2 Mi̱ko 24 - Chahta Holisso Holitopa 1886

¹ Initak ak o̱ Babulon i̱ mi̱ko Nebuchatnessa ʋt ʋla tok: atuk o̱ Chehoiakim ʋt afʋmmi tuchina ho̱ i̱ nutaka tok: yohmi mʋt i̱ filʋmmi cha, i̱ sanali tok.

² Mihma Chihowa yʋt Chaltee a̱ya kanohmi, micha Silia a̱ya kanohmi, micha Moab a̱ya kanohmi, micha Ammon im ʋlla ʋhleha a̱ya kanohmi aiena ho̱ Chehoiakim a̱ i̱ sanalichit, in tishu hopaii ʋhleha ha̱ tohno na Chihowa im anumpa anumpohonli tok mak o̱ Chutah ya̱ chukilissʋcha chi̱ ho̱ on tihleli tok.

³ Chihowa yʋt anumpuli pulla ho̱, Manasseh ʋt nan ashʋchit nana a yʋmohmi tuk moma mak o̱,

⁴ Micha nan okpʋni keyu im issish ak kia hlatahambli tuk, micha Chelusalem a̱ nan okpʋni keyu im issish alotoli tuk, yʋmmak oka Chihowa yʋt kaskoffa he keyu hosh kanʋllichit itikba ya̱ ai ishit kancha chi̱ ho̱ Chutah ya̱ onʋtula tok oke.

⁵ Mikma Chehoiakim nana akaniohmi tok inla kʋt, micha nana yʋmihchi tok moma kʋt Chutah i̱ mi̱ko ʋhleha i̱ nitak holisso ha̱ a holisso keyu cho?

⁶ Mihma Chehoiakim ʋt i̱ki ʋhleha ha̱ ta̱kla nusi tok; mihma ushi Chehoiachin ʋt ʋlhtobʋt mi̱ko tok.

⁷ Atuk o̱ Echip i̱ mi̱ko ʋt i̱ yakni ya̱ kohchʋt himakma ik minto tok: Babulon i̱ mi̱ko ʋt Echip okhina ʋttʋt ia hosh Euflates okhina ont ʋhli kʋt Echip i̱ mi̱ko immi hatuk moma ka im ishi tok oka.

⁸ Chehoiachin ʋt mi̱ko mʋt, afʋmmi auahuntuchina tok; atuk osh hʋshi tuchina ho̱ Chelusalem a̱ ʋttʋt mi̱ko tok: mikma ishki ʋt Chelusalem ʋtta Elnahlan ushetik osh hohchifo kʋt Nehushta atok.

⁹ Micha Chihowa itikba ya̱ nana ik achukmo kak o̱ yʋmohmi kʋt i̱ki ʋt nana a yʋmohmi tok moma kak o̱ yʋmohmi tok.

¹⁰ Nitak yʋmma Babulon i̱ mi̱ko in tishu ʋhleha hʋt Chelusalem a̱ ant i̱ sanali cha, abinʋchit apakfopa tok.

¹¹ Mihma Babulon i̱ mi̱ko Nebuchatnessa ʋt tʋmaha ha̱ i̱ sanali ma, in tishu ʋhleha hʋt in tanampit abinʋchit apakfoyupa tok.

¹² Mihma Chutah i̱ mi̱ko Chehoiachin ʋt, yʋmma, micha ishki, micha in tishu ʋhleha, micha i̱ kʋpitʋni ʋhleha, micha i̱ yunʋk ʋhleha aiena kʋt kohchʋt Babulon i̱ mi̱ko ya̱ im ona tok: mihma mi̱ko tok afʋmmi ont isht untuchina kak o̱ Babulon i̱ mi̱ko ʋt ishi tok.

¹³ Mihmʋt Chihowa in chuka nana holitopa puta, micha mi̱ko in chuka nana holitopa puta aiena moma ka a kohchit isht ia tok: micha tʋli holisso lakna nan aiʋlhto Islael i̱ mi̱ko Solomon ʋt Chihowa yʋt achi tok mak o̱ ikbit Chihowa in tempel ashachi tok a̱ bʋshlit tushahlichit tahli tok.

¹⁴ Micha Chelusalem moma, micha kʋpitʋni moma, micha hatak hlampko chilita ʋhleha moma, yuka tahlepa sipokni pokoli, micha nan ikbi imponna moma, micha tʋli boli moma aiena ka yukachit isht ia tok: achʋfa kia ik anto ho̱, yakni ya̱ okla ilbʋsha moma i̱ shahli ak illa hosh a̱sha tok.

¹⁵ Micha Chehoiachin a̱ yukachit Babulon isht ona tok; micha mi̱ko ishki, micha mi̱ko tekchi ʋhleha, micha i̱ yunʋk ʋhleha, micha hatak hochitoka ʋhleha yakni ya̱ a̱sha tuk a̱ yukachit Chelusalem a̱ ai ishit Babulon a̱ isht ona tok.

¹⁶ Tʋshka chipota moma kʋt tahlepa sipokni untuklo, micha nan ikbi imponna ʋhleha, micha tʋli boli ʋhleha hʋt tahlepa sipokni achʋfa, hatak kʋllo, tʋnʋp a̱ya imponna bieka ho̱ Babulon i̱ mi̱ko ʋt yukachit Babulon a̱ isht ona tok.

¹⁷ Micha Babulon i̱ mi̱ko ʋt i̱ki itibapishi Mattaniah ak o̱ atobbichit mi̱kochi cha, hohchifo ha̱ inlʋchit Setekiah achi tok.

¹⁸ Setekiah ʋt mi̱ko mʋt, afʋmmi pokoli tuklo akucha achʋfa tok; atuk osh afʋmmi auahchʋfa ho̱ Chelusalem a̱ ʋttʋt mi̱ko tok: mihma ishki ʋt Libnah ʋtta Chelemiah ushetik osh hohchifo kʋt Hamutal atok.

¹⁹ Mihma Chihowa itikba ya̱ nana ik achukmo kak o̱ yʋmohmi kʋt Chehoiakim ʋt nana a yʋmohmi tok moma kak o̱ yʋmohmi tok.

²⁰ Chihowa yʋt anukhobela pulla hosh, pola̱ka itikba ya̱ ai ishit kancha chi̱ kak o̱, Chelusalem, micha Chutah ya̱ a yʋmohmi tok oka; mihma Setekiah ʋt Babulon i̱ mi̱ko ya̱ i̱ filʋmmit i̱ sanali tok.