.

¹⁴ Mihma, Yohmi ka nanta hosh i̱ katiohma hinla cho? achi tok. Mihma Kehasi ʋt, Ushi ak osh ik im iksho mʋhli, micha i̱ hatak ʋt sipoknishke, achi tok.

¹⁵ Mihma, I̱ howá, achi tok. Mihma i̱ howa ma, aboha okhissa ya̱ ant hikia tok.

¹⁶ Mihma, Nitak ʋlhpisa himak a̱ chohmi tofahpi ʋt anonti ʋlakma, ʋlla nakni yo̱ ish shola hi oke, achi tok. Mihma, Aha̱! a̱ shahli Chitokaka immi hatak chia hʋt chin tishu ohoyo ha̱ ish i̱ holabi ná, achi tok.

¹⁷ Atuk osh ohoyo hash osh ʋlla shali tuk osh, Elisha ʋt im achi tuk mak o̱ nitak ʋlhpisa tofahpi ʋt anonti ʋla ma, ʋlla nakni yo̱ eshi tok.

¹⁸ Atuk o̱ ʋlla yash osh hofantit taha mʋt, nitak kaniohmi ma onush ʋmo aiasha i̱ki ʋt anta ka ona tok.

¹⁹ Micha i̱ki ya̱, Sa noshkobó, sa noshkobó, im ahanchi tok. Mihma hatak himita ya̱, Ishki ya̱ isht im oná, im achi tok.

²⁰ Mihma sholi cha, ishki ya̱ isht im ona ma, iyi̱kalaha om binili na tʋbokoli mʋt, illi tok.

²¹ Mihma ʋba oiya cha, Chitokaka immi hatak in topa ha̱ om bohli mʋt, on okshita cha, kohcha tok.

²² Mihma i̱ hatak a̱ i̱ howa cha, Hatak himita ʋhleha achʋfa ka, micha issuba haksobish falaia achʋfa ka, et is sa̱ pila na, malelit Chitokaka immi hatak aiʋtta ka ona lish, anonti ʋla lashke, chim asilhha lishke, achi tok.

²³ Mihma, Nanta katiohmi ho̱ himak nitak a̱ ish ona hinla cho? hʋshi talali ʋmmona keyu, micha nitak hullo keyu, achi tok. Mihma, Ʋlhpesa hoke, achi tok.

²⁴ Yohmi mʋt issuba haksobish falaia om patali mʋt, in tishu hash, Chʋffichí, micha tikba iá; ish om binili kʋt, chi̱ miha li keyukma, is sa̱ yokopa ná, im achi tok.

²⁵ Mihmʋt ia cha, Kamel nʋnih ak o̱ Chitokaka immi hatak ʋt ʋtta tuk o̱ im ona tok. Atuk o̱ yakohmi tok, Chitokaka immi hatak ash osh hopaki ho̱ pit pisa mʋt, in tishu Kehasi ya̱, Yakeh! ilʋppʋt Shunem ohoyo hash oke.

²⁶ Malelit ont ish afama cha, Chin chu̱kma cho? chi̱ hatak ʋt in chu̱kma cho? ʋlla yash osh in chu̱kma cho? im achí, chim asilhha lishke, im achi tok. Mihma, Achukma̱kʋshke, achi tok.

²⁷ Atuk osh Chitokaka immi hatak ʋt nʋnih hash anta tuk o̱ im ona mʋt, iyi ya̱ hoklit ishi tok: mihma Kehasi ʋt toblit kanʋllicha chi̱ hosh bili̱ka ona tok. Mihma Chitokaka immi hatak ash osh, Ik a̱shá; shilombish ʋt nukhʋmmi hoka; mihma Chihowa yʋt an luhmi cha, ik sʋm anoloshke, achi tok.

²⁸ Yohmi ma, A̱ shahli ha̱ ʋlla im asilhha li tok oh cho? Is sa yimmichi ná, achi li tok keyu cho? achi tok.

²⁹ Yohmi ma Kehasi ya̱, Ish il ʋskofʋchikmʋt, an tʋbi ya̱ chibbak fohkit ish ieshi cha, ish iashke; hatak a̱ ish afamakmʋt, ish aiokpʋcha he keyu; micha hatak ʋt chi aiokpʋchikma, anumpa falama ka ish miha he keyu: micha an tʋbi ya̱ ʋlla nashuka ya̱ ish onochashke, im achi tok.

³⁰ Mihma ʋlla yash ishki ʋt, Chihowa yʋt okcha̱ya pulla ka, micha chimi shilombish ʋt okcha̱ya pulla ka, chissa la he keyu hoke, achi tok. Mihma wakaya cha, iakaiya tok.

³¹ Mihma Kehasi ʋt ti̱kba iʋt ona cha, tʋbi yash ʋlla nashuka ya̱ onochi tok; yohmi kia anumpuli, micha haiyaklo kia iksho tok: yʋmohmi ma falamʋt ont afama cha, im anolit, Ʋlla yʋt ik okchoshke, achi tok.

³² Atuk o̱ Elisha yʋt aboha ya̱ ont chukowa ma, yakeh! ʋlla yʋt illi cha, in topa ha̱ onʋtoyula tok.

³³ Mihmʋt chukowa mʋt, tuklo ka okhissa il on okshita cha, Chihowa ya̱ im asilhha tok.

³⁴ Mihmʋt onʋt ʋlla yash onʋtoyula cha, itih ha̱ itih onochi mʋt, nishkin a̱ nishkin onochi mʋt, ibbak a̱ ibbak onochi cha, ile chisemochit onʋtoyula tok; mihma ʋlla yash osh nipi ʋt libishʋt isht ia tok.

³⁵ Yohmi mʋt falamʋt aboha ya̱ nowʋt itafalamoho̱wa tok: mihmʋt anonti ont ile chisemochit onʋtoyula tok: mihma ʋlla yash osh untuklo ha habishko cha, ʋlla yash osh nishkin fatummi tok.

³⁶ Mihma Kehasi ya̱ i̱ howa mʋt, Shunem ohoyo ilʋppa i̱ howá, achi tok. Yohmi ma i̱ howa tok: atuk o̱ im ʋla ma, Chiso nakni ya̱ ishi, achi tok.

³⁷ Yohmi ma iyi ya̱ ant on hlipiʋt pit im akachunoli tok; mihmʋt ushi yash ishi cha, kohcha tok.

³⁸ Atuk o̱ Elisha yʋt falamʋt Kilkal a̱ ona tok: mihma yakni ya̱ hohchʋfo yʋt a̱sha tok; mihma hopaii ushi ʋhleha hʋt itikba ya̱ chieya tok: mihma in tishu ha̱, Shuti chito ya̱ ito talali cha, hopaii ushi ʋhleha ha̱ nipi okchi ish i̱ honashke, im achi tok.

³⁹ Mihma achʋfa kʋt haiyu̱kpulo aiowa chi̱ hosh kohchʋt yakni haiaka ia tuk osh, nabalali ilapint offo ya̱ ahayuchi mʋt, yʋmma ʋni shukshubak holba ya̱ i̱ nafohka alota ho̱ ʋmot isht ʋla cha, nipi okchi shuti ya̱ chuhlit ibani tok: okla ik ithano hatuk oka.

⁴⁰ Yohmi cha hatak ʋhleha hash osh ʋpa chi̱ ho̱ in tosholi tok: atuk o̱ yakohmi tok, nipi okchi okla ʋpa hosh ma̱ya mʋt, chitolit, Chitokaka immi hatak ma! shuti ya̱ isht illi hʋt fo̱kʋshke, achi tok; mihmʋt ʋpa he keyu tok.

⁴¹ Yohmi kia, Yohmikma onush bota isht oh ʋlá, achi tok; mihma shuti ya̱ pit okʋchi tok: micha, Okla ha̱ ish in tosholi na ʋpashke, achi tok: mihma shuti ya̱ nana ik achukmo kʋt iksho tok.

⁴² Atuk o̱ hatak achʋfa kʋt Baal‐shalisha minti hosh ʋla cha, Chitokaka immi hatak a̱ waya ʋmmona pʋska, bali pʋska lumbo pokoli tuklo ho̱, micha osapushi a waya aiena ka i̱ bahta ʋlhto ho̱ isht im ʋla tok: mihma, Okla ha̱ ish ima na ʋpashke, achi tok.

⁴³ Mihma in tishu hʋt, Nanta̱? ilʋppa hatak tahlepa achʋfa ka itikba talali la hinla cho? achi tok. Mihma, Okla ha̱ ish ima na ʋpashke; Chihowa yʋt yak achi hoka, Okla impa cha, ashanchashke, achi tok.

⁴⁴ Yohmi ma itikba talali na okla impa mʋt, Chihowa im anumpa hatuk mak o̱ ashanchi tok.