2 Mi̱ko 3 - Chahta Holisso Holitopa 1886

¹ Yohmi ka, Chutah i̱ mi̱ko Chehoshafat ʋt mi̱ko tok afʋmmi ont isht auahuntuchina ho̱, Ahab ushi Cheholam ʋt Samalia ya̱ ʋttʋt Islael i̱ mi̱ko tuk osh, afʋmmi auahtuklo ho̱ mi̱ko tok.

² Mihmʋt Chihowa itikba ya̱ nana ik achukmo kak o̱ yʋmohmi tok; yohmi kia i̱ki ya̱ chohmi, micha ishki ya̱ chohmi tok keyu: yohmi kʋt Baal naholbʋt toba i̱ki ʋt ikbi tok a̱ ishit kanchi tok.

³ Yohmi kia Nebat ushi Cheloboam ʋt nan ashʋchit Islael a̱ ashʋchechi tok ak o̱ asitia tok: ik i̱ filʋmmo tok.

⁴ Mihma, Moab i̱ mi̱ko Mesha ʋt chukfʋlhpoa apoa yatuk osh, Islael i̱ mi̱ko ya̱ chukfʋlhpoa ushi tahlepa sipokni tahlepa achʋfa, micha chukfʋlhpoa nakni hishi a̱sha tahlepa sipokni tahlepa achʋfa ho̱ ima beka tuk osh,

⁵ Yakohmi tok, Ahab ʋt illi ma, Moab i̱ mi̱ko ʋt Islael i̱ mi̱ko ya̱ i̱ filʋmmit i̱ sanali tok.

⁶ Mihma mih nitak akinli ho̱ mi̱ko Cheholam ʋt Samalia ya̱ kohchʋt ia cha, Islael moma ka hoyot hotihna tok.

⁷ Mihmʋt iʋt, Chutah i̱ mi̱ko Chehoshafat a̱, Moab i̱ mi̱ko ʋt a̱ filʋmmit a̱ sanalishke; si awant Moab a̱ itibit ish ia hinla cho? pit im achi tok. Mihma, Ia lashke; ʋno ʋt chishno akinli chohmi likma, ʋm okla hʋt chim okla akinli chohmikma, ʋm issuba puta kʋt chim issuba puta akinli chohmi hoke, achi tok.

⁸ Mihma, Hina katima yak o̱ il ia chi̱ cho? achi tok. Mihma, Etom yakni haiaka hina pit hlopulli ká, achi tok.

⁹ Yohmi ho̱ Islael i̱ mi̱ko, micha Chutah i̱ mi̱ko, micha Etom i̱ mi̱ko aiena kʋt ia tok; micha nitak untuklo anowa yo̱ pit fullota tok; micha tʋshka chipota, micha nan ʋlhpoa yʋt iakaiya tuk aiena kʋt ishka he oka yʋt iksho tok.

¹⁰ Mihma Islael i̱ mi̱ko ʋt, Ikikkeh! Moab ibbak a̱, fohka chi̱ hosh, Chihowa yʋt mi̱ko tuchina ilʋppa hoyot itʋnahli tuk oka, achi tok.

¹¹ Mihma Chehoshafat ʋt, Chihowa i̱ hopaii ʋt ilʋppa anta tuk o̱ tohnot Chihowa ya̱ il i̱ ponakla hinla keyu cho? achi tok. Mihma Islael i̱ mi̱ko in tishu ʋhleha achʋfa kʋt, Shafat ushi Elisha, yʋmmʋt Elichah ibbak a̱ oka on hlali yatuk ʋt yak antʋshke, achi tok.

¹² Mihma Chehoshafat ʋt, Chihowa im anumpa hʋt ibafoyuka hoke, achi tok. Yohmi ho̱ Islael i̱ mi̱ko, micha Chehoshafat, micha Etom i̱ mi̱ko aiena kʋt iʋt im ona tok.

¹³ Mihma Elisha ʋt Islael i̱ mi̱ko ya̱, Nanta ho̱ chitim ahalaia li cho? chi̱ki i̱ hopaii ʋhleha, micha chishki i̱ hopaii ʋhleha hak o̱ im oná, im achi tok. Mihma Islael i̱ mi̱ko ʋt, Aha̱! Moab ibbak a̱ fohka chi̱ hosh, Chihowa yʋt mi̱ko tuchina ilʋppa hoyot itʋnahli tuk oka, im achi tok.

¹⁴ Mihma Elisha ʋt, Ʋba nan oklu̱ha ilaiieshi Chihowa yʋt okcha̱ya pulla ka, yʋmmak o̱ itikba hikia li kʋt, Chutah i̱ mi̱ko Chehoshafat ak osh hikia ka aiokpanchi li hatuk keyukmʋt, ish a hikia imma ya̱ pit hopo̱koyot chi pisa la hetuk keyu hoke.

¹⁵ Yohmi kia himak a̱ ʋhlepa‐olachi ya̱ isht oh ʋm ʋlá, achi tok. Atuk o̱ yakohmi tok, ʋhlepa‐olachi ʋt olachi ma, Chihowa ibbak ʋt ant onʋtoyula tok.

¹⁶ Mihma, Chihowa yʋt yak achishke, Okfa ilʋppa yakni kula biekʋchit ho tahli.

¹⁷ Chihowa yʋt yak achi hoka, Mahli ha̱ hʋsh pisa chi̱ keyu hoke, micha umba ka hʋsh pisa chi̱ keyu hoke; yohmi kia okfa yʋmmʋt oka alota na hʋchishno, micha hʋchi̱ wak, micha hʋchi̱ nanʋlhpoa aiena kʋt ishka chi̱ hoke.

¹⁸ Yohmi kia ilʋppʋt Chihowa itikba ya̱ nana afehna chi̱ keyu hoke; Moab a̱ hʋch ibbak fohka chi̱ akinli hoke.

¹⁹ Mikma tʋmaha holihta moma, micha tʋmaha achukma i̱ shahli moma ka okpʋnit, micha iti achukma moma ka kinahlichit, micha oka kʋli moma ka i̱ kʋmalit, micha osapa achukma taloha moma ka tʋli ashachit hʋsh okpʋna chi̱ hoke, achi tok.

²⁰ Atuk o̱ onnahinli ya̱, ilhpak isht aiokpʋchi im issa ma, yakeh! oka yʋt Etom pilla minti hosh ʋla na yakni ʋt oka ya̱ alota tok.

²¹ Atuk o̱ mi̱ko ʋhleha hʋt itibit ʋla ka Moab okla moma kʋt haklo mʋt, tʋnʋp a̱ya fohka ya̱ fohka hinlakmʋt, micha ʋba ma̱ya moma kʋt itʋnaha cha, yakni ʋhli ya̱ hieli tok.

²² Atuk osh onnahinli fehna ho̱ okla wakaya cha, hʋshi ʋt kohchʋt oka ya̱ on tommi ma oka yʋt ichapaka ya̱ humma kʋt issish a̱ chiyuhmi ho̱ Moab okla hʋt pisa tok.

²³ Mihmʋt, Ilʋppʋt issish oke: mi̱ko ʋhleha hash osh illit taha pulla hoke, micha iti fahamʋt iti tahli tuk oke: yʋmohmi hoka himak a̱, Moab ma! na wehpoa ya̱ ont kiloh ishi, okla achi tok.

²⁴ Atuk osh Islael im ʋlbina ha̱ ona ma, Islael okla hʋt wakaya cha, fahama na, itikba yihlepa tok: mihma fahamʋt ishit maha̱yʋt Moab okla ha̱ fahamʋt ishit kanchi tok.

²⁵ Micha in tʋmaha puta ka yuhlit tahlit, osapa achukma taloha moma ka hatak ʋt tʋli achʋfa aiyukali pilʋt alotoli tok; micha oka kʋli moma ka i̱ kʋmalit, iti achukma moma ka kinahlichi tok: yohmi cha Ki‐halaselh ʋno tʋli ya̱ okla hilinchi tok; micha tʋli ishit fahpuli ʋhleha hʋt apak?-?fopʋt tʋli isht isso tok.

²⁶ Mihma itibi kʋt i̱ kʋllo fehna na, Moab i̱ mi̱ko ʋt pisa mʋt, hatak bʋshpo falaia ieshi tablepa untuklo ho̱ pehlichi cha, tiʋblit hlopullit Etom i̱ mi̱ko ya̱ im ona bʋnna tok: yohmi kia nana kanihma he keyu tok.

²⁷ Yohmi ma ushi ʋttahpi ʋlhtobʋt mi̱ka he tuk a̱ ishi cha, holihta onochit hukmit isht aiokpʋchi im issa tok. Mihma Islael a̱ i̱ nukkilli fehna tok: mihma okla itibi tuk ʋt i̱ filʋmmi cha, falamʋt i̱ yakni akinli ho̱ ona tok.