2 Mi̱ko 23 - Chahta Holisso Holitopa 1886

¹ Mihma mi̱ko ʋt hoyo na Chutah, micha Chelusalem im asʋnonchi ʋhleha moma ka im itʋnahli tok.

² Mihma mi̱ko, micha Chutah hatak ʋhleha moma, micha Chelusalem okla aiasha moma, micha naholitompa isht asha ʋhleha, micha hopaii ʋhleha, micha chipunta, micha hochito moma aiena kʋt apeha ho̱ Chihowa in chuka ya̱ ont chukowa tok: micha nan itim apesa holisso Chihowa in chuka itoyu?-?lʋt haiaka tuk ash anumpa takali tuk moma ka itim anumpohonli na okla haiyaklo tok.

³ Mihma mi̱ko ʋt ahikia paknaka ya̱ o̱ hikia cha, Chihowa ya̱ iakaiya he, micha im anumpa ʋlhpisa puta, micha nan isht im atokowa puta, micha nan ʋlhpisa puta aiena ka chu̱kʋsh aioklu̱ha, micha shilombish aioklu̱ha hosh holitobli cha, nan itim apesa ilʋppa im anumpa puta holisso ilʋppa takali tuk a̱ yʋmihincha he Chihowa itikba ya̱ nan itim apihi̱sa tok: mihma okla moma kʋt nan itim apesa ya̱ ʋlhpesa ahni tok.

⁴ Mihma mi̱ko ʋt naholitompa isht ʋtta i̱ shahli Hilkiah, micha naholitompa isht asha atukla hieli ʋhleha micha okhissa apistikeli ʋhleha aiena kʋt Chihowa in tempel a̱ nan aiʋlhto puta Baal in toba tok, micha Ashelah in toba tok, micha ʋba shutik nana puta moma in toba tok aiasha ka moma ishit kohcha chi̱ ka i̱ mi̱ha tok: mihmʋt Chelusalem a̱ kohchit Kitlon osapa puta isht ona cha, hukmit tahli mʋt, hituk chubbi ya̱ isht iʋt Behlel a̱ isht ona tok.

⁵ Micha Chutah in tʋmaha achahaka puta ka, micha Chelusalem apakfoyupa taloha ka nabalama a hukma chi̱ ho̱ Chutah i̱ mi̱ko ʋhleha hʋt atokoli tok naholitompa isht asha naholbʋt toba aiokpʋchi ʋhleha ha̱, micha Baal, micha hʋshi, micha hʋsh ninak a̱ya, micha fochik lokoli auah tuklo, micha ʋba shutik nana puta moma aiena ka na balama i̱ hukmi ʋhleha ha̱ aieninchit issʋchi tok.

⁶ Micha Ashelah ha̱ Chihowa in chuka ya̱ kohchit Chelusalem kocha Kitlon bokushi ya̱ isht ona cha, Kitlon bokushi ya̱ a hukmit tahli mʋt, hʋhlit pushechit tahli cha, pushi ya̱ okla im ʋlla ʋhleha ahollohpi ya̱ o̱ fimmi tok.

⁷ Micha sodomait ʋhleha im ʋlhtipo puta ohoyo ʋhleha hʋt Ashelah ha̱ ʋlhtipo puta im a tʋna yʋt Chihowa in chuka bili̱ka taloha ka kinahlichi tok.

⁸ Micha Chutah in tʋmaha puta naholitompa isht asha moma Keba ʋttʋt ia hosh Bee‐sheba ont ʋhli asha ya̱ isht ʋla mʋt, achahaka puta naholitompa isht asha yʋt nabalama a hukmi chatuk a̱ litehli tok; micha holihta okhissa achahaka puta, yʋmmʋt tʋmaha pehlichi Choshua i̱ holihta okhissa achukowa hikia, yʋmmʋt hatak ʋt tʋmaha holihta okhissa hikiakma, im ʋlhfʋbekimma a̱sha ya̱ kinahlichi tok.

⁹ Yohmi kia achahaka puta naholitompa isht asha ʋhleha hʋt Chihowa im alta Chelusalem hikia ya̱ ik ono tok; amba itibapishi ʋhleha ta̱kla a̱shʋt pʋska ik shatʋmmo okla ʋpa tok.

¹⁰ Micha hatak nana kia ushi, micha ushetik a̱ Molech a̱ luak ik in hlopullecho ka chi̱ ho̱ Tofelh yʋmmʋt Hinnom im ʋlla ʋhleha im okfa talaia ka litehli tok.

¹¹ Micha issuba puta Chutah i̱ mi̱ko ʋhleha hʋt hʋshi ya̱ ima tok yʋmmʋt Chihowa in chuka achukowa yunʋk Nahlan‐melech im aboha hoshontika talaia ka aiasha tuk a̱ ishit kanchi tok: micha hʋshi im itichanʋlli puta ka luak isht hukmi tok.

¹² Micha alta puta Chutah i̱ mi̱ko ʋhleha hʋt ikbi tok o̱ Ahas im ʋba potʋlhpo ishit holmo o̱ hieli tuk, micha alta puta Manasseh ʋt ikbi tok o̱ Chihowa in chuka wanuta tuklo ka a hieli tuk aiena ka kinahlichi tok; micha yʋmma ai ishit malelit pushi ya̱ Kitlon bokushi ya̱ ont oka hlatʋbli tok.

¹³ Micha achahaka puta Islael i̱ mi̱ko Solomon ʋt Siton okla nan ashʋchi ishit yuwala Ashtolelh, micha Moab okla nan ashʋchi ishit yuwala Chemosh, micha Ammon im ʋlla ʋhleha nan ashʋchi ishit yuwala Milkom aiena ka im ikbi tok, yʋmmʋt Chelusalem itikba isht ai yoshuba nʋnih im ishtimpakimma aiasha tuk a̱ mi̱ko ʋt litehli tok.

¹⁴ Micha naholbʋt toba puta ka kinahlichit tahli mʋt, Ashelah puta ka chanlit akakohli cha, aiasha yatuk a̱ hatak foni alotoli tok.

¹⁵ Mikmʋt alta Behlel hikia tuk ak kia, micha achahaka Nebat ushi Cheloboam Islael a̱ nan ashʋchechi tok ʋt ikbi tok, alta yʋmmak kia, micha achahaka yʋmma itatuklo ka kinahlichi tok; micha achahaka ya̱ hukmi mʋt, ahʋhlichit pushechi cha, Ashelah ha̱ hukmi tok.

¹⁶ Micha Chosiah ʋt filema mʋt, ahollohpi nʋnih yʋmma a̱sha tuk o̱ pisa mʋt, pit hoyot ahollohpi ya̱ foni ʋt aiasha tuk a̱ ishi cha, alta paknaka ya̱ onochit hukmi hosh, Chihowa im anumpa Chitokaka immi hatak ʋt anumpulit anumpa ilʋppa puta anumpuli tok mak o̱ alta yash litehli tok.

¹⁷ Yohmi mʋt, Tʋli hikia ilʋppʋt nanta ho̱ pisa li cho? achi tok. Mihma tʋmaha hatak ʋhleha hʋt, Chitokaka immi hatak osh Chutah mintit ʋla cha, nana ilʋppa puta alta Behlel hikia ka i̱ sanalit ish kaniohmichi tuk ʋt yohma he anumpuli tok ak o̱ im ahollohpi yoke, okla im achi tok.

¹⁸ Mihma, Ik ashá, hatak nana kia foni ya̱ ik kanʋllecho kashke, achi tok. Mihma foni ya̱ hopaii Samalia minti tok foni aiena ka ik kaniohmecho tok.

¹⁹ Micha achahaka chuka Samalia tʋmaha aiasha Islael i̱ mi̱ko ʋhleha hʋt ikbit Chihowa ishit nokowochi tok moma ka Chosiah ʋt ishit kanchi cha, Behlel a̱ nana kaniohmichi tuk moma mak osh yʋmihchi tok.

²⁰ Micha achahaka naholitompa isht asha a̱sha tuk moma ka alta onochit ʋbit tahli cha, hatak foni onochit hukmi mʋt, falamʋt Chelusalem a̱ ona tok.

²¹ Mihmʋt mi̱ko ʋt okla moma ka im apesʋt, Nan itim apesa holisso ilʋppa a holisso hatuk mak o̱ hʋchin Chitokaka Chihowa ya̱ ʋbanʋblit ont ia ya̱ isht hʋsh im aiashashke, achi tok.

²² Ʋbanʋblit ont ia ilʋppa chohmi ka nan apesa ʋhleha hʋt Islael a̱ nana im apihi̱sa tok nitak takla, micha Islael i̱ mi̱ko ʋhleha i̱ nitak moma ka, micha Chutah i̱ mi̱ko ʋhleha i̱ nitak moma ka isht aiasha tok keyu hoka;

²³ Amba Chosiah ʋt mi̱ko tok afʋmmi ont isht auahuntuchina kak o̱ Chelusalem a̱ ʋbanʋblit ont ia ilʋppa Chihowa isht im aiasha tok.

²⁴ Micha nana a hulhkunna puta, micha isht ahullo puta, micha chuka achʋfa i̱ naholbʋt toba puta, micha naholbʋt toba puta, micha nan ashʋchi ishit yuwala Chutah yakni, micha Chelusalem a̱ a haiaka tuk a̱ nan ʋlhpisa anumpa hʋt holisso a takali hosh Chihowa in chuka ya̱ itoyula na naholitompa isht ʋtta Hilkiah ʋt ahayuchi tuk mak o̱ aia̱hlicha chi̱ hosh Chosiah ʋt ishit kanchi tok.

²⁵ Mihma tikba aiasha kʋt mi̱ko nana kia yʋmma chohmit Moses i̱ nan ʋlhpisa moma kak o̱ yʋmohmit chu̱kʋsh ai oklu̱hʋt, micha shilombish ai oklu̱hʋt, micha imi̱ hlampko ai oklu̱hʋt Chihowa iakaiya chohmi kʋt iksho tok: micha i̱ himmakma yʋmma chohmit hikia kʋt iksho tok.

²⁶ Yohmi kia nana ishit nokowʋchi Manasseh ʋt nokowʋchi tuk ak o̱ Chihowa yʋt nan isht i̱ nukkilli i̱ libbi kʋt, Chutah ya̱ i̱ sanalit nan isht i̱ nukkilli ʋt libbi fehna tuk a̱ ik i̱ shanaio tok.

²⁷ Mihma Chihowa yʋt Islael a̱ kanʋllichi li tok ʋt chohmichit Chutah ya̱ sa tikba ya̱ a kanʋllichi la chi̱ hoke; micha Chelusalem tʋmaha ilʋppa atokoli li tok ʋt, micha aboha ya̱, Sa hohchifo hʋt foyuka chi̱ hoke, ahanchi li tok ʋt shitilemʋt kanchi la chi̱ hoke, achi tok.

²⁸ Mikma Chosiah nana akaniohmi tok inla kʋt, micha nana yʋmihchi tok moma kʋt Chutah i̱ mi̱ko ʋhleha i̱ nitak holisso ha̱ a holisso keyu cho?

²⁹ I̱ nitak ak o̱ Echip i̱ mi̱ko Feleo‐nechoh ʋt Assilia i̱ mi̱ko itiba chi̱ hosh Euflates okhina ya̱ ona tok: mihma mi̱ko Chosiah ʋt afamʋt ia tok: atuk o̱ pisa mʋt; Mekitto ya̱ ai ʋbi tok.

³⁰ Mihma in tishu ʋhleha hʋt itichanʋlli fohkit, illi yo̱ Mekitto ya̱ ai ishit Chelusalem a̱ isht ona cha, im ahollohpi ak o̱ a hohpi tok: mihma yakni ya̱ okla hʋt Chosiah ushi Chehoahas a̱ ishi cha, i̱ki ya̱ atobbichit nan ahʋmmit mi̱kochi tok.

³¹ Chehoahas ʋt mi̱ko mʋt, afʋmmi pokoli tuklo akucha tuchina tok: atuk osh hʋshi tuchina ho̱ Chelusalem a̱ ʋttʋt mi̱ko tok: mihma ishki ʋt Libnah ʋtta Chelemiah ushetik osh hohchifo kʋt Hamutal atok.

³² Micha Chihowa itikba ya̱ nana ik achukmo kak o̱ yʋmohmit, i̱ki ʋhleha hʋt nana a yʋmohmi tok moma kak o̱ yʋmohmi tok.

³³ Mihma Feleo‐nechoh ʋt, Chelusalem a̱ ʋttʋt ik mi̱ko ka chi̱ ho̱, Hamalh yakni Liblah ya̱ a takchi tok: micha yakni ya̱ tʋli hʋta talent tahlepa achʋfa, micha tʋli holisso lakna talent achʋfa aiena ho̱ nan i̱ kʋma onochi tok.

³⁴ Micha Feleo‐nechoh ʋt Chosiah ushi Eliakim ak o̱ i̱ki Chosiah ya̱ atobbichit mi̱kochi cha, hohchifo ha̱ inlʋchit Chehoiakim achi tok; micha Chehoahas a̱ isht ia tok: atuk o̱ Echip a̱ ona cha, ai illi tok.

³⁵ Mihma Chehoiakim ʋt tʋli hʋta, micha tʋli holisso lakna yash Feleo ya̱ ima tok; yohmi kia Feleo ʋt apesa tuk mak o̱ tʋli holisso ya̱ ima chi̱ kʋt yakni ya̱ noshkobo atobbi onochi tok: yakni ya̱ okla ha̱ noshkobo atobbi im ʋlhpisa aiyukali hatuk mak o̱ Feleo‐nechoh ima chi̱ kʋt tʋli hʋta, micha tʋli holisso lakna ya̱ i̱ hoyo tok.

³⁶ Chehoiakim ʋt mi̱ko mʋt, afʋmmi pokoli tuklo akucha tahlapi tok; atuk osh afʋmmi auahchʋfa ho̱ Chelusalem a ʋttʋt mi̱ko tok: mihma ishki ʋt Lumah ʋtta Petaiah ushetik osh, hohchifo kʋt Sebutah atok.

³⁷ Micha Chihowa itikba ya̱ nana ik achukmo kak o̱ yʋmohmit, i̱ki ʋhleha hʋt nana a yʋmohmi tok moma kak o̱ yʋmohmi tok.