2 Mi̱ko 25 - Chahta Holisso Holitopa 1886

¹ Atuk o̱ yakohmi tok, mi̱ko tok afʋmmi ont ishit chakkali, micha hʋshi ont ishit pokoli, micha hʋshi nitak ont ishit pokoli ma, Babulon i̱ mi̱ko Nebuchatnessa, yʋmma, micha in tʋshka chipota moma aiena kʋt Chelusalem a̱ ʋla cha, in tanampit abinʋchi tok; micha chuka chaha kʋllo puta okla ikbit apakfoyubli tok.

² Mihmʋt tʋmaha ha̱ in tanampit abinanchi na Setekiah ʋt mi̱ko tok afʋmmi ont isht auahchʋfa tok.

³ Atuk o̱ hʋshi ont aiushta kʋt nitak ont ishit chakkali ma, tʋmaha ha̱ hohchʋfo fehnʋt aiasha tok; micha yakni ya̱ okla hʋt pʋska ik im iksho tok.

⁴ Mihma tʋmaha holihta yʋt yuhla ma, hatak tʋnʋp a̱ya puta kʋt ninak o̱ yihlepʋt holihta tuklo yʋmmʋt mi̱ko im osapushi bili̱ka hieli ka ititakla holihta okhissa ya̱ kohchʋt hina ya̱ ia tok: (mihma Chaltee ʋhleha hʋt tʋmaha ha̱ apakfoyupʋt aiasha tok;) mihma mi̱ko ʋt yakni patali hina ya̱ ia tok.

⁵ Mihma Chaltee in tʋshka chipota yʋt mi̱ko ya̱ iakaiyʋt hliohli tuk osh Cheliko yakni patali ak o̱ a sakki tok: mihma in tʋshka chipota moma kʋt i̱ filʋmmit itafimimpa tok.

⁶ Mihma mi̱ko ya̱ okla ishi cha, Babulon i̱ mi̱ko ʋt Liblah ak o̱ a̱sha tuk o̱ isht im ona tok; mihmʋt nan apesʋt onochi tok.

⁷ Micha Setekiah ushi ʋhleha ha̱ pi̱sa ho̱ okla ʋbi mʋt, Setekiah nishkin a̱ kocha wehli cha, asonak lakna itatakʋli tuklo ishit takchi cha, Babulon a̱ isht ona tok.

⁸ Atuk o̱ hʋshi ont ishit tahlapi, micha nitak ont isht untuklo (yʋmmʋt Babulon i̱ mi̱ko Nebuchatnessa ʋt mi̱ko tok afʋmmi ont isht abichakkali ho̱) Babulon i̱ mi̱ko in tishu anumpa a̱hlichi i̱ kʋpitʋni Nebusa‐atan ʋt Chelusalem a̱ ʋla tok.

⁹ Micha Chihowa in chuka, micha mi̱ko in chuka hukmit, Chelusalem a̱ chuka aiasha moma, micha hatak hochitoka in chuka puta moma ka luak ishit hukmi tok.

¹⁰ Mihma Chaltee tʋshka chipota moma anumpa a̱hlichi i̱ kʋpitʋni apehʋt a̱ya tuk ʋt Chelusalem tʋli holihta apakfoyupa tuk a̱ kinahlichi tok.

¹¹ Mihmʋt okla inla kʋt tʋmaha a̱sha tuk, micha kʋniʋt Babulon i̱ mi̱ko ya̱ yihlepʋt im ona tuk, micha okla laua yatuk atampa aiena ka anumpa a̱hlichi i̱ kʋpitʋni Nebusa‐atan ʋt yukachit isht ia tok.

¹² Yohmi kia hatak ilbʋsha yakni a̱sha tuk ai achʋfa ya̱ pa̱kʋpi apoksiachi, micha osapa toksʋli aiena yachi̱ ka anumpa a̱hlichi i̱ kʋpitʋni ʋt ashanchi tok.

¹³ Micha asonak lakna toni̱k Chihowa in chuka hieli tuk, micha aiontalaia puta, micha asonak lakna okhʋta Chihowa in chuka anu̱kaka talaia tuk aiena ka Chaltee ʋhleha hʋt bolit bushullichit tahli cha, asonak lakna ya̱ isht iʋt Babulon a̱ isht ona tok.

¹⁴ Micha shuti, micha tobaksi ishit pehli, micha asonak lakna nan aiʋlhto moma isht in toksʋli chatuk a̱ isht ia tok.

¹⁵ Micha luak aiʋlhto, micha ampo mahaia, micha nana hosh tʋli holisso lakna yokmʋt, tʋli holisso lakna, micha nana hosh tʋli hʋta yokmʋt, tʋli hʋta anumpa a̱hlichi i̱ kʋpitʋni ʋt isht ia tok.

¹⁶ Toni̱k tuklo, okhʋta achʋfa, micha aiontalaia puta aiena Solomon ʋt Chihowa in chuka ya̱ im ikbi tok, nan aiʋlhto ilʋppa moma kʋt asonak lakna yʋt a weki iksho tok.

¹⁷ Toni̱k achʋfa kʋt chaha kʋt kubit auahuntuchina ma, noshkobo on talaia kʋt asonak lakna atok; micha noshkobo hʋt chaha kʋt kubit tuchina tok; micha okshichanlit tʋnna, micha pomeklanat aiena apakfoyupa kʋt asonak lakna bieka atok: mihma toni̱k atukla kak kia ilʋppak inli chohmit okshichanlit tʋnna yʋt im a̱sha tok.

¹⁸ Mihma anumpa a̱hlichi i̱ kʋpitʋni ʋt naholitompa isht ʋtta i̱ shahli Selaiah, micha naholitompa isht ʋtta atukla Sefaniah, okhissa apistikeli tuchina aiena ka ishi tok:

¹⁹ Micha tʋmaha ha̱ a kohchit yunʋk hatak tʋnʋp a̱ya pehlichi, micha hatak tahlapi mi̱ko itikba hieli atok tʋmaha a̱sha na ahayuchi kʋt, micha tʋshka chipota pehlichit holissochi, yʋmmʋt yakni ya̱ okla hʋt tʋnʋp ia chi̱ ka holissochi yatuk o̱, micha yakni ya̱ okla ha̱ hatak pokoli hannali tʋmaha ha̱ a̱sha na ahayuchi mʋt, aieninchit ishi tok.

²⁰ Micha anumpa a̱hlichi i̱ kʋpitʋni Nebusa‐atan ʋt ishi mʋt, Babulon i̱ mi̱ko ʋt Liblah ya̱ a̱sha tuk o̱ isht im ona tok.

²¹ Mihma Babulon i̱ mi̱ko ʋt Hamalh yakni Liblah ya̱ a fahamʋt illichit tahli tok. Yohmit Chutah ya̱ i̱ yakni ya̱ a kohchit isht ia tok.

²² Micha Chutah i̱ yakni atampa a̱sha tuk okla ha̱ Babulon i̱ mi̱ko Nebuchatnessa ʋt ashanchi tuk okʋno Shafan ushi Ahikam a̱ ushi Ketaliah ak o̱ pehlichi ikbi tok.

²³ Atuk o̱ tʋshka chipeta puta i̱ kʋpitʋni moma kʋt, yʋmma, micha in tʋshka ʋhleha aiena kʋt Babulon i̱ mi̱ko ʋt Ketaliah ak o̱ pehlichi ikbi tuk o̱ okla haklo mʋt, Ketaliah ʋt Mispah a̱sha tuk o̱ Nehlaniah ushi Ishmael, micha Kaleah ushi Chohanan, micha Netofah hatak Tanhumelh ushi Selaiah, micha Maachah hatak ushi Chaasaniah aiena, yʋmma, micha in tʋshka ʋhleha aiena kʋt im ona tok.

²⁴ Mihma Ketaliah ʋt yʋmma, micha in tʋshka ʋhleha aiena ka anumpa kʋllo im il onochi mʋt, Chaltee in tishu ʋhleha ha̱ hʋsh i̱ nukshopa ná; yakni ya̱ aiashʋt Babulon i̱ mi̱ko ya̱ oh im antiá; yohmikmʋt hʋchim achukma chi̱ hoke, im achi tok.

²⁵ Atuk o̱ yakohmi tok, hʋshi ont isht untuklo ma, Elishama ushi Nehlaniah ya̱ ushi Ishmael ʋt mi̱ko ishtatiaka yosh hatak pokoli aienʋt ʋla cha, Ketaliah, micha Chu, micha Chaltee aiena apehʋt Mispah a̱sha tuk a̱ fahamʋt kanchi na illit taha tok.

²⁶ Mihma okla hʋt chipunta, micha hochito moma kʋt, micha tʋshka chipota i̱ kʋpitʋni ʋhleha aiena kʋt wakaya cha, Echip a̱ ona tok; Chaltee okla ha̱ i̱ nukshopa hatuk okʋt.

²⁷ Atuk o̱ yakohmi tok, Chutah i̱ mi̱ko Chehoiachin ʋt yuka tok afʋmmi ont ishit pokoli tuchina akucha untuklo, hʋshi ont isht auahtuklo, micha nitak ont ishit pokoli tuklo akucha untuklo ma, Babulon i̱ mi̱ko Efil‐melotach ʋt mi̱ko tok afʋmmi yʋmmak inli kʋt Chutah i̱ mi̱ko Chehoiachin a̱ noshkobo ha̱ akachakalichit aboha kʋllo ya̱ a kohchi tok.

²⁸ Micha anumpa achukma im anumpuli cha, mi̱ko ʋhleha hʋt apehʋt Babulon a̱ aiombinili holitompa on chieya tuk a̱ i̱ shahlichit aiombinili holitompa om binilichi tok.

²⁹ Micha aboha kʋllo i̱ nafohka ya̱ im ai ishi tok: mihma okcha̱yʋt ahanta nitak moma kʋt itikba ya̱ pʋska ai ahampa na bilia tok.

³⁰ Mi̱ko itikba ai isht ima ho̱ ilhpak im ʋlhpisa kʋt bilia tok: onna hosh onnakma ʋlhpisa hosh okcha̱yʋt ahanta nitak moma ta̱kla kʋt im ʋlhpihi̱sa tok.